ئەڤرۆ نیوز:
وەزارەتا ساخلەمیا بریتانیا ئامارێن 24 دەمژمێرێن بوری راگەهاندن و دیارکر کریە، کو هژمارا وان کەسێن هەتا نوکە ب کۆرۆنا یێ گیانێ خوە ژ دەستداین نێزیکی 10 ھزار کەسانە.
هەروەسا گۆتیە، د 24 دەمژمێرێن بوری دا 5 ھزار 234 حاله‌تێن نوو یێن تووشبوونێ ب كۆرۆنا یێ ل بریتانیا هاتینە تۆمار كرن، نوکە هژمارا تووشبوویێن کۆرۆنا یێ ل بریتانیا گەهشتە 78 ھزار و 991 کەسان، دیسان د شەڤەک و رۆژەکێ دا 917 کەسان گیانێ خوە ژ دەستدایە.
ئەڤرۆ نیوز، زنار تۆڤی:
محەمەد عەبدولرەحمان بەروارى، رێڤەبەرێ ڤەکولینێن چاندنێ ل دهۆکێ، کو ماستەر ب زانستێ پاراستنا رووەکی هەیە، بۆ ئەڤرۆ نیوز دیار کر: کو نەساخيا كونكرنا بەلگێن مشمشێ ل دهۆکێ پەیدابوویە، ئەڤ نەساخيە تۆشى هەر ئێک (مشمشان، خوخان ، گێلاس، باهيڤان) دبيت، ئەڤ نەساخیە تۆشى بەلگان و بەرهەمی و تاكێن وان دبيت.
نيشانێن ڤێ نەساخيێ ل سەر بەلگان ئەوە، کو بەلگێن وان كون كون دبن، ب كونێن بازنەیی و ل سەر بەرهەمێ وان ژی وەکر بيرۆفێ ل سەر ديار دبن و رەنگێ ڤێ بيرۆڤێ یێ قورمزى یە.
ناڤهاتی گۆت ژی: هەکە پلا گەرماتيێ 22 پلە بیت، هةروەسا هەبوونا رێژەكا باش يا شەهێ بۆ ماوێ ١٤ هەتا ٢٠ دەمژمێران د رۆژەکێ دا، ل گەل بارینا بارانێ، ئەڤ نەساخیە دێ ب شێوەکێ مەزن داروبارێ مشمشێ تۆشی ڤێ نەساخیێ کەت.
هەروەسا دیار کر ژی: خۆپاراستن و چارەسەری ئەڤە یە:
١. کەزاختنا داران ب شێوەکێ كو دار يا ڤەکری بيت و هەوا دناڤرا بهێت.
٢. زبلكرنا داروبارى ل وەرزێ پاییزێ ب زبلێ كێمياوى كو رێژا بۆتاسيومى تێدا يا بلند بيت.
٣. كريارا رەشاندنا دەستپێکی ل بهارێ بەرى دار ب پەقيت.
٤. ل دەمێ دەركەفتنا بەلگان و قەبارێ بەرهەمی هندى نوكان لێ بهێت، دڤێت بهێتە رەشاندن ب قركەرێ كێمياوى يێ تايبەتمەند.
ئەڤرۆ نیوز:
وەزیرێ ساخلەمیا تورکیا راگەهاند، هژمارا وان کەسێن ب ڤایرۆسێ کۆرۆنا یێ گیانێ خوە ژ دەستداین گەهشتە 1101 کەسان و هژمارا تووشبوویا ژی گەهشتە 52 هزار و 167 کەسان.
فەخرەدین کۆجا، وەزیرێ ساخلەمیا تورکیا ئامارێن نوو یێن تووشبوویان و مریان ب ڤایرۆسێ کۆرۆنا یێ د کۆنفرانسەکێ رۆژنامەڤانیدا دیار کرن و گوت، د ماوێ 24 دەمژمێرێن بوری دا 33 هزار و 170 پشکنین هاتینە ئەنجامدان، پێنج هزار و 138 تووشبوویێن کۆرۆنا یێ هاتینە تۆمارکرن و 95 کەس ژی مرینە.
