ئه‌و فه‌رمانا ب سه‌رێ خووشك و براێن مه‌ یێن ئێزدی هاتی و ئه‌و روودان و كاره‌ساتێن دلته‌زین و مرنا ب كۆم و ره‌ڤاندنا كچێن وان و برس و تێنیبوون و ره‌زیلی هتد.. . یا وان ب چاڤێن خوه‌ دیتی چ جاران نا هێته‌ ژبیركرن و د دیرۆكێ دا دێ هێته‌ تۆماركرن و ل جیهانێ هه‌میێ ره‌ نگڤه‌دایه‌؛ ب راستی هندی بۆ دلێن وان بێژین یا كێمه‌ ئه‌ڤجا یا پێدڤی ل سه‌ر ملێن مه‌ و زێده‌تر دێ بۆ كه‌ین و ئه‌وا هه‌تا نوكه‌ خه‌لكێ دهۆكێ ل به‌رامبه‌ر خووشك و برایێن ئێزدی كری رۆلێ وان ناهێته‌ ژبیركرن؛ لێ خۆزی ئه‌ڤه‌ ب تنێ نه‌ بیت و ئه‌م رێزێ ل هه‌بوونا وان بگرین به‌رێ خوه‌ نه‌ ده‌ینێ ب وی چاڤی كو ئه‌ڤرۆ ئه‌و ره‌ڤینه‌ و ده‌ربده‌ر و بێ مالن بلا ئه‌م ب وی چاڤی به‌رێ خوه‌ بده‌ینێ كو یێن د ناڤ مالێن خوه‌ دا؛ لێ دێ بێژم مخابن گه‌له‌ك ژ خه‌لكێ مه‌ ل ده‌وام و جهێن كاری و ل سه‌ر جادان، تنێ به‌حس به‌حسێ برایێن ئێزدینه‌ حه‌نكان ب ئاخفتن و گازندێن وان دكه‌ن و ئه‌و نزانن ئه‌و یێن د چ بارودۆخ دا و سه‌ره‌رای وان هه‌می نه‌خۆشیان نوكه‌ ئه‌و ژیانا خوه‌ دبۆرینن، دێ بێژین به‌هرا پتریا وان یێن د قوتابخانان ڤه‌، لێ گه‌له‌ك ژی د بارودۆخێن خراب دانه‌ د ناڤ هیكه‌لێن خانیان دا هه‌كه‌ هاریكاریه‌ك بۆ جو باشه‌ و هه‌كه‌ نه‌، دڤێت چ كازندان نه‌كه‌ن، راسته‌ هاریكاری یا بۆ دهێته‌ كرن، به‌لێ پا ئه‌و هاریكاری تێرا هندێ ناكه‌ت كو بێژین پێدڤێن وانان پر دكه‌ن؛ بلا ب تنێ چاڤێ مه‌ ل مه‌ و به‌رژه‌وه‌ندیێن مه‌ نه‌ بیت ئه‌ڤرۆ ئه‌م به‌حسێ ساله‌كا خواندنێ بكه‌ ین؛ بلا ئه‌ڤرۆ ئه‌م هزرا خوه‌ بكه‌ین ئه‌و چ فه‌رمانه‌ ب سه‌رێ وان هاتی به‌رامبه‌ ری ڤێ سالێ ئه‌ز بێژم نه‌ یا جانه‌ ئه‌م به‌حسێ ساله‌كا خواندنێ بكه‌ین و ئه‌م ل مالێن خوه‌ ب تنێ ئاریشه‌ یا مه‌ ئه‌و بیت ساله‌كا خواندنێ دێ ژ قوتابێن مه‌ چیت؛ راسته‌ زیانه‌كه‌ به‌لێ وه‌كی وێ زیانێ و