ئه‌ڤرۆ نیوز، زنار:
حكومه‌تا ئسپانیا ب شێوه‌كێ فه‌رمى راگه‌هاند هه‌ردو گه‌رێن 28،29 ژ خولا ئسپانیا یا ته‌پا پێ دێ بێ جه‌ماوه‌ر هێنه كرن بۆ خوه پارستن ژ ڤایروسێ كورونایێ.
به‌لاڤ بوونا ڤایروسێ كورونا ل رۆژێن چوى ل پایته‌ختێ ئسپانیا مه‌درید 578 كه‌س تووش بووینه و 17 كه‌س ژێ مرینه و 13 كه‌س ژى د ره‌وشه‌كا خراب دانه، ئه‌ڤ چه‌نده بوو ئه‌گه‌ر حكومه‌تا وى وه‌لاتى بریارێ بده‌ت یاریێن خولێ بێ جه‌ماوه‌ر بهێنه كرن ل هه‌ردو حه‌فتیێن بهێت ژ گه‌را 28 و 29 پێخه‌مه‌ت رێگرگرتن ژ به‌لاڤ بوونا ڤى ڤایروسى.
ئه‌ڤرۆ نیۆز، عه‌زیز هه‌ورامی:
مه‌رزی نێوده‌وڵه‌تی باشماخ له قه‌زای پێنچوێنی سه‌ربه‌پارێزگای سلێمانییه و ئاڵگۆڕی بازرگانی له نێوان كوردستان و كۆماری ئیسلامی ئێران به‌رده‌وامه، تیمێكی ته‌ندروستی له سلێمانییه‌وه ده‌ڕۆنه مه‌رزه‌كه پشكنین بۆ كارمه‌ندان و شۆفێران ده‌كه‌ن كه بهركهوتنیان له‌گه‌ڵ شۆفێرانی ئێرانی هه‌یه.
لوقمان له‌تیف، له ڕاگه‌یاندنی نه‌خۆشخانه‌ی گشتی قه‌زای پێنچوێن، به ئه‌ڤرۆ نیۆزی ڕاگه‌یاند، تیمێكی تایبه‌تی پزیشكی پشكنینی ڤایرۆسی كۆرۆنا له به‌ڕێوه‌به‌رایه‌تی ته‌ندروستی سلێمانی به هاوكاری نه‌خۆشخانه‌ی پێنچوێن، سه‌ردانی مه‌رزی نێوده‌وڵه‌تی باشماخ یانكرد،به‌مه‌به‌ستی پشكنینی ئه‌و كارمه‌ند و شۆفێرانه‌ی له مه‌رزه‌كه به‌رده‌وام بهركهوتنیان له‌گه‌ڵ شۆفێرانی ئێرانی هه‌یه له‌كاتی ئاڵوگۆڕی بازرگانی.
هه‌روه‌ها ئاماژه‌ی بۆ ئه‌وه‌كرد، زیاتر له 100 كه‌س ئه‌مڕۆ پشكنینیان بۆ ده‌كرێت، بۆ دڵنیابوون له ته‌ندروستیان هه‌ڵگری ڤایرۆسی كۆرۆنا نه‌بن.
ئەڤرۆ نیوز،عەلی حاجی :
د داخویانیەکێ دا راگرێ کۆلیژا پزیشکی ل زانکۆیا زاخۆ بۆ ئەڤرۆ نیوز دیار کر قوتابیێن کۆلیژا پزیشكی یا زانکۆیا زاخۆ هەوەکا خوە پاراستنێ ژ ڤایرەسێ کورونایێ راگەهاندینە و مە دو ئارمانج ژ وێ هەوێ هەنە.
