حه‌فت وه‌لاتان به‌رهه‌ڤیا خوه‌ بۆ هاریكاریكرنا كوردستانێ نیشادا

07/03/2016 19:13

227

ئه‌ڤرۆ نیوز:
شانده‌كێ هه‌ڤبه‌شێ نه‌ته‌وێن یه‌كگرتی و ئێكه‌تیا ئوروپا و ولاتێن گروپێن جی 7، ئه‌مریكا، به‌ریتانیا، كه‌نه‌دا، فره‌نسا، ئه‌لمانیا، ئیتالیا، ژاپون و نوونه‌رێ بانكا جیهانێ بۆ عیراقێ به‌رهه‌ڤیا خوه‌ نیشادا بۆ ده‌ربازكرنا قه‌یرانا دارایی و سه‌رخستنا چاكسازیێن هه‌رێما كوردستانێ.
دوهی مه‌سعود بارزانی سه‌رۆكێ هه‌رێما كوردستانێ ل گه‌ل شانده‌كێ هه‌ڤبه‌شێ نه‌ته‌وێن یه‌كگرتی، ئێكه‌تیا ئۆرۆپا، ولاتێن گرۆپێن جی حه‌فت و بانكا جیهانی كۆمبوو.
جان كوبیس نوونه‌رێ تایبه‌تێ سكرتێرێ گشتیێ رێكخراوا نه‌ته‌وێن یه‌كگرتی كو سه‌رۆكاتیا شاندی دكر ب بارزانی راگه‌هاند: ئه‌و ئاگاداری ره‌وشا دژوارا داراییا هه‌رێما كوردستانێ نه‌ و جڤاكا نێڤده‌وله‌تی به‌رهه‌ڤیا خوه‌ بۆ هه‌رێما كوردستانێ د پرسا چاكسازی و ده‌ربازكرنا قه‌یرانا داراییا هه‌رێما كوردستانێ ده‌ربریه‌.

وه‌زاره‌تا خواندنا بلند پێشنیازا زانكۆیا دهۆك ره‌تكر

07/03/2016 18:45

1052

ئه‌ڤرۆ نیوز:
وه‌زاره‌تا خواندنا بلند و ڤه‌كولینێن زانستى پێشنیازا سه‌رۆكایه‌تیا زانكۆیا دهۆك سه‌باره‌ت كێمكرنا كرێیا خواندنا پارالێل بۆ كچ و كورێن سه‌رۆكێ زانكۆ و هاریكار و ماموستایێن وێ ره‌تكر.
وه‌زاره‌تا خواندنا بلند و ڤه‌كولینێن زانستى ب نڤیساره‌كێ بریارا كێمكرنا كرێیا خواندنا ب پاره‌ بۆ كور و كچێن سه‌رۆكێن زانكۆیا دهۆك ره‌تكر و د بریارێ دا هاتیه‌” رازیبوون ل سه‌ر پێشنیازا ژماره‌ 1588 یا 28 شوباتا 2016 یا تایبه‌ت ب كێمكرنا كرێیا خواندنا پارالێل ب رێژا 50% بۆ كور و كچێن ( هاریكارێن سه‌رۆكێ زانكۆیێ، راگر، ماموستایێن زانكۆیێ) یا هه‌وه‌ هنارتى نه‌هاته‌ دان، به‌رى نوكه‌ژى هنده‌ك ژ زانكۆیێن دى پێشنیازا كێمكرنا خواندنا پارالێل كرینه‌، به‌لێ ئه‌و پێشنیازه‌ ژ ئالیێ وه‌زاره‌تێ ڤه‌ هاتیه‌ ره‌تكرن”.

