ئه‌ڤرۆ نيوز:
ئه‌ندامێ جڤاتا پيرێن ئه‌مريكا راگه‌هاند كو هێزێن چه‌كدارێن داعش به‌ره‌ده‌وام يێ سه‌ركه‌فتنێ دئينن و ب ڤێ چه‌ندێ ئه‌و دشێن ده‌ستێ خوه بداننه سه‌ر فرۆكخانا به‌غدا.
مه‌كين كو د هه‌مان ده‌م دا، ئه‌ندامێ لژنا هێزێن چه‌كداره د كۆنگرێسێ ئه‌مريكى دا دبێژيت: “ئه‌و سه‌ر دكه‌ڤن و ئه‌م سه‌رناكه‌ڤين، عيراقى ب سه‌ر ناكه‌ڤن، هێزێن پێشمه‌رگه‌ى و كورد سه‌رناكه‌ڤن، پێدڤيه پێداچوونێ د خوه دا بكه‌ين، ئه‌م داعش كێم ناكه‌ين ب دربێن خوه”.
زێده‌تر دبێژيت: “ئه‌ز باوه‌ر ناكه‌م كو داعش بشێت كۆنترۆلێ ل سه‌ر پايته‌ختێ عيراقێ بكه‌ت، به‌لێ دشێت كۆنترۆلێ ل سه‌ر فرۆكخانا به‌غدا بكه‌ت، ئه‌و دشێن بچنه ناڤ به‌غدا و ته‌قينان ئه‌نجام بده‌ن و هێرشێن خوه كوشتنێ بكه‌نه سه‌ر به‌غدا”.
بۆCNN ئاماژه ب وێ چه‌ندێ ژى كر كو يا دڤێت بهێته زانين ئه‌وه كو ئه‌ڤ دربێن ئه‌سمانى چو مفاى ناكه‌ت و گۆت: “يا دويێ ژى پێدڤيه هێزێن زێده‌تر بهنێرنه سه‌ر ئه‌ردى ب ره‌نگه‌كى وه‌كو هێزێن تايبه‌ت يان تشته‌كێ وه‌سان، دڤێت ئه‌م پێشمه‌رگه‌ى ژى پڕ چه‌ك كه‌ين ئه‌وێ هێشتا ب چه‌كێ رۆسى شه‌رێ داعش يا خودان چه‌كێ ئه‌مريكى دكه‌ت”.
د درێژاهيا ئاخفتنێن خوه دا گۆت: “دڤێت ئه‌م وێ چه‌ندێ بزانين كو سنور د ناڤبه‌را عيراقێ و سوريا دا نينه ژ لايێ داعش ڤه، دێ بۆچى بۆ مه هه‌بيت؟ ل كۆبانێ داعش نه‌شێت وه‌كو ڤان جهان دربێن مه‌زن بدانيت.. داعش يا ل سه‌ر ڤان دربێن ئه‌سمانى راهاتى.. دڤێت ئه‌م وێ چه‌ندێ بزانين چه‌ند داعش مه‌زن دبيت، مه‌ترسى ل سه‌ر وه‌لاتێ ئه‌مريكا زێده‌تر لێ دهێت”.
ل دووماهيێ ژى گۆت: “دڤێت جيهان بزانيت هه‌كه داعش خيلافه‌ت راگه‌هاند، ئه‌ڤه بۆ گه‌فه‌كا ب دروستاهى ل سه‌ر ئه‌مريكا.. جه‌نرال ئالن دبێژيت رزگاركرنا مووسل ساله‌ك دڤێت، ئه‌ز دبێژم ئه‌م ته‌حه‌مولا وێ چه‌ندێ ناكه‌ين”.
ئه‌ڤرۆ نيوز، ناجی به‌ده‌ل:
بڕياره ئه‌ڤرۆ لژنا به‌ره‌ڤانيكرن ژ مافێن ژنێ ل په‌رله‌مانێ كوردستانێ ل دۆر پرسا ژنێن ئێزدی كۆم بيت.
كه‌ژال هادی فه‌قی، جێگرا سه‌رۆكا لژنا به‌ره‌ڤانیكرن ژ مافێن ژنێ ل په‌رله‌مانێ كوردستانێ بۆ ئه‌ڤرۆ نیوز راگه‌هاند: ئه‌ڤرۆ ده‌مژمێر 10 سپێدێ لژنا وان دێ كۆمبوونه‌كا به‌رفره‌هـ و ڤه‌كری ل سه‌ر ره‌وشا ژنێن ئێزدی ئه‌نجام ده‌ت.
