ئه‌ڤرۆ نیوز:
نێچیرڤان بارزانى سه‌رۆكێ حكومه‌تا هه‌رێما كوردستانێ د چوارچوڤێ كونگره‌كێ رۆژنامه‌ڤانیێ هه‌ڤپشك دا ل گه‌ل وه‌زێرێ ده‌رڤه یێ ئیتالیا كو نوكه ب سه‌ره‌دان ل هه‌رێما كوردستانێ یه راگه‌هاند كو په‌یوه‌ندیێن هه‌رێمێ ل گه‌ل به‌غدا د قوناغه‌كا دژوار دا دره‌باز بووینه و گۆت: پشتى هاتنا عه‌بادى په‌یوه‌ندیێن نوو ل گه‌ل حكومه‌تا به‌غدا دروست بووینه، سیاسه‌تا نوكه یا هه‌رێمێ ئه‌وه كو ره‌فتارێ ل گه‌ل به‌غدا بكه‌ت”.
ئه‌ڤرۆ نیوز، هه‌ژار مه‌عروف:
تیما ته‌پا پێ یا ئامه‌د سپور یا باكوورێ كوردستانێ به‌رده‌وامى دا ئه‌نجامێن خوه یێن لاواز لسه‌ر ئاستێ خولا كوپا یا توركیا ل وه‌رزێ ئه‌ڤ ساله و د یاریا خوه یا ئه‌ڤ شه‌ڤه ژى دا نه‌شیا مفا ژ ئه‌رد و جه‌ماوه‌رێ خوه ببینیت ده‌مێ توشى خوساره‌تیه‌كا مه‌زن بووى لسه‌ر ده‌ستێ یانا گه‌لاته‌سه‌راى ب چوار گولان به‌رامبه‌ر گوله‌كێ كو دڤێ یاریێ دا تیما جیمبو ئانكو گه‌لاته‌سه‌راى ب پێكهاتیێ یه‌ده‌گ یارى كر و به‌رامبه‌ر تیما ئامه‌د سپور ب یاریكه‌رێن خوه یێن سه‌ره‌كى یارى كر.
د نیڤا ئێكێ ژ ڤێ یاریێ دا تیما ئامه‌د سپور شیابوو ئاسته‌كێ باش یێ هونه‌رى پێشكێش بكه‌ت و چه‌ندین مه‌ترسى لسه‌ر گولا گه‌لاته‌سه‌راى په‌یداكر بوون و نیڤا ئێكێ ب گوله‌كێ ب دووماهى هاتبوو و گولا ئامه‌د ژلایێ یاریكه‌ر ئه‌رهان چه‌لیك هاتبو توماركرن، ل نیڤا دوێ دا به‌روڤاژى نیڤا ئێكێ یاریكه‌رێن گه‌لاته‌سه‌راى ب شارازیا خوه شیان كونترولا یاریێ بكه‌ن و دڤێ نیڤێ دا شیان سێ گولێن دى توماربكه‌ن ب رێكا یاریكه‌رێن خوه یێ هه‌لبژارتیێ پورتوگالى بروما و یه‌كتان و ئولجان ئه‌دیم.
هه‌ژى گوتنێ یه ئه‌ڤه دبیته یاریا سیێ تیما ئامه‌د سپور د كوپا توركیا دا كه‌ت كو هه‌تانوكه بتنێ خاله‌ك ب ده‌ستخوڤه ئیناى یه به‌رامبه‌ر دو خوساره‌تیا.
مووسل،بارزان سلێمان مزوورى
ژێده‌ره‌كێ بۆ ئه‌ڤرۆ دیاركر پشتى سه‌ركه‌فتنا پێشمه‌رگه‌ى ل شنگال توماركرى، خه‌لكێ موسل كه‌تیه د ره‌وشه‌كا خراب و ئالوزدا و به‌رمیلا گازا سپى ب 400 هزار دینارایه و لترا پانزینێ ب ژى 4000 هزار دینارایه.
