ئەڤرۆ،ھەژار مەعروف:
نوونەرێن باکورێ کوردستانێ دخولێن تورکیا یێن پلا دو سێ دا ژ سەرجەمێ حەفت یانا و حەفت یاریا بتنێ دو یانا شیان سەرکەفتنێ توماربکەن ئەوژی دیاربەکر سپور و باتمان پترول دخولا پلا سێ دا و سێ وەکھەڤی ل گەل دو خوسارەتیا تومارکرن .
دخولا پلا دو دا یانا ئامەد ژ دەرڤەی یاریگەھا خوە خوسارەت بوو ل گەل یانا کوجەعەلی بیرلیک سپور ب گولەکێ بێ بەرامبەر و سەرارای ڤێ خوسارەتیێ نوونەرا باکورێ کوردستانێ ئامەد سەرێ لیستەیا خولا پلا دو پاراست ب ٢٧ خالان و د یاریێن خولا پلا سێ یا تورکیا دا د یاریێن کوما سێ دا یانا دیاربەکر سپور شیا سەرکەفتنا سێ ل دیڤ ئێک توماربکەت و یا حەفتێ ل وەرزێ ئەڤ سالە ژ سەرجەمێ ١٣ یاریان پشتی ب سەرکەفتی ل سەر یانا دەرنجە گەنجلەربیلی سپور ب سێ گولان بێ بەرامبەر و خالێن خوە گەھاندنە ٢٤ خالان پێشڤە ھاتە رێزا سیێ و د ھەمان کوم دا بینگول ل یاریگەھا خوە وەکھەڤ بوو ب گولەکێ خالێن بینگول گەھشتە ١٣ خالان ل رێزا ١٣ دھێت.
د یاریێن کوما ئێکێ دا خولا پلا سێ یانا ھەردو نوونەرێن کوردستانێ وەکھەڤ بوون د یاریێن خوە یێن ڤێ حەفتیێ یانا ڤان سپور مفا ژ ئەرد و جەماوەرێ خوە نەدیت پشتی وەکھەڤبووی ل گەل یانا گولچوک سپور ب گولەکێب ھەمان ئەنجام جزیرە سپور ژێ ل یاریگەھا خوە ل گەل ئەنقرە دەمیر وەکھەڤ بوو، د یاریێن کوما دوێ دا باتمان پترول ب سەرکەفت ل سەر جەتەلجە ب گولەکێ بێ بەرامبەر و دێرسم سپور بەردەوامی دا ئەنجامێن لاواز ل وەرزێ ئەڤ سالە توشی خوسارەتیا خوسارەتیا ھەشتێ بوو ژ سەرجەمێ ١٣ یاریان ئەڤ جارە ل گەل مانیسا ب گولەکێ بێ بەرامبەر .
ئەڤرۆ، زنار زوبێر:
سەرەرای ئەوان مەزاختنێن زور و ئینانا یاریزانێن خودان شیان بۆ تیما خوە ھەتا نوکە پشتی بورینا سێ یاریان یانا زێرەڤانی د خولا پێشمەرگەی کوردستانێ دا نەشیایە سەرکەفتنێ دەستخوە ڤە بنت و شروڤەکار ھوسا خویا دکەن ئاستێ تیمێ لاوازە و نەشێت نانساڤی دەستخوە ڤە بینت و ئەنجام ب پارەی ناھێن، بەرامبەر راھێنەرێ تمیێ خوە بەرپرسیار دبینت ھەمبەر ڤان ئەنجامان.
