ئه‌ڤرۆ نیوز:
چه‌ند به‌رپرسه‌كێن ئه‌مریكى و هه‌رێما كوردستانێ ب مالپه‌رێ بلوومبێرگ ڤیویان راگه‌هاندیه” نوكه ئه‌مریكا ناڤه‌نده‌كا ئوپه‌راسیونا سه‌ربازى ل هه‌ولێرێ ڤه‌كریه بۆ ئه‌نجامدانا ئه‌ركێ سه‌ربازى یێت تایبه‌ت”، به‌لێ به‌رپرس ئاماده‌نه‌بوون زانیاریان ئاشكرا بكه‌ن چونكه نهێنیا ده‌وله‌تێ یه.
ئه‌ركێ ڤێ ناوه‌ندێ ده‌ستنیشانكرنا جهێن به‌رپرسێن بلند یێن داعشه و هه‌ڤده‌م سه‌ربازێن ئه‌مریكیێن ئه‌نجامده‌رێن ئوپه‌راسیونا حه‌ویجه سه‌ر ب هه‌مان هێز بوون.
ئه‌ڤرۆ نیۆز، قائید میرۆ
په‌رله‌مانتاره‌كا پارتی دیموكراتی كوردستان ئاشكراكر، موچێ ئه‌ندامێن په‌رله‌مانێ عێراقێ ب رێژه‌یه‌كا به‌رچاڤ هاتیه كێمكرن و بشێوه‌یه‌كی ژ 11 ملیۆن دیناران كێمبوویه بۆ شه‌ش ملیۆن دیناران.
دكتۆر ئه‌شواق جاف، په‌رله‌مانتارا پارتی ل په‌رله‌مانێ عێراقێ ب ئه‌ڤرۆ نیۆز راگه‌هاند” به‌ریا نوكه موچێ هه‌ر په‌رله‌مانتاره‌كێ عێراقێ 11 ملیۆن و 500 هزار دینارێن عێراقی بوون، به‌لێ دگه‌ل چاكسازیا ڤێ دوماهیێ یا حه‌یده‌ر عه‌بادی موچێ په‌رله‌مانتاران 30%ێ هاته كێمكرن و گه‌هشته 8 ملیۆن و 500 هزار دیناران.
دكتۆر ئه‌شواقێ گۆتژی” به‌لێ نوكه ئه‌ف رێژه‌ژی هاتیه كێمكرن و موچێ هه‌ر په‌رله‌مانتاره‌كێ عێراقێ تنێ 4 ملیۆن دینارن و دگه‌ل ده‌رماله‌یان دگه‌هیته 6 ملیۆن دیناران، ئه‌ڤه لسه‌ر داخوازمه بۆیه وه‌كی په‌رله‌مانتار، ژبه‌ركو مه خواست موچه‌یێن پله بلند بهێنه كێمكرن و وه‌ك هه‌ڤیه‌ك د موچه‌یدا هه‌بیت.
ئه‌ڤرۆ نیوز: له‌يلان
رێڤه‌به‌ریا گشتى یا ره‌وشه‌نبیرى و هونه‌رى ل دهۆكێ، رێڤه‌به‌ریا چالاكیێن وێژه‌یى ل دهۆكێ، فیسته‌ڤالا ئه‌حمه‌دێ نالبه‌ند دوهى رۆژا 28/10/2015 ل ده‌مژمێر چارێ ئێڤارى ل هولا نالبه‌ند ل پانوراما ئازادى ل دهۆكێ گێرا و چه‌ندین هه‌لبه‌ستێن ناڤبرى هاتنه خواندن و دو مامۆستایان بناڤێن (هێرش كه‌مال، ته‌حسین دۆسكى) د ڤه‌كۆلینه‌كێ دا باس ل ژیان و هه‌لبه‌ستێن نالبه‌ندى كر و فلمه‌كێ دیكیۆمێنتارى ژ لایێ ده‌رهێنه‌رێ كورد (شینوار كه‌مال) ڤه ل سه‌ر ژیانا نالبه‌ندى هاتبوو چێكرن بۆ ئاماده‌بوویان هاته نیشادان و د هه‌مان ده‌م دا سێریانه‌ك ل جادا سه‌ره‌كى یا ئێتیتێ و هوله‌ك ل پانۆراما ئازادى ل دهۆكێ ب ناڤێ ئه‌حمه‌دێ نالبه‌ند هاتنه ب ناڤكرن.
