ئەڤرۆ نیوز:
پشتى جڤاتا نوونه‌ران پرۆژه قانوونا هه‌لبژارتنان بۆ هه‌لبژارتنێن سالا 2021 راستڤه‌كرى، بریاره ئاراسته‌ى سه‌رۆككۆمارى بكه‌ن.
حەسەن كەعبی جێگرێ ئێكێ یێ سەرۆكێ جڤاتا نوونەرێن عیراقێ دانەیا راستڤەكری ژ پرۆژه قانوونا هەلبژارتنان ئیمزاكریه و بریارە ئاراستەی سەرۆكاتییا كۆمارێ بكەت ژبۆ پەسەندكرنێ.
ئەڤرۆ نیوز:
هژمارا تووشبوویێن کۆرۆنایێ ل جیهانێ دا گەهشتە، ٤٧ ملیۆن و ٨٥٤ هزار و ٤٢ کەسان و هژمارا وان كه‌سێن ب ئه‌گه‌رێ ڤایرۆسى وه‌غه‌ر كرى گەهشتە، ملیۆن و ٢٢٠ هزار و ٥٣٥ كه‌سان.
مالپەرێ وورلدومێته‌ر، كو داتایێن نوو یێن كۆرۆنایێ به‌لاڤ دكه‌ت و دیار دكه‌ت، كو ملیۆنه‌ك و ٢٢٠ هزار و ٥٣٥ كه‌سان ل سه‌رانسه‌ری جیهانێ دا ب وى په‌تاى وه‌غه‌ر كریه.
د ده‌مه‌كێ دا هژمارا تووشبوویێن كۆرۆنایێ گه‌هشتیه، ٤٧ ملیۆن و ٨٥٤ هزار و ٤٢ كه‌سان، ٣٤ ملیۆن و ٣٥٧ هزار و ٦٠٩ كه‌س باشبووینه و نوكه ١٢ ملیۆن و ٢٧٥ هزار و ٨٩٨ کەس هەلگرێن وى ڤایرۆسى نه.
ئەڤرۆ نیوز، زنار تۆڤی:
ل كۆمەلگەها شاریا وەلاتی هشیار میرزو، شیایە كڤاركان دناڤا شكەفتاندا بەرهەم بینیت و رۆژانه وان كڤاركان رەوانەی بازاری دكەت و داهاتەکێ باش ژی بۆ وی ژێ دهێت.
هشیار میرزۆ بۆ ئەڤرۆ نیوز دبێژیت: ئەو ب رێیا خولەكێ فێرى چاندنا كڤاركان و بەرهەم ئینانا وان دناڤا شكه‌فتان دا بوویه، ئەو خولە ژ ئالیێ ڕێكخراوەكا ئیتالی ڤە هاتبوو ڤەكرن، ئه‌و دشێت د ماوێ هەیڤەکێ دا نێزیکی 400 كیلۆگرامێن كڤاركان بەرهەم بینیت و رەوانە بازاری بكەت.
ناڤهاتی زێدەتر گوت : د نوکە دا هه‌ر كیلۆیەکا كڤاركان د بازاریدا ب چار هەتا پێنچ هزار دیناران دهێتە فرۆتن.
ئەڤرۆ نیوز:
گرێبه‌ستا رامۆسێ كاپتن و به‌رگریكارێ یانا ریال مه‌درید ل دووماهیا ڤی وه‌رزی دێ ته‌مام بیت و هه‌كه نه‌هێته نووكرن دشێت بێ به‌رامبه‌ر په‌یوه‌ندیێ ب هه‌ر یانه‌كا دیتر بكه‌ت.
به‌رنامێ ئه‌لچرینگیتۆ یێ ئیسپانی ئاشكرا كریه ، كو ل ڤی وه‌رزی دو گرێبه‌ست ژلایێ یانێن پاریس سان جێرمان و یوڤێنتوس ڤه گه‌هشتینه رامۆسى، به‌لێ ئه‌و ب باشتر دزانیت ل یانا مه‌دریدی درێژیێ ب یاریكرنێ بده‌ت.