نە یاریزان و نە راھێنەرێن پارێزگەھێ مفای ژ وەرزشا ڤێ یانێ نابینن
ل دۆر ئەنجامان سەلاح مستەفا شروڤەکارێ وەرزشی بۆ رۆژناما ئەڤرۆ گۆت: ھێشتا دەم مایە بریارەکێ ل سەر راھێنەر سەمیر بابوی و ئەنجامێن وی یێن لاواز بدەین لێ جھێ پرسیارێ یە ئەڤ کوژمێن مەزن یێن یانا زێرەڤانی سەخمەراتی ناسناڤێ خولا ھەرێمێ کو چو مفا د پشکداریا وێ دا و چو خەلات بۆ تیما سەرکەفتی نینن دیسان کەس نزانت ل سەر چ بنیات کارگێریا یانێ ئەڤ کوژمێن مەزن بۆ یاریزان و راھێنەران مەزاختین بێ لێپرسین د ڤێ قەیرانێ دا و مەرەم ژ ڤێ چەندێ چیە ژبەرکو نە یاریزانێن پارێزگەھێ یێن گەنج و نە راھێنەر مفای ژ وەرزشا ڤێ یانێ نابینن تنێ بازرگانیەکە ب ڤێ یانێ دھێتە کرن و ئەو یاریزان ئینان ژی ل ئاستێ پێدڤی نینن پیشەکارێن وێ ژێ نە ل ئاستێ پێدڤی نە تایبەت یێ ھولەندی کو دووماھی یانێن یاری لێ کرین دخولێن ئورۆپی دا ل خولێن نورمال کرینە و ئاستێ وی پاشڤەزفریە گەلەک ل دو سالێن بوری
ناڤبری ئەو چەندە ژی دیارکر شێوازێ یاریا یێ دیار نینە دیسان ھەتا نوکە تیم بشێوەکێ دروست نەشێت تەپێ ڤەگوھێزت ناڤبەرا ھێلنێن خوە دا سەرەرای کو بۆ ماوێ زێدەتر ژ سێ ھەیڤان بەرھەڤی کرینە و کەمپەکێ راھێنانێ ژی ل وەلاتێ تورکیا دانایە و ھوسا دبینم یانا زێرەڤانی ل ڤی وەرزی نەشێت ناسناڤێ خولا ھەرێما کوردستانێ دەستڤە بینت.
وەحید رەشید: ھەر راھێنەرەکێ نافخوی ئەڤ شیانێن پارەی ل بەر دەستی بن یێن یانا زێرەڤانی دێ ئەنجامێن باشتر ب دەستخوڤە ئینت
ژلایێ خوە ڤە وەحید رەشید راھێنەر و شروڤەکارێ یاریا تەپا پێ بۆ رۆژناما ئەڤرۆ گۆت: تنێ پارە ناسناڤان بۆ یانێ دەستڤە نا ئینت بلا کارگێریا یانا زێرەڤانی دوبارە ھزرا خوە د دروستکرنا تیمێ دا بکەت و پشتەبستنێ ل سەر ئەوان یاریزانێن خوە یێن گەنج بکەت یێن تیمێ دا ھەین و دەلیڤە وەرنەگرتی کو سەمیر بابو ب خوە ژی گوتبۆ دێ پشتەبەستنێ ل سەر یاریزانێن گەنج کەم و یاریزانێن ب تەمەن ھاتنە دورخستن لێ مخابن ل شونا وان ھەمان یاریزانێن ب تەمەن ژ یانێن دی ئینان دیسان ئەگەر ب کوژمێن پارەی بیت گەلەک راھێنەر ل سەر ئاستێ پارێزگەھێ ھەنە دێ شێن ڤان شیانێن دارایی یێن مەزن و ڤان مەزاختنا د ڤێ قەیرانێ دا دێ تیمێ باشترین شێوە ب رێڤەبەن جھێ داخێ یە چەندین یاریزان بەری نوکە ل ڤێ یانێ کار کربیت نوکە دەلیڤە بۆ نەھێتە دان کار بکەت کو ئەڤە مەزنترین خەلەتیە کارگێریا یانا زێرەڤانی کری.
ناڤبری ل دۆر شێوازێ یاریا راھێنەر سەمیر بابوی ژی گۆت: شێوازێ یاریا وی ھەتا نوکە یێ دیارنینە و خاندنا وی بۆ یاریێ ھەتا نوکە نە یێ دروستە و چەندین خەلەتی د پێکھاتێ تیما وی دا پەیدابوینە دیسان یاریزان دروست ل جھێ وان بکارنائینت دیسان نیڤا یاریگەھێ ژی تەپە نە یا جێگیرە بەردەوام دھێـتە برین ئەو گۆلێن ھەتا نوکە ژی سەر تیمێ ھاتین باشترین گروڤە سەر ڤێ چەندێ.