داهاتێ ساخله‌ميێ دێ بۆ خزمه‌تێن وێ ڤه‌گه‌ريت

07/03/2016 13:34

175

ئەڤرۆ نیۆز ،سالار دۆسکی
ئەندامەکێ لژنا ساخلەمیێ ل پەرلەمانێ کوردستانێ بەحسێ داھاتێ ساخلەمیێ دکەت و ئاشکرا دکەت کو پێشنیار ھەنە کو داھات ھەر ل سەر سازیێن ساخلەمیێ وکارمەندان بھێتە بەلاڤکرن وەک دەسپێک حوکمەت ل سەر پێشنیارێ یا رازی بووی.
د.عەبدولا جاسم رێکانی ئەندامێ لژنا ساخلەمیێ ل پەرلەمانێ کوردستانێ بۆ ئەڤرۆ نیۆز گۆت: بەری کومبوونا وەزارەتا ساخلەمیێ ل گەل سەرۆکێ حوکمەتا ھەرێما کوردستانێ ھندەک پێشنیار ھەبوون بۆ زێدەکرنا داھاتێ کەرتێ ساخلەمیێ ل کوردستانێ، دیسان پێشنیار ھەبوو ھەکە ھەموو داھات ژی نەبیت پیچەک ژڤی داھاتی بۆ وەزارەتا ساخلەمیێ بمینت ئەڤە ژی بۆ کرین و پێدڤیێن نەخوشخانێ و کارێ سازیێن ساخلەمیێ رۆژانە پێ ب رێڤە بچیت، دیسا بۆ کرینا ئامیرێن پێدڤی، دیسان بۆ ھاندانا ستافێ ساخلەمیێ چونکە دەواما کارمەندێن ساخلەمیێ گەلەکە، پێدڤی یە جورە مووچەک بھێتە پەیروەکرن پشتی دەواما فەرمی ھەموو سازیێن ساخلەمیێ ل گورەی رێنمایێن وەزارەتێ کار بکەت و پارچەک ژوی داھاتی ل دووڤ رێنمایێن وەازرەتێ بۆ وی ستافی بھێتە بەلاڤەکرن و ئەڤە ژی رازیبوون ژلایێ ئەنجوومەنێ وەزیران ل سەر دھێـتەکرن. د.عەبدوللا رێکانی ھێشتا ژی گۆت: وەک دەسپێک رازیبوون ل سەر بابەتی ھاتیەکرن لێ ب دروستی چ رێنما ل سەر بابەتی نە دەرکەفتی نە و سازیێن ساخلەمیێ ھەموو چاڤەرێی رێنماینە، ژ ھندەک ێدەرێن باوەرپێکری دکومبوونا ل گەل ئەنجوومەنێ وەزیران ئەنجوومەنێ وەزیران رازیبوون ل سەر ڤی شێوازێ بەلاڤکرنا داھاتێ ساخلەمیێ دیارکریە، دیسا ئەڤە وەزارەتەکا گەلەک گرنگە و خزمەتێن وێ راستەوخۆ ب ژیانا وەلاتیان ڤە یا گرێدایە و دیسا بۆ بریندارێن ھێزێن پێشمەرگەی و ھێزێن ئەمنی و ئاسایشێ کو ل شەرێ داعش و روودانێن نافخوە یی ھاتینە ئەنجامدان. ھەمان ئەندامێ لژنا ساخلەمیێ ل پەرلەمانێ کوردستانێ گۆت ژی: ئەڤ داھاتێ دھێتە تەرخانکرن دێ ل دووڤ رێژێ بیت بۆ ھەر کەسەکێ ل ساخلەمیێ کاربکەت، پشتی دەوامێ ھەر کەسەکێ کاربکەت و وەک نوشدار کارمەند و فەرمانبەر و خزمەتکار و تاقیگەە و تیشک و سونەر و ئەڤە نە بتنێ نوشدار بتنێ یە و بەلکو دێ ستافەکێ بەر فرەە ب خوە ڤەگریت، کارگێریا نەخوەشخانێ و ئەڤە دێ رێژەکا وی پارەی مفاداربن و ئەڤە دا پشتی دەوامێ ب مینن و دیسان دا خەلک ژی مفاداربیت. ھەمبەر داھاتێ وەزارەتا ساخلەمیێ ژی، ھەمان ئەندامێ پەرلەمانی گۆت: ل دووڤ گۆتنێن وەزیرێ ساخلەمیێ کو دووماھی داخویانی دا ئاشکراکری داھاتێ ھەموو وەزارەتێ نە گەھشت بوو (10) ملیار دیناران، مەزاختی پتر ژ 700ملیار دیناران ئانکو مەزاختی پتر بوویە ژ داھاتی و ەزارەت بەرامبەر خزمەتێن ساخلەمیێ گەلەک یا خوسارەتە، راستە ئەڤە ئەرکێ حوکمەتێ یە دڤێت ھەموو خزمەتا پێشکێش بکەت، لێ دڤێ قەیرانا ئابووری دا و ھەتا قەیران ژی نەبیت، حوکمەت نەشێت شەش ملیۆن مرۆڤان رۆژانە ھەمو پێدڤیێن ساخلەمیێ دابین بکەت و بێ بەرامبەر چونکە ئەڤە تشتەکێ گەلەک بزحمەتە و ئەڤە ل چ وەلاتان نینە. ھێشتا گۆت: ئاریشا مە ئەوە ھەتا نوکە مە (تەمیم ێحی) چێنەکریە و ئەگەر مە چێکربا، کو رێژەک ژ مووچێن فەرمانبەران بھێتە برین ل کەرتێ تایبەت و حوکمی و بچیتە جھەکێ تایەبت ل وەزارەتا ساخلەمیێ و ئەڤە چ ناچیت چونکە پێشتر وی ھەمو ژ مووچێ خوە دایە و ھەموو خزمەت ژی دێ بۆ ھێنەکرن و جھێ داخێ یە ھەتا نوکە ئەم نەشیاینە ڤی سیستەمی ل کوردستانێ پەیرو بکەین، ل سەر ھەمان بابەت وەک لژنا ساخلەمیێ ل پەرلەمانی بەری دو سالان مە پرۆژە قانوونەک پێشکێش کریە بڤی رەنگی و ھەتا نوکە ب دووماھی نەھاتیە

