ئه‌ڤرۆ:
بزاڤا ئەفسەرێن ئازاد ل مووسل کو دژی داعشێ شەڕی دکەن راگەھاند، تیرۆرستێن داعشێ ١٣ سەربازگەھێن تایبەت ب مەشکرنا زارۆیان ل سەر بکارئینانا چەکی ل مووسلێ ڤەکرینە,
محەمەد فاھم ئەلشمەری شیرەتکارێ لەشکری یێ بزاڤا ئەفسەرێن ئازاد ل مووسلێ د داخۆیانیەکا رۆژنامەڤانی دا گوت” ھەتا نۆکە مە ١٣ سەربازگەھێن داعشێ یێن مەشقکرنا زارۆ و سنێلان ل سەر بکارئینانا چەکی و بەلاڤکرنا ھزرا تەکفیری دەستنیشانکرینە، کو ھەموو ژ کۆرێن باژێرێ مووسلێ نە”.
ئەڤرۆ:
رۆژا 6ی کانوونا دویێ دبیتە سالڤەگەرا دامەزراندنا لەشکرێ عیراقێ کو د رۆژا 6\1\1921ێ ئێکەم فەوجا لەشکرێ عێراقێ ھاتە پێکئینان، پەرلەمانتارەکێ کورد ژی دبێژیت، ب درێژاھیا دیرۆکێ ئەڤی لەشکری زۆلم ل مللەتێ کورد کریە و ئەم ئەڤێ رۆژێ ساخناکەین و لەشکرێ عیراقێ ژی لەشکرێ مە کوردان نینە.
شاخەوان عەبدولا، ئەندامێ لژنا ئاسایش و بەرگریێ ل جڤاتا نوونەرێن عیراقێ دیارکر، مخابن دوھی ئەڤ رۆژ بوو کو تێدا لەشکرێ عیراقێ ھاتیە دامەزراندن و بۆ ئەڤرۆ گۆت ” لەشکرێ عیراقێ ئامیرەک بوو ژبۆ تەپەسەرکرنا مللەتێ کورد و مللەتێن دی یێن عیراقێ، ھەر ئەف لەشکرە بوو د ھەوێن ئەنفالان دژی خەلکی کورد و تەپەسەرکرنا خەلکێ شیعە مەزھەب ھاتیە بکارئینان، ھەموو ئەڤ تاوانێن دژی گەلێ کورد ھاتینە ئەنجامدان لەشکرێ عیراقێ تێدا پشکدار بوویە و بێ لایەنی نە پارستیە، ھەروەسا ددەمێ سالێن بۆری دا بتایبەتی ھەشت سالێن دەستھەلاتداریا مالکی، دوبارە لەشکرێ عیراقێ بۆ مەرەمێن خوە یێن تایبەت بکارئینان و خونیشاندەرێن سونە ھاتنە تەپەسەرکرن و سالا 2012ێ مالکی دخواست لەشکرێ عیراقێ دژی کوردان بکاربینیت و فەرماندەیا ئۆپەراسیۆنێن دیجلە بۆ ڤێ مەرەمێ دامەزراند و دخواست ھێرشێ ل سەر دەڤەرێن کوردستانێ بکەت، ھەموو ڤان ئەگەران تشتەکێ وەسا کر وەلاتیێن عیراقی باوەری ب ڤی لەشکری نەمینیت و ب لەشکرێ خوە نەزانن، ھەتا وی دەمێ لەشکرێ عیراقێ نەبیتە لەشکرەکێ نیشتیمانی و بێ لایەن، یا ب زەحمەتە باوەری بۆ وەلاتیێن عیراقێ دروست ببیت ب لەشکرێ خوە بزانن، ئەڤە ژی ب بجھئینانا دستوورێ عیراقێ دبیت، لەشکرێ نوو یێ عیراقێ ژ دەرڤەی دستووری ھاتیە پێکئینان و د مادێن 61 و 80 دا ھاتیە دڤێت پەرلەمان فرقەیێن لەشکری دیار بکەت، ھەتا ببیتە جھێ باوەریا خەلکی، بەلێ د سالێن بۆری دا، ئێک لایەنی لەشکری ھاتیە ب رێڤەبرن”.
شاخەوانی گۆت ژی” ل سالێن بۆری چو وەکھەڤی د پێکھاتا لەشکرێ عیراقێ دا نەبوویە و کورد و پێکھاتێن دی ھاتینە بێ بەھکرن ژ پشکا خوە یا دستووری و ددەمێ نوکەدا تنێ رێژەیا کوردان دناڤ لەشکرێ عیراقێ دا 3%ێ یە و ئەڤەژی پشکا راستەقینەیا کوردان نینە و ھەتا وی دەمێ مە بەھرا خوە نەبیت دناڤ لەشکرێ عێراقێ دا، ئەم ب لەشکرێ خوە نوزانین”.
