ئەڤرۆ نيوز:
ژێدەرێن ئاگەھدار ئاشکراکرن، ھێزا بژارەیا ئەمریکی بەرھەڤیێن خوە دکەت، بۆ شەڕێ چەکدارێن داعشێ ل عیراقێ.
ل گۆڕ تۆڕا (CNN) یا ئەمریکی، ھێزا ئەمریکی د حەفتیێن بۆری دا، ڕاھێنانێن سەرەکی ل دۆر دامەزراندنا تۆڕا پێزانینان و ھەماھەنگیا ل گەل ھێزێن عیراقێ و پێشمەرگەی دکرن، ب ھەمان ستراتیژیا ھێزا تایبەت یا بەری نوکە ل عیراقێ و ئەفغانستانێ ھاتیە بکارئینان.
ل دووڤ ھندەک ناڤەندێن لەشکری و سیاسی یێن ئەمریکی، دەستپێکرنا پرۆسا لەشکری یا ئەسمانی دژی چەکدارێن داعشێ ل مووسل و رەقە یا سوری، دبیت ببیتە دەرگەھێ ڤەکرنا لەزاتیا ب جھئینانا وێ پرۆسا لەشکری.
بەری نوکە ئەمریکا ل گۆڕ ژێدەرێن ئوردنی ئاشکراکربوو، باراک ئۆبامای پەیوەندی ب شاھێ ئوردنێ (شاهـ عەبدوللا یێ دویێ) کریە و ئاگەھدار کریە کو شەڕێ ئەردی دژی داعشێ ل مووسل و رەقە ل ڤان نێزیکان دێ دەستپێکەت.
دبیت ل دووڤ وان پێزانینێن ھێشتا دووپات نەبووین، ئەو ھێزا بژارە یا ئەمریکی کارێن لەشکری ل ژێریا مووسلێ بکەت، ددەمەکی دا کو چەکدارێن داعشێ ل پارێزگەھا ئەنبارێ ب ھێزبووینە ب سەدەما شەرێن چڕ ل گەل لەشکرێ عیراقێ.
ھەروەسا ل دووڤ وان پێزانینێن ل وەلاتێ ئوردنێ ھاتینە بەلاڤکرن، ھێزا ھەڤپەیمانیا نێڤدەولەتی کو سعودیە و ئوردن و فەرنسا و ھژمارەکا دی یا وەلاتان دێ پشکدارن د وی شەڕی دا.
ژئالیەکێ دیڤە، بەرپرسێن وەزارەتا بەرەڤانیا ئەمریکی، نەڤیا چو پێزانیان دەربارەی وێ ھێزا بژارەیا ئەمریکی و کارێ پێ ھاتیە ڕاسپاردن بەلاڤ بکەت. کولۆنێل کریس گافر بۆ ڕۆژنامەڤانان گۆت” دەمێ ئەم بەرھەڤ دبین بۆ ڕاگەھاندنا وێ پرۆسا گرنگ، دێ بەلاڤ کەین، نوکە من چو کومێنت ل دۆر وێ پرۆسا لەشکری نینن، یان دەڤەرێن ئەو دێ کارێ لەشکری تێدا ئەنجامدەن.
ئه‌ڤ هێزا بيانى دێ پشکداریێ د شەڕێ مووسلێ دا دکەت
نيشاندان
