ئه‌ڤرۆ نیۆز، ئه‌میر ئه‌ترووشى:
ژێده‌ره‌كى بۆ ئه‌ڤرۆ نیوز راگه‌هاند، پشتى بوورینا دو هه‌یڤان ل سه‌ر داخوازا قوتابیێن دهۆكێ بۆ ڤه‌كرنا خۆلا سیێ و هه‌ر نه‌هاتیه‌ ڤه‌كرن، بریاره‌ سوباهى رۆژا ئێكشه‌مبى خۆنیشادانه‌كا ئاشتیانه‌ ژ لایێ قوتابیێن كه‌فتى ڤه‌ ل به‌ر ده‌رگه‌هێ رێڤه‌به‌ریا گشتیا په‌روه‌ردا دهۆكێ بهێته‌ كرن.
هێرش ره‌شید ئێك ژ رێكخه‌رێن خۆنیشادانێ و چالاكڤانێ جڤاكێ مه‌ده‌نى بۆ ئه‌ڤرۆ نیوز دیار كر، ئه‌ڤه‌ نێزیكى دو هه‌یڤانه‌ نوونه‌رێن قوتابیان و رێكخراوێن جڤاكێ مه‌ده‌نى بزاڤه‌كا مه‌زن دكه‌ن بۆ هندێ خۆلا سیێ بۆ قوتابیێن كه‌فتى یێن وه‌رزێ خواندنێ یێن سالا 2013-2014 بهێته‌ ڤه‌كرن، به‌لێ ل دووماهیێ چو پووته‌ ب داخوازا قوتابیان نه‌هاته‌ كرن و خلا سیێ نه‌هاته‌ ڤه‌كرن.
ناڤبرى دیار كر كو ل ڤێ دووماهیێ بریار هاته‌ دان خۆلا سیێ بۆ قوتابیێن ئاواره‌ بهێته‌ ڤه‌كرن و قوتابیێن دهۆكێ هاتنه‌ پشتگه هاڤێتن و غه‌در ل وان هاته‌ كر و گۆت: له‌و بریاره‌ سوباهى ل ده‌مژمێر 10 سپێدێ خۆنشادانه‌كێ ئه‌نجام بده‌ین.
ئاشكرا ژى كر كو هه‌كه‌ سوباهى چو ئه‌نجام بۆ خۆنیشادانا وان نه‌بوون دێ هنده‌ك قۆناغێن دى ب دووڤ را هێن و د به‌رده‌وامبن و هه‌ت 1/12 خۆنیشادانا كه‌ن هه‌تا كو خۆلا سیێ بۆ قوتابیێن دهۆكێ ژى بهێته‌ ڤه‌كرن.

ئه‌ڤرۆ نيوز، ناجى به‌ده‌ل:

سه‌رپه‌رشتيارێ كه‌مپان ل پارێزگه‌ها دهۆكێ راگه‌هاند كو هه‌موو رێڤه‌به‌ريێن خزمه‌تكارى ل پارێزگه‌هێ دێ پشكێن خوه‌ ل ناڤ كه‌مپان ڤه‌كه‌ن و ئه‌و ستافێ بۆ كه‌مپان ژى دهێته‌ دانان پێشيێ خوله‌كا تايبه‌ت دبينن.

ئيسماعيل محه‌مه‌د هاريكارێ پارێزگارێ دهۆكێ و سه‌رپه‌رشتێ كه‌مپێن پارێزگه‌ها دهۆك بۆ ئه‌ڤرۆ نيوز گۆت: “به‌رى نوكه‌ ژى مه‌ خول ڤه‌كرينه‌ و نوكه‌ ژى دێ ڤه‌كه‌ين كو هه‌ر ئێك ژ 25 كه‌سان پێك دهێت و ئه‌و كه‌س دێ سه‌رپه‌رشتيا ئيدارا كه‌مپان كه‌ن”.

زێده‌تر گۆت: “هه‌ر رێڤه‌به‌ريه‌كا خزمه‌تكارى ژى دێ پشكا خوه‌ ل ناڤ كه‌مپان دا هه‌بيت ژ بووى هه‌ر ئاريشه‌ك و پێدڤيه‌كا هه‌بيت”.