سەمیر بابوی نەشێت چو ناسناڤ و ئەنجامێن باش بۆ زێرەڤانی دەستڤە بینت
ژلایێ خوە ڤە وەرزشڤانێ دێرین نعمەت مەحمود بۆ رۆژناما ئەڤرۆ گۆت: مادەم یانا زێرەڤانی راھێنەرێ خوە گوھارت پێدڤی بوو راھێنەرەکێ خودان شیان بۆ تیما خوە ئینابا و راھێنەرەکێ گەنج وەکی سەمیر بابوی نەشێت چو ناسناڤ و ئەنجامێن باش بۆ زێرەڤانی دەستڤە بینت ژبەرکو شارەزایا وی یا کارێ راھێنەراتیێ یا کێمە و یانەکا وەک زێرەڤانی بەری نوکە بکێمترین مەزاختی ژ وەرزێ ئەڤ سالە شیا سێ سالان ناسناڤێ خولا ھەرێمێ ببەت کو نوکە یانە ھزرەکا مەزن بۆ زێرەڤانی دکەن لێ بلا بۆ کارگێریا یانا زێرەڤانی یا رەوا بیت ئەو ل ڤی وەرزی ناسناڤێ خولا ھەرێمێ دەستڤە نا ئینن ھەمی تشت ب پارەی ناھێتە کرن و سەمیر بابو نەشێت ب ڤان یاریزانان ئەنجامێن باش ڤی وەرزی دەستڤە بینت ژبەرکو تنێ ھندەک یاریزان ژ یانێن دھۆک و ھەولێر ئیناینە کو چەندین سالە ئاستێ وان وەک خویە و ئەو شیان دەف ڤی راھێنەری نینن بشێت ئاستێ وان ب گوھۆریت و ھەمی د زانن ئەنجام ب ڤان یاریزانان نائێن.
راھێنەرێ زێرەڤانیێ: ئەنجام نەدباشن و ئەز بەرپرسم ژێ
بەرامبەر ڤان گۆتنان سەمیر بابو راھێنەرێ یانا زێرەڤانی بۆ رۆژناما ئەڤرۆ گۆت: ھەمی بوچون دروستن و راستە ئاست و ئەنجامێن یانا زێرەڤانی لدیف داخوازیا من نینن و ئەز بەپرسیارم ژ ڤان ئەنجامان لێ من دڤێت دیاربکەم ٨٠% تیم ھاتیە گوھۆرین و ھێشتا نێزیکبون د ناڤ بەرا یاریزانا دا دروست نەبویە ژبەرکو بەری نوکە ڤێ یانێ چو بنیات نەبوو یە دیسان چەندین یاریزانێن گەنج د تیمێ دا بون لێ ئاستێ وان یێ باش نینە ئەو نەشێت پشتبەستنێ بەردەوام لسەر شیانێن وان بکەت لێ بۆ یاریێن بھێت دێ گوھۆرین د تیمێ دا پەیدابن ژلایێ ھونەری و تەکتیکی ڤە و ئەنجام دێ باشتربن و بەری نوکە دا وان کار لسەر خەلەتیێن خوە کریە کو چارەسەر بکەن.
ناڤبری ئەو چەندە ژی دیارکر کو وی بەری دەسپێکرنا خولێ کارگێریا یانێ ئاگەھدارکربوو کو ئەڤ یاریگەھە لدیف شێوازێ یاری وی نا گونجیت لێ ئەڤە نە رامانا وێ چەندێ یە ئەو ژبەر پرسیارەتیا ڤێ کاری د رەڤیت.
دەربارەی یاریزانێن نوکە یێن تمیێ ناڤبری دیارکر کو ئەو نەچاربوو ڤان یاریزانا بینت و ئەو یاریزانێن وی دڤیان نەشیا دەستڤە بینت لەورا نوکە گڤاشتنێن مەزن لسەر کارگێریا یانێ و یاریزانا پەیدابویە ژبەر وێ قەبارا مەزن دایە ڤێ تیمێ کو ئەو تیم نینە ڤی رولێ زێدە و فشارێ لسەر بھێتە پەیداکرن ژلایێ راگەھاندن و جادا وەرزشی ڤە.
ل دوماھیێ بابوی گۆت: ئارمانجا وی ئەوە نوکە تیم ب گەھیتە قوناغا چارگوشا زێرین و ل وی دەمی دێ من بوچونەکا دی ھەبیت دەربارەی دەستڤە ئینانا ناسناڤێ خولا ھەرێمێ.
ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 21ى چريا دويێ 2016ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1306 |
| 1 يۆرۆيێ ئه‌ورۆپى | 1400 |
| 1 ليرێ توركى | 390 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئه‌ڤرۆ نيوز:
حه‌شه‌د شه‌عبى ناڤێ فرۆكخانا له‌شكرى يا تله‌عفه‌ر گوهۆڕى و ل چه‌ندين ده‌ڤه‌ران ژى پێشڤه‌چوون كريه.
