ئه‌ڤرۆنیۆز، ئه‌یاد به‌روارى
سایتێ (هاڤینگتۆن پۆست) به‌حس ل زێده‌بوونا هه‌ڤركیا ئه‌مریكا و روسیا ل سه‌ر ڤه‌كێشانا پارتیا ئێكه‌تیا دیموكراتیا كوردی یا سوری (په‌یه‌ده) یا نێزیك ژ پارتیا كاركه‌رێن كوردستانێ (په‌كه‌كه)، هه‌ر ئێك ژ وان هه‌ردو وه‌لاتان بۆ لایێ خوه، كو په‌یه‌ده ژی ژلایێ خوه‌ڤه بزاڤا مفا وه‌رگرتنێ ژ ڤێ هه‌ڤركیێ دكه‌ت بۆ بده‌ستڤه‌ئینانا پشته‌ڤانیا پتر ژ هه‌ردو وه‌لاتان، ئه‌ڤ چه‌نده ژی بوویه جهێ دلته‌نگیا توركیا و د ئه‌نجامدا سه‌رۆكێ توركی ئه‌ردوگانی ل 28 ڤێ مه‌هێ ئاشكراكر كو هه‌ر كیانه‌كێ ل باكوورێ سووریێ بهێته پێكئینان، دێ توركیا دربه‌كی ل وی كیانی ده‌ت، ئه‌ڤه ژی ئاماژه‌كه بۆ هێزێن كوردی ل وێ ده‌ڤه‌رێ و ئه‌ردوگانی خویاكر ژی (مه نه‌ڤێت نموونا باكوورێ عیراقێ ل باكوورێ سووریێ دوباره ببیت).
سایتێ ناڤبری دبێژیت” په‌یه‌دێ ڕێیه‌كا جودا ژ هێزێن دی یێن ئۆپۆزسیۆنا سووری گرتیه به‌ر و بدیتنا په‌یه‌دێ ( شوره‌شا سووری) شه‌ڕه‌كه د ناڤبه‌را عه‌ره‌بان ب خوه‌دایه و ئه‌و به‌ر ب هێزكرنا خوه ژ روویێ سیاسی و له‌شكری و ئابووری ڤه چوویه ژبۆ رێگرتنێ ل په‌یدابوونا هێزێن دی یێن ناڤخوه‌یی ل گه‌ل به‌رده‌وامبوونا شه‌ڕی ل سووریێ و په‌یوه‌ندیێن خوه ل گه‌ل هێزێن ناڤخوه‌یی و ده‌رڤه دروستكرینه ل دووڤ پرنسیبێ پشته‌ڤانیا وان هێزان بۆ پێكئینانا ئیداره‌كا خوه‌سه‌ر ل ده‌ڤه‌رێن كوردی ل سووریێ و ژ وێ چه‌ندێ ژی په‌یوه‌ندیا په‌یه‌دێ ل گه‌ل رژێما سووریێ هاتیه ئاڤاكرن كو ئه‌و رژێم پشته‌ڤانیا په‌یه‌دێ دكه‌ت دڤێ چارچۆڤی دا”.
خویا ژی دكه‌ت” ل گه‌ل به‌رده‌وامیا ره‌نگڤه‌دانا نێڤده‌وله‌تی دژی رێكخستیا ده‌وله‌تا ئیسلامی (داعش) یا تیرۆرستی، بهانه‌یا شه‌ڕكرنا په‌یه‌دێ دژی داعشێ بوویه ڕێیه‌ك بۆ بده‌ستڤه‌ئینانا پشته‌ڤانیا له‌شكری و دراڤی ژ وه‌لاتێن رۆژئاڤای ڤه و ژ ڤێ چه‌ندێ ژی په‌یوه‌ندیا ب هێز و هه‌ڤپه‌یمانیا كوور د ناڤبه‌را په‌یه‌دێ و ئه‌مریكا دا دروستبوو كو ب شێوه‌كێ مه‌زن پشته‌ڤانیا وێ كر د ئۆپه‌راسیۆنێن هه‌ڤپه‌یمانیا نێڤده‌وله‌تی دا ل سالا بۆری دژی داعشێ ل كۆبانێ و هه‌ر ل گۆر وێ چه‌ندێ ژی سه‌رۆكێ ئه‌مریكی باراك ئۆباما ل رۆژا سێ ڤێ مه‌هێ دیاركر كو ئه‌مریكا ل به‌ره په‌یوه‌ندیێن خوه ل گه‌ل گرۆپێن كوردی ل سووریێ كوورتر لێ بكه‌ت، پشتى به‌رنامێ مه‌شقكرن و به‌رهه‌ڤكرنا ئۆپۆزسیۆنا میانره‌و ل سووریێ شكه‌ستن ئیناى”.
