ئەڤرۆ نیوز:
سیرگێی لاڤرۆڤ وەزیرێ دەرڤە یێ روسیا راگەهاند کو ئەو دێ جارەکا دی ل گەل ئیرانێ و تورکیا ل دۆر چارەنڤیسێ سووریێ ب تایبەتی ژی ئالۆزیێن ڤێ دووماهیێ ل ئدلبێ کۆمبن و دڤێت تورکیا سۆزێن کو بەری نها داینە بجه بینیت.
وەزیرێ دەرڤە یێ روسیا ئەو یەک ژی دیار کر کو دڤێت ئۆپۆزسیۆنا سووریێ ب تەمامی خوە ژ گرۆپێن چەکدار و تیرۆرست دوور بکەت و تورکیا ژی دڤێت ژ بۆ هندێ هاریکار بیت، هەکە ئەو یەک نەهێتە کرن دێ جارەکا دی ئۆپەراسیۆنێن بۆ پاقژکرنا ئدلبێ ژ تیرۆرستان دەستپێ کەن.
ئەڤرۆ نیوز:
ڤەکۆلەرێ ناڤدار فەهیم تاشتەکین راگەهاند کو چەند بەرپرسێن وەزارەتا دەرڤە یا روسیا بۆ وی دیار کرینە کو ئێدی سەرۆکێ روسیا وەکو جاران پشتەڤانیێ ل بەشار ئەسەدی ناکەت و هەکە ئەسەد د دەمەکێ نێزیک دا هندەک داخوازیێن روسیا بجه نەئینیت رەنگە روسیا کار بۆ لادانا بەشاری ژی بکەت.
ڤەکۆلەر فەهیم تاشتەکین دیار دکەت کو روسیا داخواز ژ بەشاری کریە کو د زووترین دەم دا کارێ ئامادەکرنا دستوورەکێ نوو بۆ سووریێ ب دووماهی بینیت و ل گەل کوردان و ئالیێن دی یێن ئۆپۆزسیۆنێ ژی پرسێن هەی چارەسەر بکەت، لێ هەتا نها بەشاری داخوازیێن پوتینی قەبوول نەکرینە و ئەو یەک ژی بوویە ئەگەرێ هندێ کو پوتین ژ بەشاری دلگران بوویە و رەنگە کار بۆ لادانا بەشاری ژ دەستهەلاتێ ژی بهێتە کرن.
ئەڤرۆ نیوز:
پشتی کو سەرۆکێ ئەمریکا دۆنالد ترامپ رەخنە ژ شێوەیێ کارێ رێکخراوا ساخلەمیا جیهانی گرت و دیار کر ئەمریکا هاریکاریا وێ رێکخراوێ ناکەت، ل هەمبەر ڤێ یەکێ چینێ بریار دایە کو هاریکاریا رێکخراوا ساخلەمیا جیهانی بکەت.
بەرپرسەکێ وەزارەتا دەرڤە یا چینێ راگەهاند کو وەلاتێ وی دێ ب کوژمێ ٣٠ ملیۆن دۆلاران هاریکاریا رێکخراوا ساخلەمیا جیهانێ کەت و رەنگە ئەو کوژمە پاشی زێدەتر ژی لێ بهێت.
ئه‌گرۆ نیۆز، عه‌زیز هه‌ورامی:
ئه‌مڕۆ 23/4/2020 كۆبوونه‌وه‌ی ئه‌نجوومه‌نی پارێزگای سلێمانی له‌سه‌ر دووته‌وه‌ركۆبویه‌وه ئه‌وانیش داوا له‌حكوومه‌ت بكرێت له 30 ڕۆژ جارێك مووچه دابه‌ش بكات و ده‌روازه بازرگانییه‌كان له‌گه‌ڵ ئێران بكرێته‌وه، فڕاكسیۆنی پارتی ده‌ڵێ، موزایده ده‌كرێت چونكه هه‌موولایه‌ك ده‌زانن له‌قه‌یرانی قوڵی دارایی و ته‌ندروستین.