خۆیاکر ژی” د سالڤەگەڕا دامەزراندنا لەشکرێ عیراقێ سەرکردێن سیاسی و سەربازی یێن عیراقێ چو ئاماژەک ب رۆلێ پێشمەرگەی نەکریە د بەرگریێ دا ژ ئاخا عیراقێ و کوردستانێ د شەڕێ دژی تیرۆرێ دا، ئەڤە ددەمەکی دایە پێشمەرگە ب درێژاھیا ھزار کیلۆمەتران یێ ئەردێ مە ژ تیرۆرستێن داعشێ دپارێزیت و ئەڤە نیشانا وێ چەندێ یە کو پێشمەرگەی ب پشکەک ژ لەشکرێ عیراقێ نا ھەژمێرن”.
ئەڤرۆ:
سکرتێرێ” پارتا بەیت نەھرێن” راگەھاند کو دوھی ھێزا ئاشووریان ب رەنگەکێ فەرمی ل تلسقۆف ھاتە راگەھاندن کو ھژمارا وان 500 کەسن.
رۆمیۆ ھەکاری ئاشکرا ژی کر کو ئارمانج ژ ڤێ ھێزێ ئەوە دا پاراستنا وان دەڤەران بکەت یێن بۆ ھاتینە دیار کرن و گۆت: “ئەڤ ھێزە دێ د چارچوڤێ وەزارەتا پێشمەرگێ کوردستانێ دا بیت و پشتی نەمانا داعش ژی ئەڤ ھێزە ھەر دێ ل جھێن خوە مینن و دەڤەرا خوە پارێزن”.
ئه‌ڤرۆ نیۆز: قائید میرۆ
به‌رپرسه‌كێ كورد ل میحوه‌رێ شنگالێ ب ئه‌ڤرۆ نیۆز راگه‌هاند، تنێ ل سنورێ ناحیا سنوونێ پێنج گۆڕێن بكۆم یێن كوردێن ئێزدی هاتینه دیتن.
غه‌یاس سورچی، كارگێڕێ مه‌لبه‌ندێ ئێكه‌تیێ ل مووسل ب ئه‌ڤرۆ نیۆز راگه‌هاند: هه‌تا نوكه ل ناحیا سنوونێ یا سه‌ر ب قه‌زا شنگالێ پێنج گۆڕێن بكۆم هاتینه دیتن، كو هه‌موو كوردێن ئێزدینه یێن ژلایێ چه‌كدارێن داعش هاتینه كوشتن.
سورچی دازانین: كو هنده‌ك ته‌رمێن ناڤا گۆڕێن بكۆم سه‌ر ئاخێ كه‌فتینه و دیاره یێن كوردێن ئێزدینه، به‌لێ دێ ژلایێ تیمه‌كا تایبه‌ت هێنه هلدان و پشكنین دێ بۆ ته‌رمێن ناڤا گۆڕێم بكۆم هێته‌كرن.
ئه‌ڤرۆ نیوز:
واسیپ شاهین پارێزگه‌رێ ئسته‌نبول ئاشكراكر كو ناسناما وى كه‌سى ئاشكرابوو كو ل ئێڤاریا 6/1 خوه ل مه‌یدانا سولتان ئه‌حمه‌د ل ئیسته‌نبولێ په‌قاندى و گۆت: ژنه‌كه، ناڤێ وێ ئه‌لیف سولتان كالسه‌نه و ئه‌نداما رێكخراوا نه‌یاسایى یا چه‌پره‌و ( پارتا به‌ره‌یا رزگاریا گه‌لێ شورشكێر DHKP-C یه).
ئه‌و ژنه به‌رى نوكه ب تومه‌تا ئه‌ندامه‌تیێ د ڤێ رێكخراوا نه‌یاسایى دا هاتبوو گرتن و پاشێ هاتبوو ئازادكرن، د چه‌ندین خونیشانانان دا وێنه و دیمه‌نێن وێ هاتینه توماركرن.
ئه‌ڤرۆ نیوز ، بارزان سلێمان مزوورى
ژێده‌ره‌ك ژ ئێمناهیا كومپانیا به‌رهه‌مئینانا پترولێ ل گوندێ بیساتێ سه‌ر ب ناحیا قه‌سروك ڤه بۆ ئه‌ڤرۆ نیوز دیار كر كۆ شوفێره‌كێ تورك یێ ڤه‌گوهاستنا پترولێ د ناڤ ترومبێلا ویدا ناسنامه‌یه‌كا رێكخستنا چه‌كدارێن تیرورستێن داعش تێدا بوو و هاته ده‌سته‌سه‌ركرن و راده‌ستێ ده‌زگه‌هێن ئیمناهیێ ل قه‌زا شێخان هاتیه كرن.
ل دووڤ پێزانینێن ئه‌ڤرۆ نیوز بده‌ست خستین، ئه‌ڤ شوفێره ژبوى ڤه‌كولینى ره‌وانه‌ى دهۆكێ هاتیه كرن.
ئه‌ڤرۆ نیوز، مه‌سعود خه‌له‌ف:
ئه‌ڤرۆ د ئه‌نجامێ په‌قینا بومبه‌كێ دا، ل ده‌ڤه‌را سولتان ئه‌حمه‌د یا گه‌شتیاری ل ئسته‌نبولێ دو كه‌س برینداربوون كو ئێك ژ وان پۆلیسه.