به‌رپرسێ نڤیسینگه‌ها ره‌وشه‌نبیرى و راگه‌هاندنا لقا 14 مووسل ، سه‌عید مه‌موزینى ، بۆ ئه‌ڤرۆ نیوز دیار كر كۆ ئه‌ڤرۆ چه‌كدارێن تیرورستێن داعش كارمه‌نده‌كێ رێڤه‌به‌ریا كاره‌با مووسل سێداره‌دا ژبه‌ر كو پێزانینێن داعش گه‌هاندینه هێزێن پێشمه‌رگه‌ى ،
ناڤبرى دیار كر كۆ هه‌ر ئه‌ڤرۆ ل تاخێ (الباب بیچ) ل ناڤ باژێرێ مووسل ئه‌و تاخێن مالێن عه‌ره‌بێن ته‌له‌عفه‌ر داعش لێ ئاكنجیكرین وه‌ك ته‌عریب كرن شه‌ر د ناڤبه‌را هنده‌ك چه‌كدارێن نه‌نیاس و داعش رویدایه و پێنج كه‌س ژ هه‌ردوو لایان دهێنه كوشتن.
ئه‌ڤرۆ نیۆز:
د چوارچوڤێ سه‌ره‌دانه‌كێ دا بۆ لایێ دایكا سێ پێشمه‌رگێن شه‌هید، سه‌رۆك بارزانى گۆت: من دخواست رۆژا ئێكێ بهێنه خزمه‌تا هه‌وه، به‌لێ بۆ من یا ب زه‌حمه‌ت بوو بشێم خوه ل به‌ر ئێش و ئازارێن هه‌وه بگرم و هه‌وه ببینم.
سه‌رۆك بارزانى ئه‌ڤرۆ 23/12 ب مه‌ره‌ما سه‌ره‌خوشیێ و ده‌ربرینا هه‌ڤخوه‌میا خوه، سه‌ره‌دانا دایك و كه‌س و كارێن ( ئه‌حمه‌د ئوسمان، نه‌جات ئوسمان، مه‌ولود ئوسمان) كر كو سێ برایێن ئێكن و ل رۆژا 25/10 پێگڤه و ل ئێك به‌ره‌یێن شه‌رێ دژى داعش ل زومار شه‌هید بوون.
سه‌رۆك بارزانى گۆته دایكا سێ شه‌هیدان: هه‌مى ئه‌و پێشمه‌رگێن نوكه ل سه‌نگه‌رى و ئه‌وێن شه‌هید بووى، كورێن ته‌نه و تو ژى دایكا هه‌میانى.
ئه‌ڤرۆ نیوز:
په‌یڤدارێ وه‌زاره‌تا خواندنا بلند راگه‌هاند كو وه‌زاره‌تا خواندنا بلند ژى یا پابه‌نده ب بهێنڤه‌دانێن فه‌رمى كو ژ ئالیێ ئه‌نجومه‌نێ وه‌زیران ڤه دهێته دیاركرن و گۆت: رۆژێن 25 و 1/1 بۆ وان ژى بهێنڤه‌دانه.
سه‌باره‌ت ده‌واما ماموستا و قوتابیان، فوئاد عه‌لى په‌یڤدارێ وه‌زاره‌تا خواندنا بلند گۆت: زانكۆیێن كوردستانێ یێن سه‌رپشكن د رێكخستن و دیاركرنا بهێنڤه‌دانان دا ل گۆر سالناما زانكۆیێ.
ئه‌ڤرۆ نیوز:
تورا نوچه‌یى یا CNN ب رێیا پرسیاركرن ژ وان رێكخراوێن ل گه‌ل كار كرى، لیستا كاریگه‌رترین ژنێن سه‌ركه‌فتى یێن جیهانى بۆ سالا 2014 راگه‌هاند كو كورد ژى تێدانه.
سه‌باره‌ت كوردان، CNN به‌حسێ شه‌رڤانێن ژن ل رۆژئاڤایێ كوردستانێ كریه كو ئه‌و ژنه ئه‌ندامن د یه‌كینه‌یێن پاراستنا ژنان دا كو رۆله‌كێ به‌رچاڤ گێرایه و د ئازابوونه د شه‌رێ دژى داعش دا ل سوریێ و عیراقێ.
هه‌روه‌سا ل سه‌ر خه‌باتا خه‌باتا وێ بۆ ئێزدیان، ڤیان ده‌خیل په‌رله‌مانتارا كورد ل په‌رله‌مانێ عیراقێ هاتیه هه‌لبژارتن.