به‌ری نوكه راپۆرتێن رۆژنامه‌ڤانان ل ئیسپانیا ئاماژه ب وێ چه‌ندێ كریه كو فلوره‌نتینۆ پێرێز سه‌رۆكێ ریال مه‌درید هێشتا هه‌ڤپه‌یڤین ل گه‌ل رامۆسی نه‌كریه ل سه‌ر نووكرنا گرێبه‌ستا دناڤبه‌را واندا و دووماهیك په‌یوه‌ندیا دناڤبه‌را واندا ل هاڤینا بوری بوویه و ڤێ چه‌ندێ ژی ئه‌و به‌رگریكارێ ئسپانی دل گران كریه.
ئەڤرۆ نیوز:
په‌یڤدارێ حكومەتا عیراقێ راگەهاند: هێزێن مه یێن ئەمنى د ئامادەنه ئاسايشا شنگالێ بپارێزن.
ئەحمەد موللا تەلال، د كڤانێ رێككەفتنا دناڤبه‌را بەغدا و هەولێرێ دا ل سەر شنگالێ و چاوانیا ده‌رخستنا پەكەكێ ل وێ ده‌ڤه‌رێ گوت: ب هشیارى و ب تایبه‌تى مه دڤیت هێزین مه یێن ئه‌منى ل شنگالێ نه‌كه‌ڤنه چو پێكدادانێن له‌شكرى، چەند ئالیه‌ك پەكەكێ ب رێكخراوه‌كا تيرۆريستى ددانن، وەكو حكومەت، مه دڤێت قانوون و هه‌بوونا دەولەتێ ل وێ ده‌ڤه‌رێ ب رێیا ب كارئینانا سياسەتا هێزا نەرم جێبەجێ بكەين، هێزێن ئەمنى یێن ئیراقێ، د ئامادەنە دۆسيا ئەمنى و ئاسايشا شنگالێ وەربگریت.
ناڤهاتى گوت ژى: دی هه‌موو مادێن رێككەفتنا شنگالێ جێبەجێ كەین و گوتیه، فرهەنسا و ئەلمانيا و چەندين وه‌لاتێن دیتر یێن ئورۆپى ئامادەيا خوه نيشاندایە بۆ دوبارە ئاڤەدانکرنا شنگالێ.
ئه‌ڤرۆ نیوز، زنار تۆڤى:
هونه‌مه‌ندێ شێوه‌كار و په‌یكه‌رساز مه‌حمود به‌كر، كو ب رۆزۆر دهێته نیاسین، خه‌لكێ عه‌فرینا رۆژئاڤایێ كوردستانێ یه و نوكه ل باژێرێ به‌یرۆتێ ل لوبنانێ دژیت، د دیداره‌كێ دا بۆ ئه‌ڤرۆ نیوز دیار كر: وى ل حه‌له‌بێ په‌یمانگه‌ها شێوه‌كارى خواندیه، كه‌سه‌كێ په‌ككه‌فتى یه، لێ ئه‌ڤ چه‌نده نه‌بوویه رێگر ل هه‌مبه‌رى كارێ وى یێ هونه‌رى، د زارۆكاتیا خوه دا وى كارێ شێوه‌كارى كریه و ل سالا 1988 وى ب به‌رده‌وامى هه‌تا نوكه كارێ شێوه‌كاریى كریه، ناڤه‌رۆكا كه‌ڤالێن وى ل سه‌ر مرۆڤاتیێ ب گشتى و ب تایبه‌تى ژى ل سه‌ر وه‌لاتى و دایكێ و ژنانه، به‌حسێ ئێش و ئازارێن وان دكه‌ت.
ناڤهاتى زێده‌تر گۆت: نوكه لوبنان د ره‌وشه‌كا خراب دایه، له‌وما پرانیا كاران ل وى وه‌لاتى و ب تایبه‌تى ل به‌یرۆتێ راوه‌ستیاینه، ره‌وشا ئێمناهیێ و كۆرۆنایێ باندۆره‌كا خراب كریه سه‌ر ژیانا خه‌لكێ، لێ دناڤ مالدا ئه‌ز كارێ خوه دكه‌م، هه‌روه‌سا به‌رى ئه‌ز ژ ر‌وژئاڤا بهێم، من پشكدارى د چه‌ندین پێشانگه‌هان دا كریه و من چه‌ندین كه‌ڤالێن خوه ژى فرۆتینه، دیسان ئه‌و د وارێ دیكۆرێن مالان ژى دا كار دكه‌ت.