ل دۆر هه‌لویستێ روسیا ل سه‌ر په‌یه‌دێ، سایتێ هاڤینگتۆن پۆست، دیاركریه كو ” سه‌رۆكێ روسیا فلادیمێر بۆتین په‌سنا رۆلێ په‌یه‌دێ و رژێما سووری د شه‌ڕێ دژی داعشێ دا یا كری ئه‌وژی د په‌یڤا وی دا ل به‌رده‌م جڤاتا ئاسایشێ ل نه‌ته‌وێن ئێكگرتی به‌ری ده‌ستپێكرنا هێرشێن ئه‌سمانی یێن روسی دژى داعشێ ل سووریێ ل 30 ئیلۆنا بۆری و پشتى 11 رۆژان ژ هێرشێن روسی، نوونه‌رێ بۆتینی ل رۆژهه‌لاتا ناڤین و ئه‌فریقیا (میخائیل بوگدانوف) ل گه‌ل سه‌رۆكێ هه‌ڤپشكێ په‌یه‌دێ (سالح موسلم) ل پاریس كۆمبوو و دانوستاندن ل دۆر ڤه‌كرنا ئۆفیسه‌كا په‌یه‌دێ ل موسكۆ زیچده‌باری چه‌ند پرسێن دی گرنگ كرن”.
ل دووڤ سایتێ ناڤبری” په‌یه‌ده داخوازیت په‌یوه‌ندیێن خوه ل گه‌ل روسیا خورتتر بكه‌ت، ل گه‌ل پاراستنا هه‌ڤكاریا ستراتیژی ل گه‌ل ئه‌مریكا كو هه‌ردو لایه‌نان وه‌كو كاغه‌زه‌كا مفادار به‌رامبه‌ر هه‌ڤدو بكاربینیت و د ئه‌نجامدا جهێ ل ده‌ف هه‌ردو لایه‌نان دا خورتتر بكه‌ت”.
ل دووڤ شرۆڤه‌كرنا (هاڤینگتۆن پۆست)، ل به‌رامبه‌ر وێ پشته‌ڤانیا له‌شكری یا روسی بۆ په‌یه‌دێ، دێ روسیا داخواز ژێ كه‌ت هێرشان دژی به‌هنگارێن سووری ل به‌ره‌یێن ( حه‌له‌ب و عفرین) بكه‌ت، لێ دبیت هه‌ڤپه‌یمانیا په‌یه‌دێ ل گه‌ل به‌شار ئه‌سه‌دی ببیته ئه‌گه‌رێ نه‌مانا باوه‌ریا ئه‌مریكا ب په‌یه‌دێ، هه‌ر چه‌نده په‌یه‌ده ب ڕێیا په‌یوه‌ندیێن خوه یێن باش ل گه‌ل ئه‌مریكا و روسیا، دخوازیت ئیداره‌كا خوه‌سه‌ر ب درێژاهیا سنۆرێن سووریێ ل گه‌ل توركیا دروست بكه‌ت بێ كو تووشێ ده‌ستێوه‌ردانا توركیا ببیت”.
هه‌لویستێ توركی ل دۆر ڤێ چه‌ندێ ل سه‌ر زارێ سه‌رۆك وه‌زیرێن توركیا (ئه‌حمه‌د داود ئوگلۆ) هات ده‌مێ راگه‌هاندی “فرۆكێن توركی دو جاران جهێن په‌یه‌دێ یێن توپبارانكرین و توركیا ڕێ ناده‌ته وان كو به‌رفره‌هببن به‌ر ب رۆژئاڤایێ رووبارێ فورات و دیاركر كو وه‌لاتێ وی قه‌بوول ناكه‌ت كیانێن دژی توركیا ل سه‌ر سنۆرێ وێ ل گه‌ل سووریێ هه‌بن، چ سه‌ربازگه‌هێن په‌كه‌كێ بن ل (باكوورێ عیراقێ)، یان ژی په‌یه‌ده و بالێ وێ یێ له‌شكری یه‌په‌كه”.
ئه‌مریكا و روسیا هه‌ڤركیێ ل سه‌ر ڤه‌كێشانا په‌یه‌دێ بۆ لایێ خوه دكه‌ن
نيشاندان