ئه‌ڤرۆ نیوز، ناجی به‌ده‌ل:
رێناس جانو ئه‌ندامێ په‌رله‌مانێ عیراقێ ژ پارێزگه‌ها دهۆكێ بو ئه‌ڤرۆ نیوز راگه‌هاند:پێنگاڤ ب رێكا لیژنه‌كا تایبه‌ت هاتیه هاڤێتن بو ئاواره و ده‌ربه‌ده‌ران و نها ژی ره‌نگه دچارچوڤێ به‌رنامێ ڤێ لیژنێ دا، خه‌لكێ ل چیایێ شنگالێ و شێوازێ چه‌وانیا ڤه‌گه‌راندنا وان بو ناڤ شه‌نگالێ و هنده‌ك كارێن دی هه‌نه ره‌نگه نه‌راسته‌وخو كارێ په‌رله‌مانتاران بیت.
په‌رله‌مانتاره‌ك دبێژیت كو ئه‌و مژوولى دارێژتنا راپۆرته‌كێ نه كو پاشان دێ ژ ئالیێ هنده‌ك ئه‌ندام په‌رله‌مانان ڤه هێته بلندكرن ل سه‌ر شه‌نگالێ، كو ده‌ڤه‌ره‌كا پاراستی بو شنگالێ بهێته درۆست كرن و ره‌نگه هنده‌ك ده‌ڤه‌ر تایبه‌یتمه‌ندیه‌ك پێ بهێته دان و شنگال ژی دێ ئێك ژ ئه‌وان ده‌ڤه‌ران بیت
رێناس جانو ئه‌ندام په‌رله‌مانێ عیراقێ بۆ ئه‌ڤرۆ نیوز گوت:پیدڤیه ل سه‌ر رێكخراوێن مرۆڤی و نێڤ ده‌وله‌تی كاره‌كێ جدی و بكردار بكه‌ن ژبوی رۆحیه‌ت و ده‌رۆنێ ئاواران ئارام ببیت و ڤه‌گه‌ریا وان بۆ ناڤ شنگالێ.
رێناس جانو دا زانین : پێدڤیه ئه‌م ئه‌وێ زه‌مینه‌یێ ساز بكه‌ین كو ترسه‌كا دی یان وه‌همه‌كا دی بڤی شێوه‌یی درۆست نه‌بیته‌ڤه ئه‌و ژی ب داخازكرنا مه ژ هه‌مو لایه‌نێن په‌یوه‌ندیدار چ لایه‌نێن ئه‌منی یان له‌شكه‌ری بو درۆستكرنا بازنه‌یه‌كێ بو پاراستنا ئه‌ڤی باژێركی و پاراستنا ژیانا ئه‌ڤان مرۆڤان كو ئه‌ڤه دێ هنده‌ك خال بن ل داهاتی دا داخواز بكه‌ین ژ سه‌رۆكاتیا په‌رله‌مانێ عیراقێ كو بكه‌ڤنه بیاڤێ بجهكرنێ .
ئه‌ڤرۆ نيوز:
د روونشتنا ئه‌ڤرۆ يا ئاسايا حوكمه‌تا عيراقێ دا بودحێ سالا 2015 يێ عيراقێ په‌سه‌ند بوو كو دگه‌هيته 123 ترليۆن دينار و بهايێ ئێك به‌رميلا په‌ترۆلێ ژى 60 دۆلاران هه‌ژمارت.
سه‌عد حه‌ديسى، ئاخفتنكه‌رێ ب ناڤێ جڤاتا وه‌زيرێن عيراقێ راگه‌هاند: د روونشتنا ئه‌ڤرۆ رۆژا سێشه‌مبى رێكه‌فتى 23\12\2014 دا، جڤاتا وه‌زيرێن عيراقێ ده‌نگدان ل سه‌ر پرۆژێ قانوونا بودجێ عيراقێ بۆ سالا 2015 دا كودگه‌هيته 123 ترليۆن ديناران.