نه‌خۆشیێ نینه‌ یا ب خووشك و براێین ئێزدی كه‌تی ژ لایه‌كی ڤه‌ خواندن و ژ لایه‌كی دیڤه‌ مالخرابی و ده‌ربه‌ده‌ری؛ بلا ئه‌م جهێن حه‌واندنێ جارێ بۆ دابین بكه‌ین پاشی به‌حسێ ساله‌كا خواندنێ بكه‌ین یان ئاریشه‌ كا دێ باس بكه‌ین؛ ئه‌ز بێژم مه‌ ب تنێ ئه‌ڤ ئاریشه‌ نینه‌ گه‌له‌ك تشتێن فه‌رتر یێن هه‌ین مه‌ یا خوه‌ ل سه‌ر بێده‌نگ كری و پێدڤی به‌رچاڤكرنێنه‌؛ ئه‌ڤرۆ بلا هه‌می بزاڤان ئه‌م بكه‌ین بۆ زڤراندنا وان كچێن ئه‌ ڤرۆ د ده‌ستێ ڤان دوژمنان دا و كرین و فرۆتن پێ دهێته‌كرن و چاره‌نڤێسی وان ییێ به‌رزه‌؛ ئه‌ڤرۆ ڤان كاودانێن نه‌خۆش پێشمه‌ۆگێ مه‌ یێ مه‌ دپارێزیت
بێ جوداهیێ بكه‌ت د ناڤبه‌را مه‌ و برایێن مه‌ یێن ئێزدی دا بلا ئه‌ڤرۆ ئه‌م ژی دبێ جوداهی بین ل گه‌ل برایێن ئێزدی، چونكو ئه‌ڤا ب سه‌رێ وان هاتی نه‌یا كێمه‌؛ خۆزی ئه‌ڤرۆ ئه‌م وه‌ بكه‌ین هه‌ر خێزانه‌ كا نوكه‌ د ناڤ هیكه‌له‌كی دا یان دبن خیڤه‌ته‌كێ دا كو دو چبكێن بارانێ بهێن بكه‌ڤنه‌ د بارودۆخه‌كێ نه‌خۆش و مرنێ دا ئه‌م چاره‌كێ بۆ ببینن و هه‌ر ئێك ژ مه‌ هه‌كه‌ چ نه‌ بیت بیننه‌ د ناڤ مالێن خوه‌ دا و ژیانه‌كا ئاسایی پێكڤه‌ ببوورینن هه‌تا ئه‌ ڤ بارودۆخێ نه‌خۆش د سه‌را ده‌رباز دبیت یا ژمنڤه‌ ئه‌ڤه‌ دێ بیته‌ كێمترین ئه‌رك ل به‌رامبه‌ر وان د ڤان كاودانان دا؛ چونكی ئه‌م دزانینن ئه‌گه‌رێن په‌یدابوونا ڤان ئاریشه‌ و كاره‌ساتان كی بووینه‌؟ خۆزی نوكه‌ ل جه و تاخێن ئاواره‌یێن عه‌ ره‌ب لێ د ئاكنجی هه‌می ئه‌و خووشك و برایێن ئێزدی بن ئه‌وێن ئه‌ڤرۆ د بێ رێك و جه؛ لێ مخابن دێ بێژین ئه‌م ملله‌ته‌كین ب هه‌ست و سۆزان هزر دكه‌ین و كارێن خوه‌ برێڤه‌دبه‌ین؛ ژ به‌ر هندێ هه‌می ده‌مان دوژمنێن مه‌ كه‌یف ب سه‌ر مه‌ دهێت و بچووكترین ده‌لیڤه‌ ببینن دێ هه‌می هه‌ولان ده‌ن بۆ ژ ناڤبرنا ده‌سكه‌فتێن مه‌ ئه‌وێن هنده‌ ساله‌ ملله‌تێ مه‌ خه‌بات و قوربانی بۆ داین.

