ئەڤرۆ نیوز:
بەرپرسێ راگەھاندنێ ل سەرۆکاتیا باژێرڤانیا دھۆکێ ئاشکرا کر کو سەرۆکاتیا باژێرڤانیا دھۆکێ چەندین پلان و پرۆژێن باش ھەنە ژبۆ زێدەکرنا رێژا کەسکاتیێ ل ناڤا باژێرێ دھۆکێ و د ڤی واری دا رێڤەبەریا ئەندازەیا پارکان کو سەر ب سەرۆکاتیا باژێرڤانیا دھۆکێ ڤەیە بەردەوام بزاڤێ دکەت ژ بۆ زێدەکرنا رێژا کەسکاتیێ ل ناڤا سەنتەرێ باژێرێ دھۆکێ و دەروبەران.
ئیسماعیل مستەفا بەرپرسێ راگەھاندنێ ل سەرۆکاتیا باژێرڤانیا دھۆکێ بۆ رۆژناما ئەڤرۆ دیار کر ژی کو رێڤەبەریا ئەندازەیا پارکان ب درێژاھیا نێزیکی (12) کیلومەتران ناڤەندا جادا بارزان نووژەن کریە و رێژا ئەنجامدانا پرۆژەی ھەتا نوکە 95% کار د قووناغا بەلاڤکرنا خیزێ چاندنێ و ھەروەسا د راکرنا کاشیێ شکەستی دایە.
بەرپرسێ راگەھاندنێ ل سەرۆکاتیا باژێرڤانیا دھۆکێ گۆت ژی “ناڤەندا جادێ دێ ب سیستەمێ چپکان (ئوتوماتیک) ھێتە ئاڤدان، کو کەسکاتی پێک دھێت ژ فریزی و گول و داران و ئەڤ پرۆژە مفایەکێ مەزن دێ گەھینیتە وەلاتیان ژ بۆ پاقژیا ژینگەھێ، ھەروەسا روویەکێ شارستانی دێ دەتە باژێری”.
ل دووماھیێ ئیسماعیل مستەفای گۆت “ھەر گەشتیارەکێ قەستا دھۆکێ بکەت دێ سەرنجا وی ھێتە راکێشا، دیسا ئەگەرەکە ژبۆ زێدەکرنا رێژا گەشتیاران ل باژێرێ دھۆکا رەنگین، زێدەباری کو کەسکاتی دەروونێ مروڤی ئارام دکەت”.

ئەڤرۆ نیوز:
رێڤەبەرێ پیوەندیان و پێکڤەژیانا ئاینان ل وەزارەتا ئەوقاف و کاروبارێن ئایینی یا حوکمەتا ھەرێما کوردستانێ دیار کر، وەزارەتا ئەوقافێ لژنەک بۆ دەستنیشانکرن و سزادانا وان مامۆستایێن ئایینی پێکئینایە، یێن خەمساریێ د بابەتێ روو ب رووبوونا تیرۆرێ دا دکەن و گەنجان ھانددەن کو بچنە ناڤ داعش و گۆت: “ھژمارەکا مامۆستایێن ئایینی ژ گۆتاربێژیێ ھاتینە ڕاگرتن”.
مەریوان نەقشبەندی، رێڤەبەرێ پیوەندیان و پێکڤەژیانا ئاینان ل وەزارەتا ئەوقاف و کاروبارێن ئایینی یا حوکمەتا ھەرێما کوردستانێ ڕاگەھاند، ئەو لژنە ھاماھەنگیێ د گەل وەزارەتا پێشمەرگەی و ھێزێن ئەمنی دکەت، ئەرکێ وێ ژی دەستنیشانکرن و سزادانا وان مامۆستایێن ئایینیە، یێن خەمساریێ د بابەتێ روو ب رووبوونا تیرۆرێ دا دکەن و گەنجان ھانددەن کو بچنە ناڤ داعش”.
ناڤھاتی بۆ خەندان گۆت: “لژنا وەزارەتا ئەوقافێ ل سەرانسەری ھەرێما کوردستانێ دێ کارکەت، ھەر کەسەکێ بیت، مامۆستایێ ئایینی، فەرمانبەر یان بەرپرسەکێ وەزارەتێ بیت، ڤەکۆلینێ دێ د گەل دا کەت”.
ئاشکرا ژی کر، وەکو پێنگاڤا ئێکێ، چەند مامۆستایێن ئایینی ژ گۆتاربێژیێ ھاتنە ڕاگرتن و گۆت: “پشتی سەرێ سالێ ژی ئەو لژنە ب رەنگەکێ بەرفرەھتر دێ کارێ خوە کەت، ئەو بەرپرسێن وەزارەتا ئەوقافێ یێن خەمساری کرین دێ سزا دەت”.
ھەتا نوکە سێ ئیمام و گۆتاربێژ ل ھەرێما کوردستانێ چووینە ناڤ داعش.

ئەڤرۆ نيوز:
سیروان بارزانی سەرپەرشتێ میحوەرێ گوێر ـ مەخمور یێ ھێزا پێشمەرگێ ھەرێما کوردستانێ راگەھاند، سالا 2016 سالا سەربخوەیا کوردستانێ یە، ھەروەسا دوپاتکر ل سالا بھێت دێ کیانەک بۆ کوردان ھێتە دروستکرن.
سەرپەرشتێ میحوەرێ گوێر ـ مەخمور راگەھاند، نھا ب دیتنا گەلەک ژ وەلاتێن جیھانێ و ب تایبەتی ئەمریکا و وەلاتێن ھەڤسووی زێدەباری وەلاتێ تورکیا ، پشتەڤانی و پشتگیریا سەربخوەیا ھەرێما کوردستانێ بھێتە کرن و دێ کەن.
سیروان بارزانی دوپاتکر، ریفراندۆم بۆ سەربخوەیا کوردستانێ و دروستکرنا دەولەتا کوردستانێ بھێتە کرن، کو خەونا دیرۆکیا مللەتێ کوردستانێ یە، ھەڤدەم داخوازا سەرۆکێ ھەرێما کوردستانێ بۆ ڤێ کێشێ ب دەرئەنجامێ ھەلوەشاندنا رێککەفتنا سایکس بیکو ل قەلەمدا، چونکی ل سالا 2016 رێک 100 سال بسەر وێ رێککەفتنێ دەرباز دبن، لەورا ئەڤ دەمە ب دووماھی ھاتنا تەمەنێ وێ رێککەفتنێ دھێتە زانین.
سیروان بارزانی ھەروەسا گۆت: پەیاما پیرۆز باھیا سەرۆک (مەسعود بارزانی) سەرۆکێ ھەرێما کوردستانێ بۆ سالا نوو دکەین، کو سالا سەبخوەیێ یە.
دیسا سیروان بارزانی ئەو چەندە ژی نەڤەشارەت، کو ھەموو ئەو شاندێن سەرەدانا مە دکەن، ھەمان بوچوونێن مە ھەنە سەبارەت ھەلوەشاندنا رێککەفتنا سایکس بیکو و دەربڕینا ھەست و ھەلویستێ ئەرێنی ھەمبەری پێشمەرگە و خەلکێ کوردستانێ.
ل دووماھیێ سیروان بارزانی بۆ ئاژانسا (ئەنادۆل) راگەھاند، کو ل دووماھی سەرەدانا شاندێ ھەرێمێ بۆ وەلاتێن ئەوروپا سۆزا بەردەوامیا ھاریکاری لەشکری بۆ ھەرێمێ داینە.