ئاماژه ب وێ چه‌ندێ ژى كر كو د پرۆژێ قانوونا بودجا سالا داهاتى دا، بهايێ ئێك به‌رميلا په‌ترۆلێ ب 60 دۆلاران هاتيه خه‌ملاندن و گۆتژى: “د پرۆژێ قانوونێ دا، ته‌ماميا په‌ترۆلا دێ ل عيراقێ هێته هنارتن سێ مليۆن به‌رميلێن په‌ترۆلێ نه د رۆژێ دا كو په‌ترۆلا هه‌رێم و كوردستانێ ژى تێدايه و ئه‌ڤ رێژه قابلى گوهۆڕينێ يه”.
پشتى ڤێ په‌سه‌ندكرنێ ژى پرۆژه دێ بۆ جڤاتا نوونه‌رێن عيراقێ هێته ره‌وانه كرن دا كو ژ لايێ وان ژى ڤه بهێته په‌سه‌ندكرن.
نها پێشمه‌رگه ل كوردستانێ هێمایێ به‌رخودان و شه‌ره‌ف و سه‌ربه‌رزیێ یه، ئه‌ڤ ناڤێ پیرۆزێ كو ساله‌ها ساله یێ هه‌ی رۆژ ب رۆژ ب هه‌یبه‌تتر و مه‌زنتر لێدهێت، دیاره كو ئه‌وان ژیانا خوه كو ب نرخترین به‌ها پێشكێشی خاك و وه‌لاتێن خوه كرینه، به‌لێ ژبلی هندێ كو روحا خوه كرینه قوربان، هه‌كه بچینه سه‌ر ته‌وه‌ره‌كێ دیتر كو به‌رده‌وامیا ژیانا خوه ب ستویێ خوه ڤه دگریت، ئه‌و ژی لایه‌نێ ئابووریه، راسته د ڤان هه‌ل و مه‌رجان دا، كوردستان د مه‌زنترین قه‌یرانا ئابووری دا ده‌بازدبیت، دبیت ئه‌و ژی نه‌مانا بودجه‌ی و ل دووماهیێ نه‌مانا مووچه‌یان بوو، ده‌مه‌كێ درێژ بوو پیشمه‌رگه ژ گیرۆكرنا مووچه‌یان ده‌نالی و به‌رده‌وام ده‌نگێن نه‌ره‌زایبوویان به‌رزكرن، ژ وان ژی نها گیرۆكرنا مووچه‌یان كو بۆ وان دبیت ته‌شته‌كێ ئاسایی و نوو نه‌بیت! مووچێ پێشمه‌رگه‌ی 500 پینج سه‌د هه‌زار دیناره واته بۆ رۆژه‌كێ نێزیكی 17 هزار دینار دكه‌ڤن، دبیت كێشه نه ژ وی گۆژمێ پاره‌ی بیت، به‌لكو ئه‌رێ به‌هرا هه‌ر پێشمه‌رگه‌یه‌كی دكه‌ت كو كرێدار بیت؟ ئه‌م هه‌موو دئاگه‌هدارین كو چو كرێیه‌ك ژ 300 سێ سه‌د هه‌زار دیناران كێمتر نینه، واته ژ وی مووچه‌ی ته‌نێ 200 دو سه‌د هزار دینار بۆ وی دمینن، واته بۆ هه‌ر رۆژه‌كێ حه‌فت هزار دیناره!! ب چو پیڤه‌ره‌كی و ب چو شێوازه‌كێ ئابووری بشێین دابه‌شكرنێ بۆ بكه‌ین؟ هه‌كه چو به‌نده‌كا ئابووری نه‌شیا وی پارێ كێم رێكبێخیت ل گه‌ل ڤان بازاڕێن گران، ئه‌ڤجا باشه پێشمه‌رگه‌كێ دامایی چاوا بشێت خزمه‌تێن ژیانێ پێ دابنین بكه‌ت؟چاوا بشێت خێزانا خوه ژ پێدڤیێن سه‌ره‌كی یێن ژیانێ بێ به‌هر نه‌كه‌ت؟ د ئابووری دا هێله‌ك هه‌یه كو مرۆڤان پێ پۆلین ده‌كه‌ت بۆ كۆمه‌لگه‌هان دهێنه دانان، بێگومان ئه‌و ژی یا ئاشكرایه كو پێشمه‌رگه ل بن هێلا هه‌ژاریێ دا یه، چونكو هه‌ژاری ئه‌وه نینه كو ژ مرۆڤ ژ برسا بمریت، به‌لكو ئه‌و چه‌نده كو نه‌شێت ژ داهاتێ رۆژانه به‌هرا تشتێن سه‌ره‌كی یێن ژیانا ته پێ دابین ببیت، له‌ورا ل كوردستانێ ژبلی كو ژ خه‌لكێ هه‌ژاره مخابن پێشمه‌رگه ب گشتی ل ژێر هێلا هه‌ژاریێ دایه واته ژبلی كو ل به‌ره‌یێن شه‌ڕێ داعشێ دا یه و د ژیانێ ژی دا د شه‌رێ ئابووری دانه!
