ئەڤرۆ، چەکدار ئەترووشی:

پشتی کو بۆ دەمێ چەند رۆژان تیرۆرستێن داعش ناحیا رەبیعە ئێخستیە بن کونترۆلا خوە، دوھی و ب سەرپەرشتیا ئێکسەر یا سەرۆک مەسعود بارزانی فەرماندێ گشتیێ ھێزێن پێشمەرگەی ھێرش بۆ کونترۆلکرنا رەبیعە دەستپێکر و ھاتە رزگار کرن ب تەمامی.

ژێدەرەکی تایبەت بۆ رۆژناما ئەڤرۆ دیارکر کو ھێزێن پێشمەرگەی ژ چار لایان ڤە ھێرش کریە سەر تیرۆرستێن داعش و گوت” بۆ کونترۆلکرنا ناحیا رەبیعە ئەو چەند رۆژ بوون ب سەرپەرشتیا سەروکێ ھەرێما کوردستانێ کومبوونێن بەردەوام دھاتنەکرن بۆ دانانا نەخشەکێ لەشکریێ ب رێکوپێک، سۆپاس بۆ خودێ دوھی بەری سپێدێ ھێرشێ دەستپێکر ژ چار لایان ڤە و شیاین کونترۆلا رەبیعە بکەین”.

ھەمان ژێدەر ئەو چەندە دا دیارکرن کو رزگارکرنا رەبیعە دەرگەھێ مەیە بۆ وێ چەندێ کو ب تمامی ئەو دەڤەر بھێـتە پاقژکرن ژ تیرۆرستان و گوت” د وێ باوەریێ داینە کو چەژنا قوربانیا ئەڤ سالە دێ بیتە جەژنا سەرکەفتنێ، چونکو نەخشەکێ گەلەک ب ھێز ھاتیە دانان بۆ ھندێ ھەتا بەعاج بچین و ھەموو دەڤەرێ رزگار بکەین ژ تیرۆرستان”.

ھەمان ژێدەر ئەو چەندە دا دیارکرن کو ھێرشا ل سەر رەبیعە ئێکسەر ب سەرپەرشتیا سەروک بارزانی بۆ و گوت” سەروکێ ھەرێما کوردستانێ مەسعود بارزانی سەرپەرشتیا ئێکسەر یا ھێرشا ل سەر رەبیعە دکر و یێ ئامادەبو د سەنگەرێن شەڕی دا و ئامادەبوونا وی بۆ ئەگەرێ وێ چەندێ کو وڕەیێن پێشمەرگەی بلندتر لێ بھێن”.

ژێدەرێ نەڤیایی ناڤێ وی ئاشکەرا بکەین، دیارکر ژی کو فرۆکەیان رولەکێ مەزن ھەبوو و گوت” فرۆکێن ھەڤپەیمانیا نێڤدەولەتی رۆلەکێ مەزن ھەبوو د ڤێ ھێرشێ دا و لێک تێگەھشتنەکا باش ژی یا ھەی ل گەل پێشمەرگی َکوردستانێ”.

زێدەتر ژێدەری ئاماژە ب وێ ئێکێ کر کو ھێرشا وان ژ چار لایان ڤە بو و گوت” ژلایێ سنوورێ وەلاتێ سووریێ ڤە ژ دو جھان پێشمەرگەی پێشڤەچوون کر و تیرۆرستێن داعش شکاندن، ژلایێ دی ڤە ژی ل دو جھان کو ئەڤێ تەکتیکێ سەرگرت و شیاین ب سەرکەفتیانە ئەوان جھێن کو بریار بۆ ھاتیە دان بھێنە کونترۆلکرن ھاتە رزگارکرن و وڕەیا پێشمەرگەی وەسا یا بلند بۆ ئەم د ترسیاین کو گەلەک شەھیدان بدەین”.

چاڤدێرێن سیاسی ژی ئەوێ چەندێ رادگەھینن کو رزگارکرنا رەبیعە باشترین  پێنگاڤ بۆ ھاتیە ھاڤێتن، چونکو جھەکێ ستراتیژی بوو بۆ داعش کو ژ وەلاتێ سووریێ چەک و تەقەمەنیان بینن و ژلایەکێ دیڤە ھەموو ئەو بزاڤێن تیرۆرستان دکرن بۆ کونترۆلکرنا خالا سنۆری یا رەبیعە کو ژ لایێ رۆژئاڤای ڤە ھاتنە ژناڤبرن و راوەستاندن کو مەترسی بوو ل سەر کوردستانێ”.

د ھێرشا پێشمەرگێ کوردستانێ دا بۆ سەر ناحیا رەبیعە، ھێزێن فەرماندەیا دھۆک یا پێشمەرگێ کوردستانێ و لەشکرێ تایبەتێ ئێک و لەشکرێ تایبەتێ گولان و فەرماندەیا سەفین یا پێشمەرگێ کوردستانێ و فەرماندەیا زێرەڤانی و ھێزا پشتیوانی ئێک و ھێزا دەست وەشین یا ب سەر فەرماندەیا دھۆک یا پێشمەرگێ کوردستانێ ڤە.

ناحیا رەبیعە دەڤەرەکا ستراتیژی یە بۆ ھەرێما کوردستانێ و عیراقێ ب گشتی، چونکو دبیتە خالا سنۆری د ناڤبەرا وەلاتێ سووریێ و عیراقێ دا و ھژمارا ئاکنجیێن وێ پترن ژ ٩٠ ھزار کەسان و ژ ٧٢ گوند و کومەلگەھان پێک دھێت کو پتریا وان عەرەبنشینن و بتنێ ٧ ژ وان گوندان کوردن، رەبیعە ٥٠ کیلومەتران ژ ناحیا زومار یا دوورە”.