جێگرا سه‌رۆكا لژنه‌یا به‌ره‌ڤانیكرن ژ مافێن ژنێ دیاركر كۆمبوون ب پشكداريا سه‌رۆكێ په‌رله‌مانێ كوردستانێ و هه‌موو ته‌خ و چینێن دبیاڤێن ژنان ل هه‌رسێ پارێزگه‌هێن هه‌رێمێ يێن خودان سه‌ربور و شاره‌زا و هه‌موو رێكخراو و لایه‌نێن په‌یوه‌ندیدار ب ژنێڤه گرێدای و دو نوونه‌رێن ژنێن ئیزدی كو رزگاربووینه ژ ده‌ستێ داعشێ ره‌وشا ب سه‌رێ وان هاتی چ بوویه و چ ل گه‌ل هاتیه‌كرن و چاوا رزگاربوین ژ ده‌ستێ داعشێ هێته‌كرن
په‌رله‌مانتار كه‌ژال هادی فه‌قی گۆتژی: “دێ بزاڤێ كه‌ين كا چ بكه‌ین بۆ ژنێن ئیزدیان یان يێن ل شنگال چ ئه‌وێن هاتینه ئازادكرن یان ئه‌وێن هێشتا ل ده‌ستێ داعشی دانه، ئه‌م وه‌كو لژنه خوه به‌رهه‌ڤ كه‌ین و راپۆرتا خوه به‌رهه‌ڤ كه‌ین بۆ په‌رله‌مانی و ئاراسته‌ی سه‌رۆكاتیا په‌رله‌مانی كه‌ین”.
ئه‌ڤرۆ، رەڤین سالح لاوەند:
پشتی ھاتنا ئاوارەیێن شنگال بۆ دھوکێ ڤایروسێ ھەودانا مێلاکێ یا جورێ ئەی زێدەبوویە، نوشدارێن تایبەمەند ئەگەرێن زێدەبوونا وێ بۆ نەپاقژیێ و ئاڤا پیس و دیسان ب خوارنێ دانە زانین ب تایبەت ل قوتابخانا و باخچێن زارۆیان، ژ نیشانێن وێ تایەکا سڤک بو نەخۆشی پەیدا دبیت و ھەکە سپیلکا چاڤی زەر بوو و دەستئاڤا زراڤ رەنگێ وێ تاری بوو ئەڤە دبنە نیشانێن زەرکا ھەودانا مێلاکێ.
د. سەردار غازی، تایبەتمەندێ نەخۆشیێن زارۆیان دیارکر کو ئەگەرێن ھەودانا مێلاکێ گەلەکن، بەلێ یا ژ ھەمیا گرنگتر ڤایروسێن ھەودانا مێلاکێ یە، و گۆت : پێنج جورێن ڤایروسا ھەودانا مێلاکێ ھەنە، ئەوژی(A-B-C-D-E ). بەلێ یاگرنگتر ل دەڤ نوشدارێن زارۆیان، ڤایروسا ھەودانا مێلاکێ جورێ(ئەی) یە ،جورێ بی و سی ل دەڤ وان زارویان پەیدادبن یێن ھیموفیلیا ھەین، دیسان ژ ئەگەرەکێ دی زکماکی یە یان دەرمانەکی بو دەمەکێ درێژ ددەنە وان زارویێن تووشی ئێشا زراڤ دبن کو ھندەک جارا ئەو دەرمانژی دبنە ئەگەرێ پەیدابوونا ھەودانا مێلاکێ.
د. سەردار غازی، دیارکر ژی پشتی کاودان ئالوز بووین و ئاوارەیان قەستا دھۆکێ کری ڤایروسێ جورێ ئەی یێ ھەودانا مێلاکێ ل دەڤ زارۆیان دزێدەبوونێ دایە، ژبەرکو جھێ وان نە یێ درستە و ئاڤا پاقژ نینە و گۆت: ئەڤ ڤایروسە ب رێکا خوارنێ ئانکو ھەکە دەست یێ پیس بیت دھێتە ڤەگوھاستن بو کەسەکێ دی، دیسان پێدڤییە زارۆ پشتی دەستئاڤێ دەستێن خوە باش بشوون، ھەروەسان ھەکە دخێزانێ دا کەسەکێ نەخوش ھەبیت ب ڤێ نەخوشیێ دڤێت خوارنا وی و جلکێن وی د جودا بن ژ ئەندامێن خێزانێ وگۆت: پتر ئەڤ ڤایروسە ل ناڤ قوتابخانا و باخچێن زارۆیان یان جھێن قەرەبالغ ھەبیت دھێتە ڤەگوھاستن، و ئاریشا مەزن ئەوە ڤایروس دگەل پیساتیێ دھێتە ڤەگوھاستن.
