ئەڤرۆ نیوز:
شیرەتکارێ بەرێ یێ جڤاتا ئاسایشا نیشتمانی یا عیراقی دداخویانیەکێ دا بۆ رۆژناما ئەڤرۆ ئەو دەنگوباس رەتکرن کو ئاماژێ ب نەرازیبوونا خەلکێ مووسلێ دکەن ل دۆر پشکداریا حەشد شەعبی د شەڕێ چاڤەڕیکریێ ئازادکرنا باژێرێ مووسلێ دا و دیارکر کو خەلکێ مووسلێ و ھێزێن سیاسی یێن وی باژێری پێشوازیێ ل پشکداریا حەشد شەعبی دکەن و دیارکر ژی پێشمەرگەی دێ رۆلەکێ گرنک د ئازادکرنا مووسلێ ژ دەستێ داعشێ دا ھەبیت.
د. موەفەق روبێعی شیرەتکارێ بەرێ یێ جڤاتا ئاسایشا نیشتمانی یا عیراقی بۆ رۆژناما ئەڤرۆ گۆت” ھێزێن پێشمەرگەی دێ رۆلەکێ سەرەکی د ئازادکرنا مووسلێ دا ھەبیت و مە چو ھەستیاری ژی ل بەرامبەر پێشمەرگەی نینە و پێشمەرگە خودان دیرۆکە و پشکداری د بەرھنگاری و شەرێ رژێما بەعس دا یا کری و تووشی غازێن ژەھراوی و ئەنفالکرنێ بوویە ل سەر دەستێ وێ رژێمێ”.
ل دۆر پشکداریا حەشد شەعبی د شەڕێ ئازادکرنا مووسلێ دا، موەفەق روبێعی دبێژیت” بەرۆڤاژی وان دەنگوباسێن دھێنە بەلاڤکرن ل دۆر نەرازیبوونا خەلکێ مووسلێ ژ پشکداریا حەشد شەعبی د ئازادکرنا باژێرێ وان دا، خەلکێ مووسلێ و ھێزێن سیاسی یێن وی باژێری پێشوازیەکا مەزن ل پرسا پشکداریا حەشد شەعبی د شەرێ ئازادکرنا مووسلێ دا دکەن”.
روبێعی ئاماژە دا” ئەم دخوازین پرۆسا ئازادکرنا باژێرێ مووسلێ وەکو پرۆسا ئازادکرنا باژێرێ تکریتێ ب رێڤە بچیت، نەکو وەکو پرۆسا ئازادکرنا باژێرێ رومادی”.
مە ژ روبێعی پرسی، باشە ما د وان ھەردو پرۆسان دا حەشد شەعبی پشکدار نەبوویە و بەحس دھاتە کرن کو تاوان دژی وەلاتیێن سڤیل ل ھەردو باژێران یێن ئەنجامداین، د بەرسڤێ دا گۆت” نەخێر وەسا نینە وەکو تو دبێژی، حەشد شەعبی پشکداری د ئازادکرنا باژێرێ تکریتێ دا کر و 80% ژ ئاڤاھیێن وی باژێری ددروست بوون و زیان نەگەھشتنێ، بەلێ د پرۆسا ئازادکرنا باژێرێ رومادی دا لەشەکرێ ئەمریکی 80% ژ وی باژێری تێکدا و خرابکر و حەشد شەعبی پشکداری د ئازادکرنا رومادی دا نەکربوو”.
سەبارەت نە پشکداریا ھێزێن حەشد وەتەنی ب سەرکردایەتیا ئەسیل نوجێفی پارێزگەرێ بەرێ یێ نەینەوا، د شەڕێن ئازادکرنا باشوورێ مووسلێ و گەیارە دا، روبێعی گۆت” ھێزا چەکدار یا سەر ب ئەسیل نوجێفی ڤە چو رۆل د پرۆسا ئازادکرنا مووسلێ دا نابیت، ھەکە وەکو تاک بھێن پشکداریێ بکەن دێ پێشوازیێ لێ کەین، بەلێ ئەم قەبوول ناکەین وەکو گرۆپ و ھێز پشکداریێ د پرۆسا ئازادکرنا مووسلێ دا بکەن وحوکمەتا عیراقێ دانپێدانێ ب ھێزا حەشد وەتەنی ناکەت”.
ل دۆر ھاتنا وەزیرێ بەرگریا ئەمریکا بۆ بەغدا وراستیا وێ چەندی کو پەیمانەکا لەشکری دناڤبەرا عیراقێ و ئەمریکا دا ھاتیە ئیمزاکرن بۆ پێشکێشکرنا ھاریکاریێن لەشکری بۆ عیراقێ و ئایا دێ سەرەدانا ھەرێما کوردستانێ ژی کەت، گۆت” ئەز نوکە یێ ل دەرڤەی عیراقێ و ئەڤە دو رۆژە من پەیوەندی ب حەیدەر عەبادی سەرۆک وەزیران نەکریە و من پێزانین ل سەر وی بابەتی نینن، لێ یا ئەز دزانم نوکە ئاشتۆن کارتەر وەزیرێ بەرگریا ئەمریکی یێ ل بەغدا و بۆ بابەتەکێ دیارکری یێ ل بەغدا و ب دیتنا من ئەمریکا نوکە پشتەڤانیێ ل ئێکگرتنا عیراقێ دکەت”.

