ئەڤرۆ نیوز:
ئێکەتیا تەپا پێ یا ناڤەندی ل عیراقێ راگەھاند کو وان چو نیاز نینن ژبو دەست بەردان و گوھارتنا راھێنەرێ ھەلبژارتیێ عیراقێ یێ ئێکێ سەرەرای ب زەحمەت کەفتنا دەلیڤا دەربازبونێ بو یاریێن دووماھا موندیالا ٢٠١٨ ل روسیا.
ئەف چەندە ھاتە پێش پشتی خوسارەتیا ھەلبژارتیێ عیراقێ دگەل ھەلبژارتیێ ئیمارات ب دو گولان بێ بەرامبەر و ب ڤێ چەندێ رەسیدێ وێ ھەر ماین سێ خال ل رێزا بەری دووماھیێ د کومێ دا ئەوا سعودی و ژاپون ل رێزێن ئێکێ دھێن ب دەە خالان.
زێدەتر فالح موسا ئەندامێ ئێکەتیا تە پا پێ یا ناڤەندی ل عیراقێ ئاشکەرا کر وان چو نیاز نینن دەستا ژ راھێنەرێ ھەلبژارتیێ عیراقێ رازی شنێشلی بەردەن و ئەو دێ د پێگیربن ب ھەڤبەستا وی ھەتا سالا ٢٠١٩ێ.
ئەو چەندە ژی نە ڤەشارت کو پشتی ڤەگەریانا ھەلبژارتیێ عیراقێ بو بەغدا دێ دان و ستاندنێ لسەر رێبازا ھەلبژارتی د قوناغا دویێ دا و راوەستیان لسەر خوسارەتیێن ل دووڤ ئێک کەن.

ئەڤرۆ،ھەژار مەعروف:
ھەر ل دەستپێکرنا خولا نایابا عیراقێ و خولا پێشمەرگەی کوردستانێ بۆ وەرزێ نوو یێ ٢٠١٦-٢٠١٧ یانێن پارێزگەھا دھۆکێ نەشیاینە تام بکەنە سەرکەفتنا بەروڤاژی وەرزێن بوری کو یانێن پارێزگەھا دھۆکێ ژمارەکا ب ھێز بوون دخولێن ھەرێمێ عیراقێ دا لێ ل وەرزێ ئەڤ سالە ھەر ژ دووماھیا وەرزێ بوری ھەتا وەرزێ ئەڤ سالە یانێن پارێزگەھێ پاشڤەزفرینە ئەنجامێن لاواز د ھەردو خولان دا ب دەستخوڤە ئیناینە کو نێزیکی دو ھەیڤانە چو یانە نەشیانە تام بکەنە سەرکەفتنێ.
دخولا عیراقێ دا یانا زاخۆ یاریا خوە یا ئێکێ بەرامبەر جەویە نەکر ئەوا ھاتیە پاشئێخستن کو بریار بوو ١٥-٩-٢٠١٦ کربا و یاریا دوێ ل ٢١-٩-٢٠١٦ بەرامبەر یانا کەربەلا بوو تێدا وەکھەڤ بوو ب گولەکێ و پشتی ڤێ یاریێ پێنج یاریێن دی ئەنجامداینە و د ھەر پێنج یاریان دا نەشیا سەرکەفتنێ توماربکەت سێ جاران ل یاریگەھا خوە یاری کریە دو جاران خوسارەت بوویە و جارەکێ وەکھەڤبوویە و سێ یاری ژ دەرڤەی یاریگەھا خوە وەکھەڤبوویە.
دخولا پلا نایاب یا ھەرێما کوردستانێ دا ئەوا ئەڤ سالە ھاتیە بناڤکرن ب خولا پێشمەرگە ل ٣-١١-٢٠١٦ دەستپێکری ھەر چار نوونەرێن پارێزگەھێ ژ سەرجەمێ حەفت یاریێن خوە نەشیاینە سەرکەفتنێ توماربکەن کو د کوما ئێکێ دا دھۆک دو جاران خوسارەت بوویە و زێرەڤانی دو خال ب دەستخوڤە ئینا ھەردو یاریان وەکھەڤبوویە ب ھەمان شێوە گارە دو خال ھەنە ب دو وەکھەڤیا و زاخۆ ئێک یاری کریە ئەوژی خالەک ھەیە وەکھەڤبوو د یاریا خوە ئێکێ دا.