ئه‌حمه‌د ئه‌سه‌دى ئاخفتنكه‌رێ ب ناڤێ حه‌شه‌د شه‌عبى د به‌ياننامه‌كێ دا راگه‌هاند: “كه‌تيبا بابيلۆن (چه‌كدارێن مه‌سيحى) و هێزێن ده‌شتا نه‌ينه‌وا (شه‌به‌ك) ب هه‌ماهه‌نگى ل گه‌ل سۆپايێ عيراقێ د پێشڤه‌چوونێن ده‌ڤه‌را ده‌شتا نه‌ينه‌وا (عه‌لى ره‌ش و عومه‌ركان) رزگاركر”.
گۆتژى: “پێشڤه‌چوونێن كه‌تيبا بابيلۆن يا ناڤ حه‌شه‌د شه‌عبى ل ده‌ڤه‌را (الخضر) يا به‌رده‌وامه و كه‌نيسا دێرمار بهناميان رزگاركر و خاچا سور ل سه‌ر كه‌نيسێ بلندكريه كو مه‌زنترين كه‌نيسا ده‌ڤه‌رێ يه”.
هه‌ر ديسا به‌حس ل شيانێن ناڤ حه‌شه‌د شه‌عبى ژى كريه بۆ كونترۆلكرنا مه‌زارگه‌هێ “زين العابدين”.
ژ لايه‌كێ دى ڤه حه‌شه‌د شه‌عبى وێنێ ده‌زگه‌هێ لێدانا تونێل و ترۆمبێلێن مينرێژكرى ل فرۆكخانا له‌شكرى يا تله‌عفه‌ر بلاڤكرينه و ناڤێ وێ ژى بۆ “فرۆكخانا شه‌هيد جاسم شه‌به‌ر” گوهۆڕيه.
حه‌شه‌د شه‌عبى حه‌فتيا بۆرى فرۆكخانا تله‌عفه‌ر كونترۆل كريه و ژ ئه‌گه‌رێ وێ چه‌ندێ پێنگاڤێن گرنگ به‌ر ب كونترۆلكرنا سه‌نته‌رێ قه‌زايێ و ماوێ دو سالايه ل بن ده‌ستێ داعش دايه.
ئه‌ڤرۆ نیڤرۆ 21/11/2016 فه‌رهاد ئه‌مین پارێزگه‌رێ دهۆكێ پێشوازیا شانده‌كێ كه‌نه‌دی ب سه‌روكاتیا (پول گارو) كار ب رێڤه‌به‌رێ قونسلخانا كه‌نه‌دا ل هه‌رێما كوردستانێ كر.
د هه‌ڤدیتنه‌كێ دا ل ده‌سپێكێ پارێزگه‌رێ دهۆكێ كورتیه‌ك دا سه‌ر ره‌وش و سه‌روبه‌رێ ئاواره و په‌نابه‌ران ل سنورێ پارێزگه‌ها دهۆكێ و ئه‌و هاریكاری و خزمه‌تێن ژ لایێ كارگێریا پارێزگه‌هێ ب هه‌ڤكاریا رێكخراوێن UN و جڤاكێ نێڤده‌وله‌تی بۆ دهێنه پێشكێشكرن و داكوكی ل سه‌ر پتر خورتكرنا رولێ جڤاكێ نێڤده‌وله‌تی و به‌رپرساتیا حكومه‌تا ئێراقێ بۆ ئاڤه‌دانكرنا وان ده‌ڤه‌رێن هاتینه رزگار كرن ژ تیرورستێن داعش و تایبه‌ت شنگالێ و ده‌ڤه‌رێن وێ و گه‌هاندنا خزمه‌تێن پێدڤی بێخه‌مه‌ت ڤه‌گه‌ریانا خه‌لكێ وان ده‌ڤه‌را و پێدڤی و كێم و كاسیێن كه‌مپێن سنورێ پارێزگه‌هێ تایبه‌ت پێدڤیێن زڤستانێ و ده‌رمان و ئاڤ و كاره‌بێ دا بو شاندێ میهڤان به‌رچاف كرن.