موسه‌ده‌ق تۆڤى، د په‌یڤا رێڤه‌به‌ریا گشتى یا ره‌وشه‌نبیرى و هونه‌رى ل دهۆكێ دا گۆت: “نالبه‌ندى هه‌موو ژیانا خوه ب هه‌ژارى بۆراندیه،به‌لێ ژبه‌ر ده‌وله‌مه‌ندیا به‌رهه‌مێن وى یێن ئه‌ده‌بى پشتى چوویه به‌ر دلۆڤانیا خۆدێ ژى ل ده‌ڤ مه هه‌ر ب ساخى مایه”.
خالد حسێن، د په‌یڤا ئێكه‌تیا نڤێسه‌رێن كورد تایێ دهۆكێ دا ئاشكرا كر كو پێدڤیه ده‌مێ ره‌وشه‌نبیر د ساخ رێز لێ بهێته‌گرتن و گۆت: “د سالێن حه‌فتێیان دا به‌رگێ ئێكێ و دویێ ژ هه‌لبه‌ستێن ئه‌حمه‌دێ نالبه‌ند و د سالێن هه‌شتێیان دا به‌رگێ سێیێ ژ هه‌لبه‌ستێن ناڤبرى ژ لایێ ئه‌ندامێن ئێكه‌تیا نڤێسه‌رێن كورد تایێ دهۆكێ ڤه هاتنه چاپكرن”.
محه‌مه‌د خشخاشى، نه‌ڤیێ ئه‌حمه‌دێ نالبه‌ند د په‌یڤا بنه‌مالا نالبه‌ندى دا گۆت: “نالبه‌ندى د چه‌ندین هه‌لبه‌ستێن خوه دا بزاڤا بهێزكرنا هه‌ستا نه‌ته‌وه‌یى كریه بۆ هشیاركرنا جڤاكى و ب ده‌ستڤه‌هاتنا مافێن گه‌لێ كورد”.
هه‌ژى گۆتنێ یه ئه‌ڤرۆ رۆژا پێنجشه‌مبى 29/10/2015 ل ده‌مژمێر چارێ ئێڤارى دێ رۆژا دویێ ژ فیسته‌ڤالێ ل گۆندێ خشحاشا هێته گێران و د ڤێ رۆژێ دا دێ مال و مه‌زارێ نالبه‌ندى هێنه ڤه‌كرن و چه‌ندین هه‌لبه‌ستێن نالبه‌ندى دێ هێنه خواندن.
ئه‌ڤرۆ نیوز:
ژنه‌كا 35 سالى دلێ خوه بۆ ئه‌ڤرۆ ڤه‌دكه‌ت و دبێژیت: من 2 زارۆ هه‌نه و ئه‌ڤه 5 ساله ئه‌ز دگه‌ل خه‌سویا خوه وان دژیم هه‌روه‌سا ژن تیه‌كا من ژى دگه‌له و ئه‌م پێكڤه دژین وێ ژى زارۆیه‌ك هه‌یه، به‌س ئاریشا من ئه‌وه خه‌سویا من بو من یا باش نینه و بو ژن تیا من باشتره و ئه‌و ئازادى و خوشیا دده‌ته وێ ناده‌ته من و گه‌له‌ك دلێ من دهێلیت و جیاوازیه‌كا سور و سور دكه‌ت ژن تیا من كچ خووشكا وێ یه ژبه‌ر ڤێ چه‌ندێ ئه‌ز گه‌له‌ك دقه‌هرم و دئێشم بو زانین نه ئه‌ز و نه ژى زه‌لامێ من نه‌شێین داخوازا جودابونێ بكه‌ین هه‌كه دا جودا بین و ژ ڤێ نه‌خوشیێ هێینه ده‌ر ئه‌ڤجا هیڤیدارم هوون چ دبێژن و ئه‌ز چ بكه‌م دا خه‌سویا من حه‌ز ژ من ژى بكه‌ت ؟
خانما هێژا :