زێدەتر دکتور نەوفەل رەشید گۆت : ژبەرکو قوتابی و مامۆستایێن مە گەلەک ئەکتیڤن دناڤ نەخوشخانەیا زاخۆ دا،قوتابیێن کۆلیژا پزیشکی ل زانکۆیا زاخۆ ب هەڤکاری دگەل مامۆستایان هەوەکا خوە پاراستنێ ژ ڤایرۆسێ کورونایێ راگەهاندینە و مە دو ئارمانچ ژ وێ هەوێ هەنە،ئارمانجا ئێکێ ئەوە دناڤ کەمپێن دکەڤمە سنورێ قەزا زاخۆ دا هوشیارکرنا خوە پاراستنێ ژ ڤایرۆسێ کورونایێ دناڤ خەلکێ کەمپێ دا زێدە بکەن و هەر دیسان ئارمانجا دووێ ژی ئەوە چاوانیا دەست شیشتنێ ب رێکێن زانستی نیشانی خەلکێ دناڤ کەمپێ دا بده‌ن ژبەر کو ل دویف ڤەکۆلینەکا ئەمریکی ٥٪ بتنێ رێیا دروست یا پاراستنێ شیشتنه دزانین لەورا مە دڤیا ڤێ چەندێ بکەین. و گۆت ژی : ئەڤ هەوە نەبتنێ دێ دناڤ کەمپێ دا بیت بەلکو دێ دناڤ سەنتەرێ باژێری دا بیت بەلێ نوکە دا مە دناڤ کەمپان دا دەست پێکری یە ژبەر کو قەرەبالغیەکا زێدە دناڤ کەمپان دا هەیە و ئەڤ هەوە ژی دێ بۆ ده‌مێ ١٠ رۆژان یا بەردەوام بیت و هەکە پێدڤی کر ژی دێ ئەڤ هەوە بەردەوام بیت.
ئه‌ڤرۆ نیوز، مه‌حمود نهێلى، عەلی حاجی:
به‌پرسێ لژنا ئابوورى یا قه‌زا ئامێدیێ بۆ ئه‌ڤرۆ نیوز دیاركر 13 جهێن بازرگانى سزاداینه و هه‌ر كه‌سێ ل دووڤ رێنمایان كار نه‌كه‌ت و بكێمترین كێماسى ئه‌و دێ پێرابوونان به‌رامبه‌رى وان وه‌رگرن.
كاروان حاجى سه‌عید به‌رپرسێ لژنا ئابوورى یا قه‌زا ئامێدیێ دیار كر، ژبۆ پتر پاراستنا ساخله‌میا وه‌لاتیان ب تایبه‌تى ژى دڤى ده‌مى دا ئه‌و به‌رده‌وام ب سه‌ر بازارى و خارنگه‌ه و جهێن دى یێن بازرگانى دگه‌رن و ژبه‌ر نه پَێگریكرن ب رێنمایێن ساخله‌میێ و یێن لژنا ئابوورى ، دڤێ هه‌یامێ دا ئه‌و شیانه پتر ژ 13 جهێن بازرگانى سزا بده‌ن كو ژ وانا سێ هاتینه گرتن.
ناڤهاتى ئاشكرا كر، كو ئه‌وان خارنگه‌هه‌ك و دو ماركێت گرتینه و 10 جهێن دى یێن بازرگانى ب كوژمێ 800 هزار دینارا سزاداینه و ده‌ست ب سه‌ر 300 كیلوگرامێن كه‌ره‌سته‌یێن ئێكسپایر دا گرتینه.
وەلات هەجەر نوونەرێ قایمقامێ زاخۆ د لژنا دیفچوونا بازاری دا بۆ ئەڤرۆ نیوز دیار کر ژبەر نەپێگیریا پێنچ جهان ب رێنمایێن تایبەت ب خوە پاراستنێ ژ ڤایروسێ کورونایێ ئەو جهە هاتنە گرتن و سزادان، قوناغا دووێ یا چاڤدێریکرنێ ل سەر جهێن رێنما ب وان هاتینە دان ئەڤرۆ روژا سێ شەمبێ مە سەرەدانا چەندین جهان دناڤ سەنتەرێ زاخۆ دا کر و ژبەر نەپێگیریکرنا سێ نانپێژ و شریناهیەکێ ب رێنمایێن تایبەتێن خوە پاراستنی ژ ڤایروسێ کورونایێ ب کوژمەیەکێ پارەی هاتنە سزادان و ئەو جهە هاتنە ئاگەهدار کرن ژی هەکە پێگیر نەبن ب رێنمایان دێ سزایێن توندتر ب وان هێتە دان لەورا پێدڤی یە پێگیر بن ب جێبەجێ کرنا رێنمایان،هەر د بەردەوامیا سەرەدانێن مە دا مە شیا جهەکێ گوشت فروشیێ بگرین کو خودانێ وێ را بوو ب فروتنا گوشتێ سور بێ مور و هەر دیسان ل دەوروبەرێ جهێ خوە ژی راد بوو ب ڤەکوشتنا ئاژەلی و ئەڤە ژی بەروڤاژی رێنمایان بوو.