تایبەتمەندێ نەخۆشیێن زارۆیان دیارکر ژی گەلەک جاران مرۆڤ نزانیت ئەڤی زارۆی جگەرا ڤایروس یا ھەی ھەتا زەرک لێ دیاربیت، و گۆت: بەری زەرکێ و پشتی زەرک لێ دیاربیت نێزیکی دو حەفتیان ئەو ڤێ نەخۆشیێ ڤەدگوھێزیتە کەسێن دەوروبەر، و گۆتژی: دەمێ کوردێن روژئاڤا ل کەمپا دومیز ئاکنجی بووین ڤایروسێ ھەودانا مێلاکێ زێدەبوو، بەلێ مە پشنیارەک دا رێڤەبەریا گشتی یا ساخلەمیا دھوکێ کو ڤاکسینا بو وان بدانن، بەلێ پشتی سۆلینێن وان دروست بووین ئەڤ ڤایروسە نەما و پشتی ھاتنا ئاوارەیێن شنگال بو دھۆکێ ڤایروسێ ھەودانا مێلاکێ جورێ (ئەی) زێدەبوویە کو روژانە پتر ژ پێنج نەخوشان ل شیرەتکاریێ سەرەدانا مە دکەن، ژبلی کلینیکین تایبەت.
ل دور نیشانێن ھەودانا مێلاکێ د. سەردا غازی دبێژیت: تایەکا سڤک بو نەخوشی پەیدادبیت و دلێ وی ناچیتە خوارنێ، دیسان دلێ وی رادبیت و زکئێشان بو پەیدادبیت، بەری زەرک بو نەخوشی پەیدا ببیت نوشدار نەشێن دەست نیشان بکەن کا ئەڤە ڤایروسا ھەودانا مێلاکێ یە، بەلێ ھەکە سپیلکا چاڤی زەر بوو و دەست ئاڤا زراڤ رەنگێ وێ تاری بو ئەڤە دبنە نیشانێن زەرکا ھەودانا مێلاکێ.
ل دور پشکنینان تایبەتمەندێ نەخۆشیێن زارۆیان خویاکر کو تەماشەی جورێن زەرکێ دکەن یا ئێکسەرە یان ژی زەرکا نە ئێکسەرە، دیسان رێژا زەرکێ چەندە، و فرێدکەینە پشکنینێن ڤایروسی، ژبەرکو نەشێن ب چاڤان دەست نیشانکەین کا کیژان جورە وگۆت: بەلێ باراپتر جورێ ئەی دەردکەڤیت و ئەڤ جورێ ڤایروسی دەرمان نینە پێ بھێتە کوشتن، ب تنێ سێلانێ و ڤیتامینا ددەینێ، نە وەک جورێ بی و سی یە، کو دەرمانا ددەنێ بو ماوەیەکێ درێژ، ھەکە خارنا زاروی باشتر لێ ھات، ئێک ژ نیشانێن گرنگە کو نەخوش دێ شێتە ئێشێ، ھەکە زەرکا زارۆی کێمبوو پێدڤی ناکەت ل نەخوشخانێ بمینت، بارا پتر ئەڤ نەخوشیە نێزیکی دو حەفتیان ڤەدکێشیت، بەلێ ھندەک نەخوش ھەتا دو ھەیڤان ل نەخوشخانێ ھاتینە نڤاندن، چونکی نەخوشیا وان دومدرێژ دبیت.