باش بزانه سه‌ره‌ده‌ریا یه‌كسان گه‌له‌ك یا بزه‌حمه‌ته و ئه‌گه‌ر نه‌بێژن مه‌حاله ژى ژبه‌ركو هه‌تا دایك و باب دگه‌ل زارویێن خوه‌دا سه‌ره‌ده‌ریه‌كا یه‌كسان ناكه‌ن و ئه‌ڤ چه‌نده یا لده‌ف هه‌موویا هه‌ى، ئه‌ڤجا ئه‌ڤێ چه‌ندێ ژ هزرا خوه دوور بێخه، ژبه‌ركو هه‌ر كاره‌كێ ئه‌نجام بده‌ت تو دێ هه‌ست ب وێ چه‌ندێ كه‌ى و هه‌تا هه‌كه ب وى وێنه‌ى ژى نه‌بیت ژبه‌ر ئه‌ڤ هه‌سته لده‌ف ته یێ په‌یدا بوى و تو یا توش بویێ، جودا بون كاره‌كێ ره‌وایه و پێدڤى یه به‌رى پێكئینانا خێزانێ هزر د ڤێ چه‌ندێ دا بهێته كرن، ژبه‌ركو هه‌تا هوون جودا نه‌بن نه‌شێن هزرێ د دابینكرنا كارێن پێدڤى بو خێزانێ بكه‌ن، ئه‌ڤجا هه‌ول بده په‌یوه‌ندیێن خوه خوه‌ش بكه دگه‌ل خه‌سویا خوه و ژن تیا خوه و ب عه‌قلانه سه‌ره‌ده‌ریێ دگه‌ل بكه، هه‌روه‌سا كار بكه دگه‌ل هه‌ڤژینێ خوه ژبو جودابونێ و بزانه ئه‌گه‌ر هه‌ڤژینێ ته د ئاستێ به‌رپرسیاریێ دا نه‌بیت حه‌ز دكه‌ت هه‌ر دناڤ مالێ دا بیت و دوباره تو و ئه‌و گه‌نگه‌شا به‌خته‌وه‌ركرنا خێزانا خوه بكه‌ن .
ئه‌ڤرۆ نیوز:
ماموستایه‌ك ئه‌شكه‌را دكه‌ت كو، كچ و كوڕ هه‌ردو یێن هه‌ین خیانه‌تێ دكه‌ن ب تایبه‌تى ل ڤى سه‌رده‌مى، ژبه‌ركو كوڕ و كچ د ژیه‌كێ وه‌ها بچووك دا حه‌زژێكرنێ و ڤیانێ دكه‌ن كو چو ژێ نزانن و خوه ناگرن هه‌تا بگه‌هنه ژیه‌كێ وه‌سا كو بشێن جوداهیێ بكه‌ن دناڤبه‌را ڤیانى َو خیانه‌تێ.
ڤه‌كوله‌رێ جڤاكى عه‌بدلره‌حمان چاربوتى دا زانین كو، د جڤاكێ مه یێ نه‌ره‌وشه‌نبیردا خیانه‌ت بۆ كورى مێرانیه و گۆت: ئه‌گه‌ر كوڕ لدووڤ كچه‌كێ ب چیت و ده‌ستێ وێ بگریت و هه‌تا ماچى ژى بكه‌ت بێى ترس ڤێ چه‌ندێ دێ بۆ دایك و هه‌ڤال و نیاسێن خوه ڤه‌گێریت و به‌حسێ رابوردویێ خوه كه‌ت كا چه‌وا ئه‌و كچه رازى بۆ و چه‌وا ده‌ستێ وێ گه‌هشتێ و هه‌موو دى َبێژنێ ولا تو مێرى.
په‌روین خه‌واجه ئه‌و ماموستایه زێده‌ترت دبێژیت: دبینم رێژا خیانه‌تا كوڕ و كچان وه‌كو ئێكه و ئه‌گه‌رێ ڤێ چه‌ندێ ژى مالباتێن وانن چونكى دبیت ئه‌و كچا كورێ وان بڤێت بۆ ناخوازن كچ ژى هه‌روه‌سا ئه‌و كورێ وێ دڤیت وێ ناده‌نێ ل ڤى ده‌مى كوڕ دێ بێژیت هه‌ڤالا من خیانه‌ت ل من كریه و نزانیت مالا وێ رێگره.
