ئه‌و كه‌سه‌نه‌ كو پێدڤی چاڤدێریه‌كا تایبه‌ت یان ژی رێخۆشكرنه‌كێ یان ژی هنده‌ك پێداویستیان قووناغ بۆ قووناغێ پشتی چه‌ندین سالان به‌رهنگاریه‌كا توند ژ لایێ سازیێن كێم ئه‌ندامان و خودان پێدڤیێن تایبه‌ت ڤه‌ پرۆژه‌ یاسایه‌ك گه‌هشته‌ په‌رله‌مانێ كوردستانێ ئه‌و بوو خۆشبه‌ختانه‌ قانوونا ژماره‌ 22 سالا 2011 ب ناڤێ قانوونا (ماف و ئیمتیازاتێن خودان پێدڤیێن تایبه‌ت) پشتی ده‌ركه‌فتنا ڤێ قانوونێ مه‌زنترین مزگینی بوو ژ بۆ هه‌می كه‌سێن گرێدایی ڤێ قانوونێ، ل دووڤ قانوونێ ماف و ئیمتیازاتێن خوه‌ ده‌سته‌به‌ر بكه‌ین، لێ پشتی ده‌ركه‌فتنا هه‌ر قانوونه‌كێ پێدڤی ده‌ركه‌فتنا چه‌ندین رێنمایانه‌ كو ب ده‌ركه‌ڤن ژ لایێ سازیێن شۆله‌ ژێ ڤه‌، ده‌مه‌كێ درێژ ده‌رباز بوو ژ بلی چه‌ند رێنمایه‌كێن بچووك چو رێنمایه‌كا دی نه‌ده‌ركه‌تیه‌، تشتێ هه‌ری ئاسان ده‌ركرنا ناسنامه‌یه‌كێ یه‌ بۆ هه‌می خودان پێدڤیێن تایبه‌ت ئه‌و ژی نه‌هاتیه‌ كرن پشكا (2) ژ قانوونا ماددا (3) ئه‌نجومه‌نه‌ك بۆ چاڤدێری و شیاندنا كێم ئه‌ندامان و خودان پێدڤیێن تایبه‌ت ئه‌ڤ ئه‌نجوومه‌نه‌ ده‌مه‌كی كه‌فته‌ كاری چه‌ند، كۆمبوونه‌كێن كێم كرن و ده‌مه‌كێ درێژه‌ راوستیایی ڤی ئه‌نجوومه‌نی گرنگیه‌كا زۆر یا هه‌یی چه‌ندین وه‌زارتێن په‌یوه‌ندیدار تێدا ئه‌ندامن.
ماددێ (8) خوه‌ ته‌رخانكرن بۆ چاڤدێریا كێم ئه‌ندامی
ئه‌ڤ مادده‌ زۆرێ گرنگه‌ ڤیابا هه‌تا نوكه‌ كه‌فتبا كاری زۆر ژ كێم ئه‌ندامان ئه‌ڤ ئاریشه‌ هه‌یی ئه‌و كێم ئه‌ندامێن خودانێن ڤێ ئاریشێ ژی زۆر زۆر دكه‌فتینه‌ و زۆر پێدڤی ئێكینه‌ كو تنێ ب خزمه‌تا وی را ببیت
لقێ(3) ماددێ (10) بڕگه‌یا(4)
حوكمه‌ت هاندنا كه‌رتێ تایبه‌ت بكه‌ت ده‌رفه‌تا كاری بۆ كه‌سێن خودان پێدڤیێن تایبه‌ت دابین بكه‌ت بۆ ده‌مێ (3) سالان حوكمه‌ت دێ نیڤا مووچێ وی ب ستویێ خوه‌ ڤه‌ گریت، ئه‌ڤه‌ بڕگه‌كا زۆرا گرنگه‌ دێ خودان پێدڤیێن تایبه‌ت ئه‌وێن شیانێن شۆلی هه‌ین و دێ كاركه‌ن.
لقێ (4) ماددێ (11) بڕگه‌یا (1)

دڤێت حوكمه‌ت و كه‌رتێ تایبه‌ت كاربكه‌ن بۆ ئاماده‌كرنا ژینگه‌هه‌كا گونجایی بۆ ئاسانكرنا رێكێ دابینكرنا هه‌می پێدڤیان ژ بۆ هندێ ب شێن ئامرازێن گه‌هاندنێ یێن گشتی بكاربینن ئه‌و ژینگه‌ها وه‌م نوكه‌ تێدا ب چو ره‌نگه‌كی نه‌یا گونجایه‌ نه‌ جهێن گشتی و نه‌یێن تایبه‌ت نه‌ د هاریكارن كه‌سێ خودان پێدڤیێن تایبه‌ت بشێت ب ئاسایی هاتن و چوونا خوه‌ بكه‌ت. ئه‌ڤه‌ هنده‌ك خالێن كێم بوون ژ قانوونێ زۆربه‌یا خالان ژی مه‌ ئاماژه‌ پێنه‌دان رۆژ یێن ده‌رباز دبن و د بۆرن قانوون ژی تۆز یا دكه‌ڤیته‌ سه‌ر، راسته‌ بارودۆخ نه‌ یێ گونجایه‌ و قه‌یرانه‌كا زۆر یا ل سه‌ر مه‌، هه‌ر چو نه‌بیت هنده‌ك خال ژێ بهێنه‌ جێبه‌جێكرن دا خودان پێدڤیێن تایبه‌ت مافێن خوه‌ شاد ببن.