ژ سەرجەمێ ١٣ یاریێن یانێن پارێزگەھێ د ھەردو خولێن عیراقێ و کوردستانێ دا ھەشت وەکھەڤی تومارکرینە ل گەل پێنج خوسارەتیا یازدە گول تومارکرینە و پازدە گول ل سەر ھاتینە تومارکرن.
ھەژی گوتنێ یە ئەڤ ژمارە ب لاوازترین دەستپێکا یانێن پارێزگەھێ دھێتە ھژمارتن ل دەە سالێن بوری د ھەردو خولێن عیراق و کوردستانێ دا

ئەڤرۆ،قەیس وەیس:
لژنەیا بەریکانا ل ئێکەتیا عیراقێ یا تەپا پێی راگەھاند دێ یاریێن گەرا ھەشتێ یێن خولا عیراقێ یا پلا نایاب ل ٢٥ ڤێ مەھێ جارەکا دی دەستپێکەن پشتی بۆ ماوێ سێ حەفتیان ژبو خوە بەرھەڤکرنا ھەلبژارتیێ عیراقێ بو یاریا دگەل ھەلبژارتیێ ئیماراتێ ژ چارچوڤێ ڤاڤارتنێن ئاسیا بۆ دەربازبوونێ بۆ نوندیالا جیھانی ل روسیا .
سەروکێ لیژنێ شھاب ئەحمەد بو دەزگەھێن راگەھاندنێ گوت : یاریێن گەرا ھەشتێ بریارە ل ھەردو رۆژێن ھەینی و شەمبیی ل رێکەفتنی ٢٥-٢٦ ڤێ ھەیڤی بھێنەکرن کو ل رۆژا ھەینی ل ٢٥ مەھێ یاریا تەلەبە و ھەولێر ل یاریگەھا شەعب ھێتەکرن و ھەردیسان نەفت ل گەل سەماوە ل یاریگەھا نەفت و نەفت میسان ل گەل بەحری ل یاریگەھا مەیمونە و حسێن ل گەل کەرخ و نەفت وەست ل گەل زەورا ل یاریگەھا نەفت وەست ل باژێرێ نەجەف.
ھەردیسان ناڤبری ئاماژە ب وێ چەندێ ژی کر ل رۆژا دووڤدا ل ٢٦-١١-٢٠١٦ بەردەوامی ب یاریێن گەرا ھەشتێ ھێنەکرن ل یاریگەھا باژێرێ وەرزشی ل بەسرا یانا زاخۆ دێ بیتە مێڤانا یانا مینا و نەجەف ل گەل کارەبا و نەفت ئەلجنوب ل گەل کەربەلا ل یاریگەھا کەربەلا و جەویە ل گەل بەغدا و شورتە ل گەل حدود .

ئەڤرۆ، قەیس وەیس:
پشتی بورینا دو گەران ژ خولا پێشمەرگەیێ کوردستانێ بو یاریا تەپا پێ یانا دھۆک توشی دو خسارەتیان بویە و ل رێزا دووماھیێ دھێت درێزبەندیا کوما دویێ دا ئەوا یانا نەوروز ب شەش خالان ل رێزا ئێکێ دھێت.
ل دور رەوشا یانا دھۆک تێدا د دیدارەکا تایبەت دا بو روژناما ئەڤرۆ راھێنەرێ یانێ ئاشتی موستەفا گوت: بەری ھەر تشتەکی من دڤێت بێژم خوسارەتی ل دەستپێکا خولێ نە دووماھیا خولێ یە و تیما مە دیاریا ئێکێ دا باشترین ئاست ئەنجامدا، لێ یانا ھەولێرێ مفا ژ نە شارەزایا یاریزان دیت و شیان دخولەکێن دوماھیێ دا گولا سەرکەفتنێ بینن و ل یاریا دویێ پێنج یاریزانێن مە دگەل تیمێ نەبون ژبەر ئەگەرێن جودا و دیسان یاریزانێن مە نە ل ئاستی خو یێ جاران بون.
دیسان ئاشتی گوت: دڤێت پشتی ڤان ھەردو یاریان ئەم کار بکەین ل سەر دەرونێ یاریزانان و فشارا یاریێن دی ل سەر نەھێلین ژبەرکو سەرکەفتنا یاریا بھێت دێ تیمێ بەر ب ھەڤرکیێ بەت و لدویڤ دا کارێ خو بکەین بو دێربیا پارێزگەھێ دگەل یانا زێرەڤانی و ھەکە ئەنجام یێ باش نەبو دیسان دێ بیژم ئەم ژ ھەڤرکیێ دوور نابین.