بەردا و پارێن وێ ژی ھەموو بۆ خوە برن

07/03/2016 13:30

779

ئه‌ڤرۆ نيوز:
پارێزەرەکێ دادگەھا زاخۆ راگەھاند، کو ژنەکێ و زەلامەکی ل سالێن ھەشتیا خێزان پێکئینا بوو و چوو بوونە دەرڤەی وەلاتی، ژنێ داخواز ژ ھەڤژینی َخوەکر بزڤریتە کوردستانێ و ئەو دێ ل دەرڤەی وەلاتی کار کەت و پاران بۆ فرێ کەت داکو پاشەرۆژا زارۆیێن خوە دانن، گۆتژی زەلام زڤری کوردستانێ و خوە دامەزراند و ژنێ کوژمەکێ مەزن یێ پاران بۆ فری َکر پشتی زەلامی ئاڤاھی کری، قەستا دادگەھێ کر و ھەڤژینا خوە بەردا بێ کو ھزرا زارۆیێن خوە بکەت.
پارێزەر ھەژار محەمەد یوسف بۆ ئەڤرۆ دیارکر کو ژنەکێ و زەلامەکی ل سالێن ھەشتیا خێزان پێکئینا بوو و گۆت: چوو بوونە دەرڤەی وەلاتی ھەردوو خودان باوەرنامێن بلند بوون، پشتی ماوەکی ژنێ گۆتە ھەڤژینێ خوە بزڤرە کوردستانێ پاشی ئەم ژی دێ ھیێن و مینین نازڤرینە وەلاتێ بیانیا، زەلام زڤری کوردستانێ و خوە دامەزراند و ب شێوەکێ ئاسایی دەواما خوەدکر، ژنێ کار دکر و ھەر ماوە ماوە کوژمەکێ پارەی بۆ فرێ دکر داکو ئاڤاھیەکی بکرن و پاشەرۆژا خوە بدانن ل کوردستانێ، پشتی زەلامی ئاڤاھی کری، قەستا دادگەھێ کر و ھەڤژینا خوە بەردا بێ کو ھزرا زارۆیێن خوە بکەت ب بھانەیا ھندێ کو نەیا باشە و ئەڤە چەند سالە تەحەمولا وێ دکەت، گۆتژی ل دووڤ قانوونێ (ایقاع الگلاق) مافی ددەتە زەلامی ھەڤژینا خوە بەردەت، پشتی ژنێ زانی زەلامێ وێ بەردایە نەشیا زارۆیێن خوە ژی لنک خوە راگریت، نوکە دەولەت زارۆیێن وێ ب خودان دکەت نەماینە لنک دەیکا خوە.
زێدەتر گۆت: ژنێ داوایا پارێ خوە ل زەلامی کر دەمێ بۆ وی ژ دەرڤەی وەلاتی د ھنارت دا ئاڤاھیەکی بکریت کو نێزیکی 36 دەفتەرێن دولاران بوون، زەلامی ل بەرامبەری دادوەری سووند خوار کو ڤێ ژنێ چ پارە بۆ ژدەرڤەی وەلاتی نە ھنارتینە، ئەڤێ ژنێ چ کاغەز و دیدەڤان ژی نەبوون بۆ دادگەھێ ب سەلمینن ئەڤ پارە بۆ ڤی زەلامی ھنارتینە، ھندی ھاتوچوو زەلامی ب تنێ شەش ملیون دینارێن عیراقی دانێ.
پارێزەر ھەژاری دیارکر ژی کو ئەڤ قانوونە پشتا ژنێ ناگریت، مەھرا ڤێ ژنێ دەمێ ل سالێن ھەشتیا شووکری ل سەر گرێبەستا ھەڤژینیێ شەش ھزار دینارێن بەرێ بوون ئانکو بەرامبەری یێن نوکە گەلەک کێم دەردکەتن، نوکە ل عیراقێ دبێژیت ھەکە تشتەکێ وەسا ھەبیت دبیتە زێر ل شوونا پاران، گۆتژی ئەڤە ل ڤێرە غەدرە ل ژنێ دھێتەکرن، ھەما زەلام بێ منەت ھات ھەڤژینا خوە بەردا، مەھرێ وێ شەش ھزار دینار بوون چ تشتێ وەسا بۆ وێ نەکەت نێزیکی 600 ھزار دینارێن عیراقی کەفتن، بەلێ ھەکە ل شوونا وان بۆ وێ ببانە زێر دا باشتر بیت چۆنکو بھایێ زێری جودایە.
پارێزەری ئاشکراکر ژی کو ھندەک دێ بێژن ماھەکە بەردان روودا ئێدی پارە بووچنە؟! پا ھەکە ھەر بەردان روودا و ئەڤ ژنە نەگەھشتە مافێ خوە خرابترە، دبیت ئەڤ ژنە چ کارا نەکەت یان یا بێ خوەدان بیت برایێن وێ خودان نەکەن، چ نەبیت ئەڤ پارە دێ ھاریکاریا وێ کەن سباھی بۆ خوە پاشەرۆژەکێ دانیت پیچەکێ بێ منەت بیت، گۆتژی پێدڤیە ئەڤ قانوونە بھێتە راستڤەکرن داکو پتر خزمەتا ژنێ بکەت وەکو ڤی حالەتی نەبیت چەوا زەلام غەدرێ لێ دکەت.