گومان تێدا نینه‌ هه‌ر كومه‌لگه‌هه‌ك ل جیهانێ هه‌ولده‌ت ل دووڤ پلان و به‌رنامێن دارشتی ب لبه‌چاڤگرتنا ژماره‌ و ئاستێ ژێده‌رێن مه‌ترسیێ و به‌رژه‌وه‌ندیا خوه‌ بارێ ئێمناهیا نه‌ته‌وه‌ی دپارێزیت، هه‌ر گرفته‌كا ببیته‌ گه‌ف ل سه‌ر وێ ئێمناهیێ ل سه‌ر ئاستێ ناڤخوه‌ و ده‌رڤه‌ چاره‌سه‌ربكه‌ت. بێكاری ئێك ژ ئاریشه‌یێن به‌رده‌وام و ب مه‌ترسی یه‌ ل ڤی سه‌رده‌می ل هه‌می كومه‌لگه‌هان دا هه‌یه‌ ب شێوه‌كێ رێژه‌ی دوور ژ جۆرێ سیسته‌مێ سیاسی و ئاستێ ره‌وشه‌نبیریا خه‌لكێ ئه‌وی وه‌لاتی ومێژوو و جوگرافیا وی و ڤێ كێشێ كارتیكرنێن خوه‌ یێن خراب هه‌نه‌ ل سه‌ر هه‌می وارێن ژیانێ، ب مه‌ره‌ما كێمكرنا كارتیكرنا بێكاریێ كۆنفرانسێن نێڤده‌ولی هاتینه‌ به‌ستن و سازیێن ل ئاستێ جیهانێ و هه‌رێماتی هاتینه‌ دامه‌زراندن، ژماره‌كا زۆر ژ ڤه‌كۆلینان ژ لایێ كه‌سێن بسپۆر و شاره‌زا ڤه‌ هاتینه‌ دروستكرن.
بۆ دابینكرنا ژیانێ مرۆڤ كار دكه‌ت و بهایێ وی دكاركرنێ دایه‌ و ب كاری پاشه‌رۆژ دهێته‌ ئاڤاكرن و پێناسه‌یا بێكاریێ ئه‌وه‌ مرۆڤی ڤیان و شیانێن كاركرنێ هه‌بن و ده‌لیڤا كاری نه‌بیت، جۆرێن بێكاریێ د زۆرن، هه‌روه‌سا ئه‌گه‌رێن په‌یدابوونا ڤێ دیاردا سه‌رانسه‌ری جۆرا و جۆرن و گرێدای ره‌وشا ناڤخوه‌ و ده‌رڤه‌یا هه‌ر وه‌لاته‌كینه‌.
ئێمناهی پێدڤی و ئارمانجا هه‌می مرۆڤ و كومه‌لگه‌هانه‌، ژیان ئارام نابیت ل به‌ر سیبه‌را گه‌ف و مه‌ترسیان و گیان و سامان یێ پاراستی نه‌بیت، ئه‌ڤجا په‌یوه‌ندیه‌كا ب هێز هه‌یه‌ د ناڤبه‌را بێكاریێ و ئێمناهیێ دا ژ به‌ر كو مرۆڤێ بێكار (نه‌ هه‌می به‌لێ رێژه‌كا بلند) خوه‌ ژ ده‌رڤه‌ كۆمه‌لگه‌ها خوه‌ دبینیت و بێ حه‌زا وی شیانێن وی یێن هزری و جه‌سته‌ی مفا ژێ نه‌ هاتینه‌ و ئاستێ ڤیانێ بۆ وه‌لاتی كێم دبیت و دبیته‌ ژێده‌رێ ره‌خنا خرابكه‌ر بێ ئۆمێدیا تایبه‌ت ل ژێر فشارا پێدڤیێن ژیانا ڤی سه‌رده‌می ژ لایێ جڤاكی و ئابووری ڤه‌. كه‌سێ بێكار ژ لایێ ده‌روونی ڤه‌ خوه‌ ب كه‌سه‌كێ كێم بها دزانیت و د ئه‌نجام دا هزر د كارێن خراب و تاوانان دا دكه‌ت وه‌ك كوشتن و دزی و فێلبازی.. هتد، بۆ په‌یداكرنا پاریێ ژیانێ و دبیته‌ ژێده‌رێ مه‌ترسیێ ل سه‌ر ئێمناهیا نشتیمانی ژ به‌ر كو بلندبوونا ژمارا تاوانان ل هه‌ر وه‌لاته‌كی نیشانا نه‌ ئارامیا ئه‌وی وه‌لاتی یه‌، جاران ئه‌ڤ كه‌سه‌ په‌نایێ دبه‌ته‌ خۆكوشتنێ بۆ قورتالبوون ژ ئه‌وی بارودۆخێ ده‌روونی و ئابووری یێ تێدا دژیت و ژماره‌كا ئالۆزیان ل دووڤ خوه‌ دهێلیت وه‌ك زارۆ و خێزانه‌كا بێ سه‌میان كو كارتیكرنێن خوه‌ هه‌نه‌. ژ لایه‌كێ دیڤه‌ بێكاری ئێكه‌ ژ هۆكارێن په‌یدابوونا هزرێن توندره‌و د ناڤ جڤاكی دا و نێچیره‌كا ب ساناهی یه‌ بۆ گرۆپێن تیرۆری و هشك باوه‌ر مفای ژێ وه‌ربگرن بۆ مه‌ره‌مێن خوه‌ یێن تایبه‌ت، زۆربه‌ی جاران كه‌سێن بێكار په‌نایێ دبه‌ته‌ به‌ر ب كارئینانا كه‌ره‌ستێن بێ هۆشكه‌ر و بازرگانی و ڤه‌گوهاستنا وی ل به‌رامبه‌ر ب ده‌ستڤه‌ ئینانا پاره‌كی یان ب جهیلانا وه‌لاتێ خوه‌ و كۆچكرن به‌ر ب وه‌لاته‌كێ دی.