هژمارا مریان ب ڤایرۆسێ کۆرۆنا یێ ل تورکیا گەهشتە 1101 کەسان و هژمارا تووشبوویان گەهشتە 52 هزار و 167 کەسان.
ئەڤرۆ نیوز:
ل كۆریا باشوور، ئه‌و كه‌سێن ژ ڤایرۆسێ كۆرۆنا یێ چێدبن، دووباره تۆش دبن، به‌رپرسێن وی وەلاتی ژی بۆ دیتنا ئەگەران ده‌ست ب ڤەکولینان كریه.
رێڤەبەرێ سەنتەرێ کۆنترۆلا نەخۆشیێن کۆریا باشوور راگەهاندیە: کو ٩١ تووشبوویێن کۆرۆنا یێ پشتی کو ساخ بووین، جارەکا دی پشکنین بۆ هاتینە کرن و ئه‌نجامێن وان پۆزەتیڤ بووینە و گۆتیە ژی: ھێشتا ئەم نزانین ھۆکارێن سەرھلدانا ڤی ڤایرۆسی چیە، بەلێ ڤەکولینێن مە دەستپێکرینە.
ئەڤرۆ نیوز:
وەزارەتا ساخلەمیا عێراقێ دیار کر، د دەمێ شەڤەک و رۆژەکێ دا ٣٨ حالەتێن نوو یێن توشبوون ب کۆرۆنا یێ هاتنە تۆمار کرن، هەروەسا ٤٠ کەس ب تەمامی چێبووینە و کەسەکێ ژی گیانێ خوە ژ دەستدایە.
ئەڤرۆ شەمبیێ 11 نیسانا 2020، وەزارەتا ساخلەمی و ژینگەها عیراقێ راگەهاند، د ٢٤ دەمژمێرێن بوری دا ٣٨ حالەتێن توشبوون ب کۆرۆنا یێ هاتینە تۆمار کرن، کو ١٢ حالەت ل بەغدا، نەهـ ل بەسرا، پێنج ل کەرکوکێ، سێ ل زیقار، سێ ل واست، دو ل کەربەلا، دو حالەت ل نەجەف و دو ژی ل موسەنا.
ئەڤرۆ نیوز:
نۆشدارەکێ چینی کو رێڤەبەرێ نەخۆشخانەکا دەمکی ل باژێرێ ووهان یێ چینی بوویە، هۆشداریێ ددەت ژ ئەگەرێ خەمساریێ ل بەرامبەر کۆرۆنا و بێژیت، چێدبیت ئەڤ ڤایرۆسە هندێ شەرێ جیهانیێ ئێکێ و دویێ خەلکێ بکوژیت.
وانگ ژینهوان، ئەو نۆشدارێ چینی یە دبێژیت، هۆکارەکێ ب لەز یێ بەلاڤبوونا کۆرۆنا بەحس دکەت و دبێژیت، ل گەلەک جهـان رێک ب تووشبوویان دهێتە دان، بچنە مال و بۆ خوە چارەسەریێ وەرگرن، ئەڤە شکەستنەکا مەزنە.
هەروەسا گوتیە، ئەوا نیویۆرک دکەت خەلەتیە، کو ناهێلن خەلک ب ناچاری ماسکان ب کاربینن، گۆتیە، نۆشدارەکێ نیویۆرک گوتیە وی ئەڤە جۆداهیا کولتووریە، لێ وی گۆتیە، ئەڤێ چ پەیوەندی ب کولتوورێ ڤە نینە، بنەمایێن زانستی دبێژن، دڤێت ماسک بۆ خۆپارێزیێ بهێتە ب کارئینان.
ئەو نۆشدارە رەخنێ ل دەستهەلاتدارێن ئەمریکا دگریت و دبێژیت، وان وەکو پێدڤی خەلک رێنمایی نەکریە،کو د مالدا بمینن و قەدەغەیا هاتنوچوونێ ب باشی جێبەجێنەکریە.
ڤایرۆسێ کۆرۆنا دشێت ب دووراتیا 4 مەتران ژ کەسەکێ تووشبوویی بۆ کەسەکێ دیتر ڤەگوهێزیت.