زیاد كاكه ڕه‌زا سه‌رۆكی فڕاكسیۆنی پارتی دیموكراتی كوردستان له ئه‌نجوومه‌نی پارێزگای سلێمانی،ئه ئه‌ڤرۆنیۆز ده‌ڵێ، له چه‌ند ڕۆژی ڕابردوو له كۆبونه‌وه‌ی سه‌رۆكی فڕاكسیۆنه‌كان وتم ئه‌گه‌ر كۆبونه‌وه‌ی ئه‌نجوونی پارێزگا بۆ موزایده‌ی سیاسی ده‌كه‌ن ئه‌وه ئێمه وه‌ك فڕاكسیۆنی پارتی كۆبونه‌وه‌كه بایه‌كۆت ده‌كه‌ین.
كاكه ڕه‌زا وتیشی، كۆبونه‌وه‌ی ئه‌نجوومه‌نی پارێزگا دوو ته‌وه‌ری له خۆگرتبوو ئه‌وانیش داوا له حكوومه‌تی هه‌رێم بكرێت 30 ڕۆژ جارێك مووچه بدرێته مووچه خۆران، وه چه‌ند ده‌روازه‌یه‌كی بازرگانی وه‌ك سه‌یران به‌ن و شۆشمێ ته‌وێڵه له‌گه‌ڵ ئێران بكرێنه‌وه.
سه‌رۆكی فڕاكسیۆنی پارتی له ئه‌نجوومه‌نی پارێزگای سلێمانی وتیشی، حكوومه‌تی هه‌رێمی كوردستان بۆ دابه‌شكردنی مووچه پشت به‌داهاتنی ناوخۆ و فرۆشتنی نه‌وت و ئه‌وپاره‌ی له‌به‌غداوه‌دێت ده‌به‌ستێت، هه‌موومان ده‌زانین داهاتی ناوخۆ به‌هۆكاری ڕێكاره‌كان دژ به كۆرۆنا بۆ سفر دابه‌زیوه، نرخی نه‌وت دابه‌زییوه ،هاتنی پاره‌ش له به‌غداوه دوواده‌كه‌وێت، ئیدی قه‌یرانی دارایی و دابه‌شنه‌كردنی مووچه له‌ده‌ره‌وه‌ی ویستی ده‌سه‌ڵاتی هه‌موانه.
هه‌روه‌ها ئاماژه‌ی به‌وه‌كرد، كردنه‌وه‌ی ده‌روازه بازرگانییه‌كان له‌گه‌ڵ حكوومه‌تی ئێران ئه‌وه پێوه‌سته به ڕێو شوێنه ئیدارییه‌كانی حكوومه‌تی عێراق، وه ئه‌گه‌ر بۆ پاراستنی خه‌ڵكی خۆمان نه‌بێت له ڤایرۆسی كۆرۆنا حكوومه‌تی هه‌رێمی كوردستان بۆ ده‌روازه‌كانی بازرگانی داده‌خات و زیانی گه‌وره‌ی ئابووری له‌خۆی ده‌دات.
فڕاكسیۆنی پارتی دیموكراتی كوردستان له ئه‌نجوومه‌نی پارێزگای سلێمانی له سێ ئه‌ندام پێكهاتوون.
ئه‌ڤرۆنیۆز، سالار دۆسكی:
قائیمقامێ قه‌زا دهۆكێ ئاشكراكر كو دێ ئه‌ڤرۆ لیسته‌كا دی یا ئاسانكاریا هێته راگه‌هاندن و هه‌ر دو بازارێن ناڤدار ل سه‌نته‌رێ بازاری كو ب بازارێ (چه‌لێ و بازارێ چارگوشه) دهێنه نیاسین ل گه‌ل ڤه‌كرنا گه‌له‌ك جهێن دی دهێنه‌ڤه‌كرن.
جه‌هوه‌ر عه‌زیز، قائیمقامێ قه‌زا دهۆكێ، ل دور به‌رهه‌ڤیێن هه‌یڤا ره‌مه‌زانا پیرۆز، ئه‌ڤرۆ رۆژا پێنج شه‌مبی 23ی نیسانێ بۆ ئه‌ڤرۆ نیۆز ئاشكراكر كو ئه‌ڤرۆ رۆژا پێنج شه‌مبی دێ لیسته‌كا ئاسانكاریان ل سه‌ر ڤه‌كرنا جهان بۆ خه‌لكێ مه هێته راگه‌هاندن و نوكه چاڤه‌رێی راپورتا وه‌زاره‌تێ دكه‌ن و دێ هه‌موو بزاڤ هێنه‌كرن ئه‌و هه‌ر دو راپورت ل گه‌ل هه‌موو پێدڤیێن خه‌لكێ مه بهێنه گونجاندن و رێنمایێن ساخله‌میێ بهێنه بجهئینان.