ره‌وشا سه‌قايێ سوبه‌هى

07/03/2016 13:05

360

ئه‌ڤرۆ نيوز:

رێڤه‌به‌ريا كه‌شناسى و بيڤه‌له‌رزێ ل دهۆكێ راگه‌هاند كو سوبه‌هى رۆژا سێشه‌مبى رێكه‌فتى 7ى ئادارا 2016ێ ئه‌سمان دێ ساهى بيت ل گه‌ل هنده‌ك ئه‌ورێن بچووك.

پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه‌ كرينه‌ راگه‌هاند كو ژ ئه‌نجامێ فشارێن بلندێن وه‌لاتێ توركيا بۆ سه‌ر هه‌رێما كوردستانێ دهێته‌ پێشبينيكرن ئه‌سمان ئه‌سمان ساهى بيت ل گه‌ل هنده‌ك ئه‌ورێن بچووك.

پشكا پێشبينيان دايه‌ زايه‌ زانين كو دێ ئاراستێ باى ژى دێ باكوورێ رۆژئاڤا بيت ب ره‌نگه‌كى د ناڤبه‌را 10 هه‌تا 20كم دا و هنده‌ك و ماوێ ديتنێ ژى دێ 8 بۆ 10كم بيت، پلێن گه‌رمێ ژى دێ د ناڤبه‌را (9 بۆ 16) پلان دا بيت.