تایبەتمەندێ نەخوشێن زارۆیان دا زانین ھندی زارۆ دژییەکێ بچووک دا تووشی ھەودانا مێلاکێ بیت دێ زوو ژ ڤێ نەخوشیێ چارەسەر بیت، بەلێ ھەکە دژییێ ٢٠ سالیێ و وێڤە بوو دبیت ریژا وێ زێدە ببیت و ببیتە ئەگەر گیانێ خوە ژ دەست بدەن، بەلێ ٩٥% ژ ڤێ نەخوشیێ ساخ دبن، چونکو جورێ ئەی ھندێ مەترسی نینە ل سەر نەخوشی، ١ھەتا ٥% ب ڤێ نەخوشیێ گیانێ خوە ژ دەست ددەن، ژبەرکو پێدڤی چاندنا مێلاکێ دبن، کو نێزیکی ٣١ نەخوشان ل ھەیڤا بوری ب ھەودانا مێلاکا جورێ ئەی ل نەخوشخانێ ھاتینە نڤاندن و ھندەک ژی بڤێ نەخوشیێ گیانێ خوە ژ دەست داینە.
ئه‌ڤرۆ، سەرجان مەحمود:
جێگرێ سەرۆکێ پارتا کۆماریا گەل (CHP) راگەھاند کو ئەو ژ نێزیک ڤە دووڤچوونا رەوشا کۆبانێ دکەن و گەلەک خەمگینە ل ھەمبەر ھێرشێن نەمرۆڤی یێن تیرۆرستێن داعشێ و دڤێت د زووترین دەم دا حوکمەت ھەڤکاریا کۆبانێ بکەت و ھەلویستەکی دژوار ل دژی داعشێ وەربگریت، بەرۆڤاژی وێ یەکێ دێ تورکیا تووشی قەیرانەکا گەلەک مەزن بیت.
سەزگین تانری کولو جێگرێ سەرۆکێ پارتا کۆماریا گەل CHP د دیدارەکا تایبەت دا بۆ رۆژناما ئەڤرۆ ل سەر رەوشا کۆبانێ، قۆناغا ئاشتیا تورکیا و ھەلویستێ پارتا وی ل سەر پرسا کوردی و ھەرێما کوردستانێ و رۆژئاڤا داخۆیانیێن گرینگ دان و راگەھاند کو سیاسەتا نھا یا تورکیا ل ھەمبەر کوردان سیاسەتەکا گەلەک شاشە و ھەلویستێ ل ھەمبەر رۆژئاڤایێ کوردستانێ ب تایبەتی کۆبانێ ژی دوورە ژ ئەقلێ سیاسی و بەرژەوەندێن تورکیا.
جێگرێ سەرۆکێ گشتی یێ CHP ل سەر رەوشا کانتۆنا کۆبانێ و ھێرشێن تیرۆرستێن داعشێ دیار کر کو ئەز ب ناڤێ پارتا خوە ھێرشێن تیرۆرستێن داعشێ بۆ سەر رۆژئاڤا ب گشتی و کۆبانێ ب تایبەتی ب دژواری شەرمەزار دکەت و گۆت: (خەلکێ کۆبانێ و رۆژئاڤایێ کوردستانێ نە خەلکەکی بیانی نە، بەلکو خزمێن مەنە و خەلکێ سروجێ و کۆبانێ ھەموو مرۆڤێن ھەڤدو نە و نابیت تورکیا ل ھەمبەر ھێرشێن نە مرۆڤی یێن تیرۆرستان بێدەنگ بمینیت و رێ بۆ تیرۆرستان خوەش بکەت دا کو ژ ئاخا تورکیا دەربازی کۆبانێ ببن و ھێرشێ برایێن مە بکەن، ئەڤرۆ ژ ئەنجاما سیاسەتا شاش یا حوکمەتا تورکیا رۆژ ب رۆژێ جیھانا دەرڤە تورکیا وەک ھەڤکارێ تیرۆرستان تۆمەتبار دکەت و د ئاستێ نێڤدەولەتی دا باوەریا ژ حوکمەتا ئەردۆگان و داوود ئوگلۆ گەلەک کێم بوویە و دڤێت د زووترین دەم دا حوکمەت ژ سیاسەتا خوە یا شاش ڤەگەریت و ھەڤکاریا رۆژئاڤا ب تایبەت کۆبانێ بکەت، ژ بەر کو ھەکە کۆبانێ بکەڤیتە دەستێ تیرۆرستان دێ رەوشا تورکیا ژی گەلەک ئالۆز بیت و دێ رێ ل بەر روودانێن گەلەک مەزن ڤەکەت).
