ئه‌ڤرو نیوز،بارزان مزوورى
ل پێنج شه‌مبیا بورى كۆمپانیا گولف كیستون پترولیوم راگه‌هاند ل سالا 2015 دا 135 ملیون دولارا زیان ییێن پێ كه‌فتین و به‌رهه‌م ئینانا نه‌فتا خاڤ ل كێلگه‌هێن شێخان به‌ره‌ڤ كێم بونێ دچیت.
كومپانیا گولف كیستون د به‌یاننامه‌كێ دا به‌لاڤكریه كو ل 4 ئادارا 2016 بكوژمێ 15 ملیون دینارا شایستێن دارایى ژ حكومه‌تا هه‌رێمێ وه‌رگرتینه .
ئه‌ڤرۆ نيوز:
ئه‌ڤرۆ رۆژا ئه‌ينى بهايێ نه‌فتێ بلندبوو و بهايێ به‌رميله‌كا برێنت ل ده‌مژمێر 17:00 ب 42 دولار و 24 سه‌نتان هاته فرۆتن، گرانبوونا بهايێ به‌رميلا نه‌فتێ پشتى دياركرنا ژڤانێ كومبوونا به‌رهه‌مئينه‌رێن نه‌فتێ هات كو برياره ل 17/4/2016 ل ده‌وحه كوم ببن بۆ دانوستاندن ل دۆر چاره‌كرنا بهايێ ئه‌رزانبوونا نه‌فتێ.
ئه‌ڤرۆ نيوز:
دوهى فیلیپ هامۆند وه‌زيرێ ده‌رڤه يێ بريتانيا ل گه‌ل سه‌رۆك بارزانى كومبوو و د كۆنگره‌يه‌كێ رۆژنامه‌ڤانى دا به‌حسێ ره‌وشا دارايى يا هه‌رێما كوردستانێ كر و پشته‌ڤانيا خوه بۆ ده‌ربازكرنا هه‌رێمێ ژ ڤێ قه‌يرانێ كر و راگه‌هاند: ژبلى داعش، ئه‌رزانبوونا بهايێ نه‌فتێ ژى دوژمنه‌كێ دى يێ كوردستانێ يه.
ئه‌ڤرۆ نیۆز، قائید میرۆ
مه‌غره‌بیا ئه‌ڤرۆ چه‌كدارێن داعش هێرشكره سه‌ر ناحیا گوێڕ ل رۆژئاڤایێ هه‌ولێرێ و ژلایێ هێزێن پێشمه‌رگه‌ی هێرش هاته شكاندن.
جه‌مال جه‌لال، جێگرێ به‌رپرسێ میحوه‌رێ گوێڕ ب ئه‌ڤرۆ نیۆز راگه‌هاند” مه‌غره‌بیا ئه‌ڤرۆ دگه‌ل رۆژئاڤابوونێ چه‌كدارێن گروپا تیرۆرستیا داعش لسه‌ر پرا ناحیا گوێڕ هێرشی سه‌ر هێزێن پێشمه‌رگه‌ی كر و شه‌ڕۆ پێكدادان ناڤبه‌ر پێشمه‌رگه و داعش چێبوو.
جه‌مالی گۆتژی” پێشمه‌رگه‌ی هێرشا داعش تێكشكاند و چه‌كدارێن داعش نه‌چاربوون پاشڤه بچن، به‌لێ ژبه‌ركو دنیا تاریبوو هژمارا كوشتیێن داعش نه‌هاتیه زانین، پشتی هێرشی فڕۆكه‌یێن هه‌ڤپه‌یمانان چه‌كدارێن داعش ب گرانی بوردۆمانكرن.
ئەڤرۆ نیوز،زنار تۆڤی:
ئەڤرۆ رۆژا پێنجشەمبی بهايێ به‌رمیلا نەفتێ نێزیكی 41 دۆلاران بوویه و ب گه‌هشتنا وی نرخی ئەڤ سالە ئاستێ نەفتێ گەهشتیە مه‌زنترین ئاستێ فرۆشتنا نەفتێ د سالا 2016 دا.
د سه‌ره‌ده‌رییێن ئه‌ڤرۆ یێن بازارێن په‌ترۆلێ خاما برێنت 51 سه‌نتان بلندبوویه و هه‌ر به‌رمیله‌كا وی جۆری گه‌هشتییه40 دۆلار و 84 سه‌نتان و خاما ئه‌مریكی ژی 62 سه‌نتان بلندبوو یە و گه‌هشتیه 39 دۆلار و 8 سه‌نتان.