دیاره‌ بێكاریێ كارتیكرنێن خراب هه‌نه‌ ل سه‌ر ژیانێ ب گشتی و لایه‌نێ ئه‌منی ب تایبه‌تی و دبیته‌ ئه‌گه‌ر بۆ په‌یدابوونا ژماره‌كا زۆر ژ ئاریشه‌ و ئالۆزیان كو پێدڤی ب ڤه‌كۆلین و چاره‌سه‌ریێنه‌ ژ لایێ لایه‌نێن په‌یوه‌ندیدار ڤه‌، په‌یوه‌ندیه‌كا ب هێز و به‌ردوام هه‌یه‌ د ناڤبه‌را بێكاریێ و پاراستا بارێ ئێمناهیێ دا، ژ به‌ر كو په‌یداكرنا ژیانه‌كا ئارام بۆ وه‌لاتیان ئارمانجا سه‌ره‌كی یه‌ د هه‌می پلانێن ئه‌منی دا ده‌مێ دهێنه‌ دارشتن، ب ئه‌ڤێ چه‌ندێ دیار دبیت بێكاری و نه‌ ئارامی دو روونه‌ بۆ ئێك ئالۆزی. هه‌رێما كوردستانا عیراقێ وه‌ك پارچه‌ك ژ ڤێ جیهانێ یا بێبه‌هر نینه‌ ژ ڤێ دیاردێ و رێژه‌كا بێكاریێ هه‌یه‌ و دهێته‌ گوهۆرین ژ پارێزگه‌هه‌كێ بۆ یا دی و ژ قووناغه‌كێ بۆ یا دی و ئه‌ڤ دیارده‌ پێدڤی ڤه‌كۆلین و چاره‌سه‌ریێ یه‌ ب رێیێن زانستی بۆ كێمكرنێ ب دیتنا ده‌لیڤه‌یێن كاری بۆ خه‌لكێ هه‌رێمێ و بكارئینانا كرێكارێن بیانی بهێته‌ مه‌رجدار و سنۆرداركرن و دامه‌زراندنا ده‌رچوویێن زانكۆ و په‌یمانگه‌ها، كاركرن رێكه‌فتنێن نێڤده‌ولی یێن عیراق و هه‌رێما كوردستانێ ئه‌ندام تێدا و پشكداری د كۆنفرانسێن ده‌ولی و هه‌رێمی یێن تایبه‌ت ب چاره‌سه‌ركرنا ئه‌ڤێ ئاریشێ.
* ماسته‌ر ب یاسا نێڤده‌ولی

ملله‌تێ كورد ب درێژایا مێژوویێ راستی روودانێن سیاسی یێن نه‌خۆش بوویه‌ و دوژمنان ب ئاوایه‌كێ دره‌ندانه‌ و نه‌مرۆڤانه‌ سه‌ره‌ده‌ری دگه‌ل كوردان هاتیه‌ كرن و زیانه‌كا مه‌زن گه‌هاندیه‌ كوردان، به‌لێ چ جاران نه‌شیاینه‌ كوردان لاواز بكه‌ن و نه‌شیاینه‌ ئیرادا ملله‌تێ كورد لاواز بكه‌ن و نه‌هێلن، پێشمه‌رگه‌ هه‌ر ئه‌و پێشمه‌رگه‌یه‌ كو ل سه‌رێ چای و به‌رۆكێن شه‌ری دا ب ئیراده‌ و وره‌یا بلند شه‌رێ دوژمنی كری.