سەزگین تانری کولو ل سەر قۆناغا ئاشتیا تورکیا و باکورێ کوردستانێ ژی دیار کر کو ئەو ب ئاشکرا دبێژیت ھەتا نھا ژ ئارمانجا حوکمەتێ و قۆناغا ئاشتیێ تێنەگەھشتیە و نزانیت چ بەرنامەکا حوکمەتێ بۆ چارەکرنا پرسا کوردی ھەیە و گۆت: (زمانێ حوکمەتێ دوورە ژ چارەکرنا پرسا کوردی و ھەکە ب راستی مەرەما حوکمەتێ چارەکرنا پرسا کوردیە بلا نەخشەیا چارەکرنێ ب زەلالی دیار بکەت و ھەڤدیتنێن ل گەل ئۆجەلان و قەندیلێ و پارتا دیمۆکراسیا گەلان را بۆ مە و بۆ رایا گشتی ئاشکرا بکەت. ئەز ب ئاشکرا دبێژم ھەتا ھەڤدیتنێن ل گەل ئۆجەلان و قەندیلێ ب زەلالی نەھێنە راگەھاندن باوەریا من ب قۆناغا ئاشتیێ یا حوکمەتا تورکیا نینە و ھەکە ئارمانجا حوکمەتێ چارەکرنا پرسا کوردی بیت چاوا ل ھەمبەر ھێرشێن تیرۆرستێن داعشێ یێن ل سەر رۆژئاڤا بێدەنگ دمینیت؟).
ل سەر ھەلویستێ CHP ل ھەمبەر ھەرێما کوردستانێ و سیاسەتا پارتا وی بۆ چارەکرنا پرسا کوردی ل تورکیا و رۆژئاڤایێ کوردستانێ ژی سەزگین تانری کولو راگەھاند کو ئەو دخوازن پەیوەندیێن ل گەل ھەرێما کوردستانێ بەرفرەھتر و باشتر ببن و راستیا ھەرێما کوردستانێ ب ھەموو رەنگەکی ڤە قەبوول دکەن و گۆت: (ھەرێما کوردستانێ رویێ گەش و پێشکەڤتی یێ عیراقێیە و ئەم دخوازین کو ھەردەم ئارامی لێ ھەبیت و دیمۆکراسیا وێ پێشکەڤیت و ل دووڤ ھزرا من وەلاتیێن ڤێ ھەرێمێ د ھەر واری دا دشێن پاشەرۆژا خوە دیار بکەن و ئەو یەک مافێن وان یێ ھەری سروشتیە).
د بەردەوامیا ئاخڤتنا خوە دا ل سەر سیاسەتا پارتا وی بۆ چارەکرنا پرسا کوردی ل تورکیا ژی دیار کر پارتا وی ھەر دەم دخوازیت پرسا کوردی ب دانوستاندنێ و ب رێیا ئاشتیێ بھێتە چارەکرن و بۆ ڤێ یەکێ ژی چەندین پرۆژە پێشکێش کرینە و گۆت: (بۆ مەزنبوون و پێشکەڤتنا دیمۆکراسی و گەشبوونا ئابووریێ و پێکڤەژیانێ دڤێت پرسا کوردی بھێتە چارەکرن و پارتا مە ژی ھەردەم بەرھەڤە پێشەنگیا چارەکرنا وێ پرسێ بکەت و سیاسەتا پارتا مە ئەڤە کو ل پەرلەمانی چارەسەریا ھەری راست و گونجای بۆ چارەکرنا پرسا کوردی بھێتە پەیدا کرینە و ھەموو ئالیێن جڤاکی و سیاسەتا تورکیا د ڤێ چارەسەریێ دا جە بگرن و ئاشتیەکا سەرتاسەری یا سیاسی و جڤاکی ب ڤی رەنگی بھێتە دروست کرن).