د لایه‌كێ دی يێ هه‌ڤدیتنێ دا سۆپاسیا ده‌وله‌تا كه‌نه‌دا كر بۆ وان هاریكاریێن مرۆڤا‌تی و له‌شكری یێن پێشكێشی كوردستانێ و پێشمه‌رگه‌ی كرین و دا كو ل سه‌ر خورتكرنا په‌یوه‌ندیێن ئابووری و بازرگانی و كارێ بزنس مانیێ د ناڤبه‌را كه‌نه‌دا و كوردستانێ و بجهئینانا پرۆژێن وه‌به‌رئینانێ ب تایبه‌ت د بیاڤێ گوزاری و چاندنێ دا كر.
ژ لایێ خوه ڤه شاندێ ناڤبری به‌رهه‌ڤیا وه‌لاتێ خو دیاركر كو به‌رده‌وام هاریكاریا حوكمه‌تا هه‌رێما كوردستانێ د بیاڤێن مرۆڤا‌تی و له‌شكری دا بكه‌ت و دیار كر كو ئه‌و دێ هه‌موو بزاڤا كه‌ن په‌یوه‌ندیان خورت و به‌رفره‌هتر لێ بكه‌ن.
ئه‌ڤرۆ نيوز:
دەرھێنەرێ گەنج کاروان مێسکی، بۆ ئەڤرۆ دیارکر، ئەڤە دەمەکە ئەو مژوولی کلیپەکێ یە بۆ سترانبێژ سەمیرعەبدوللا و نوکە دقۆناغا مۆنتاژی دایە، ل بەرە ل دەمەکێ نێزک بھێتە بەلاڤکرن.، و ناڤەروکا ڤێ کلیپی ل دۆر غەریبیێ یە، کو کەسەک ژمالا خوە، و دایکا خوە، و جەگەرا خوە، و وەلاتێ خوە غەریب دبیت و دبێژیت کوردستانە وەلاتێ من.
کلیپا دایێ، ژ پەیڤ و ئاوازێن سەمیری بخوە نە، ژدەرھێنانا کاروان مێسکی و و کامیرە ھیًرش بەرواری و رێڤەبەرێ وێنە گرتنێ جڤین مەھدی یە.
ئه‌ڤرۆ نيوز:
سترانبێژ دەلال زاخۆیی، کو ئەڤە دەمەکە ل وەلاتێ ئەلمانیا دژیت، ددیدارەکێ دا بۆ رۆژناما ئەڤرۆ گۆت: کەسێ نەڤێت ژ وەلاتێ خوە دوور بکەڤیت، لێ ھەکە نەچار بوو دێ قەستا جھەکێ دی کەت، و ھەکە من ژۆرەکا ئاخێ ژی ل زاخۆ ھەبا ئەز نەدچوومە ئورۆپا.
ھێشتا گۆت: ھەرچەندە ئەز فەرمانبەربووم ل رێڤەبەریا رەوشەنبیری و ھونەری ل زاخۆ، لێ ژ بەر قەیرانا دارایی و گیرۆبونا مووچەی ئەز نەدشیام دەبارا ژیانا خوە بکەم، لەورا من قەستا دەرڤەی وەلاتی کر، و ئورۆپا ل دەف من گەلەکا نەخۆشە، چونکی نە سەقایێ وێ، نە مرۆڤێن وێ، نابنە یێن کوردستانێ، و دەردێ غەریبێ گەلەکێ نەخۆشە، و رۆژانە 10 جاران مرۆڤ د مریت.
ھێشتا دبێژیت: ھەکە کەسەک ھونەرمەند و رەوشەنبیر بیت و بھێتە غەریبیا و بکەڤیتە دناڤ کەمپان دا، دێ گەلەک ژیانەکا دژوار و پری ئێش و ئازار و قەھر بۆرینیت، من ئەڤە ھەموو دیتینە، و نوکە حەز دکەم ڤەگەرمە کوردستانێ، و رۆژانە 10 جاران پتر ئەز دکەمە گری بۆ وارێ خوە، لێ ئەز نەشێم ڤەگەرم، چونکو ل کوردستانێ من خانی نینە.
د دووڤدا گۆت: ھزرا من ھەموو ل سەر پێشمەرگەیە و ھیڤیا من ھەر ئەوە بەردەوام دسەرکەفتی بن، ھەروەسا وەکی ھەر کوردەکێ دلسۆز خەونا من ئەوە کورد ببنە دەولەت.