قائیمقامێ قه‌زا دهۆك زێده‌تر ژی گۆت: دچارچووڤێ لیستا نوو دا دێ هه‌ر دو بازارێن چارگوشه و بازارێ چه‌لێ ل سه‌نته‌رێ بازارێ دهۆك هێنه‌ڤه‌كرن، زێده‌باری هه‌ژماره‌كا خوارنگه‌هان كوپ ێشتر ژی هاتینه‌ڤه‌كرن لێ هزر ل هه‌یڤا ره‌مه‌زانێ هاتیه‌كرن وه‌ك ناپێژی و سه‌مونخانه .
جه‌هوه‌ر عه‌زیز ئه‌و ژی دیاركر كو هه‌ر خوارنگه‌هه‌كا مووله‌ت بۆ بهێته‌دان ل هه‌یڤا ره‌مه‌زانێ یا ڤه‌كری بیت دڤێت سوزنامه‌كێ بده‌ن كو بۆ جه‌ژنێ ژی دێ دڤه‌كری بن .
ئەڤرۆ نیوز:
ئەڤرۆ ل باژێرێ کۆبانێ یێ رۆژئاڤایێ کوردستانێ د ئەنجاما پەقینا مینەکێ دو کەس ژ مالباتەکێ جانێ خوە ژ دەست دان و سێ کەسێن دی ژی ب گرانی بریندار بوون.
ل گۆر زانیاریێن ئەڤرۆ نیوز مینا کو ئەڤرۆ پەقیە بەری نها ژ ئالیێ تیرۆرستان داعشێ ڤە هاتبوو دانان و ئەڤرۆ ژی بوو ئەگەرێ مرنا دو وەلاتیێن سڤیل و برینداربوونا سێ کەسێن دی.
ئەڤرۆ نیوز:
سازان ئیبراهیم رێڤەبەرا ساخلەمیا قەزا دەربەندیخان بۆ دەزگەهێن راگەهاندنێ دیار کر کو هەموو نەخوشێن کۆرۆنایێ یێن سەر ب قەزا دەربەندیخانێ باش بووینە و نها چو نەخوش نەماینە و گۆت: (د ماوەیێ بۆری دا پشکنین بۆ ٥٠٠ کەسان ل دەربەندیخانێ هاتبوونە کرن و د ئەنجام دا ٣٣ کەس تووشی ڤایرۆسێ کۆرۆنا ببوون لێ نها هەموو باش بووینە).
ناڤهاتیێ دیار ژی کر کو رەوشا ژیانێ ل دەربەندیخانێ و دەوروبەرێن وێ رۆژ ب رۆژێ پتر ئاسایی دبیت و سوپاسیا هەموو ئالیان کر یێن کو د دەمێن بۆری دا هاریکاریا خەلکێ دەربەندیخانێ کربوون.
ئەڤرۆ نیوز:
ب بریارا نێچیرڤان بارزانی سەرۆکێ هەرێما کوردستانێ ئەڤرۆ دو تاقیگەهێن دی یێن تایبەت بۆ پشکنینا کۆرۆنایێ رەوانەی رۆژئاڤایێ کوردستانێ هاتنە کرن.
ئەو یەک د دەمەکێ دایە کو بەری نها ژی سەرۆکێ هەرێما کوردستانێ تاقیگەهەک بۆ رۆژئاڤایێ کوردستانێ هنارتبوو و ل هەمبەر دا مەزلوم عەبدی فەرماندارێ گشتی یێ هێزێن سووریا دیموکرات ژی سوپاسیا سەرۆکێ هەرێما کوردستانێ کربوو.
بەرپرسێن رۆژئاڤایێ کوردستانێ بەری نها ژ بۆ ڤایرۆسێ کۆرۆنا داخوازا هاریکاریێ ژ گەلەک وەلاتان کربوون لێ هەرێما کوردستانێ بەری هەموو وەلاتێن دی هاریکاریا رۆژئاڤایێ کوردستانێ کر.
