ئه‌ڤرۆ:
حەیدەر عەبادی سەرۆک وەزیرێن عێراقێ، پشکا بودجا ھەرێما کوردستانێ بۆ ھەیڤا نیسانێ ٣٥%ێ بڕیە و ئەندامەکێ لیژنا دارایی و وەبەرھینانێ یا پەرلەمانێ عێراقێ ژی رادگەھینیت، دێ ئەڤرۆ دەست ب ڤەکۆلینێ کەن و ئەگەر بەغدا پارێ ھەرێمێ وەکی خوە فڕێنەکەت دێ حەیدەر عەبادی ھێتە گازیکرن بۆ پەرلەمانی، ژلایێ خۆڤەژی پەرلەمانتارەکێ پارتی دیموکراتی کوردستان دبێژیت، ئەگەر بەغدا یا پێگیر نەبیت ب رێکەفتنا دگەل ھەرێمێ پێدڤیە ھەرێما کوردستانێ ھنارتنا پتڕۆلێ بۆ دەرڤە راگریت.
مەسعود حەیدەر، ئەندامێ لیژنا دارایی و وەبەرھێنانا جڤاتا نوونەرێن عێراقێ بۆ رۆژناما ئەڤرۆ گۆت” وەزارەتا پتڕۆلا عێراقێ بەلاڤکریە، کو ھەرێما کوردستانێ د ھەیڤا نیسانا بۆری دا رۆژانە ٤٥٠ ھزار بەرمیلێن پترۆلێ ھنارتینە دەرڤە، د ھەمبەردا وەزارەتا سامانێن سرۆشتیێن ھەرێما کوردستانێ بەلافکریە، وانا رۆژێ ٥٦٠ ھزار بەرمیلێن پترۆلێ ھنارتینە دەرڤە، ئەگەر بھێت و ئەم تنێ ئامارا وەزارەتا یتڕۆلا عێراقێ بەرچاڤ بکەین، ئەڤە دڤێت عێراق ٦٩٨ ملیار دیناران بۆ ھەرێمێ فڕێکەت، وەک پشکا ھەرێما کوردستانێ، گورەی قانوونا بودجەیێ گشتیێ عێراقێ بۆ سالا ٢٠١٥ێ وەک د ماددێ ١٠ بڕگا پێنجێ دا ھاتیە، دڤێت عێراق بودجێ بۆ ھێزێن پێشمەرگەی بمەزێخیت و پێدڤیە بۆ ھەیڤا نیسانا بۆری عێراق لایەنێ کێم ٥٠ ملیار دیناران بدەتە ھێزێن پێشمەرگەی، ئەگەر ل گورەی ھنارتنا پتڕۆلێ بیت بۆ ھەیڤا نیسانێ، دبیت بەغدا ٨٥٠ ھەتا ٨٨٠ ملیار دیناران بۆ ھەرێمێ فڕێکەت، نوکە عێراقێ ٥٤٣ ملیار ھنارتینە و بەغدا ٣٥%ێ مووچێ فەرمانبەرێن ھەرێما کوردستانێ بڕیە”.
ئەڤی ئەندامێ لیژنا دارایی دیارکر، بڕینا پارێ ھەرێما کوردستانێ ب بڕیارەکا تاکە کەسی بوویە ژلایێ حەیدەر عەبادی سەرۆک وەزیرێن عێراقێ، ئەڤەژی ب ئەگەرێ سیاسی دھێتە ھژمارتن و بێی کو شیرەتێ دگەل وەزیرێ دارایی و حوکمەتا ھەرێما کوردستانێ ئەڤەژی سالا بۆری تینیت بیرامە، وی دەمێ نۆری مالکیێ سەرۆک وەزیرێن بەرێ یێ عێراقێ دەمێ ب ئیک لایەنە بودجێ ھەرێمێ بڕی، ھەیڤا ئێک یا ئەڤسالە مە حەیدەر عەبادی دیتیە و ئەڤ چەندە بمە راگەھاند، بەغدا دێ ل گورەی ھنارتنا پترۆلێ بودجەی دەتە ھەرێما کوردستانێ، وی دەمی گوژمەکێ کێم یێ پارەی فڕێکر، ئەوژی ب بەھانەیا ڤێ چەندێ ھەرێما کوردستانێ نەشیایە وەکی پێدڤی پتڕۆلێ فڕێکەتە دەرڤە، نوکە بۆچی پشتی سێ ھەیڤا ب ڤی شێوەی سەرەدەریێ دگەل ھەرێما کوردستانێ دکەت، د دەمەکیدا ھەرێمێ نوکە شیان ھەنە، ل گورەی رێکەفتنا دگەل بەغدا پتڕۆلێ فڕێکەتە دەرڤە و بەھرا موچەیێ فەرمانبەرێن وێ بکەت”.
مەسعود حەیدەر گۆت” ئەڤرۆ دێ دەست ب ڤەکۆلینێ ھێتەکرن و دگەل وەزیرێ دارایی و پتڕۆلێ، ئەگەر نەگەھشتین چو ئەنجامان ئەڤە وەزیرێ دارایی و پتڕۆلێ و ھەتا حەیدەر عەبادی ژی دێ ھێتە گازیکرن بۆ پەرلەمانێ عێراقێ، ھەتا رۆھنکرنێ بدەن ل سەر بڕینا بودجێ ھەرێمێ، ھیڤیدارین بەری ئاریشە بھێتە پەرلەمانی و ھندەک لایەنێن سیاسیێن عێراقێ بکەنە موزایەدە ئاریشە بھێتە چارەسەرکرن، ئەم ژی دێ ب رێیا کەنالێن خوە یێن دبلۆماسی بزاڤان کەین ئاریشە بھێتە چارەسەرکرن و حەیدەر عەبادی ژ بڕیارا خوە پەشێمانببیت و پارێ فەرمانبەرێن کوردستانێ ڤەگەڕینیت”.

ژلایێ خۆڤەژی شاخەوان عەبدولا، پەرلەمانتارێ پارتی دیموکراتی کوردستان ل جڤاتا نوونەرێن عێراقێ بۆ رۆژناما ئەڤرۆ ئاماژە ب ڤێ چەندێ کر” مخابن بەغدا یا پێگیر نینە ب ڤێ رێکەفتنا دگەل ھەرێما کوردستانێ کری و ھەتا نوکە ١٧%ێ پشکا ھەرێما کوردستانێ ل بودجەی فڕێنەکریە، لەوڕا دێ ھەموو بزاڤەکێ کەین ئاریشە بھێتە چارەسەرکرن، بەلێ ئەگەر بەغدا یا بەردەوامبیت ل سەر ئەڤێ سیاسەتا خوە و پێگرنەبیت ب رێکەفتنا دگەل ھەرێمێ، ئەڤە دڤێت ھەرێما کوردستانێ دەمەکێ زوودا ھنارتنا پتڕۆلێ بۆ دەرڤە ب رێیا عێراقێ راگریت و لایەنێن نێڤدەولەتی ژی بھێنە ئاگەھدارکرن، کو بەغدا پێگیر نابیت ب رێکەفتنێ و بودجێ ھەرێمێ نادەت”.