ئەڤرۆنیۆز، ئەیاد بەرواری
وەزیرێ ئاسایشا ئیسرائیلی یێ بەرێ راگەھاند، رەڤین ژ رۆژھەلاتا ناڤین، ئانکو رۆژھەلاتا ناڤینەکا نوو کو ب سەدان ھزار کەس وەلاتێن خوە بجە دھێلن تایبەتی سووریێ و بەربەر ب ئورۆپا ڤە دچن و ملیۆنا کەسێن دی ھەموو بزاڤان بۆ بجە ھێلانا رۆژھەلاتا ناڤین دکەن.
موشێ ئارنس وەزیرێ بەرێ یێ ئاسایشا ئیسرائیلی د گۆتارەکێ دا ل رۆژناما ( ھائارتس) یا ئیسرائیلی دبێژیت” نە تنێ ئەو مال و ئەردێ خوە بجە دھێلن، بەلکو یێ ژێیاتیا خوە یا نیشتمانی ژی دھێلن و ئایدیۆلۆژیاتان ل دەف وان چو گرنگیا خوە نینە ل بەرامبەر مەترسیا ل سەر ژیانا وان ھەی”.
موشێ زێدەتر دبێژیت”ئەو وەلاتێن دەستکرد ئەوێن ژلایێ وەلاتێن زلھێز ھاتینە دامەزراندن پشتی شەڕێ جیھانیێ ئێکێ، یێن بەر ب نەمانێ ڤە دچن، ئەڤ چەندە ل سووریێ و عیراقێ دھێتە روودان و ل گەل نەمانا سووریێ و عیراقێ، ئایدیۆلۆژیێن نەتەوی یێن فەرمی یێن عیراقی و سووری ژی نامینن”.
خویاژی دکەت” دبیت ھندەک وەلاتێن دی یێن عەرەبی ل رۆژھەلاتا ناڤین ژ ئەگەرێ توندرەویا ئیسلامی ل دەڤەرێ، ژناڤ بچن و دێ رۆژھەلاتەکا ناڤین یا نوو ھێتە دروستکرن”.
ب دیتنا ڤی وەزیرێ ئیسرائیلی یێ بەرێ تنێ ئوردن وەکو وەلاتەکێ جھگیر ل دەڤەرێ مایە و دبێژیت” ھەتا نوکە تنێ دەزگەھێن ئەمنی یێن ئوردنی یێن شیاین ل بەرامبەر توندرەوێن ئیسلامی ب راوەستن “.
وەزیرەکێ ئیسرائیلی: ب نەمانا عیراقێ و سووریێ ئایدیۆلۆژیێن نەتەوی نامینن
نيشاندان