ئه‌مه‌ل سالح كچه‌كا 25 سالى یه ئاشكرا كر، پتریا كوڕان خیانه‌تێ ل كچان دكه‌ن چونكو پتریا كچان لسه‌ر سوزا خوه‌نه و خیانه‌تێ ل كوڕان ناكه‌ن و ئه‌گه‌ر كوڕ بێژن كچ خیانه‌تێ دكه‌ن دبیت مالێن كچان دبنه رێگر كچا خوه نه‌ده‌نه وى كه‌سێ یێ كو كچا وان دڤێت.
ل دووماهیێ ڤه‌كوله‌رێ جڤاكى ئاماژه پى َدا كو ، ئه‌گه‌ر كچه‌ك حه‌ز ژ كوڕه‌كى بكه‌ت و مالا وێ كچێ بزانن دێ ئاریشه گه‌له‌ك مه‌زن بن و هه‌تا دگه‌هیته وى راده‌ى دبیت (قه‌رارا) كوشتنا كچێ دهێته دان ژلایێ مه‌زنێ بنه‌مالێ ڤه و گۆت: لێ كوڕ ژلایێ مالێ ڤه دهێته هاندان كو لدووڤ كچان بكه‌ڤیت و كه‌یفێ بخوه دگه‌ل بكه‌ت و بدیتنا من كوڕ پتر ژ كچان خیانه‌تێ دكه‌ن.
ئه‌ڤرۆ نیوز:
سه‌رۆكێ لیژنا كۆچ و كۆچبه‌ران ل ئه‌نجومه‌نێ پارێزگه‌ها دهۆكێ دیار كر كو به‌ری زڤستان خورت ببیت دێ گازا سپی ب سه‌ر ئاواران دا هێته به‌لاڤكرن و گۆت “ئه‌و ئاوارێن هه‌تا نها ماینه د كاڤلان دا دێ بۆ ده‌رگه‌ه و په‌نجه‌ر و نایلۆن و .. هتد بۆ هێنه دابینكرن”.
ئه‌كره‌م فه‌تاح سه‌رۆكێ لیژنا كۆچ و كۆچبه‌ران ل ئه‌نجومه‌نێ پارێزگه‌ها دهۆكێ بۆ رۆژناما ئه‌ڤرۆ خویا كر كو گازا سپی ژ ئالیێ حوكمه‌تا فیدرال ڤه دێ بۆ ئاواران هێته دابینكرن و هه‌ر سه‌رۆك خێزانه‌ك دێ 200 لترا وه‌رگریت و گۆت “مه هه‌ماهه‌نگی ل گه‌ل رێكخراوا رێكخراوا یونیسف هه‌یه و ئه‌و دێ جلكێن زڤستانێ بۆ هه‌مى ئاواران ل سه‌رانسه‌ری پارێزگه‌ها دهۆكێ دابین كه‌ت”.
ئه‌كره‌م فه‌تاح خویا ژی كر كو به‌ری نها هه‌مى ئاواران به‌ته‌نى و كه‌لوپه‌لێن دى ب سه‌رپه‌رشتیا بۆردێ پارێزگه‌هێ یێ مرۆڤایه‌تى و ل گه‌ل رێكخراوێن خێرخواز وه‌رگرتینه، لێ بزاڤا دكه‌ن هنده‌ك به‌ته‌نیێن دى ژی ل سه‌ر وان بهێنه به‌لاڤكرن”.
سه‌رۆكێ لیژنا كۆچ و كۆچبه‌ران ئاشكرا ژی كر كو كه‌مپا مام ره‌شان 500 كه‌ره‌ڤان دێ ل سه‌ر هێنه به‌لاڤكرن به‌ری زڤستان خورت ببیت و گۆت “ئه‌و ئاوارێن هه‌تا نها ماینه د كاڤلان دا دێ بۆ ده‌رگه‌ه و په‌نجه‌ر و نایلوون و ..هتد بۆ هێنه دابینكرن”.