سەزگین تانری کولو جێگرێ سەرۆکێ CHP د دووماھیا ئاخڤتنا خوە دا ژی راگەھاند کو دڤێت تورکیا بۆ پاراستنا کۆبانێ ئەرکێ سەر ملێن خوە بجە بینیت و بێی گیرۆ بوون دەست ب بزاڤێن مەزن بکەت و گۆت: (د دەمەکی دا کو ل بەر چاڤێن مە تیرۆرستێن داعشێ ب چەکێن گران و ب رەنگەکی ھۆڤانە ھێرشی کۆبانێ دکەن و حوکمەتا مە خوە بێدەنگ کریە و بێی ھەلویستە، ئەم دێ چاوا بەحسێ براتیا ل گەل کوردان بکەین و ئەڤ حوکمەت دێ چاوا پرسا کوردی چارە بکەت، ئەڤە جھێ گۆمانێیە. سیاسەتا پارتا مە د ڤی واری دا گەلەک زەلالە و ئەم دخوازین کوردێن رۆژئاڤا بھێنە پاراستن و حوکمەت چ دەمێ بریارێ بۆ پاقژکرنا کۆبانێ ژ تیرۆرستان بدەت ب مەرجێ کو پشتی پاقژکرنا تیرۆرستان ڤەگەریتە تورکیا ئەم دێ پشتەڤانیێ لێ کەین. ل دووڤ ھزرا من پاراستنا کۆبانێ ئەرکەکی مرۆڤیە ل سەر ھەموو جیھانێ).
ئەڤرۆ، چەکدار ئەترووشی:
بۆ دەمێ چەند رۆژانە پارت و ئالیێن سیاسی یێن رۆژئاڤایێ کوردستانێ ل دھوکێ نە بۆ گەھشتن ب رێککەفتنەکێ و پێکڤە کارکرن، ئەندامەکێ دانوستاندنان دیارکر کو ھەڤالێن جڤاتا نیشتمانی یا کوردی وەکو (اصحاب االكهف)ن، وان تشتەک دڤێت یێ کو ئەستەمە بھێتە بجھئینان و دێ کومبوون د بەردەوام بن ھەتا رادەکی نەزێدەتر.
ئالدار خەلیل ھەڤسەروکێ تەڤدەمێ بۆ ئەڤرۆ گوت” ئەم دێ د بەردەوام بین ل سەر کومبوونێن خوە بۆ ھندێ بگەھینە رێککەفتنەکێ، لێ کومبوونێن مە ژی دێ د دەمی بن، چونکو ئەم نەشێین ھەتا سالەکا دی ب دانوستاندنان ڤەبین و بێ مفابن”.
ھەڤسەروکێ تەڤدەمێ ئاماژە ب وێ چەندێ کر کو ھەتا نوکە نەگەھشتینە چو رێککەفتنان و گوت” ھەڤالێن جڤاتا نیشتیمانی یا کوردی دڤێن بھێنە سەر سفرێ د دەمەکی دا کو پەیەدێ ھەموو کار بۆ خەلکێ رۆژئاڤا کریە و نوکە خودان دامودەزگەھن، ئالیێن بەرامبەر دڤێت ببنە ھەڤپشک دڤێ چەندێ دا کو ئەڤە ناھێتە کرن.”
ئەندامێ شاندێ دانوستاندکار دیارکر کو کارێ ھەڤالێن جڤاتا نیشتمانی یا کوردی شەڕ نینە و گوت” برادەرێن جڤاتێ چو ھێزێن لەشکری نینن کو شەڕی پێ بکەن و د بنەرەتدا کارێ وان ئەو نینە چونکو چو پێ چێنابیت.”
ناڤبری گوت ژی” ئالیێن سیاسی یێن دێ یێن کورد ل رۆژئاڤا د خەوەکا گران دابوون وەکو (اصحاب االكهف) و پشتی ھەموو کار بۆ رۆژئاڤا ھاتینە کرن، ل وی دەمی ھاتن و داخوازا ھەڤپشکیێ کر.”
ل دۆر ھێرشا (پەیەدەێ) ل چیایێ شنگالێ، ئالدار خەلیل گوت” چو راستی بۆ نینن و یا دروست ئەوە ھەڤالێن مە بەرگری ژ ھێزێن پێشمەرگێ کوردستانێ کریە و ئەڤ چەندە بۆ ئەگەر چەند ھەڤالێن مە بریندار ببن”.
ھەڤسەروکێ تەڤدەمێ دیارکر کو د بەرھەڤن شەڕی بۆ رزگارکرنا شنگالێ بکەن و گوت” ل ھەر بھوستەکا کوردستانێ شەڕ ھەبیت و مەترسی ل سەر بیت د بەرھەڤین شەڕی بۆ بکەین و شەھیدان بۆ بدەین، ھەکە ژمە بھێـتە خواستن”.
ئایە چەک بۆ کوبانێ ھاتیە ھنارتن، ناڤبری گوت” ل دووڤ شیانان باشور تەخسیری نەکریە و ب ھیڤی نە ئەڤ چەندە یا بەردەوام بیت.”