مه‌حمود هێشتا دبێژیت: ئه‌و حه‌ز دكه‌ت ب رێیا كه‌ڤالێن خوه ئێش و ئازارێن كوردان بگه‌هینیته هه‌موو خه‌لكێ جیهانێ، نوكه ئه‌ڤ پرۆژه ل پێشیا وى هه‌یه، هه‌روه‌سا ژبه‌ر وێ ره‌وشا نوكه ئه‌و تێدا دژیت، نه‌شێت ب رێیا كارێ خوه ده‌بارا ژیانا خوه په‌یدا بكه‌ت، هه‌ر چه‌نده به‌رى نوكه وى گه‌له‌ك كه‌ڤالێن خوه فرۆتینه، دیسان ئه‌و كارێ په‌یكه‌رسازیێ ژى دكه‌ت و چه‌ندین كارێن وى ل ناڤا باژێرێ عه‌فرینێ هاتینه دانان، لێ پشتى عه‌فرین ژ ئالیێ توركیا ڤه هاتیه داگیر كرن، هه‌موو په‌یكه‌رێن وى هاتنیه راكرن و خراب كرن، هندى ئه‌و د ژیانێ دابیت دێ خزمه‌تا هونه‌رێ كوردى كه‌ت.
ئه‌ڤرۆ نیوز، زنار تۆڤى:
خۆرشید سلێمان خه‌لكێ گوندێ به‌لیتێ یه ل ده‌ڤه‌را به‌رێ گاره‌ى و ئه‌ڤه 30 ساله ل باژێرێ دهۆكێ دژیت، د دیداره‌كێ دا بۆ ئه‌ڤرۆ نوز دیار كر: ل سالا 1950 ژ دایك بوویه، ئه‌ڤه نێزیكى 50 سالانه كارێ فرۆتنا تووتنێ دكه‌ت، ده‌مێ ئه‌و ل گوندى ژى وى ئه‌ڤ كاره دكر و وى كاروان دكرن و تووتن ژ وێ ده‌ڤه‌رێ دئینا و ل ئه‌لكیشێ و خه‌تارێ دفرۆت، به‌رامبه‌ر هندێ وان بۆ خوه هنده‌ك كه‌لوپه‌لێن دیتر دئینان.
ناڤهاتى گۆت ژى: ئه‌و تووتنا گوندێن گویز و به‌لیتێ یا ده‌ڤه‌را به‌رێ گاره‌یی و یا ده‌ڤه‌را باله‌كایه‌تى ژى دفرۆشیت، د نوكه دا ئه‌و تووتنا ڤان هه‌ردو ده‌ڤه‌ران دفرۆشیت، كیلۆیا تووتنێ دناڤبه‌را ” 40 – 70″ هزار دیناران د فرۆشیت، رۆژانه چه‌ند كیلۆیان دفرۆشیت و وى بكرێن خوه یێن تایبه‌ت هه‌نه.
خۆرشید هێشتا دبێژیت: لدووڤ حه‌زا بكران ئه‌و تووتنێ چێدكه‌ت و بۆ وان تێكه‌ل دكه‌ت و خه‌لك پتر حه‌ز ژ یا به‌رێ گاره‌ى دكه‌ن، وى بكرێن تایبه‌ت هه‌نه، ئه‌و تووتنا خومالى دفرۆشیت، هه‌روه‌سا د به‌رێدا وى باتمانا تووتنێ ب شه‌ش دیناران دفرۆت، لێ نوكه كیلۆ ب شێست حه‌فتێ هزار دینارانه، دیسان ده‌مێ جگاران دكێشیت ژى، دزانیت یا كیژ ده‌ڤه‌رێ یه و هه‌موو جۆرێن تووتنێ دنیاسیت و دبێژیت: تووتنا توركى ره‌نگێ وێ یا زه‌ره و یا دژواره، یا به‌رێ گاره‌ى یا شینه و گه‌له‌ك تاما وێ یا خۆشه، تووتنا ده‌ڤه‌را كه‌رسێ یا ره‌شه، یا باله‌كایه‌تى یا سۆره.
ئەڤرۆ نیوز:
پێشبینیێن مه‌زن بۆ گیرۆبوونا ئه‌نجامێن هه‌لبژارتنێن سه‌رۆكاتییا ئه‌مریكا هه‌نه.
دۆنالد ترامپێ، سه‌رۆكێ ئه‌مریكا و به‌ربژارێ كۆمارییان راگه‌هاند، ئه‌و دخوازیت ل ئێڤارییا رۆژا ده‌نگدانێ ئه‌نجام بهێنه راگه‌هاندن، هه‌كه ئه‌نجامێن هه‌لبژارتنان گیرۆببن ئه‌و دێ په‌نایێ بو پارێزه‌ران به‌ت.