ئه‌ڤرۆ نیوز:
سه‌رۆكێ لیژنا ساخله‌می و ژینگه‌هێ ل په‌رله‌مانێ عیراقێ بۆ رۆژناما ئه‌ڤرۆ دیار كر كو دوهى سپێدێ 28/10 ل گه‌ل رێڤه‌به‌رێ ئیدارى و رێڤه‌به‌رێ كۆمه‌لگه‌هێن نۆشداران و رێڤه‌به‌رێ كۆمپانیا كیمادیا یا سه‌ر ب وه‌زاره‌تا ساخله‌میا عێراقێ ڤه كۆم بوو و گۆت “ل دووڤ پێشنیارا مه مه‌زنترین نه‌خۆشخانه ل سه‌ر ئاستێ عیراقێ دێ ل شێخان هێته دانان”.
د فارس بریفكانى، سه‌رۆكێ لیژنا ساخله‌می و ژینگه‌هێ ل په‌رله‌مانێ عیراقێ خویا ژی كر د كۆمبوونێ دا بریار هاته دان كو مه‌زنترین نه‌خۆشخانه ل قه‌زا شێخان بهێته ئاڤاكرن به‌س پارچه‌كا عه‌ردى یا مه‌زن ل قه‌زا شێخان بهێته دابینكرن و پشكه‌ك ژ بۆدجا رێڤه‌به‌ریا ساخله‌میا مووسل دێ بۆ قه‌زا شێخان هێنه ره‌وانه‌كرن بۆ دانانا ڤێ نه‌خۆشخانێ و گۆت “ئه‌ڤ نه‌خۆشخانه ب شێوه‌یه‌كێ مودێرن و سه‌رده‌م دێ هێته ئاڤاكرن و دێ 400 نه‌خۆشخان حه‌وینیت”.
بریفكانى خویا ژی كر د وێ باوه‌ریێ دایه كو ب هاریكاریا قائیمقامێ شێخان و لقا 20 شێخان دێ جهه‌كێ باش بۆ دانانا ڤێ نه‌خۆشخانێ هێته دابینكرن و گۆت “پشكێن زارۆبوونێ و به‌نكا خوینێ و هه‌موو نه‌شته‌رگه‌رى و ئامیرێن گرێدایی نه‌خۆشیان دێ بخوه‌ڤه گریت و دێ بیته باشترین و مه‌زنترین نه‌خۆشخانا مودێرن ل سه‌ر ئاستێ پارێزگه‌هێن عیراقێ”.
ئه‌ڤرۆ نیوز:
سه‌رۆكێ دادگه‌ها شێخان بۆ رۆژناما ئه‌ڤرۆ دیار كر كو رێژا ژێكڤه‌بوونا هه‌ڤژینان ل قه‌زا شێخان رۆژ بۆ رۆژ زێده دبیت، ب ئاوایه‌كی ل ده‌ستپێكا سالا 2015 ل دووڤ ئامارا فه‌رمیا دادگه‌ها شێخان 200 حاله‌تێن ژێكڤه‌بوونا هه‌ڤژینان هاتینه تۆماركرن.
محه‌مه‌د نه‌جم، سه‌رۆكێ دادگه‌ها شێخان دیار كر كو ل دووڤ ئامارا دادگه‌هێ هاتیه تۆماركرن ئه‌ڤ ساله 174 كه‌سان ژنا دویێ و شه‌ش كه‌سان ژنا سیێ و چار كه‌سان ژی ژنا چارێ ئینایه و گۆت “رێژا ژێكڤه‌بوون و ژنا دویێ نێزیكی ئێك بوویه و ئه‌گه‌رێ هه‌ره سه‌ره‌كى بۆ تۆرا كۆمه‌لایه‌تى فێسبوكى دزڤریت، ئه‌گه‌رێ دووێ لێك تێنه‌گه‌هشتنه كوڕ هێشتا یێ بچیكه ژن بو ماره‌كریه و د هه‌ڤدو ناگه‌هن و دبیته ئه‌گه‌رێ ژێكڤه‌بوونێ و ئه‌گه‌رێ سیێ ره‌وشا داریى وه‌ل ژن و مێران كریه كو بگه‌هیته ژێك ڤه‌بوونا ژن و مێران”.
سه‌رۆكێ دادگه‌ها شێخان خویا ژی كر كو نها گه‌له‌ك كه‌س هه‌نه خێزاندارن و ب رێیا فێسبوكێ گه‌هشتینه ئێك و بوویه ئه‌گه‌رێ به‌ردانا ژنا ئێكێ یان ئه‌گه‌ر ژنا رازى بیت یا كریه دو ئه‌و ژى یا بسه‌ر ژنا ئێكێ ئینای و گۆت ” ئه‌گه‌ر ب ڤى شێوه‌یی بیت هه‌تا سه‌رێ سالێ دێ رێژا ژێكڤه‌بوونێ پتر ژ سالێن بۆرى بیت” .