ئەڤرۆ نیوز، زنار:
ب فەرمی حکومەتا هەرێما کەتالونیا ئاشکراکر کو یاریا یانا بەرشەلونا دکەل ناپولی یا ئیتالی دێ بێ ئامادەبوونا جەماوەر بیت ئەوا بریارە ل رۆژا چارشەمبی رێککەفتی ۱٨ ڤێ هەیڤا ئادارێ بهێتە کرن ژ چارچوڤێ یاریێن قوناغا شازدێ یا قارەمانیا چامپیونزلیگێ.
ئەڤ بریارا حکومەتا کەتالونیا هاتەپێش پشتی ڤایروسێ کورونا بشێوەکێ بەرچاڤ ل کیشوەرێ ئوروپا بەربەلاڤ بووی داکو خەلک یێ پاراستی بیت یاریا یانا بەرشەلونا دگەل ناپولی یا ئیتالێ دێ بێ جەماوەربیت.
ئه‌ڤرۆ نیوز ، زنار تۆڤى:
ده‌مێ دبیته وه‌رزێ بهارێ خه‌لكێ پارێزگه‌ها دهۆكێ ب ره‌نگه‌كێ گشتى قه‌ستا بازارى دكه‌ن ژ بۆ كرینا جلكێن كوردى، چونكى پرانیا هه‌لكه‌فت و بیره‌وه‌ریێن كوردى د ڤێ هه‌یڤێ دانه، هه‌ر ژ سه‌رهلدانێ و جه‌ژنا نه‌ورۆزێ، به‌لێ فرۆشیارێن جلكێن كوردى دده‌نه دیار كرن، ئه‌ڤ ساله بازارێ جلكێن كوردى سستى ب خوه‌ڤه دیتیه و ئه‌و ڤایرۆسێ كۆرۆنا ب ئه‌گه‌رێ سه‌ره‌كى یێ ڤێ چه‌ندێ دبینن.
شه‌عبان بۆتى ئه‌ڤه ده‌مێ 27 سالانه كارێ دروونا جلكێن كوردى یێن زه‌لامان دكه‌ت ل ناڤا بازارێ دهۆكێ و فرۆشیارێ جلكێن كوردى یه، بۆ ئه‌ڤرۆ نیوز دیار كر: هه‌ر سال ده‌مێ هه‌یڤا ئادارێ دگه‌هشتێ، ب رێژه‌كا مه‌زن وان جلكێن كوردى یێن زه‌مالان و زارۆیان چێدكرن و دفرۆتن، هه‌روه‌سا ل سالا بورى ژى وان ب رێژه‌كا مه‌زن یا جلكێن كوردى بۆ خه‌لكێ چێدكرن، لێ ئه‌ڤ ساله بزاڤا چێكرن و كرینا جلكێن كوردى گه‌له‌ك ژ سالا بورى كێمتره و نوكه ب ره‌نگه‌كێ گشتى بازارێ جلكێن كوردى ل بازارى سست بوویه، ئه‌ڤه ژى ڤه‌دگه‌ریت، بۆ په‌یدابوونا ڤایرۆسێ كۆرۆنا، ژبه‌ركو ده‌وامێن قوتابخانان هاتینه راوه‌ستاندن و دیسان جه‌ژنا نه‌ورۆزێ ژى ناهێته گێران، ئه‌ڤه بووینه هوكار كو بازارێ جلكێن كورى سست ببیت و وه‌كو سالێن به‌رى نوكه نه‌بیت.
