ئه‌ڤرۆ نیوز:
موقته‌دا سه‌در سه‌رۆكێ بزاڤا سه‌در د به‌یاننامه‌كێ دا داخاز ژ لایه‌نگرێن بزاڤا خوه و هه‌موو وه‌لاتیێن عیراقێ كریه، رۆژى ئه‌ینیا بهێت، ل باژێرێ به‌غدا و هه‌موو ده‌ڤه‌رێن عیراقێ خونیشادانه‌كا ملیونى ساز بكه‌ن و روو ب روو گه‌نده‌لكار و زولما سته‌مكاران ببن.
موقته‌دا سه‌در سه‌رۆكێ بزاڤا سه‌در داخاز ژ خونیشادانان كریه كو ب ره‌نگه‌كێ ئاشتیانه خونیشادانان بكه‌ن و داخازا چاره‌كرنا قه‌یرانا دارایى و ره‌وشا ئێمناهیا عیراقێ بكه‌ن.
ئه‌ڤرۆ نیوز:
سه‌فین دزه‌یى په‌یڤدارێ حوكمه‌تا هه‌رێما كوردستانێ راگه‌هاند، ئه‌و په‌كه‌كێ به‌رپرسیار دزانن به‌رامبه‌ر ته‌قاندنا بوریا نه‌فتا هه‌رێما كوردستانێ و به‌رى چه‌ند رۆژان په‌یڤدارێ كه‌جه‌كێ زور ب ئاشكرا گه‌ف ژ رێككه‌فتنا د ناڤبه‌را هه‌رێما كوردستانێ و توركیا كریه ب تایبه‌ت د بیاڤێ غازا سروشتى دا و گۆت” مه هوشدارییا دایه په‌كه‌كێ و مه یێن ئاگه‌هداركرین كو ئه‌و كارێن ئه‌و دكه‌ن یێ شاشه و ده‌ستدرێژیكرنه بۆ سه‌ر قویتى خه‌لكى.
سه‌فین دزه‌یى ئاماژه ب وێ یه‌كێ كر كو كارێن وان یێت ده‌ستپێكى دابینكرنا مووچێ فه‌رمانبه‌رانه و گۆت” پشكه‌ك ژ قه‌یرانان ده‌رڤه‌ى ده‌ستهه‌لاتا هه‌رێما كوردستانێ نه.
رۆژا 17 ڤێ هه‌یڤێ ژ ئه‌گه‌رێ په‌قاندنا بوریا نه‌فتا هه‌رێما ل سه‌ر ئاخا توركیا، پرۆسا هنارتنێ بۆ به‌نده‌رێ جه‌یهان هاته راوه‌ستاندن و هه‌تا نوكه نه‌هاتیه چێكرن كو رۆژانه هه‌رێم 620 هزار به‌رمیلێن نه‌فتێ دهنارتن.
ئه‌ڤرۆ نیوز:
په‌رله‌مانتارا كورد ڤیان ده‌خیل خه‌لاتێ نێڤده‌وله‌تى یێ به‌ره‌ڤانیكرن ژ مافێن ئافره‌تان یێ سالا 2016ێ وه‌رگرت.
خانما ڤیان د چارچوڤێ پشكداریكرنێ د كۆنگرێ گۆپیتكا جنێڤ دا یێ مافێن مرۆڤ و دیمۆكراسیێ بۆ سالا 2016 خه‌لاتێ نێڤده‌وله‌تى یێ به‌ره‌ڤانى و پارێزه‌ریێ ژ مافێن ئافره‌تان وه‌رگرت و په‌یڤه‌ك پێشكێشكر و ئاماژه دا وێ چه‌ندێ كو ئه‌و ژ پێخه‌مه‌ت به‌ره‌ڤانیكرنێ ژ مافێن هه‌موو ئافره‌تێن زولم لێ هاتیه‌كرن د ئاخڤیت.