ل دۆر چونا ھێزێن پێشمەرگێ کوردستانێ بۆ کۆبانێ، ئالداری گوت” چو ھێز نەچوینە کۆبانێ ژبەر نەبوونا چو رێیان و وەلاتێ تورکیا ژی رێ نادەت د ئاخا وێ دا ئەڤ ھێزە بھێتە رەوانەکرن.”
ناڤھاتی ھەلویستێ تورکیا ب خرابی دا دیارکرن و گوت” تورکیا ب ھەموو شیانان کار دکەت بۆ شکاندنا کوردان و رۆلێ وێ بو ڤێ چەندێ یێ دیارە”.
ھەڤسەروکێ تەڤدەمێ ئەو چەندە ئاشکرا کر کو کۆبانێ یا سەرکەفتی و نوکە چو تیرۆرست تێدا نەماینە و ئەڤ چەندە بویە جھێ حێبەتیبوونێ بۆ جڤاکێ نێڤدەولەتی و بوویە ئەگەر کو ئۆباما بەغدا و ئەنبار بھێلیت و د ھەوارا کۆبانێ بھێت کو ئەڤە جھێ سەربلندیێ یە بۆ مە کوردان.
ئەڤرۆ، رێوار مزیری:
بەرپرسێ پشکا پەیوەندی و راگەھاندنا رێڤەبەریا پۆلیسێن پارێزگەھا دھۆکێ دیار کر کو ل رۆژا پێنجشەمبی یا بۆری ١٦/١٠/٢٠١٤ ل دەمژمێر ٩:٣٠ شەڤ ھژمارەکا قۆمارچیا ل بیستانەکێ پارێزگەھا دھۆکێ دەستەسەرکرن.
نەقیبێ مافپەروەر ھێمن سلێمان ئەترووشی بۆ رۆژناما ئەڤرۆ گۆت”پۆلیسێن چالاکیێن مەدەنی دگەل پۆلیسێن ھەوارھاتنێ ل دھۆکێ شیان ١٥ قۆمارچیا ل ناڤ بیستانەکێ پارێزگەھا دھۆکێ و دگەل پەرکێن وان یێن کۆمکانێ و ١٣٣ پیلێن قومارێ دەستەسەر بکەن”.
ناڤھاتی ئاماژە دا وێ چەندێ ژی کو ئەڤ قومارچیە ھاتنە رەوانەکرن بۆ بنگەھێ نەورۆز یێ پۆلیسان و ب بریارا دادوەرێ ڤەکۆلینێ ھاتنە زیندانکرن و ل دووڤ بەندێ ٣٨٩ ژ قانوونا سزایێن عیراقی.
ھونەرمەندا بەرنیا مسری سومەیە ئەلخەشاب دیارکر کو ھەتا نھۆ ھەموو جلکێن وێ ل گەل ئێکسسوارتێن وێ ژلایێ دایکا وێڤە بۆ دھێتە ھەلبژاراتن، ھەروەسا ئەو سیناریۆێن بۆ دھێن ژی بەری وێ دایکا وێ دخوینیت و بریارێ ل سەر ددەت.
ناڤبریێ ددیدارەکێ دا گۆت: ژبەرکو دایکا من نەبەس دایکە بەلکو ھەڤالەکا وەفادارە ژی بۆ من، لەورا ل ھەموو ژیێ خوە من دلێ وێ نەھێلە و تانھۆ ژی دەمێ دەرھێنەرەک سیناریۆیا فلمەکی ئان زنجیرەکا تەلەفزیۆنی ددەتە من ئەز نیشا وێ ددەم چونکو رەئیا وێ بۆ من یا گرنگە و ھەکە ھاتوو گۆت: پشکداریێ دڤی بەرھەمی دا نەکە ئەز ناکەم.
ھەروەسا گۆت: بۆ کرینا جلکا و ئێکسسواراتان ژی ئەز وێ ل گەل خوە دبەم چونکو خودان زەوقەکا باشە و ئەو بۆ من دھەلبژێریت.
ل دووماھیێ گۆت: ئەلبۆما وێ یا نوو یا دقوناغێن دووماھیێ دا و سترانەک ب زارێ خەلیجی ھاتیە گۆتن کو دێ ل ڤان رۆژان ھێتە کلیپکرن.
به‌رهه‌ڤكرن، شاكر ئه‌ترووشى:
نيشاندان