ناڤهاتى گۆت ژى: د وه‌رزێ بهارێ و جه‌ژنێن نه‌ورۆزێ دا مه پترى 500 ده‌ستێن جلكێن كوردى بۆ خه‌لكێ چێدكرن و دفرۆتن، لێ ئه‌ڤ ساله ئه‌و بازاره نینه و ڤێ چه‌ندێ كارتێكرنه‌كا مه‌زن ل كارێ مه و بازارێ جلكێن كوردى كریه، هه‌روه‌سا نوكه پرانیا كاران سست بووینه و لێ ئه‌م ب هیڤینه دێ جاره‌كا دى بازار وه‌كو به‌رێ زڤریت.
لوقمان حسێن عه‌بدوللا خودانێ دوكانه‌كا فرۆتنا جلكێن ژنانه، بۆ رۆژناما ئه‌ڤرۆ دبێژیت: ئه‌ڤه 22 ساله ئه‌و كارێ فرۆتنا جلكێن ژنان دكه‌ت، هه‌روه‌سا هه‌ر ل ده‌مێ هاتنا داعشێ هه‌تا نوكه بازارێ فرۆتنا جلكێن كوردى وه‌كو به‌رى هنگێ خورت نه‌بوویه، لێ پشتى ئه‌ڤ ساله ده‌واما قوتابخانان بۆ ده‌مێ هه‌یڤه‌كێ هاتیه راوه‌ستاندن و جه‌ژنا نه‌ورۆزێ ژى ناهێته گێران، ئه‌ڤه بووینه هوكار كو بازارێ فرۆتنا جلكێن كوردى سست ببیت، كارتێكرنه‌كا مه‌زن ژى ل سه‌ر كارێ مه بوویه، چونكى به‌رى نوكه ئه‌و جۆرێن قوماشى یێن مه دئینان سێ چارێكێن وى قوماشى مه دفرۆتن د هه‌یڤا شواتێ و ئادارێ دا، لێ ئه‌ڤ ساله هێشتا مه چارێكه‌ك ژى نه فرۆتیه، له‌وما ئه‌م دخوازین جاره‌كا دى بازار وه‌كو به‌رى نوكه بزڤریت و ئێدى سستى و خاڤى د ڤى بازارى دا نه‌مینیتن هه‌ره‌سا ئه‌و ئه‌گه‌رێ سستیا بازارى ڤه‌دگه‌رینیت بۆ ڤایرۆسێ كۆرۆنا.
ئه‌ڤرۆ نیوز:
پشتى توشبونا ڤایروسێ كورونا ل زوربه‌یا وه‌لاتێن جیهانێ گرتى و تایبه‌ت ل ئورۆپا ترسه‌كا مه‌زن ئێخستى یه دلێ هه‌موو وه‌لاتێن جیهانێ و هژماره‌كا چالاكیێن وه‌رزشى هاتینه راوستاندن و هه‌ردیسان یاریێن چه‌ندین خولێن جیهانى بێ جه‌ماوه‌ر دهێنه برێڤه‌برن .
رادیویا كادینا كوبى یا ئیسپانى دیاركریه ئێكه‌تیا ته‌پا پێ یا ئیسپانى چاڤه‌رێ بریارا وه‌زاره‌تا ته‌ندروستى یا وى وه‌لاتى یه و هه‌ر ده‌مێ وێ وه‌زاره‌تێ بریار دا یاریێن خولێ بێ جه‌ماوه‌ر بهێنه‌كرن ئه‌و دێ بریارا وێ وه‌زاره‌تێ بجه ئینن و هه‌موو یاریێن خولێ بێ جه‌ماوه‌ر برێڤه‌به‌ن نه بتنێ خولا پلا ئێك به‌لكو ل سه‌ر ئاستێ هه‌موو چالاكیێن سه‌ر ب ئێكه‌تیا ته‌پا پێ یا ئیسپانى ڤه .
ئه‌ڤرۆ نیوز:
ئێكه‌تیا ته‌پا پێ یا ئه‌لمانى د بیانامه‌كا فه‌رمى دا چاره‌نڤسیێ یاریێن خۆلا بوندس لیگا ئێك و دو یێن ئه‌لمانیا دیاركرن پشتى ل ماوێ چه‌ند رۆژێن بورى راپورتێن رۆژنامه‌ڤانى ئاشكراكربوون دبیت یاریێن خۆلا ئه‌لمانیا بهێنه پاشئێخستن بۆ ده‌مه‌كێ دى ژبه‌ر ڤایروسێ كورونا.