ژ ئەگەرێ تەحەرشا سێکسی سێ بەرپرس دھێنە سزا دان

07/03/2016 13:00

1867

ئەڤرۆ نیوز:
ژ ئەگەرێ تەحەرشا سێکسی د ناڤ دام و دەزگەھێن حوکمەتا ھەرێما کوردستانێ دا، سێ بەرپرس دھێنە سزا دان.
رێکخراوا ڕاگەھاندن و رۆناکبیریا ژنان دوھی 6/3/2016 د کۆنفرانسەکێ رۆژنامەڤانی دا ئاشکرا کر کو ل جھێ کاری و د ناڤ دام و دەزگەھێن حوکمەتا ھەرێما کوردستانێ دا و ژ ئەگەرێ تەحەرشا سێکسی ژ لایێ بەرپرسان ڤە ب ژن و کچان، سێ بەرپرس ھاتینە سزا دان و گۆت: “ژ بەر ڤێ چەندێ ژی، مە وەکو رێکخراوا ڕاگەھاندن و رۆناکبیریا ژنان، ھێلەکا گەرم یا تایبەت ب روو ب رووبوونا تەحەرشا سێکسی ب ژن و کچان، ب تایبەت ل دام و دەزگەھێن حوکمەتێ و ناڤەندێن کاری ڕاگەھاندیە”.
ھانا شوان، بەرپرسا ڕاگەھاندنا رێکخراوا ڕاگەھاندن و رۆناکبیریا ژنان دیار ژی کر، ئەڤ پرۆژە یێ تایبەتە ب وان ژن و کچان یێن روو ب روو تەحەرشا سێکسی دبن، ب تایبەت ئەوێن ل دام و دەزگەھێن حوکمەتا ھەرێما کوردستانێ کار دکەن و گۆت: “ئەو ھێلە ڕاستەوخوە دێ بەرسڤا پەیوەندیێن ژن و کچان دەت ل ھەر جھەکی کو ھەست بکەن یێن تووشی تەحەرشێ یان سڤکاتیپێکرنێ دبن، دشێن پەیوەندیێ ب ڤێ ھژمارێ 07701557090 بکەن و ئەم ژی دێ دووچوونێ ل سەر ئارێشا وێ کەین”.
ھانا خانێ گۆتژی: “د سالا 2015 دا چەند حالەتێن تەحەرشا سێکسی ب ژن و کچان ھاتینە تۆمارکرن، ئەو کەسێن دەستدرێژی کرین ژی، ب مفا وەرگرتن ژ پلە و پۆستێ خوە، تەحەرشا سێکسی ب ژن و کچان کرینە، ھەتا گەھشتیە وی ڕادەی گەف ژی ل قوربانیان کرینە”.
د وی کۆنفرانسێ رۆژنامەڤانی دا ھانایێ خویا ژی کر، سالا بۆری ھەتا نوکە سێ کەس ل سەر تەحەرشا سێکسی ھاتینە سزا دان کو ھەر سێ بەرپرس بوون و پلە و پۆستێن بلند ھەبوون، و گۆت: “ئێک ژ وان پلەکا سەربازی ھەبوو، پلا وی ھاتیە کێمکرن، کەسەک ژی ل جھێ کاری ھاتیە دوورخستن و یێ سێیێ ژی ھاتیە لادان”.

زەلام دانپێدانێ ب ڤان نھێنیان ناکەن بەلێ حەز دکەن تو تێبگەھی

07/03/2016 12:45

886

ئەڤرۆ نیوز:
تو وەسا ھزر دکەی کو ھەڤژینێ تە وەکو قارەمانێن فلمێن رۆمانسیە و دێ تە بەتە جیھانا ئاشۆپی و خۆشیا ھەر و ھەر دەتە تە، بەلێ ژ نشکەکێ ڤە دێ بینی ئەو خەون ب دووماھی ھات و ئاریشە و دوبەرەکیان دەستپیکر بێی تو بزانی چاوا.
خوە نەوەستینە و گەلەک پرسیاران نەکە، دبیت ئەگەر گەلەک یێ سادە بیت، گەلەک تشتێن ھەین زەلام بزاڤێ دکەت کو تو تێبگەھی بەلێ تە ھای ژێ نینە ژ بەر ئەگەرەکی.
ئەڤە ھندەک ئەو نھێنی نە کو زەلامی نەڤێت بێژیت بەلێ دێ ھاریکاریا تە کەن کو تو تێبگەھی:
1- زەلام یێ ھەستیارە بەلێ ل دووڤ رێیا خوە یا تایبەت: دبیت نەکەتە گری دەمی فلمەکێ ب باندۆر ببینیت، بەلێ ئەڤە رامانا وێ نینە کو وی چ ھەست نینن، دبیت ئەو دەربرینێ ب رێیەکا دی ژ خەما خوە بکەت و دبیت ل وی دەمی قەستا راھێنانێن وەرزشی بکەت. گەلەک پرسیاران ژێ نەکە و ل ھیڤیێ نەبە ھەرۆ ئێڤاری خەمێن خوە بۆ تە بێژیت، بەلێ ھندەک تایبەتمەندیێ بدێ و ل دەمێ پێدڤی ئەو ب خوە دێ قەستا تە کەت.
2- زەلام ژی حەز ژ دلینیێ دکەت: دێ تۆرە بی ھەکە پێلاڤا تە یا نوو ل تەپیرۆز نەکەت یان دلێ خوە ب بەژن و بالا تە خۆش نەکەت، بەلێ ما خو نە تو ژی دێ ھەر وەکەی؟ خۆشتڤیێ تە پێدڤی ب ھندەک پەیڤێن نازک ھەیە دا باوەریا وی ب وی زێدە بیت، ژبیر نەکە تو بەحسی جوانی و ماقویلیا وی بکە بەلێ نە زێدەی یا پێدڤی.
3- ھندەک جاران زەلامی باوەری ب خوە نینە: ئەو پێدڤی ب پشتەڤانیا تە ھەیە خو ھەکە ژ تە داخواز ژی نەکەت، بۆ وی ببە ھەڤال و ھەڤژین و خۆشتڤی و سوپاسیا وی بکە ل سەر وەستیانا وی و ئەڤە دێ مۆرالا وی بلند کەت.
4- ڤەلام حەز ژ بازاری ناکەت: ل سەر نە شەپینە کو ل گەل تە بھێتە ناڤ بازاری و چەند سەعەتان بمینیتە ل گەل تە بۆ کڕینا جلک و پێلاڤان، ئەو حەز دکەت بمینیتە ل مال و بلا دانپێدانێ ژی نەکەت.
5- زەلام یێ رۆمانسیە بەلێ..: دبیت تە نەبەتە چ گەشت و سەیرانان، بەلێ ئەو بزاڤێ دکەت ھندەک تشتێت بساناھی بکەت، دبیت ژ نشکەکێ ڤە و بێی ھەلکەفت بۆ تە دیاریەکێ بینیت یان ژی دێ رۆژا بێھنڤەدانا خوە ل گەل تە بۆرینیت و نەچیتە ناڤ ھەالێن خوە، ئەڤ تشتێن بچووک گەلەگ دگرنگن لەورا بزاڤێ بکە تێبگەھە و سوپاسیا وی بکە.