ئه‌ڤرۆ نيوز:
د ئۆپه‌راسیۆنه‌كا تایبه‌ت دا كو د ناڤ سنوورێ ژێر ده‌ستهه‌لاتا داعش دا ل ده‌ڤه‌ره‌كا نێزیكى مووسلێ هاتیه ئه‌نجامدان، هێزه‌كا تایبه‌تا دژى تیرۆرێ 17/2/2016 شیایه ژنه‌كا سویدى ژ ده‌ستێن تیرۆرستێن داعش رزگار بكه‌ت.
د راگه‌هاندنه‌كێ دا ئه‌نجۆمه‌نێ ئاسایشا هه‌رێما كوردستانێ ئاشكرا كر كو د ئۆپه‌راسیۆنه‌كا تایبه‌ت دا كو د ناڤ سنوورێ ژێر ده‌ستهه‌لاتا داعش دا ل ده‌ڤه‌ره‌كا نێزیكى مووسلێ هاتبوو ئه‌نجامدان هێزه‌كا كوردى یا دژى تیرۆرێ شیان ژنه‌كا سویدى ب ناڤێ (مارلین ستیڤانى نیڤه‌رلاین) د ژیێ 16 سالیێ دا رزگار بكه‌ن.
ئه‌ڤرۆ نیۆز، رێوار مزیرى:
رێڤه‌به‌ریا گشتى یا په‌روه‌ردێ ل پارێزگه‌ها دهۆكێ، رێڤه‌به‌ریا په‌روه‌ردا دهۆك رۆژئاڤا، پشكا چالاكیێن قوتابخانان ئه‌ڤرۆ 23/2/2016 ێ ل ده‌مژمێر 10 ى سپێدێ پێشانگه‌ها شێوه‌كارى و كارێن ده‌ستى بۆ قوتابخانێن قووناغێن بنه‌ره‌ت و ئاماده‌یى ل پشكا چالاكیێن قوتابخانا رۆژئاڤا ڤه‌كر.
كه‌ڤر كه‌ما، به‌رپرسێ پشكا چالاكیێن قوتابخانا رۆژئاڤا بۆ ئه‌ڤرۆ نیۆز دیار كر كو سێ هزار و 902 قوتابى ژ 52 قوتابخانێن قووناغێن بنه‌ره‌ت و ئاماده‌یى پشكدارى ڤێ پێشانگه‌هێ ببوون و گۆت: “ل دووماهیا پێشانگه‌هێ كارێن قوتابیان ژ لایێ لژنه‌كا بسپۆر ڤه هاتنه هه‌لسه‌نگاندن و سێ قوتابخانێن سه‌ركه‌فتى یێن ئێكێ یێن قووناغێن بنه‌ره‌ت و ئاماده‌یى هاتنه خه‌لاتكرن”.
ئه‌نجام ب ڤى ره‌نگى بوون:
سه‌ركه‌فتى یێن قوتابخانێن قووناغا (1 هه‌تا 6)ێ بنه‌ره‌ت
1-قوتابخانا كنێر 88 خال
2-قوتابخانا خه‌تیر 82 خال
3-قوتابخانا راژان 76 خال
سه‌ركه‌فتى یێن قوتابخانێن قووناغا (7،8،9)ێ بنه‌ره‌ت
1- قوتابخانا كه‌زان 89 خال
2- قوتابخانا ناز 85 خال
3- قوتابخانا نى ره‌نگ 82 خال
سه‌ركه‌فتى یێن قوتابخانێن قووناغا ئاماده‌یێ
1- ئاماده‌یا دهۆك یا كچان 90 خال
2- ئاماده‌یا كه‌ژین یا كچان 87 خال
3- ئاماده‌یا سه‌فین یا كچان 86 خال
قووتابیێن پلێن ئێكێ ب ده‌ست خوه ڤه ئیناین
1- دوعا محه‌مه‌د/ قوتابخانا چنار
2- دنیا سه‌عید/ قوتابخانا ئازا
3- زنار ئه‌حمه‌د/ قوتابخانا وه‌رار
ئەڤرۆ نیوز،زنار تۆڤی:
وه‌زاره‌تا په‌روه‌ردا حكومه‌تا هه‌رێما كوردستانێ دا رادگه‌هینیت کو بێهنڤه‌دانێن بوهارێ یێن قوتابیان دێ وه‌ك خوه مینن و چ گورانكاری تێدا ناهێته كرن.