هەروەسا بلندبوونا نرخێ نەفتێ د ده‌مه‌كی دانه وه‌لاتێن به‌رهه‌م هێنه‌رێن نەفتێ ل به‌ره ل 20 ڤێ هەیڤێ ل سه‌ر سنۆرداركرنا هنارتنا په‌ترۆلێ كۆمببنە ڤە،ژ پێخەمەت بشێن نرخێ نەفتێ بگەهیننە ئاستەکێ بلندتر ژ نوکە.
ئه‌ڤرۆ نیوز ، نه‌وزاد زاده هلۆرى:
وه‌زاره‌تا چاندن و ژێده‌رێن ئاڤى یا حكومه‌تا هه‌رێما كوردستانێ ژڤانێ قه‌ده‌غه‌كرنا راڤه ماسیان ل هه‌رێما كوردستانێ راگه‌هاند.
ل گوره‌ى راگه‌هاندنه‌كا رێڤه‌به‌ریا گشتى یا سامانێن ئاژه‌ل و ڤیته‌رنه‌رى یا وه‌زاره‌تا چاندن و ژێده‌رێن ئاڤى یا حكومه‌تا هه‌رێما كوردستانێ ژڤانێ قه‌ده‌غه‌كرنا راڤه‌یا ماسیان ل هه‌موو پارێزگه‌هێن سه‌ر ب هه‌رێما كوردستانێ ڤه هاته دیاركرن ، و ل پارێزگه‌ها دهوك و به‌نداڤا موسل قه‌ده‌غه‌كرنا ماسیان دێ ل رۆژا 1/4/2016 ده‌ستپێكه‌ت و هه‌تا رۆژا 20/6/2016 یا به‌رده‌وام بیت ، و دیسان ل پارێزگه‌هێن سلێمانى و هه‌ولێر و ئیداره‌یا گه‌رمیان ژى دێ لرۆژا 20/3/2016 ده‌ستپێكه‌ت و هه‌تا رۆژا 20/6/2016 یا به‌رده‌وام بیت.
دراگه‌هاندنێ دا زێده‌تر هاتیه : ( راڤكرنا ماسیان ب كوم ب هه‌موو شێوه‌یێن وه‌كو تورێن هویر و كاره‌ب و مادده‌یێن ژه‌هراوى و بومبه‌یان هاتینه قه‌ده‌غه‌كرن و پێدڤى یه هه‌ر كه‌س پێگیربیت.
ئەڤرۆ نیوز،زنار تۆڤى:
ئه‌ڤ ساله تا ڤى ده‌مى رێژه‌یه‌كا باش یا بارانێ ل ناحیا كانى ماسێ و گوندێن ده‌وروبه‌ر باریه و هۆبا چاندنێ ل كانى ماسێ بۆ ئه‌ڤرۆ نیوز دایه دیاركرن:كو ل 24 ده‌مژمێرێن بورى 65 میلێن بارانێ ل كانى ماسێ بارینه و دهێته پێشبینى كرن كو هه‌تا ئه‌ینیێ باران بارین ل ڤێ ده‌ڤه‌رێ یا به‌رده‌وام بیت،هه‌روه‌سا ل چیایان و چه‌ند گوندان ژى به‌فر باریه.
مسته‌فا ئه‌حمه‌د ژ هۆبا چاندنێ ل كانى ماسێ زێده‌تر بۆ ئه‌ڤرۆ نیوز دبێژیت:د ماوێ 24 ده‌مژمێرێن بورى دا ل ناحیا كانى ماسێ 65 ملیمێن بارانێ بارینه و سه‌رجه‌مێ گشتى یێ باران بارینێ ل كانى ماسێ ئه‌ڤ ساله گه‌هشتیه 940 ملیمان و هه‌تا دوماهیا ڤێ حه‌فتیێ ژى باران بارین دێ یا به‌رده‌وامبیت و دیاركر ژى:پار تا ڤى ده‌مى ل كانى ماسێ 795 ملیمێن بارانێ بارى بوون و ئه‌ڤ ساله پتر ژ سالا بورى باران باریه و ئه‌ڤ چه‌نده ژى بوویه جهێ دلخۆشیا جوتیاران و هه‌روه‌سا مفایه‌كێ مه‌زن دێ گه‌هینیته به‌رهه‌مێ چاندنێ ژى ل ڤێ ده‌ڤه‌رێ.
نيشاندان