ڤەکولینەک ژ ئالیێ ئەکادیمیا زانستی یا سەربازی ل پەکینا پایتەختێ چینێ هاتیە ئەنجامدان و دبێژیت، ڤایرۆسێ کۆرۆنا دشێت ب دووراتیا نێزیکی چار مەتران ژ کەسەکێ تووشبوویی بۆ کەسەکێ دیتر ڤەگوهێزیت، ئەف مەودایە دو جار هندی وان دو مەترایە، یاکو رێکخراوا ساخلەمیا جیهانی پێشنیاز کریە دناڤبەرا دو کەسان دا بمینیت.
ئەڤ ڤەکولینە ل گۆڤارا دەرکەفتنا نەخۆشیێن ڤەگوهاستی هاتیە بەلاڤکرن، ئەڤ تاقیکرنا ل نەخۆشخانا هۆشینشان ل ووهان هاتیە ئەنجامدان، کو زانایان پشکنین بۆ هەوای و رووبەرێ یەکا چاڤدێریا چر و قاویشەکا گشتی یا تووشبوویێن کۆرۆنا یێ کریە، هەردو هۆلان 24 نەخۆش تێدا هاتبوونە نڤاندن، پشکنین ل 19 شوباتێ هەتا 2 ئادارێ هاتینە ئەنجامدان.
د ئەنجام دا هندەک دلۆپێن ئاڤێ ب دووریا زێدەتر ژ سێ مەتران ژ تووشبوویێن کۆرۆنا یێ دیتینە، کو هەلگرێن ڤایرۆسێ کۆرۆنا یێ بووینە و کۆرۆنا تێدا بوویە و چەند دەمژمێران یا چالاکبوویە، پشکنین بۆ هەوایێ ژووران هاتیە ئەنجامدان، تێدا دەرکەفتیە کو کۆرۆنا جۆدا ژ رێیا کۆخکێ و بێهنژینێ تێدا بەلاڤبوویە و بۆ چەند دەمژمێران وی ڤایرۆسی پارێزگاری ژ خوە کریە.
پشکەکا بچووک ژ وان ڤایرۆسان ب دووراتیا دو مەتر و نیڤان دوور ژ وان تووشبوویان دیتینە، لدووڤ ڤێ ڤەکولینا ئەکادیمیا زانستی یاسەربازی ل پەکینێ، ئەو دو مەترێن، وەکو رێنمایێن خوە پارێزیێ هاتینە پێشنیاز کرن، یا کێمە، کو مرۆڤ خوە ژ کەسەکێ تووشبوویی ب کۆرۆنا یێ بپارێزیت.
د پشکنینا وان دا تشتەکێ دیتر دەرکەفتیه، ب ئەگەرێ هێزا کێشکرنا ئەردی، پرانیا وان دلۆپێن ب رێیا کۆخکێ و بێهنژینێ دەردکەڤن، د کەڤنە سەر ئەردی و بۆ چەند دەمژمێران وەکو مەترسی ل سەر ساخلەمیا مرۆڤی دمینیت، دیسان وێ تیما چینی بۆ دلنیابوونێ ژ ڤێ چەندێ، پێلاڤێن چەند نۆشدارێن یەکەیا چاڤدێریا چر پشکنینە، تێدا دەرکەفتیە کو پشکەکا ژ وان کۆرۆنا ل سەر بوویە، داخواز ژ خەلکێ کریە خوە بپارێزن و هەموو تشتان تافیل بکەن.
ئەڤرۆ نیوز:
هێمن سلێمان بەرپرسێ راگەهاندنا پۆلیسێن پارێزگەها دهۆکێ، بۆ ئەڤرۆ نیوز دیار کر: ل رۆژا ئێکێ یا نەورۆزێ 21.3.2020 ل دەمێ رابوونا لەهیان ل دهۆکێ، تەرمێ زەلامەکێ د رووبارێ هشکەرووی دا ل نێزیکی گرێ سور ل سەنتەرێ باژێرێ دهوکێ هاتیە دیتن و هەتا نوکە خودان لێ پەیدا نەبوویە.