زێده‌تر ئێكه‌تیا ته‌پا پێ یا ئه‌لمانى ب فه‌رمى دیاركر هه‌موو یاریێن خولا بوندس لیگا ئێك و دو دێ ل ده‌مێ خوه یێ دورست هێنه‌كرن لێ دبیت یاریێن حه‌فتیا بهێت بێ جه‌ماوه‌ر بهێنه‌كرن هه‌كه بریار ژ لایێ جهێن فه‌رمى یێن ئه‌منى بهێته راگه‌هاندن وى ده‌مى ئه‌و دێ هه‌موو یاریێن خولێ بێ جه‌ماوه‌ر برێڤه‌به‌ن هه‌تا بۆ ده‌مه‌كێ نه دیار.
ئه‌ڤرۆ نیوز:
زه‌نگینترین زه‌لامێ جیهانێ 125 ملیۆن دۆر بۆ ڤه‌دیتنا چاره‌سه‌ریێ بۆ ڤایرۆسێ كورونا دان، پارێ هاتیه دان ژی بۆ ڤه‌كۆلینێن دروستكرنا ده‌رمانه‌كێ نوو دهێته بكار ئینان، كو چاره‌سه‌ریێ بۆ ڤایرۆسێ كورونایی و ڤایرۆسێن ل پاشه‌رۆژێ بهێن بكه‌ن.
ده‌زگه‌هێ بیل گیتس یێ خێرخوازی د به‌یاننامه‌یه‌كێ دا راگه‌هاند: گیتس بریار دایه 125 ملیۆن دۆلاران ب ده‌ته ئه‌وان سازیێن ساخله‌میێ، كۆ ڤه‌كۆلینان دكه‌ن بۆ ڤه‌دیتنا چاره‌سه‌ریێ بۆ كورونایێ.
ئارمانجا بیل گیتس ژ ته‌رخانكرنا ئه‌ڤی پاره‌یی، ژبلی ڤه‌دیتنا چاره‌سه‌ریێ، گه‌هشتنا چاره‌سه‌ریێ بۆ ئه‌وان وه‌لاتێن هه‌ژار و شیانێن دابینكرنا ده‌رمانان نه‌ی.
بیل گیتس دامه‌زرینه‌رێ كۆمپانیا مایكرۆسوفته و سامانێ وی 112 ملیار و 800 ملیۆن دۆلاره ب زه‌نگینترین زه‌لامێ جیهانێ دهێته نیاسین.
ئه‌ڤرۆ نیوز:
شی حین بینغ سه‌رۆكێ چینی سپێده‌هیا ئه‌ڤرۆ گه‌هشته باژێرێ ئوهان سه‌حكره ئه‌وان رێ و ئاوایێن و رێكار و رێنما و پێدڤیێن به‌رهنگاروبونا ئه‌ڤێ نه‌خوشیێ ژلایێ ده‌سه‌لاتێن خۆجهی یێن باژێری بۆ نه‌هێلانانا ڤایرۆسێ كورونایی بكار ئینانان.
ده‌ستپێكێ ڤایرۆسێ كورونا یی ناڤدار ب كوڤید 19 ل باژێرێ ئوهان یێ چینێ به‌لاڤ بوو تانوكه ل ئه‌ڤی وه‌لاتی 3136 كه‌سان گیانێ خۆ ژ ده‌ست دایه و 60 هه‌زار كه‌س ژ نه‌خوشیێ باشبوینه و هه‌روه‌سا 80 هزار و 756 كه‌س ژی تووشی ئه‌ڤی ڤایرۆسی بوون.
لگۆری ئامارێن ساخله‌میا جیهانی كۆ به‌لاڤكرینه، تانوكه ل 100 وه‌لاتان ڤایرۆسێ كورونا تێدا به‌لاڤ بوویه 111 هه‌زار و 360 كه‌س ژی توشی كورونایێ بوون.
نيشاندان