ته‌له‌فزیونا Ntv یا توركی دیاركریه كو كه‌سه‌كێ نه‌نیاس بومبه‌ك هاڤێته جهێ پۆلیسان ل ده‌ڤه‌را سولتان ئه‌حمه‌د و ده‌ست ب ڤه‌كولینێ هاتیه كرن بۆ ده‌سته‌سه‌ركرنا گونه‌هباران.
ل گور پارێزگه‌رێ ئیسته‌نبولێ فیسیب شاهین، ژنه‌كێ خوه ل ده‌ڤه‌را سولتان احمه‌د یا گه‌شتیاری په‌قاند و ئه‌ڤ ژنه چوویه د بنگه‌هه‌كێ پولیسان ڤه و گۆتیه كو وێ جوزدانكا خو یا پاران به‌رزه‌كریه به‌ری كو بومبه‌یا ل گه‌ل خو ببه‌قینت، هه‌ر وه‌سا پارێزگه‌ری گۆت ژی كو پولیسێن پسپور بومبه‌یه‌كه دی یا كو د ب ژنكێ ڤه بوو بێ باندور كرن.
ل دور رودانێ گروپه‌كه ماركسی كو ناڤێ وان (پارتیا رزگاری یا گه‌له‌ری یا شوره‌شگێر )په‌رپرسیاریا خو ژ په‌قینێ راگه‌هاند. و گرۆپا نڤبری گۆتیه ژی كو ئارمانجا وان ژ ڤێ صالاكیێ سزادانا پارتیا دادوه‌ری و گه‌شپێدانێ یا ده‌ستهه‌لاتدار بوویه، ئه‌و ژی پشتی كو وان دادگه‌هكرنا چار وه‌زیرێن ژ به‌ر باده‌كا گه‌نده‌لیێ دادگه‌هنه‌كری.
ئه‌ڤرۆ نیۆز، قائید میرۆ:
به‌رپرسه‌كێ پارتی ل جڤاتا پارێزگه‌ها هه‌ولێرێ خویاكر ل ده‌مه‌كێ نێزیك دێ پشكا هه‌ر لایه‌نه‌كی ل ئیداره‌یا خوه‌جهیا هه‌ولێرێ هێته ئه‌شكراكرن و هه‌موو لایه‌ن دێ پشكداربن.
كه‌نعان خه‌یلانی، سه‌رۆكی فڕاكسیۆنا پارتی ل جڤاتا پارێزگه‌ها هه‌ولێرێ تایبه‌ت بۆ ئه‌ڤرۆ نیۆز گۆت” ئه‌م وه‌كی پارتی دگه‌ل بزاڤا گۆڕان بۆ پشكداریێ د حوكمه‌تا هه‌ولێرێ دا گه‌هشتینه رێكه‌فتنا دووماهیێ و دگه‌ل ئێكه‌تیێ و لایه‌نێن ئیسلامی ژی دووماهی هاتیه كو ئه‌وژی دێ پشكدابن، تنێ مایه پۆستێن پارێزگه‌هێ بهێنه به‌لاڤكرن”.
خه‌یلانی گۆت ژى” بڕیاره رۆژێن داهاتی د كۆنگره‌یه‌كێ رۆژنامه‌ڤانی دا هویرده‌كاریان ئاشكرا بكه‌ین و هه‌موو لایه‌ن دێ پشكداریێ د رێڤه‌برنا ئیداره‌یا هه‌ولێرێ دا بكه‌ن”.
ئه‌ڤرۆ نیوز:
ئه‌ندامێ خۆلا به‌رێ یا په‌رله‌مانێ عیراقێ ل سه‌ر لیستا پارتى دیموكراتى كوردستان مه‌حما خه‌لیل راگه‌هاند كو ئه‌ڤرۆ پێشمه‌رگه‌ى ل شنگالێ پێشره‌وى كریه و شیاینه سایلو و نه‌خوشخانا شنگال ئازاد بكه‌ن و گۆت: د ڤێ پێشره‌ویا وان دا، داعش زیانه‌كا مه‌زن به‌ركه‌فت و نوكه 75% شنگال هاتیه ئازادكرن.
سه‌باره‌ت پشكداریا چه‌كدارێن یه‌په‌گێ ل میحوه‌رێ شنگال، مه‌حما خه‌لیل دیاركر كو ب تنێ هێزێن پێشمه‌رگه‌ى ل سه‌نگه‌رێن پێشییێ یێن شه‌رى دانه و چو هێزێن دى لێ نینن.
ژێده‌ره‌كێ ئاگه‌هدار ژ هێزێن پێشمه‌رگه‌ى راگه‌هاند كو ده‌ڤه‌رێن ستراتیژى یێن شنگال كه‌تنه ده‌ست هێزێن پێشمه‌رگه‌ى دا و بۆ كونترۆلكرنا قه‌زایا شنگال، چاڤه‌رێى بڕیارێ نه.
نيشاندان