ئاشتی لدور فشارا جەماوەری ل سەر تیمێ گوت: ئەڤە نە جەماوەرێ یانێ یە وەدکەت، لێ چەند کەسەکن و پشتەڤانێن یاریزانەکی نە و ھیڤیا من ئەوە دیربین ژ کەسان، لی پشتەڤانی بتنێ بو ناڤێ یانا دھۆک بیتن، ژبەر وێ چەندێ من پشت گوە ڤە ھاڤێتینە و ئەوێن ل تورێن جڤاکی دھاڤێنە یاریزانا و راھێنەری بتنێ ل پشت کیبوردی نە و روژەکێ ژی ل پێش یاریێ نەھاتینە دیتن و ئەڤان کەسا خرابیا یانێ دڤێت.
لدور وان یاریزانێن ھاتینە دوورخستن موستەفای گوت: ئەو یاریزان ب قەناعەت یێن ھاتینە دوورخستن بتنێ ژبەرکو یاریزانێن باشتر ھەنە دناف تیمێ دا و دەرگەھێ یانێ بو ھەمی یاریزانان یێ ڤەکریە ئەوێن بزانین ئاستێ وان بلندترە ژ یاریزانێن مە و ئەس یێ کاردکەم دو یاریزانان ل جھێن تیم پیدڤی بینمە دناڤ رێزێن تیمێ دا.
ل دووماھیێ ناڤھاتی دیارکر کو ئارمانجا وان چارگوشا زێرینە و رێ ل ھەمبەر وان یا ڤەکریە کو ئارمانجا خوە ب جە بینن تایبەت کو ئاستێ ھەمی یانا وەکی ئێکە، سەرەرای زێدەھیا یانێن دی ل سەر ئاستی مادی و ئینانا یاریزانان ب بھایێن گران بو ناف رێزێن تیما خو باشترە و ئاشکەراکر ژی چو فشارێن کارگێریێ ل سەر وی نینن ژبەرکو کاودانێن تیمێ ھەمی ل بەر چاڤن و باوەریەکا موکم ب ستاڤێ راھێنانێ ھەیە و زێدەتر گرێداینە کو بشێن تیمەکا باش رێکبێخین ھەکە خو بو سالا بھێت ژی بیت.

ب، ئەڤرۆ:
یاریزانێ ئەلمانی و یێ ھێلا ناڤینا یانا ئەرسینال یا ئێنگلیزی مەسعود ئوزێل نێزیکی نووکرنا ھەڤبەستێ بویە د ماوێ بھێت دا.
د ڤی چارچوڤەی دا روژنامەیا میرور یا بریتانی ئاشکەراکریە کو ئوزێلی چەند جارانە دان و ستاندنا ل گەل کارگێریا یانێ دکەت د ماوێ راوەستاندنا یاریێن نێڤدەولەتی دا کرینە و رەزامەندی ھاتیە کرن بو ئیمزاکرنا ھەڤبەستێ ھەمبەر موچەکێ ھەفتیانە ٢٠٠ ھزار جونەیھێن ئسترلینی.
ڤێ روژنامێ ئاماژە بو وێ چەندێ ژی کریە کو کارگێریا یانێ با وەری ب شیانێن وی ھەنە و ژبەر ڤێ چەندێ دخوازن بکەنە یاریزانێ خودان مەزنترین موچە ل ناڤا یانێ کو ڤی یاریزانی بەری نوکە حەفتیانە ١٤٠ ھزار جونەیە وەردگرتن و ١٨ ھەیڤ ماینە ھەڤبەستا وی ب دووماھی بھێت.
ژلایەکێ دوڤە ڤێ روژنامێ خویاکریە کو ھەتا نوکە کاروبار د رون و ئاشکەرا نینن دەربارەی یاریزانێ چیلی ئەلیکسیس سانشێز ھێرشبەرێ یانێ ئەوێ ماوێ ھەڤبەستا وی ژی ١٨ ھەیڤ ماین و حەفتیانە ١٣٠ ھزار جونەیھان وەردگریت و بزاڤ بو بلندکرنا موچێ وی ژی دھێتە کرن.