پەرلەمانتارەک: حوکمەتا عێراقێ دێ ھێتە گوھۆڕین و تنێ دێ پارتی وەزارەت بەرکەڤن

07/03/2016 12:00

233

ھەولێر، قائید میرۆ:
بڕیارە حوکمەتا نوکە یا عیراقێ ب تەمامی بھێـتە گوھۆڕین و حوکمەتەکا نوو ب سەرۆکایەتیا حەیدەر عەبادی بھێتە پێکئینان، پەرلەمانتارەکێ فراکسیۆنا پارتی ژی دبێژیت، ھەکە حوکمەت ھاتە گوھۆڕین، تنێ دو وەزارەت دێ بۆ کوردان بن ئەوژی بۆ پارتی دیموکراتی کوردستانن، ھەروەسا دیارکر، سێ سەرکردێن ھەرێما کوردستانێ بۆ پێکئینانا حوکمەتا نوو، گەھشتینە بەغدا و دێ ھەلویستێ کوردان گەھیننە عەبادی.
د.عەرەفات کەرەم، ئەندامێ جڤاتا نوونەرێن عیراقێ ژ فراکسیۆنا پارتی دیموکراتی کوردستانی بۆ ڕۆژناما ئەڤرۆ بەحسێ ھووردەکاریێن پێکئینانا حوکمەتەکا نوو ل عیراقێ کر و گۆت” دچارچۆڤێ چاکسازیێن حەیدەر عەبادی سەرۆک وەزیرێن عیراقێ، ل بەرە ئەڤ حوکمەتە بھێتە گوھۆڕین و حوکمەتەکا نوو ل عیراقێ بھێتە پێکئینان، مە وەکو فڕاکسیۆنێن کوردی ل بەغدا کۆمبوونا خوە ل دۆر ھەلویستێ کوردان ل دۆر ڤێ پرسی یا کری و نوونەرێن ھەرێما کوردستانێ ژی گەھشتینە بەغدا، کو ڕۆژ نوری شاوێس ب نوونەرایەتیا پارتی ھاتیە و بڕیارە ل گەل سەرۆک کۆماری و نوونەرێن کورد ل بەغدا کۆمبوونان بکەن، چونکی کورد و عەرەب دو پێکھاتێن سەرەکی نە د عیراقێ دا و ب چو شێوەکی ئەم دڕزانینین کورد بھێنە پشتگوە ھاڤێتن و عەبادی وەکو خوە ڕەفتارێ ل گەل کوردان بکەت، عەبادی دخوازیت ھەموو وەزیرێن نوکە بھێنە لادان و وەزیرێن نوو بھێنە دانان، بەلێ بێی بۆچوونا کوردان نەشێت ڤێ پێنگاڤێ ب ھاڤێژیت، ب دیتنا من ئەڤ چاکسازیە کارەکێ باشە، بەلێ نابیت بێی کوردان بھێتەکرن”.
عەرەفاتی گۆت ژی” بڕیارە پشتی نوونەرێن کورد کۆمبوونان ئەنجامبدەن، دێ ب شێوەکێ فەرمی ھەلویستێ خوە گەھیننە سەرۆک وەزیرێن عیراقێ، فڕاکسیۆنا پارتی مەزنترین فڕاکسیۆنا کوردی یە ل بەغدا، لەوما دڤێت بەھرا پارتی د حوکمەتا نوو یا عیراقێ دا ل بەرچاڤ بھێتە وەرگرتن، ڕاستە بڕیارە ھژمارەکا وەزارەتان بھێنە کێمکرن، بەلێ ب گۆرەی ڕێککەفتنا سیاسی، دڤێت بەھرا کوردان د حوکمەتا عیراقێ دا یا پاراستی بیت، بزاڤا گۆڕان پۆستێ جێگرێ سەرۆکێ جڤاتا نوونەران یێ ھەی و ئێکەتیێ پۆستێ سەرۆک کۆماری یێ ھەی، تنێ پارتی چو پۆستێن سیادی ل عیراقێ نینن، ئەڤە ددەمەکی دایە پارتی زۆرترین کورسیێن کوردان د جڤاتا نوونەران دا یێن ھەین، ئەز باوەرم دگوھۆڕینێن ڤێ جارێ دا تنێ دێ دو وەزارەت بەر کوردان کەڤن و ھەردو وەزارەت ژی دێ بۆ پارتی دیموکراتی کوردستان بن و ب زەحمەتە گۆڕان و ئێکەتی وەزارەتەکێ وەربگرن ، ھەکە وەزارەتا سیێ بەر کوردان بکەڤیت، دێ بۆ ئێکەتیێ بیت، چونکی دێ ل گۆرەی کورسیێن جڤاتا نوونەران ھێنە بەلاڤکرن”.