ل دووماھیێ گۆت: ل سالا 2015 من ئەلبۆما خوە یا ب دوماھی ئینای، کو ژ ھەشت تراکان پێک دھێت، و نوکە یا حازرە، لێ ژ بەر قەیرانا دارایی، ھەروەسا وەک رێزگرتن بۆ گیانێ شەھیدان و پێشمەرگێن کوردستانێ ئەز نوکە نەشێم بەلاڤ کەم، ،ھەروەسا نە بوونا سپۆنسەری ژی ھۆکارەکە. و بۆ زانین دۆرێن 22 ھزار دۆلاران من یێن ل بەرھەمێ خوە مەزاختین، وھەردەمێ رەوشا کوردستانێ باش بوو، دێ ئەلبۆما خوە بەلاڤ کەم.
ئەڤرۆ نیوز:
ھژمارەک زێدە ژ پەرلەمانتارێن ئەلمانیا د روونشتنا پەرلەمانێ فیدرال یێ ئەلمانیا دا داخواز ژ حوکمەتێ و ھەڤپەیمانیا ناتۆ کرن کو چەکان نەفرۆشنە تورکیا ژ بەر کو ئەگەرێ وێ یەکێ ھەیە تورکیا وان چەکان ل دژی کوردان بکار بینیت.
ھژمارەک زێدە ژ پەرلەمانتارێن ئەلمانیا د روونشتنا پەرلەمانێ فیدرال دا ل سەر رەوشا نھا یا تورکیا راوەستیان و راگەھاندن کو ب سەرکێشیا سەرۆک کۆمار رەجەب تەیب ئەردۆگانی تورکیا بەر ب سیستەمێ دکاتۆری ڤە دچیت و زۆرداری و فشار ل سەر ھەموو ئالیێن ئۆپۆزسیۆنێ و دەنگ و رەنگێن جودا دھێتە کرن و دڤێت ئورۆپا رێگریێ ل زۆرداریێن تورکیا بگریت و تورکیا رۆژ ب رۆژێ دکەڤیتە د ناڤ ئالۆزیێن بەرفرەە دا.
د ڤێ مژارێ دا یورگەن تریتتین ئەندامێ پەرلەمانێ فیدرال یێ ئەلمانیا یێ سەر ب پارتا کەسک راگەھاند کو دڤێت حوکمەتا ئەلمانیا، ئورۆپا و ھەڤپەیمانیا ئەتلانتیک ناتۆ، ب باشی رەوشا تورکیا ب شۆپینن و ل دژی زۆرداری، بنپێ کرنا مافێن مرۆڤان و گرتنا سیاسەتمەدارێن کورد و ئۆپۆزسیۆنێ ھەلویست وەربگرن و گۆت: (ل دووڤ یەک ژ بنەمایێن سەرەکی یێ ناتۆ نابیت چەک بۆ ھەرێمێن کو شەر تێدا ھەنە، بھێتە فرۆشتن و د رەوشا نھا دا تورکیا و دەوروبەرێن وێ د ناڤا رەوشا شەری دانە و بۆ ڤێ یەکێ ژی نابیت ئورۆپا و ناتۆ چەکان بدەنە تورکیا).
ئەندامێ پەرلەمانێ ئەلمانیا ھەروەسا راگەھاند ژی کو مەترسیا وێ یەکێ ھەیە دەستھەلاتدارێن تورکیا چەکێن کو ژ وەلاتێن ئورۆپا، ئەمریکا و ناتۆیێ وەردگرن ل دژی کوردان بکار بینن و گۆت: (دڤێت ھەم ئورۆپا و ئەمریکا و ھەم ژی ناتۆ بنەمایێ سەرەکی یێ دیمۆکراسیێ و مافێن مرۆڤی ب پارێزن کو ئەو ژی رەدکرنا زۆرداری و دکاتۆریەتێیە و تورکیا بەر ب رەوشەکا دژوار ڤە دچیت و د ڤێ رەوشێ دا مەترسیا ڤێ یەکێ ھەیە تورکیا چەکێن ناتۆ و یێن کو ژ ئورۆپا و ئەمریکا وەردگریت ل دژی کوردان بکار بینیت و بۆ ڤێ چەندێ داخواز ژ ئورۆپا، ئەمریکا و ناتۆیێ دکەین ئێدی چەکی نەدەنە تورکیا و ل دژی ھەموو رەنگێن زۆرداریان ھەلویست وەربگرن).
نيشاندان
