ھەولێر نيوز:
دەستەیا مافێ مرۆڤی خویا کر، کو دەزگەھێن ئەمنیێن ھەرێما کوردستانێ ئازادن بۆ لێپرسینێ دگەل ئاوارەیان و رێو جھێن ئەمنی، بەلێ نابیت بێ فەرمانا دادوەری چو وەلاتی بھێنە دەستەسەرکرن و بەرۆڤاژی رێکەفتنێن مافێ مرۆڤی لێپرسین دگەل ئاوارەیان بھێتەکرن.
تاڤگە عومەر، رێڤەبەرا گشتیا مافێ مرۆڤی و قانوونی ل دەستەیا مافێ مرۆڤی بۆ رۆژناما ئەڤرۆ گۆت: “ئەڤە چەندین جارە رێکخراوێن بیانی رەخنێ ل ھەرێما کوردستانێ دگرن ل دۆر لێپرسینێ دگەل وەلاتیێن ئاوارە ئەڤێن دھێنە ھەرێما کوردستانێ، مەژی وەکو دەستەیا مافێ مرۆڤی دوڤچوون بۆ ڤێ پرسێ کریە و بۆ پاراستنا ئێمناھیا ھەرێما کوردستانێ دەزگەھێن ئەمنی ئازادن چاوا لێپرسینێ دگەل خەلکێ ئاواران دا بکەن، چونکی پاراستنا ئێمناھیا کوردستانێ ل سەر ھەموو تشتانە و ئەگەر ھەرێما کوردستانێ یا ئارام نەبیت ئاوارە ژی نەشێن بھێنە کوردستانێ و ب ئازادانە بژین.
تاڤگە عومەر گۆتژی”چەند لێپرسین بھێتەکرن ئەڤە دەزگەھێن ئەمنی ئەرکێ خوە بجە دئینن، بەلێ ئەڤ لێپرسین نابیت بەرۆڤاژی رێکەفتنێن مافێ مرۆڤی بیت و تێدا ب ناڤێ لێپرسین و رێو جھێن ئەمنی مافێ مرۆڤی بھێتە پێشێلکرن، ھەروەسان ب چو شێوەیەکی نابیت بێ فەرمانا دادوەری خەلک بھێتە دەستەسەرکرن و لێپرسین دگەلدا بھێتەکرن، ژبەرکو دبیتە پێشێلکرنا مافێن مرۆڤی و دەرچوون ل قانوونێ.

ئەڤرۆ نیوز:
ھێزەکا مەزن یا میلیشیاتێن حەشد شەعبی ل بەغدا ڤە بەرب دەوربەرێ مووسل ھاتینە و دخوازن بھەر بھایەکێ ھەبیت قەزا تلەعفەر ژ تیرۆرستێن داعش پاقژ بکەن، بەرپرسەکێ کورد ل پارێزگەھا نەینەوا ئاشکراکر، دو لیوایێن میلیشیاتێن شیعە ھاتینە دەڤەرێ و ھەکە ھێرشی سەر قەزا تلەعفەر بکەن، دێ کارەساتێن مرۆڤی چێکەن و بیتە شەڕەکێ مەزھەبی، بەرپرسەکێ تورکومان ژی دبێژیت، داخوازێ دکەین ھێزێن پێشمەرگەی ل گەل حەشدا تورکومانی ھێرشی سەر تلەعفەر بکەن، و رێکێ نەدەن حەشدا شەعبی بچیتە تلەعفەر.