ئيسماعيل محه‌مه‌د خۆيا ژى كر كو كارمه‌ندێن رێڤه‌به‌ريا كه‌مپان هاتينه‌ مه‌شقكرن و حه‌فتيا بهێت دێ خولا دويێ يا كارمه‌ندێن كه‌مپان هێته‌ ڤه‌كرن.

دا زانين ژى كو هه‌يكه‌لێ كارگێرى يێ هه‌موو كه‌مپان ب دووماهى هاتيه‌، به‌لێ هه‌تا نوكه‌ ئه‌ڤ كه‌سه‌ ده‌ست ب كار نه‌بووينه‌ و چاڤه‌رێ تيمێن خزمه‌تگۆزارى نه‌ ل رێڤه‌به‌ريێن وان و ئه‌و ژى ب ده‌مه‌كێ نێزيك دێ كه‌ڤنه‌ كارى.

ئه‌ڤرۆ نيوز:

رێڤه‌به‌رێ گشتيێ ئاسايشا هه‌ولێرێ ئاشكه‌را كر كو به‌رى نوكه‌ د رێيا خالێن سنورى يێن هه‌ولێر ل گه‌ل پارێزگه‌هێن دى يێن عيراقێ بزاڤێن هنارتنا ترۆمبێلێن مينرێژكرى كريه‌، به‌لێ ژ لايێ پێشمه‌رگه‌ و هێزێن ئێمناهيێ و خالێن پشكنينێ ڤه‌ رێگرى لێ هاتيه‌ كرن و ده‌ست ب سه‌ر دا هاتيه‌ گرتن.

تارق گه‌ردى، رێڤه‌به‌رێ گشتيێ ئاسايشا هه‌ولێر بۆ باسنيوز گۆت: “هه‌تا نوكه‌ چو كه‌س ب تۆمه‌تا ته‌قينا هه‌ولێر نه‌هاتينه‌ ده‌سته‌سه‌ركرن، به‌لێ گۆمان ل سه‌ر هه‌ر كه‌سه‌كى هه‌بيت دێ هێته‌ ده‌سته‌سه‌ركرن و لێپرسين ل گه‌ل هێنه‌ كرن”.

رێڤه‌به‌رێ گشتيێ ئاسايشا هه‌ولێر ده‌رباره‌ى ئاگه‌هداربوونا وان ژ ئه‌ڤان ره‌نگه‌ كرياران گۆت: “مه‌ به‌رى نوكه‌ ژ لايێ جڤاتا ئاسايشا هه‌رێما كوردستانێ ڤه‌، وه‌لاتى ئاگه‌هدار كرينه‌ كو چه‌ند جاران بزاڤێن ژ ڤى ره‌نگى هه‌بوون، بزاڤ هاتيه‌ كرن ترۆمبێلێن مينرێژكرى هنارتينه‌ ناڤ هه‌ولێر، به‌لێ ژ لايێ پێشمه‌رگه‌ى و زالگه‌هێن ئاسايشێ ڤه‌ رێ لێ هاتيه‌ گرتن و گۆت: “ڤێ جارا رێژا مادێ ناڤ ترۆمبێلێ كێم بوويه‌ و نه‌هاتيه‌ ئاشكه‌را كرن”.

ل دۆر پێداچوونا هاتنا ئاوارێن ده‌ڤه‌رێن باشوور و ناڤه‌راستا عيراقێ بۆ هه‌رێما كوردستانێ گۆت: “پێدڤيه‌ پێداچوون تێدا بهێته‌ كرن و پێداچوون دێ دهاتنا ئاواران ژى دا هێته‌ كرن”.

ل رۆژا چارشه‌مبيا بۆرى 19\11\2014 ترۆمبێله‌كا مينرێژكرى ل به‌ر ده‌رگه‌هێ پارێزگه‌ها هه‌ولێر په‌قى و د ئه‌نجام دا پێنج كه‌س شه‌هيد بوون و 29 كه‌س ژى هاتنه‌ برينداركرن.