دیاره پێشمه‌رگه ل به‌ره‌یێن شه‌ری ب فه‌وج هاتیه دانان، هه‌ر فه‌وجه‌ك ژی ژ پێنج سرییان پیكهاتیه هه‌ر سریه‌ك ژی ژ سێ (په‌ل) فه‌سیلان ب ڤی شیوه‌یی یه، هه‌ر فه‌سیله‌ك ژی ژ 34 پێشمه‌رگان پێكهاتیه ب شێوه‌یه‌كی سریه‌ك ژ 120 پێشمه‌رگان ب گشتی، واته فه‌وجه‌ك ژ 650 كه‌سان پێكدئێت، ل ڤێره دا بڕه پاره‌یه‌ك ب رێژه‌یا %70 ژ وێ 650 كه‌سان واته بۆ 455 كه‌سان بڕا 50 هزار دینار ته‌رخان دكه‌ت بۆ هه‌ر ئێكێ كو نزیكی 22. 750. 000 بیست و دو ملیۆن و حه‌فت سه‌د و پێنجی هه‌زار دینار بۆ مه‌هه‌كێ دده‌نه فه‌رماندێ فه‌وجێ بۆ پێداویستیێن خوارنێ وه‌كو گۆشت و زه‌رزه‌واتی و. . هتد، به‌لێ ئه‌و %30 ته‌رخانكریه بۆ خوارن و ئازۆقێ هشك وه‌ك برنج و فاسۆلی و هتد، دیاره ئه‌و پارێ كو هه‌ر پێشمه‌رگه‌ك بۆ خوارنا رۆژانه د به‌ریێن جه‌نگی دا دبیته 3. 33 ب نێزیكی چار هزار دینار بۆ رۆژێ د ماوێ 15 رۆژان دا ده‌وامی د هه‌یڤه‌كێ دا دكه‌ت، ئه‌ڤ گۆژمه د نێڕینا به‌رپرسان دا باشه ژ سه‌رجه‌مێ گشتی، به‌لێ د نێرینا پێشمه‌رگان دا خۆیایه كو گه‌له‌ك كێمه و ب تنێ گه‌له‌ك گلوگازاندان دكه‌ن ژ خۆرانان، دیاره خوارن بچووكترین مافه د شه‌ڕی دا، ل ده‌مێ خوه كو ئه‌مریكا ئه‌فسه‌رێن خوه دهنارتنه عیراقێ هه‌موو خوارنێن ساخله‌م بۆ وان دابین دكرن، ب تنێ كاغه‌زا هه‌لگرتنا خوارنا وی جۆره‌كێ سیسته‌مه‌كێ گه‌رمكرنێ تیدابوو! له‌ورا ب هه‌موو تیروانین و لێكدانا خورانان وان هه‌تا راده‌یه‌كی كه‌موكوری هه‌نه و گه‌له‌ك ژی نه د ساخله‌من، ژ بلی هندێ پرسیاریك ل ڤێره دا دهێته پێش، ئه‌و ژی ئه‌رێ گۆژمێ پارێ خوارنا پێشمه‌رگان ل ده‌مێ موله‌تێ ژ نشكه‌ڤێ ڤه و نه‌خۆشی و برینداركرن و نه‌هاتنی دێ چ ب سه‌ری هێت؟ ئه‌رێ پشتی وێ نه‌هاتنێ كو ب هه‌ر ئه‌گه‌ره‌كێ ژ نشكه‌كێ ڤه بیت، گۆژمێ وی پاره‌ی بده‌ته خوه؟ یانكو نامینیت؟ ژبلی وێ چه‌ندێ ژی، هنده‌ك هه‌نه ـ ب ناڤی ـ، به‌لێ هه‌بوونا خوه نینه د ئه‌ركان دا چاوا سه‌ره‌ده‌ی ل گه‌ل دهێته كرن؟ به‌هرا وان یا خوارنێ چ لێ دهێت؟