غەیاس سورچی، پەیڤدارێ ئێکەتی نیشتیمانی کوردستان ل نەینەوا بۆ رۆژناما ئەڤرۆ گۆت” قەزا تلەعفەر مەزنترین قەزایە لسەرئاستێ عێراقێ و ل ھەرسێ ناحیێن رەبیعە و عیازیە و زومار پێکھاتیە و ھژمارا ئاکنجیێن تەلەعفەر ژ 600 ھزار کەسان پترە و ل پێکھاتێن عەرەب و تورکومان و کوردن، ھەر ل دەستپێکا شەڕێ تیرۆرێ پتریا کریارێن تیرۆرستێن دەڤەرێ ژلایێ تورکومانێن سونە مەزھەبێن تلەعفەر ھاتینە ئەنجامدان و تورکومانێن سونەیێن تلەعفەر پشتی ئەنجامدانا چەندین کریارێن تیرۆرستی زۆربەیا وانا بەرب مووسل ئاوارەبوونە و پشتی ھاتنا تیرۆرستێن داعش ڤەگەڕیانە قەزا تلەعفەر و تورکومانێن شیعە ئاوارەبووینە پارێزگەھێن ژێریا عێراقێ، خوینداری کەفتیە د ناڤبەرا تورکومانێن شیعە و سونە دا ل تلەعفەر و چەندین کریارێن تیرۆرستی ل دژی ئێک ئەنجامداینە، نوکە مەترسی ھەیە تولڤەکرنێ چێبیت، چونکە پتریا چەکدارێن داعش و ئەمیر و بەرپرسێن وان ل دەڤەرێ تورکومانێن تلەعفەرن و رۆلەکێ خراپ دیتیە ل شەڕێ تیرۆرێ و پتریا وان پەیوەندی ب گروپا تیرۆرستیا داعش ڤە کریە.
غەیاسی گۆتژی” راستە ژلایێ سیاسی ڤە دبێژن نابیت حەشدا شەعبی پشکداری شەڕێ مووسڵ بکەت، بەلێ دو لیوایێن میلیشیاتێن حەشدا شەعبی نێزیکی قەزا تلەعفەربووینە و دخوازن باژێڕکێ تلەعفەر کۆنتڕۆلکەن، ھەروەسا ئەف یەکەیێن سوپایێ عێراقێ یێن پشکداری گرتنا مووسل دکەن 95%ێ عەرەبێن شیعەنە و ئەڤێن دمینن کوردن و عەرەبێن سونەنە، مەترسیەکا زۆر ھەیە ئەگەر ئەف دو لیوایێن شیعە بچنە ناڤا تلەعفەر دێ کارەسات چێبن و دەستێ خوە ژ تورکومانێن شیعە ناپارێزن، ئەڤەژی دێ بیتە ئەگەرێ کوشتنا ھژمارەکا زۆرا وەلاتیان، چونکو میلیشیاتێن شیعە پێگیری چو بڕیارێن سەربازی و حوکمەتێ نابن، تنێ فەرمانا وان ددەستێ واندایە و ئەو ب کەیفا خوە دێ کار کەن، راستە پشکەکا زۆرا سوپایێ عێراقێ شیعەیە، بەلێ سوپا ھاتیە رێکخستن و ھەر باشترە ل میلیشیاتێن شیعە، ژلایەکێ دیڤە ئەگەر حەشدا شەعبی بچیتە ناڤا تلەعفەر پێشبینی ھەیە وەلاتێن دەڤەرێ دەستێ خوە بینن ناڤا ئەڤێ پرسێ و ھێشتا ئاریشەیا گرتنا تلەعفەر ئالۆزببیت.
ژلایێ خۆڤەژی عیماد رەفعەت، سەرۆکێ فڕاکسیۆنا تورکومانی ل جڤاتا پارێزگەھا ھەولێرێ بۆ رۆژناما ئەڤرۆ گۆت” راستە تورکومانێن تلەعفەر لسەر ھەردو مەزھەبێن شیعە و سونە بەلافبووینە و تورکومانێن سونە نوکە ل تلەعفەر ماینە، بەری چەند رۆژان پارت و لایەنێن تورکومانی ل ھەرێما کۆمبووینە و تێدا ئەف پرسە ھاتیە گوتوبێژکرن، ژبەرکو حەشدا شەعبی لبەرە ھێرشی سەر قەزا تلەعفەر بکەت و کۆمکوژی دژی تورکومانان بھێتەکرن، ئەم داخوازێ دکەین ھێزێن پێشمەرگەی دگەل حەشدا تورکومانی تنێ پشکداریێ د کۆنتڕۆلکرنا قەزا تلەعفەردا بکەن، چونکە پێشمەرگە ھێزەکا بێلایەنە و دێ وەلاتیێن سڤیل پارێزیت، یا فەرە حوکمەتا عێراقێ و یا ھەرێما کوردستانێ چارەسەریەکێ ڤەبینن بۆ پرسا گرتنا تلەعفەر و وەلاتیێن سڤیل نەبنە ئارمانجا ھێزێن سەربازی، ئەم دترسین شەڕێ مەزھەبی روویدەت و ئەف دوژمنداریا ب ئەگەرێ شەڕێ تیرۆرێ چێبووی ھێشتا مەزن ببیت.