مفایێن ساخلەمی یێن حلیکا کەسک

07/03/2016 11:45

1738

ئەڤرۆ نیوز:
نێزیکە دێ حلیکا کەسک وەکو باھیڤ تەڕکان گەھیت کو ئێک ژ فێقیێن بھارێ یێ پری خوویێن کانزایی یە، ئەڤ حلیکە ئێک ژ ژێدەرێن سروشتیە یێن قەبارەکێ مەزن یێ “پوتاسیومی” و تێنێ ددەتە لەشێ مرۆڤی.
ئێک ژ نۆشدارێن تایبەتمەند دیار دکەت کو حلیکا کەسک ژ وان فێقیانە یێن تێھنا مرۆڤی دکوژن و گولچیسکان ب بزاڤ دئێخیت.
ئێک کتا حلیکا کەسک چار سعرێن گەرمێ یێن تێدا، کو ئەو دبیتە تافیلکەرەک بۆ لەشی و نەخۆشیان دەردئێخیت، ئەڤ حلیکە یا دەولەمەندە ب خوویێن کانزایی وەکو پوتاسیۆم، کو یا ھاریکارە نەھێلانا خوویێن سودیۆمی د ناڤ لەشی دا ئەوێن ب زیان بۆ دەمارێن خوینێ. بەلێ یا باش ئەوە بەری خوارنێ ڤان حلیکان نەخۆن چونکو دێ بیتە ئەگەرێ بزەحمەت ئێخستنا ھەرەسانا خوارنێ.
ل دووڤ گۆتنێن تایبەتمەندان حلیکا کەسک ھەمی جۆرێن ھەودانان ناھێلیت و ئەڤە بۆ نەخۆشێن رۆماتیزمێ یا باشە چونکو ھاریکاریا وان دکەت کو بەرھنگاریا ھەودانان بکەن، ھەکە گەلەک ڤان حلیکان بخۆن دلی ژ نەخۆشیان دپارێزیت و ناھێلیت فشارا خوینێ بلند ببیت.
ھەروەسا حلیکا کەسک دەماران تەنا دکەت و خوینێ ژ کەرستێن ژەھراوی پاقژ دکەت.