باشتر ئه‌وه ئه‌و گۆژمێ پارێ دهێته مه‌زاختن بۆ ئه‌فسه‌ران كو نێزیكی چار ملیۆن دینار ژ گۆژمێ مه‌زاختنا كارته‌كێ بۆ نموونه یان هه‌ر پیداویستیه‌كێ بۆ ئه‌فسه‌ر و پله‌داران، دشیان دایه چینا پیشمه‌رگه برێكه‌ك بۆ بهێته دابینكرن، هه‌كه كێمتر ژی بیت، دیاره ل ڤێ داویێ په‌رله‌مانێ كوردستانێ د جڤینه‌كێ دا به‌حسێ گرنگیا ڤێ گرفتێ كریه به‌ڵینا زێده‌كرنا مووچه‌ی و باشتركرنا ژیانا پێشمه‌رگه‌ی دایه، ئه‌ڤه ژی دڵخوشكه‌ریكه بۆ خه‌ڵكی، چونكو خه‌ڵك ب خۆشگوزه‌رانیا پیشمه‌رگه‌ی خۆشحال دبن، ب وێ چه‌ندێ كه ئه‌و پارێزه‌رێن خاك و نیشتمانن، ل ڤێره دا گرنگه جه‌ختی ل سه‌ر بهێته كرن و له‌ز لێ بهێته كرن، د به‌ڵینه‌یێن په‌رله‌مانی دا وه‌كو چاوا له‌ز هاتیه كرن د هنارتنا پێشمه‌رگه دا بۆ كۆبانی، بلا ده‌رمالێن مه‌ترسیێ بۆ بهێنه مه‌زاختن، گۆژمی وێ ژی نێزیكی 300 سێ سه‌د هزار دینارن كو تشته‌كێ یاساییه و د هه‌موو دونیایێ دا هه‌ر كاره‌كێ مه‌ترسی ل سه‌ر هه‌بیت بۆ ژیانا كه‌سه‌كی ئه‌و ده‌رماله پێ بهێنه به‌خشكرن، له‌ورا بلا ل دووڤ ڤێ چه‌ندێ وی گۆژمێ ده‌رمالان بهێته ته‌رخان.
رێككه‌فتنا دهۆكێ د ناڤبه‌را ئه‌نجومه‌نێ نیشتمانیا كورد ـ سووریا، ئه‌نه‌كه‌س و ته‌ڤگه‌را جڤاكا دیموكراتی ( ته‌ڤ – ده‌م) د ناڤبه‌را پارتێن رۆژئاڤایێ كوردستانێ پێنگاڤه‌كا دیروكی بوو، ڤێ رێكه‌فتنێ و پێكهاتنێ هیڤی و شادی دا كوردستانێ و هه‌ر چوار پارچێن كوردستانێ دلشاد كرن و پێكهاتێن لایه‌نێن رۆژئاڤایێ كوردستانێ هیڤی خوازن خالێن بنگه‌هی و سه‌ره‌كی بگه‌هنه وارێ بجهئینانێ، له‌وما ئه‌ڤ ئه‌ركێ گرانی نیشتمانی د كه‌ڤیته سه‌ر ملێ ته‌ڤ لایه‌نێن نیشتمانی یێن كوردستانی نه‌مازه ته‌ڤگه‌را جڤاكا دیموكراتی ( ته‌ڤ ده‌م) و جڤاتا نیشتمانیا كورد( ئه‌نه‌كه‌سێ).
ئێكگرتنا ڤان هه‌ر دو هێزا كلیلا چاره‌كرنا كێشێن د ناڤبه‌را لایه‌نێن كوردستانی یه، له‌وما دڤێت هه‌موو بزاڤ ئه‌و بن كو بگه‌هنه چاره‌كا بنگه‌هین كو ل ئاستێ خوه‌سته‌كێن گه‌لێ كوردستانێ بیت و ئالایێ به‌رخوه‌دانا نیشتمانی بلند بكه‌ن بۆ سه‌روه‌ریا كوردستانێ.