ئه‌ڤرۆ نیوز:
رێڤه‌به‌رێ پێشانگه‌ها دهۆك یا نێڤده‌وله‌تى دیار كر كو ئه‌ڤ ساله ژى وه‌كو سالێن بۆرى به‌رهه‌ڤى بۆ ڤه‌كرنا پێشانگه‌ها دهۆك یا نێڤده‌وله‌تى هاتینه‌كرن، كو 50 كۆمپانیێن جۆراوجۆر دێ پشكداریێ تێدا كه‌ن.
ئیسماعیل سه‌عید ئیسماعیل بۆ ئه‌ڤرۆ دیار كر كو پێشانگه‌ها دهۆك یا نێڤده‌وله‌تى دێ ل رێكه‌فتى 1/11/2015 ێ ل ده‌مژمێر سێ ئێڤارى هێته ڤه‌كرن و بۆ ماوێ چار رۆژان دێ یا به‌رده‌وام بیت و گۆت “رۆژانه ژ ده‌مژمێر 12 نیڤرۆ هه‌تا حه‌فتێ مه‌غره‌ب دێ یا ڤه‌كرى بیت و كه‌لوپه‌لێن كۆمپانیێن پشكدار پێكهاتینه ژ ناڤمالیێ و ئامیرێن كاره‌بێ و ئه‌لكترۆنى و كه‌ره‌ستێن ئاڤاكرنێ و خوارنێ”.
رێڤه‌به‌رێ پێشانگه‌ها دهۆك یا نێڤده‌وله‌تى ئاشكرا كر كو ڤه‌كرنا پێشانگه‌هان دێ یا به‌رده‌وام بیت و گۆت “ب تنێ ساله‌كێ هاتیه پاشخستن، چونكی جهێ پێشانگه‌هێ بۆ حه‌واندنا كه‌لوپه‌لێن ئاواران هاتبوو ته‌رخانكرن”.
ئه‌ڤرۆنیۆز، ئه‌یاد به‌روارى
سه‌رۆكێ هه‌والگیریا ئه‌مریكی ( CAI) راگه‌هاند، هنارتنا له‌شكری بۆ عیراقێ و سووریێ باشترین ڕێ نینه بۆ چاره‌كرنا ره‌وشا عیراقێ و سووریێ و دووپاتكر كو چاره‌یا له‌شكری ل وان هه‌ردو وه‌لاتان یا ئه‌سته‌مه.
جون برینن سه‌رۆكێ هه‌والگیریا ئه‌مریكی د كونگره‌كێ رۆژنامه‌ڤانی دا ل گه‌ل هژماره‌كا به‌رپرسێن ئه‌منی یێن ئه‌مریكی ل واشنتۆن گوت” ل عیراقێ و سووریێ و یه‌مه‌نێ و لیبیا ب زه‌حمه‌ته حوكمه‌تێن ناڤه‌ندی ببیته ئالاڤه‌ك بۆ ڤه‌گه‌راندنا ده‌ستهه‌لاتێ و ئێمناهیێ بۆ وان وه‌لاتان”.
زێده‌تر گوت” چاره‌سه‌كرنا گرفتان ل وان وه‌لاتان دێ ب ڕێیا دروستكرنا باوه‌ریێ بیت د ناڤبه‌را حزبێن ده‌ستهه‌لاتدار دا” ئه‌ڤه ژی ئاماژه‌كه بۆ دوباره ڤه‌ژاندنا ستراتیژیه‌تا ئه‌مریكی ئه‌وا ژلایێ ئۆبامای ڤه هاتیه په‌یره‌وكرن ئه‌وژی لێگه‌ریان ل هه‌ڤپه‌یمانان ل وان ده‌ڤه‌ران ب مه‌ره‌ما پشته‌ڤانیا وان كو دووماهیا وێ ستراتیژیه‌تێ ل ده‌مێ بۆری، شكه‌ستن بوو.
نيشاندان