بھایێ پانزینێ ئەرزان بوو و کریا ڤەگوھاستنێ وەکو خوەیە

07/03/2016 11:30

316

ئەڤرۆ نیوز:
بەری بۆھایێ پانزینێ ئەرزان ببیت کریا ھاتنوچوونێ ژدەڤەرا بەرواری بالا بۆ دھوک و زاخۆ و جھێن دی ھەتا رادەکێ یێ گران بوو، بەلێ پشتی بۆھایێ پانزینێ ئەرزان ژی بووی، ئەڤە دەمەکە کریا ھاتنوچوونێ وەکو بەرێ ژ نەفەران دھێتە وەرگرتن، لەوما خەلکێ ڤێ دەڤەرێ دخوازن پشتی بۆھایێ پانزینێ ئەرزان بووی، کریا ھاتنوچوونێ ژی ئەرزان ببیت.
وەلاتیەک ب ناڤێ (ئارام محەمەد)بۆ ڕۆژناما ئەڤرۆ دبێژیت” پشتی ئەڤ ڕەوشا ئالۆز ل ھەرێمێ پەیدا بووی کو بۆ دەمەکێ درێژ مووچە ناھێنەدان و ھەروەسا مووچە ھاتیە ب نیڤی کرن و ڤێ چەندێ کارتێکرنەکا نەرێنی ل سەر ڕەوشا مە کریە، نوکە بۆھایێ پانزینێ ژی ئەرزان بوویە، بەلێ کریا ھاتنوچوونێ وەکو خوە یا مای و بۆ ڤی دەمی کریا ھەر نەفەرەکی 10 ھزار دینار ژ بەرواری بالا بۆ دھوکێ و زاخۆ گەلەکن”.
ئارامێ زێدەتر گۆت” ل دەڤەرا مە ھەتا نوکە ترومبێلێن تایبەت و تەکسی کارێ نەفەران دکەن و ھێشتا کۆستەر و ڕەف ل ڤێ دەڤەرێ کارناکەن، ھەکە ئەو ھەبان، دا کریا ھاتنوچوونێ ئەرزانتر لێ ھێت، دخوازین جھێن شولەژێ بۆمە چارەکێ ببینن و مە ژڤێ ڕەوشێ قورتال بکەن”.
فەوزی موسا شۆفێرە ل ھێلا بەرواری بالا – زاخۆ کاردکەت بۆ ئەڤرۆ دبێژیت” ھەتا نوکە گەراج و ھێلا ڤەگۆھاستنێ ژ زاخۆ بۆ بەرواری بالا نینە، نە سەندیکا ڤەگۆھاستنێ ل زاخۆ و نە حھێن شۆلەژێ ئەڤ چەندە چارە نەکریە و ھندەک شۆفێر یێن ھەین ل سەر ڤێ ھێلێ کاردکەن، ژ بەر کو ب تنێ ھێلا ڤەگۆھاستنێ ژ زاخۆ بۆ بێگۆڤا یا ھەی و ژ وێرێ وێڤە نینە، لەوما شۆَفێر ژی ب کەیفا خۆ کریا ھاتنوچوونێ ژ نەفەران وەردگرن، ھەر چەندە ئەم حەز دکەین ھاریکاریا خەلکێ بکەین، بەلێ ب تنێ پانزین یێ ئەرزان بووی، بھایێن کەلوپەلێن ترومبێلان و ھەموو تشتێن دی وەکو خوە یێن ماین و ئەرزان نەبووینە، ھەر دەمێ کەلوپەلێن ترومبێلان ھاتنە کێمکرن، ئەم ژی دێ کریا ھاتنوچوونێ کێم کەین”.
رێبەر ھەدێنەیی شۆفێرەکێ دی یە کو ل سەر ھێلا دھۆک – بەرواری بالا کاردکەت، دبێژیت” دەمێ پانزینا گران ژی، مە ھەر 10 ھزار دینار ژ نەفەری وەردگرتن و ھەر چەندە پانزینا ئەرزان بووی ژی، بەلێ ھەر ئەم ڤی گۆژمێ پارەی ژ ھەر نەفەرەکی وەردگرین، ھەرچەندە ھندەک شۆفێر یێن ھەین نوکە ژی پتر ژ 10 ھزار دیناران ژ نەفەری وەردگرن، دبیت ئەڤ پارە بۆ نوکە گەلەک ژی بن، بەلێ پتریا کەلوپەلێن ترومبێلان دگرانن و ھەر بازار وەکو خوەیە و گەلەک ئەرزان نەبوویە، چونکی ترومبێل و کریا ھاتنوچوونێ ل سەر پانزینێ ب تنێ نینە”.
لەتیفا عەبدی دبێژیت” بۆ چوونا نەخوەشخانا و کلینیکێن نوژداران و گەلەک کارێن دی پێدڤی دبین کو ھەیڤانە چەند جاران قەستا باژێری بکەین، بەلێ نوکە ژی ھێشتا کریا ھاتنوچوونێ یا گرانە و ئێدی بۆمە دەست نادەت ب ڤی ڕەنگی ئەم بھێن و بچین، ژ بەر کو مە داھاتەکێ کێم یێ ھەی و مە پێ چێنابیت ئەم پارێ خوە ھەموویێ بۆ کریا ترومبێلان بدەین، دڤێت شۆفێر ب خوە د حالێ خەلکی بگەھن و کریا ھاتنوچوونێ کێم بکەن”.

نيشاندان 1...1,000 2,000 2,9702,9712,972 3,970...4,207 زێده‌تر

لاپه‌ر 2,971 ژ 4,207