وه‌زاره‌تا په‌روه‌دێ د به‌یانه‌كێ دا ئاشكه‌را كر، بۆ بێهنڤه‌دانێن بوهارا ئه‌ڤ ساله یێن قوتابیان، هه‌روه‌سا وان بێهنڤه‌دانێن دكه‌ڤنه د وه‌رزێ خواندنێ دا، گورانكاری لسه‌ر نه‌هاتینه كرن و دێ وه‌كو خۆ مینن.
هه‌روه‌سا دیاركر، وه‌زاره‌تا په‌روه‌ردێ مامۆستا و قوتابیان ئاگه‌هدار دكه‌ت كو بێهنڤه‌دانا بوهارێ دێ ژ 11 ئاداراێ تا 26 ئادارێ بیت، واته ل 26 ئادارێ دێ ده‌واما فه‌رمی ده‌ست پێ هێته كرن.
ئه‌ڤرۆ نیوز:
وه‌زاره‌تا ساخله‌میێ د راگه‌هاندنه‌كێ دا ئاماژه ب وێ یه‌كێ كریه پشتى كو وه‌زاره‌تا وان و سه‌ندیكا نوشدارا و كارمه‌ندێن ساخله‌میێ ئه‌ڤرۆ ل گه‌ل سه‌رۆك حوكمه‌تێ و جێگرێ وى كومبووین، بریار هاته دان پێداچوون ب خشتێ پاشكه‌فتنا مووچێ نوشدار و كارمه‌ندێن ساخله‌میێ بهێته كرن و د ڤێ هه‌یڤێ دا پشكه‌ك ژ داهاتێ ناڤخو ب كارمه‌ند و نوشدارێن ساخله‌میێ ل جهێن هه‌ستیار بهێته دان.
ئه‌ڤرۆ نيوز:
فرانك به‌یكه‌ر بالیۆزێ بریتانیا ل عیراقێ ئه‌ڤرۆ ل گه‌ل مه‌سعود بارزانى سه‌رۆكێ هه‌رێما كوردستانێ كۆم بوو و به‌رهه‌ڤیا خوه بۆ چاره‌كرنا قه‌یرانا داراییا هه‌رێما كوردستانێ ده‌ربرى.
د كومبوونێ دا، بالیۆزێ بریتانیا ل عیراقێ به‌رهه‌ڤیا وه‌لاتێ خوه بۆ ده‌ربازكرنا قه‌یرانا داراییا هه‌رێمێ ب رێیا راوێژ و هنارتنا تیمێن ته‌كنیكى یێن بسپور دیاركر.
سه‌رۆك بارزانى و فرانك به‌یكه‌ر به‌حسێ كۆنفرانسێ ئاسایشا میونشن كرن، هه‌روه‌سا به‌حسا پێنگاڤێن حكومه‌تا هه‌رێما كوردستانێ د روو ب رووبوون و چاره‌كرنا قه‌یرانا دارایى دا كرن، هه‌روه‌سا دووماهى پێشهاتێن سیاسى و ئێمناهیێن ده‌ڤه‌رێ و عیراقێ و شه‌رێ داعش شروڤه‌كرن و دیسا به‌حسێ به‌رهه‌ڤیێن ئوپه‌راسیونا ئازادكرنا مووسل و قوناغا پشتى داعش كرن.