پێشمه‌رگه‌ و ملله‌تێ كورد د شۆره‌شێن ئیلول و گولانێ دا ئیرادا خوه‌ نیشا وه‌لاتێن هه‌رێماتیك دایه‌ كو خودان ئیراده‌یه‌كا پوولاییه‌ و ناهێته‌ هه‌ژاندن، له‌ورا ئه‌و كاره‌ستاتێن ب سه‌رێ ملله‌تێ كورد هاتین كو د چارچوڤێ ژناڤبرنا نه‌ته‌وه‌یه‌كی دا بوویه‌، ئیرادا خوه‌ ژ ده‌ست نه‌دایه‌ و نه‌ كه‌فتیه‌ بن چ باره‌كێ سیاسی كو ژ ده‌رڤه‌ی خواستێن وی بسه‌ر دا هاتبیته‌ سه‌پاندن، هه‌تا ل ڤێ دووماهیێ گرۆپا ب ناڤێ ده‌وله‌تا ئیسلامی ل عیراقێ و شامێ كو دبێژنێ داعش هاتیه‌ مه‌یدانێ و پێشمه‌رگه‌ی ژی ب وێ ئیرادا نه‌ته‌وه‌یی و نشتیمانی شه‌رێ ل دژی تیرۆرستێن داعش كریه‌ و پێش هه‌می جیهانێ ڤه‌ به‌رسینگێ ڤێ گرۆپا تیرۆرست گرتیه‌ و ب چه‌ك و كه‌رسته‌یه‌كێ كێمتر ژ یێ داعشێن تیرۆرست خوه‌ ل هه‌مبه‌ری وان گرتیه‌ و راستی شكه‌ستنێ كرینه‌.
د ڤی شه‌ری دا كو نوكه‌ كورد ب قوربانیێن خوه‌ دسه‌ربلندن و مه‌زنترین ئیراده‌ د هێزا پێشمه‌گه‌ی دا دهێته‌ دیتن، راسته‌ ژ لایه‌كی ڤه‌ هێزێن ناڤ نه‌ته‌وه‌یی ب وان هاریكاریێن پێشكێشی كوردان و پێشمه‌گه‌ی كرین بۆ بهێزكرنا په‌یوه‌ندیان نیشا هه‌میا دا كو په‌یوه‌ندیێن دبلوماسی یێن جه‌نابێ سه‌رۆك بارزانی سه‌رۆكێ هه‌رێما كوردستانێ جهێ هیڤیه‌كا مه‌زن و رێكه‌كا سه‌ركه‌فتیانه‌یه‌، به‌لێ پا ژ لایه‌كێ دی ڤه‌ ئیرادا پێشمه‌رگه‌ی و سه‌رۆك بارزانی بوو كو شیایی نه‌بتنێ داعش ژ پێشكه‌فتنێن وان ب راوه‌ستینیت به‌لكو شیان بشكێنن و پاشڤه‌ ببه‌ن و شكه‌ستن ل دووڤ شكه‌ستنێ ب سه‌رێ وان بینن و نێزیكی شكه‌ستنێ بكه‌ت.
ئه‌ڤ ئیرادا كو پێشمه‌رگه‌ی هه‌ی پێدڤی ب پشته‌ڤانیكرنا خه‌لكی و هێزا كوردستانێ هه‌یه‌ و فه‌ره‌ هه‌می پێكهاتێن خه‌لكێ كوردستانێ پشته‌ڤان و به‌رده‌وامده‌رێن وێ ئیرادێ بن به‌رامبه‌ر دوژمنێن كوردان، ل ڤێرێ بارێ سه‌ر ملێن هه‌ر تاكه‌كی ژ وێ ده‌ست پێ دكه‌ت كو د جهێ خوه‌ دا به‌ر پرسیاریا مێژوویی یا سه‌ر ملێن خوه‌ وه‌رگریت و رۆل هه‌بیت د بلندكرنا ئیراده‌ و وره‌یا پێشمه‌گه‌ی دا، هه‌تاكو ئه‌ڤ قووناغه‌ ژی دبیته‌ مێژوویه‌كا تژی سه‌روه‌ری بۆ كورد و كوردستانێ.