ئەڤرۆ نيوز:
ئەندامەکێ پەرلەمانێ کوردستانێ ژ فراکسیۆنا پارتی دیار کر کو بھایێ پەترۆلێ یێ بلند بووی، لەو ئەو چاڤەرێ دکەن حوکمەتا ھەرێما کوردستانێ گوھۆرینان د خشتێ ھەلگرتنا مووچێ فەرمانبەران دا بکەت و گۆت: “ئەم وەکو پەرلەمان پێداگریێ ل سەر کێمکرنا ھەلگرتنا مووچێ فەرمانبەران دکەین”.
فەرسەت سۆفی، ئەندامی لژنا دەستپاکیێ ل پەرلەمانێ کوردستانێ ئاشکرا کر، بەرپرسێن بلند یێن حوکمەتا ھەرێما کوردستانێ ل سەر وێ چەندێ د رژد بوون کو خشتێ ھەلگرتنا مووچەی یێ دەمی یە و گۆتبوو ھەکەر بھایێ پەترۆلێ بلند بوو، وی دەمی دێ گوھۆرین د خشتێ ھەلگرتنا مووچێ فەرمانبەران دا ھێتە کرن و بۆ باسنیوز گۆت: “ئەم ل پەرلەمانی چاڤەرێی وێ چەندێ دکەین، کو سەرۆکاتیا جڤاتا وەزیرێن ھەرێما کوردستانێ ژ ئەگەرێ بلندبوونا بھایێ پەترۆلێ گوھۆرینان د خشتێ ھەلگرتنا مووچێ فەرمانبەران دا بکەت”.
ناڤبری خویا ژی کر، ھەکەر خشتێ بەلاڤکرنا مووچێ فەرمانبەران ھەر ب ڤی رەنگێ نوکە بمینیت و دەستکاری تێدا نەھێتە کرن و گۆت: “مە وەکو ئەندامێن پەرلەمانی دێ ھەلویست ھەبیت و ل گەل بەرپرسێن حوکمەتا ھەرێما کوردستانێ دێ پێداگریێ ل سەر ھندێ کەین کو ھەلگرتنا مووچێ فەرمانبەران بھێتە کێمکرن”.
وەکو دیار بەری نوکە بەرپرسێن حوکمەتا ھەرێما کوردستانێ ڕاگەھاندبوو، ژ ئەگەرێ قەیرانا دارایی و مەزاختنێن ھەرێما کوردستانێ یێن شەرێ دژی تیرۆرستێن داعش و وێ ھژمارا زۆرا ئاوارە و پەنابەران کەفتینە سەر ھەرێمێ، وان بریار دابوو، پشکەکێ ژ مووچێ فەرمانبەران ھەلبگریت و ھەر دەمێ داھاتێ ھەرێمێ زێدە بوو، دێ ھەلگرتنا مووچەی ھێتە کێمکرن.