ئەڤرۆ:
ئەندامەکێ ئەنجوومەنێ نیشتمانیێ کورد ل سووریێ دیار دکەت کو سێ پارتێن کورد یێن د ناڤ ئەنجوومەنی دا پێدڤی بوو دەنگێ خوە بدەنە بەربژێرێن ئەنجوومەنی، لێ ب بەلگە ھاتە سەلماندن کو وان دەنگێ خوە داینە بەربژێرێن تەڤدەمێ و ژ بەر ھندێ ژی سێ کەسێن نوو ھاتنە ھەلبژارتن و ئەو ھەر سێ پارتی ژی ژ ئەنجوومەنێ ھاتنە دەرخستن.
سەعید عومەر ئەندامێ سەرکردایەتیا پارتی دیموکراتی کوردستان/ سووریا کو پارتا وان ئێکە ژ پارتێن ئەنجوومەنێ نیشتمانی یێ سووریێ بۆ رۆژناما ئەڤرۆ دیار کر کو پشتی رێککەڤتنا دھۆکێ بریار بوو کو لێڤەگەرا سیاسی بھێتە ئاڤاکرن و ژ بلی ٢٤ کەسێن کو بۆ ھەر دو جڤاتا ھاتبوو دەستنیشان کرن، پێدڤی بوو کو شەش کەسێن سەربخوە ژی ژ ئالیێ ھەر دو جڤاتان ڤە بھێتە ھەلبژارتن و مە وەک ئەنجوومەنێ نیشتمانی یێ سووریێ سێ کەس بەربژار کربوون کو پێدڤی بوو پارتێن ناڤ ئەنجوومەنی پشتەڤانیێ لێ بکەن و گۆت: (پشتی پرۆسا دەنگدانێ ب دووماھی ھاتی بۆ مە ئاشکرا بوو کو ھەموو پارتێن ناڤ ئەنجوومەنی دەنگ نەداینە سێ بەربژێرێن مە و ژ بەر ڤێ یەکێ ژی پارێزەران دووڤچوونا بابەتی کر و پاشی ب بەلگە ھاتە سەلماندن کو پارتیا ویفاق، ئەلوەحدە و ئەلپارتی یا نەسرەدین ئیبراھیم دەنگێ خوە داینە بەربژێرێن تەڤدەمێ و ژ بەر ھندێ ژی ب پرانیا دەنگێ ئەندامێن ئەنجوومەنێ نیشتمانی ئەو ھەر س پارتی ژ ئەنجوومەنی ھاتنە دەرخستن).
سەعید عومەر د بەردەوامیا ئاخڤتنا خوە دا ئەو یەک ژی دیار کر کو مافێ ئەنجوومەنێ نیشتمانی ھەیە کو دووڤچوونا ھەر بابەتەکی گرێدای بۆ کارێ خوە بکەت، چونکو ئەنجوومەن وەک ئالیەکێ یێ رێککەڤتنا دھۆکێ نەچارە ب ئەرکی خوە رابیت و نابیت ھندەک ئالی ل سەر حسابێ مە دەنگێ خوە بدەنە تەڤدەمێ و براستی ژی یا ھاتیە کرن تشتەکێ گەلەک نەخوەش بوو و دەرخستنا وان سێ پارتیان ژی بریارەکا گرنگ بوو و گۆت: (پشتی دەرخستنا وان ھەر سێ پارتان ئەنجوومەنێ نیشتمانی سێ بەربژارێن دی دەستنیشان کرن، چونکو ھەموو تشت ب بەلگە ھاتنە سەلماندن و مە ژی خواست ھەموو تشت ژ نوو ڤە برێڤە بچیت).
ل ئالیێ دی ھەر سێ پارتێن ناڤھاتی د پرێس کۆنفرانسەکێ ل باژارێ قامشلو یێ رۆژئاڤایێ کوردستانێ دیار کرن کو وان دەنگێ خوە نەداینە بەربژارێن تەڤدەمێ و پیلانەک ل دژی وان ھاتیە گێران و دوورخستنا وان ژ ئەنجوومەنێ نیشتمانی و لێڤەگەرا سیاسی دژی رێککەڤتنا دھۆکێ یە و دێ زیانێ گەھینتە پرۆسا سیاسی یا رۆژئاڤایێ کوردستانێ و داخواز کرن کو ئەنجوومەن پێداچوونێ د بریارا خوە دا بکەت.
لێ ئەنجوومەنێ نیشتمانی یێ سووریێ دیار کر کو ئەو ب چو رەنگەکێ ژ بریارا خوە ڤەنابن و ب بەلگە ھەموو تشت ھاتنە سەلماندن و دەرخستنا وان سێ پارتان ژی ب دەنگێ پرانیا ئەندامێن ئەنجوومەنی بووینە و تنێ بریارا ئالیەکێ نینە.