داخویانیێن ترامپى دده‌مه‌كى دا هاتن پێشبینیێن مه‌زن بۆ گیروبوونا ئه‌نجامان هه‌نه، ژبه‌ر وێ هه‌ژمارا مه‌زن یا ده‌نگده‌ران د ده‌نگدانا پێشوه‌خت دا كو نێزیكى سه‌د ملیۆن كه‌سان بووینه.
ده‌نگدانا گشتى بۆ هه‌لبژرتنا سه‌رۆكێ ئه‌مریكا ئه‌ڤرۆ رۆژا سێ شه‌مبى دێ هێنه كرن، هه‌ڤركێن سه‌ره‌كى بۆ پوستێ چار سالێن بهێن یێن سه‌رۆكاتییا ئه‌مریكا د ناڤبه‌را جۆ بایدن، به‌ربژارێ دیمۆكراتییان و دۆنالد ترامپ، به‌ربژارێ كومارییان دا دێ هێنه كرن.
ئەڤرۆ نیوز:
به‌ربژارێ دیمۆكراتان بۆ هه‌لبژارتنێن سه‌رۆكاتییا ئه‌مریكا، داخواز ژ ده‌نگده‌رێن ئه‌مریكى كر دیموكراسیێ بۆ وه‌لاتێ خوه ڤه‌گه‌رینن.
چۆ بایدن، د په‌یڤه‌كێ دا ل داوى رۆژا بانگه‌شا خۆه یا هه‌لبژارتنان ل ویلایه‌تا پێنسلڤانیا راگه‌هاند، ده‌م هاتییه هه‌ڤركێ وى یێ كۆمارى، دۆنالد ترامپ كۆچكا سپى بجهـ بهێلیت.
بایدنی گۆت ژى، ئه‌و دێ داویێ ب سه‌رۆكایه‌تیه‌كێ ئینن یا سه‌ركه‌فتى نه‌بوو د پاراستنا ئه‌مریكییان دا.
زێده‌تر ژى گوت، هێزا گوهورینێ ل ئه‌مریكا د ده‌ستێن ده‌نگده‌ران دایه، و داخاز كر ده‌نگ بده‌ن.
ئەڤرۆ نیوز:
سه‌رۆكێ رووسیا د په‌یوه‌ندیه‌كا ته‌له‌فۆنیدا دگه‌ل سه‌رۆكێ ئازه‌ربیجانێو سه‌رۆكوه‌زیرێنئه‌رمه‌نستانێ، ره‌وشا هه‌رێما قه‌ره‌باخ گۆتوبێژ كر.
كۆچكا سه‌رووكایه‌تیا رۆسیا كرملێنێ د به‌یانه‌كێ دا راگه‌هاند، ڤلادیمێر پۆتین د په‌یوه‌ندیه‌كا ته‌له‌فۆنى دا دگه‌ل هه‌ر ئێك ژ ئیلهام عه‌لیێف و نیكۆل باشینیان كێشه و ئالۆزیێن هه‌رێما قه‌ره‌باخێ گۆتوبێژ كرن.
پێشتر هه‌رئێك ژ سه‌رۆكێ ئازه‌ربیجانێ وسه‌رۆكوه‌زیرێن ئه‌رمه‌نستانێبه‌رهه‌ڤیا خوه بۆ راگرتنا شه‌رى ل هه‌رێما قه‌ره‌باخ و ده‌سپێكرنا دانوستاندناندیار كربوو، سه‌رۆكوه‌زیێن ئه‌رمه‌نستانێ ژى به‌رهه‌ڤیا خوه بۆ سه‌ره‌دانا موسكو و كۆمبوونا ل گه‌ل سه‌رۆكێ ئازه‌ربیجانێ دیار كرییه.
ل رۆژا 27 ئیلۆنا ئه‌ڤساله، شه‌ر و پێكدادانێن دناڤبه‌را هێزێن ئازه‌ربیجانێ و ئه‌رمه‌نستانێ ل هه‌رێما قه‌ره‌باخ دروستبوون، چه‌ندین جاران ژى هه‌ردو وه‌لات ل سه‌ر ئاگربه‌ستێ رازیبووینه، لێ تا نها ئه‌و شه‌ر و ئالۆزى به‌رده‌وامن.
نيشاندان