ناڤهاتی گۆت ژی: ژیێ وی کەسی نێزیکی 40_45 سالایە و درێژاهیا وی ۱۷٥ سم و پەنتەرونەکێ کابویی یێ نیلی و بلوزەکێ رساسی ل بەربوویە، چ بەلگەنامێن فەرمی دبەریکێن وی دا نەبوون، پەرێن ڤەکولینێ ل بنگەهێ پولیسێن نەورۆز هاتینە دروستکرن و هەتا نوکە تەرمێ وی ل رێڤەبەریا نۆشدارێ دادە ل دهۆکێ.
ئەڤرۆ نیوز:
بەرپرسێن ساخلەمیێ ل بریتانیا دیار کرن کو د ماوەیێ ٢٤ دەمژمێرێن بۆری دا ل بریتانیا ٩١٧ کەسان ژ بەر ڤایرۆسێ کۆرۆنایێ جانێ خوە ژ دەست داینە و ب گشتی هژمارا کەسێن کو هەتا نها ل وی وەلاتی جانێ خوە ژ دەست داینە گەهشتیە ٨ هزار و ٨٧٥ کەسان.
هەر دیسان بەرپرسێن ساخلەمیێ دیار کرن کو هەتا نها ٧٨ هزار و ٩٩١ کەس ل بریتانیا تووشی ڤایرۆسێ کۆرۆنایێ بووینە.
ئەڤرۆ نیوز، زنار تۆڤی:
ئەڤرۆ شەمبیێ 11.4.2020 ژ ئەگەرێ لێدانا بریسیێ ل قەزا ئاکرێ کەسەکێ گیانێ خوە ژ دەست دا و دو کەسێن دیتر ژی بریندار بوون و رەوشا ساخلەمیا وان یا باشە.
سەباح زۆهێر بەرپرسێ راگەهاندنا ساخلەمیا قەزا ئاکرێ، بۆ ئەڤرۆ نیوز دیار کر: کو ژ ئەگەرێ لێدانا بریسیێ، گەنجەکێ 22 سالی، کو خۆجهێ گوندێ هشکەبەرانە، ل ناحیا گردەسێن یا سەر ب قەزا ئاکرێ ڤە، گیانێ خوە ژ دەستدایە، لدووڤ دا هاتیە ڤەگۆهاستن بۆ نۆشداریا داد ل ئاکرێ.
ناڤهاتی گۆت ژی: د هەمان دەمدا هەر ئەڤرۆ ل گوندێ گلگوران بریسیەکێ ل دو گەنجێن دیتر دایە، هەر زوو هاتینە ڤەگۆهاستن بۆ نەخۆشخانا تەنگاڤیا ل ئاکرێ و نوکە رەوشا ساخلەمیا وان یا باشە.
ئەڤرۆ نیۆز، قائید میرۆ:
بڕیار ڤێ حەفتیێ حوکمەتا ھەرێما کوردستانێ کۆمببیت و تێدا بڕیارێ لدۆر کریێ بدەت، ئەندامەکێ لیژنا باژێڕڤانیانژی ئاشکراکر، دێ کرێ بھێتە کێمکرن و حوکمەتژی دێ ھاریکاربیت.
شوان کەریم، ئەندامێ لیژنا باژێڕڤانیان لپەرلەمانێ کوردستانێ ئەڤرۆ نیۆز دیارکر” بڕیارە رۆژا دوشەمبیا داھاتی جڤاتا وەزیرێن ھەرێما کوردستانێ لدۆر کێمکرنا کریێ کۆمببن و تێدا پڕۆژەیەک بۆ کێمکرنا کریا ئاڤاھی و جھێن ئاکنجیبوونێ ھاتیە بەرھەڤکرن، بەلێ پێدڤیە بڕیار لسەر بھێتەدان.
شوان کەریم ئاماژەکر” گورەی پڕۆژێ ھاتیە بەرھەڤکرن، دێ حوکمەت باجێ لسەر جھێن بازرگانی و ئاڤاھیان کێم بکەت و ھەمبەردا دێ خوەدی مولک کریێ کێم کەن لسەر کرێداران ھەتا رەوشا نوکە تێتە دەربازکرن و رەوش ئاسایی دبیت.
نيشاندان