ئەڤرۆ نیوز ، نەوزاد زادە ھلۆری:
د دەمەکێ دا کو ئەنجومەنا وەزیرێن کوردستانێ ل رێکەفتی 3/1/2016 بریار دایە کو ئەو فەرمانبەر و کارمەندێن کو ترومبێلێن گشتیێن حکومەتێ کو ب تایبەتی بو ھاتینە تەرخانکرن و نەیێن خزمەتگوزاری نە ژ ئەڤرۆ وێڤە دڤێت ئەو بخوە ھەموو مەزاختیێن وان ترومبێلان ب ستویێ خوڤە بگرن یان ژی ترومبێلێن خوە بزڤرینن ڤە بو حکومەتێ بەلێ دەستکاری د وێ بریارێ دا ھاتیەکرن.
لگورەی ئەوان زانیاریێن کو ژ ئەنجومەنا وەزیران دەست ” باس ” کەفتینە بریارەک د ھەبوونێ دایە کو وەزیر و پارێزگار و رێڤەبەرێن گشتی نەکەڤنە بن ئەوێ بریارێ )
لگورەی ئەوێ بریارێ ترومبێلێن حکومەتێ ئەڤێن ژلایێ وەزیران و رێڤەبەرێن گشتی دێ مینن و ھەموو مەزاختنێن وان ژی دێ لسەر حکومەتێ بن.
( باس ) پەیوەندی ب دکتور نوری عوسمان سەروکێ فەرمانگەھا ھەماھەنگی و دووڤچوونێ ل سەروکاتیا ئەنجومەنا وەیران کر ، بەلێ ناڤبری ئەو یەک رەتکر کو لسەر ڤی بابەتی لێدوانەکێ بدەتن.
لگورەی زانیارێن ” باس ” پتری 27 ھزار ترومبێلێن حکومی ل ھەرێما کوردستانێ ھەنە و ژ وێ ھژمارێ ژی 10 ھزار ترومبێلێن حکومەتێ ژلایێ کارمەند و بەرپرسێن فەرمانگەھێن حکومەتێ نە و پشتی دەوامێ دگەل خوە دبەنە مال و سالانە ملیاران دیناران ل چێکرن و بەنزینێ دمەزێخن.
دکتور فەرسەد سوفی پەرلەمانتارێ پارتی ل پەرلەمانێ کوردستانێ بو ” باس ” دیارکر کو ئەو بریارا حکومەتێ یاکو دیاردکەت دێ مەزاختنێن ترومبێلێ لسەر وی کەسی بن کو ترومبێل لدەڤ وی یە مە ئەو بریار ب باشی پەسەندکریە و داخوازێ ژی ل حکومەتێ کریە کو جوداھیێ نەکەت و ئەڤ بریارە بو ھەمووان بیت ھەر ژ وەزیران ھەتا فەرمانبەرێ ئاسایی و ھەروەکو خوە بجھبکەت
فەرسەد سوفی ژ وێ یەکێ دلگرانە کو جوداھی د بریارێ بھێتەکرن و گۆت ژی : ( ئەز دگەل وێ یەکێ نیمە کو وەزیر ژ وێ بریارێ بھێنە ڤەدەرکرن ژبەرکو ئەڤ یەک دێ بیتە سەدەم کو ئەڤ بریارە بو ھەمووان نەبیت و جوداکاری ھەبیت )
پەرلەمانتارێ ناڤبری ل وێ باوەرێ یە ژبلی ترومبێلێن خزمەتگوزاری نابیت چوو ترومبێلێن دن یێن حکومەتێ کو ژلایێ کارمەندان و پلەیێن بلندێن حکومەتێ نە مەزاختنێن وان لسەر حکومەتێ بن.
گوت ژی : ( ژ سەروکێ حکومەتێ ھەتاکو فەرمانبەرێن ئاسایی نابیت کەس ژ وێ بریارێ بھێتە ڤەدەرکرن و ب پشتراستیڤە دێ دووڤچوونێ لسەر ئەڤێ بریارا حکومەتێ کەین و دێ کار لسەر کەین و نابیت چوو کەس بھێتە ڤەدەرکرن.
نيشاندان