ئه‌ڤرۆ نیوز:
ئه‌نگێلا مێركل راوێژكارا ئه‌لمانیا راگه‌هاند وه‌لاتێ وێ ب ئاوایه‌كێ به‌رچاڤ بۆدجا خو بۆ ئێكه‌تیا ئه‌وروپا دا زێده دكه‌ت.
لگۆری راگه‌هاندنێن ئه‌لمانی ئه‌نگێلا مێركلێ راگه‌هاندیه كۆ وه‌لاتێ وێ به‌رهه‌ڤه بۆ زێده‌كرنا دانا پشكا بودجا وه‌لاتێ خۆ بۆ ئیكه‌تیا ئه‌ورۆپا.
ئه‌ڤ داخویانیێن ئه‌نگێلا مێركل پشتی ئه‌وێ چه‌ندێ دهێت كۆ ئێكه‌تیا ئه‌ورۆپا راگه‌هاند بوو ب مه‌به‌ستا به‌رهنگاربوونا كورونایێ پێدڤی ب بودجه‌یه‌كا زێده‌تر هه‌یه و هه‌ماهه‌نگی دناڤبه‌را ئه‌ندامێن ئێكه‌تیێ وه‌ك پێدڤی نینه بۆ به‌رهنگاربوونا ڤایرۆسی.
راوێژكارا ئه‌لمانیا پێنگاڤێن وه‌لاتێ خۆ د سه‌ره‌ده‌ریكرنا ل گه‌ل كورونایێ ب سه‌ركه‌فتن ل قه‌له‌مدا لچاڤ وه‌لاتێن هه‌ڤسی و دوی چارچوڤه‌ی دا پینگاڤێن ده‌ستپێكی یێن هه‌لگرتنا قه‌ده‌غه‌یا هاتنوچونێ و ئاسایكرنا ژیانێ ده‌ستپێكر.
ئه‌ڤرۆنیۆز، سالار دۆسكی:
رێڤه‌به‌ریا گشتی یا ساخله‌میێ ل پارێزگه‌هێ ئاشكراكر كو ره‌وشا هه‌موو برینداران یا باش بوویه، ژ سه‌رجه‌مێ 13 بریندارێن شه‌ڤا ده‌ربازبووی 12 برینداران نه‌خوشخانه بجهـ هێلایه.
حه‌مزه ره‌زیكی، به‌رده‌فكێ رێڤه‌به‌ریا گشتی یا ساخله‌میێ ل پارێزگه‌ها دهۆكێ، ل دور ره‌وشا بریندارێن ته‌قا خوشیێ ل پارێزگه‌هێ، ئه‌ڤرۆ رۆژا پێنج شه‌مبی 23نیسانێ بۆ ئه‌ڤرۆ نیۆز گۆت: ژ به‌ر ره‌وشا باش یا برینداران شه‌ڤا ده‌رباز بووین ل سنورێن قه‌زایێن (دهۆك و سێمێل، زاخۆ) ئه‌ڤرۆ سپێدێ هه‌موو بریندار ژ نه‌خوشخانێ هاتینه ده‌رخستن بۆ چه‌ند برینداران نه‌شته‌گه‌ری هاتبوونه ئه‌نجامدان.
ره‌زیكی ئه‌و ژی ئاشكراكر كو ل قه‌زا ئاكرێ ژی كه‌سه‌ك بریندار كه‌فتیه و ره‌وشا وی ژی یا باشه نوكه نه‌شته‌گه‌ریه‌ك ل قه‌زا ناڤبری بۆ دهێته‌كرن.
جهێ ئاماژه‌كرنێ یه كو شه‌ڤا ده‌ربازبوویی و ژ ئه‌نجامێ ده‌ربرینا خوشیێ و سوپاسیێ بۆ هێزێن نافخو و ستافێ ساخله‌میێ هه‌ژماركا وه‌لاتیێن پارێزگه‌هێ ل قه‌زایێن جودا ته‌قا خوشیێ كرن و دئه‌نجام دا 13 كه‌س ب ته‌ق و یاریێن ئاگری بریندار كه‌فت بوون.
نيشاندان