ئهڤرۆ نيوز:
بەرپرسێ ژوورا پارێزەرێن شێخان راگەھاند کو، ژنەکێ ل نیڤا شەڤێ ئاگر بەردا ژوورا ھەڤژینێ خوە و رەڤی، وی ژی سکالایەک ل بنگەھێ پولیسان ل دژی ھەڤژینا خوە تومار کر کو ئاگر بەردایە مالێ و رەڤیە و کەس نزانیت بەرب کیڤە چوویە، گۆتژی پشتی ڤێ روودانێ ب 10 رۆژان تەرمێ وێ ژنێ ب کوشتی ل چولی ھاتە دیتن، د راپورتا نوژداریا داد دا ھاتیە کو شوونوارێن لێدانێ ل سەر لاشێ وێ ھەبوون.
پارێزەر ئەڤین خودێدا ژ ژوورا پارێزەرێن شێخان بۆ رۆژناما ئەڤرۆ دیارکر کو ژنەکێ ل نیڤا شەڤێ ئاگر بەردا ژوورا ھەڤژینێ خوە و رەڤی و گۆت: ژ خەوێ رابوو ھند دیت پێن وی سوتن، بەرێ خوە دا زارۆیێن خوە د باش بوون د ژوورا دیڤە د نڤستی بوون و دەیکا وان نە ل مالە، وی بزاڤ کرن ئەڤ ئاگرە ڤەمراند و زارۆیێن خوە برنە مالا جیرانان، وان ژی گەھاندە نەخۆشخانێ بۆ چارەسەریێ، وی ژی سکالایەک ل بنگەھێ پولیسان ل دژی ھەڤژینا خوە تومار کر کو ئاگر بەردایە مالێ و رەڤیە و کەس نزانیت بەرب کیڤە چوویە.
پارێزەرێ گۆتژی: پشتی ڤێ روودانا سووتنێ ب 10 رۆژان تەرمێ وێ ژنێ کوشتی ل چولی ھاتە دیتن، د راپورتا نوژداریا داد دا ھاتیە کو شوونوارێن لێدانێ ل سەر لاشێ وێ ھەبوون و ب رێیا (DNA) ل گەل خووشکا وێ دیار بۆ کو ئەو ھەڤژینا زەلامێ سوتیە یێ کو سکالا ل سەر وێ تومار کری کو وێ ئاگر بەردایە مالا وی و رەڤیە، پشتی دیتنا تەرمێ ڤێ ژنێ زەلامێ وێ ھاتیە دەستەسەرکرن و گونەھبارکرن ب کوشتنا وێ.
سەروەر رەزیکی چارەسەرکارێ دەروونی ئاماژە پێ کر کو، ژن گەلەک جاران گەلەک تشتان دکەتە ددلێ خوەدا و ژ دلێ خوە نائینتە دەر، ئەفجا ئەو خەم و کول و عاجزی دبنە ئەگەر رۆژەکێ ئەو برینا دەروونی دەرببیت و مینا ڤێ روودانا سەری ھاتیە بەحسکرن لێ پەیدا بیت و گۆت: دبیت کومەکا ئەگەرا ھەبیت ھەتا ئەڤ ژنە ڤێ کریارێ بکەت، بەلێ ئەگەرێ ژ ھەموویان بەرفرەھتر و سەردەمیانە خیانەتا ھەڤژینیێ یە و دبیتە ئەگەرێ تۆلڤەکرن و بەردانا ئاگری ب ژوورا زەلامێ خوە کو وەسا ھزر کریە وی دلێ وێ سوتیە و ئەو ژی پێدڤیە وی ب سوژیت داکو بشێت تولێن خوە ژێ ڤەکەت.
چارەسەرکارێ دەروونی گۆتژی: ھەکە ئەڤ ژنە تووشی حالەتەکێ دەروونی ژی بیت ناگەھیتە وێ رادێ کو زەلامێ خوە ب سوژیت.
نيشاندان