ئه‌ڤ رێككه‌ڤتنا دیروكی ل ژێر چاڤدێریا سه‌رۆك بارزانی هاتبوو هاتیه ئه‌نجامدان و ل سه‌ر سێ خالێن گرنگ رێككه‌فتی نه یا ئێكێ لێڤه‌گه‌را سیاسی و یا دوێ هه‌موو لایه‌نێن رۆژئاڤا ته‌ڤلی رێڤه‌به‌ریا خوه‌سه‌ریا دیموكراتی بن و یا سیێ سه‌ركردایه‌تیا هه‌ڤپار یا له‌شكه‌ری هه‌بیت، له‌وما بۆ بجهئینانا خالێن رێككه‌فتنێ پێدڤیه هه‌ردو جڤات ئاسته‌نگ و ئالوزیان هه‌مبه‌ر ئێك نه‌دانن و پێدڤیه وه‌رارێ بده‌نه كانتونێن جزیری و كۆبانێ و ئه‌فرینێ و ل سه‌ر ئاستێ ڤان كانتونان ئه‌ندامێن جڤاتا نیشتیمانی كورد – سووریا، ئه‌ڤلی رێڤه‌به‌ریێ ببن و ڤالاتیێ داگرن و ل سه‌ر ئاستێ لێڤه‌گه‌را سیاسی ژی هه‌ردو لایه‌نێن ده‌رڤه‌ی هه‌ردو جڤاتان پشكدار ببن، ئه‌و بوشاتی و ڤالاتی بهێته تژی كرن و ل سه‌ر ئاستێ له‌شكری ژی شه‌رڤانێن هه‌ردولایان، بكه‌ڤنه د چارچوڤێ سه‌ركردایه‌تیه‌كا هه‌ڤپشك و چارچوڤێ یه‌په‌كێ دا و به‌رخوه‌دانێ بكه‌ن.
له‌وما د ڤێ پێڤاژوویێ دا گرنگه ده‌م لده‌ست رێكه‌ڤتن بكه‌ڤیته د بیاڤێ بجهئینانێ دا و كارو و خه‌بات بۆ برێڤه‌به‌رنا رۆژئاڤایێ كوردستانێ بهێته كرن و پاشتی پشت را كار و خه‌بات بۆ هه‌لبژارتنان ل رۆژئاڤایێ كوردستانێ بهێنه كرن و حكومه‌ته‌كێ پێكبینن و هه‌ر ئێك ل گۆر سه‌نگا خوه، دێ یا پشكدار بیت د په‌رله‌مانی دا و نوونه‌راتیا خه‌لكی كه‌ت.
له‌وما پێدڤیه پارت و لایه‌نێن سیاسی یێن كوردستانی یێن رۆژئاڤا هه‌ست ب به‌رپرسایه‌تیا دیروكی بكه‌ن و هه‌می ئاریشا ب رێكا ئاخافتن و دانوستاندن و لێكتێگه‌هشتن چاره بكه‌ن و ڤێ ده‌لیڤا دیروكی ژ ده‌ست خوه نه‌ده‌ن چونكه رۆژئاڤایێ كوردستانێ د قوناغه‌كا هه‌ستیار دا ده‌رباز دبیت داكو ئه‌ڤ ئێكگرتنه ببیته پشته‌ڤان و پالیشته‌كا خورت و سه‌ره‌كی بۆ خوراگر و سه‌ربلند و هه‌لوه‌شاندنا پیلانێن چه‌ته‌یێن داعش و هه‌موو دوژمنێن كوردستانێ و مه‌ترسیا ل سه‌ر كوبانێ ب ئێكجاری نه‌مینیت و ئه‌گه‌ر خالێن رێككه‌ڤتنێ هه‌موو بكه‌ڤنه د بوارێ بجهئینانێ دا دێ سه‌ركه‌فتنه‌كا سه‌رانسه‌ری په‌یدا بیت ب تایبه‌ت ل هه‌مبه‌ر چه‌ته‌یێن داعش و داگیركه‌رێن كوردستانێ و بلا ژ بیر نه‌كه‌ین د مێژوویێ دا یه‌كبوون و یه‌كگرتن و بنگه‌هێ سه‌روه‌ریا گه‌لان بوویه و ب ئێكگرتنێ ملله‌ت سه‌ركه‌فتی نه.
نيشاندان