ئەڤرۆ نیوز:
لدۆر چوونا پەرلەمانتارێن کورد ئەڤرۆ رۆژا سێشەمبی بۆ بەغدا پشتی بۆ دەمەکێ درێژ و ھەروەسا ھەڤگرتنا ھەردو فراکسیۆنێن گۆران و ئێکەتیێ ل پەرلەمانێ عێراقێ ئەندامەکێ پەرلەمانێ عێراقێ ل سەر فراکسیۆنا پارتی بۆ رۆژناما ئەڤرۆ دبێژیت:ھەڤگرتنا ھەردو فراکسیۆنێن ئێکەتی و گۆرانێ ل پەرلەمانێ عێراقێ ب مەبەستا ھندێ بوویە کو وان دڤێت خوە نێزیکی حوکمەتا عێراقێ بکەن و ھندەک خزمەتان بۆ دەڤەرا سلێمانیێ ب دەست خوەڤە بینن،لێ مەبەستا وان یا سەرەکی ئەوە کو ب خرابی بەحسێ حوکمەتا ھەرێمێ بکەن و وەسا خوە نیشان ددەن کو ئەو یێ تەمسیلا حوکمەتا ھەرێما کوردستانێ دکەن ل بەغدا،ھەر چەندە مە حوکمەتا خوە و پەرلەمان یێن ھەین،لێ ئێکەتی و گۆرانێ بێی کو بزڤرن بۆ حوکمەتا ھەرێمێ سەرەدانا بەغدا کریە و دگەل دۆژمنێ کوردان نوری مالکی کۆمبووینە،لەورا مەرەما وان ئەوە کو حوکمەتا ھەرێمێ لاواز بۆ بەغدا نیشان بدەن،حاکم سەرحان سلێڤانەیی ئەو پەرلەمانتارێ عێراقێ یە زێدەتر دبێژیت:ھەڤگرتنا ئێکەتی و گۆرانێ نابیتە ئەگەرێ لاوازبوون و دوبەرەکیێ دناڤبەرا فراکسیۆنێن کوردی دا ل بەغدا،لێ ھەولدانێن وان بۆ ھندێ نە کو رۆلێ حوکمەتا ھەرێمێ کێم بکەن و وان دڤێت خوە نێزیکی بەغدا بکەن،بۆ ب دەست ڤەئینانا ھندەک پێدڤیێن خوە،لێ ئەم وەک فراکسیۆنا پارتی ناھێلین چ پرۆژە بێی مە ل پەرلەمانێ عێراقێ دەرباز ببن،ھەکە نە بۆ بەرژەوەندا مللەتێ کورد ھەمیێ بن.
ناڤھاتی دەربارەی ھەلویستێ پارتی بەرامبەر ئێکەتی و گۆرانێ دیارکر:ژ ئەگەرێ نە چوونا مە بۆ ماوێ 70 رۆژان بۆ بەغدا،ھەتاکو نوکە ئەم نزانین کانێ داخوازیێن ئێکەتی و گۆرانێ ژ حوکمەتا عێراقێ چ بووینە و کانێ وان چ ب دەست خوەڤە ئینایە؟،لێ رۆژا سێشەمبی دەمێ ئەم دچینە بەغدا دێ زانین کانێ داخواز و پلانێن وان چنە.
سەبارەت چوونا پەرلەمانتارێن کوردستانی بۆ بەغدا حاکم سەرحانی گۆت:مە وەک کورد چ ھیڤی ب بەغدا نەماینە،لێ ئەم نابینە ھوکارێن ھندێ کو حوکمەتا عێراقێ بھێتە ھەلوەشاندن،ھەروەسا ئەم دێ بۆ دەولەتێن جیھانی ژی دیارکەین کو ئەم کورد نابینە ئەگەرێن شکەستنا حوکمەت و پەرلەمانێ عێراقێ،لەورا ئەم وەک پەرلەمانتارێن کورد دێ چینە بەغدا و تارادەیەکێ ئەم دێ بەشداری کۆمبوونێن پەرلەمانی ژی بین،ھەتاکو حوکمەتا ھەرێما کوردستانێ بریارا دوماھیێ ددەت ئەم ب ئێکجاری ڤەگەرین بەغدا یان ژی بزڤرینە ھەرێمێ.
سەبارەت نەچوونا کوردان بۆ بەغدا ئەندامێ پەرلەمانێ عێراقێ دبێژیت:دامەزراندنا حوکمەتا عێراقا فیدرال ل سەر بنەمایێ ھەڤپشکیێ بوویە،ھەروەسا ل سەر بنەمایێ دابەشکرنا پۆستان بوویە ل بەغدا،نەکو ل سەر بنەمایێ پتریێ ھاتیە دامەزراندن،لەورا پێدڤیە بریارێن حوکمەتێ و پەرلەمانێ عێراقێ ل سەر بنەمایێ ل ھەڤکرنێ و دەنگدانێ بھێنەدان،لەورا نوکە ھەکە ئەم ڤەگەرینە بەغدا بۆ مە باشترە،چونکی گەلەک یاسا و پرۆژە ل بەر دەستێ پەرلەمانینە و ل دژی ھەرێما کوردستانێنە،لێ مە نە ھێلاینە ئەو پرۆژە یاسا دەرباز ببن،کو زیان پێ بگەھیتە ھەرێما کوردستانێ.