بیرا مه‌ دهێت ل ده‌ما سه‌رهلدانا بوهارا ١٩٩١ و كۆچا ملیۆنی یا ملله‌تێ كورد بۆ سنۆرێن توركیا و ئیرانێ ئه‌ز ئێك ژ وان وه‌لاتیان بووم مینا هزاران ئه‌وێن به‌ر ب توركی چووین ب راستی زۆر یا نه‌خوش بوو و مه‌ زۆر زاروك و گه‌نج و پیر ژ ده‌ستدان ژ ئه‌گه‌رێ نه‌بوونا خوارنێ و ژ به‌ر سر و سه‌رمایێ و بیرا مه‌ دهێت ئه‌و كوردێن ل ده‌شتانێ و چه‌لێ خوه‌ گۆڤێن خوه‌ یێن په‌زی ل سه‌ر سه‌رێ مه‌ كرنه‌ هوتێلێن 5 ستێر و تشتێ خو كره‌ ١٠ قات و فرۆتنه‌ مه‌ سه‌رهاتیه‌كا دوور و درێژه‌ و ئه‌ڤه‌ ئه‌و كارێن بچووكن یێن به‌حس لێ دهێته‌ كرن لێ ب هزارا سه‌رهاتیێن دی یێن هه‌ین. مه‌ره‌ما من بۆچی من ئه‌ڤ چه‌نده‌ گۆت ب تنێ دا پیچه‌كا به‌راوردیێ بكه‌ین د ناڤبه‌را مه‌ و وان دا ل سالێن نوتان دا ده‌ما كو ئه‌و ده‌ربه‌ده‌ری وه‌لاتێ مه‌ بووین بۆ زانین هینگێ ئابلووقا ئابووری یا دژوار ل سه‌ر هه‌رێمێ بوو و خه‌لكێ هه‌رێمێ د كاودانێن خراب دا دژیا لێ نه‌بوونه‌ رێگر ل به‌ر ده‌م هاریكاریكرنا وان وه‌لاتیێن كورد ئه‌وێن ژ توركی ده‌ربه‌ده‌ربووین و قه‌ستا مه‌ كرین و ب دلسۆزی مه‌ خوارنا خوه‌ یا مالێ و نڤینێن خوه‌ پێشكێشی وان كرن بیرا مه‌ دهێت ترومبێل مه‌زن ل كولانا دگه‌ریان و سترانا (بیرا چه‌لێ ل بیرا وه‌بیت) ل سه‌ر وێ ترومبێلێ و خه‌لكێ مه‌ ل گوره‌ی شیانێن خوه‌ هه‌ر كه‌ره‌سته‌ك هه‌با پێشكێشی وان دكر و مه‌ وه‌كو وان نه‌كر تشتێ خوه‌ ل سه‌ر گران بكه‌ین و مه‌ هه‌میان ده‌رگه‌هێن مالێن خوه‌ بۆ ڤه‌كرن و حوكمه‌تا هه‌رێمێ ژی ژ لایێ خوه‌ڤه‌ كه‌مپه‌ك بۆ دورستكر و هه‌می پێدڤیێن ژیانێ بۆ به‌رده‌ست كرن لێ وه‌كو كتكێن چاڤنقن. قه‌نجی یا خرابه‌ ل گه‌ل وان بۆچی. ؟ كاودانێن ڤێ داویێ یێن كۆبانێ و ده‌ربه‌ده‌ربوونا وان بۆ تركیا و وئاسێبوونا وان ل سه‌ر سنۆرێ توركیا كو نه‌هێلان ده‌ربازی ئاخا توركیا بن ل ڤێره‌ هه‌ر كاره‌كێ حوكمه‌تا توركیا بكه‌ت خه‌لكێ باشۆر ب تایبه‌تی خه‌لكێ به‌هدینان یێ دهێته‌ گونه‌هباركرن و دبێژن ئه‌م پشته‌ڤانێن تركاینه‌، نموونه‌ ژی بۆ ڤێ چه‌ندێ ل جه‌ژنا قوربانێ نێزكی٣٠-٤٠ هزار كوردێن باشۆر ژ بۆ ئه‌گه‌رێن جودا قه‌ستا تركیا كربوون و پشتی په‌یدابوونا خۆنیشاندان و نه‌رازیبوونا خه‌لكێ باكۆر ل به‌رامبه‌ر بێ هه‌لویستیا حوكمه‌تا تركیا به‌رامبه‌ر كۆبانێ و ل ده‌مێ وه‌لاتیێن باشۆر د ڤه‌گه‌ریانه‌ هه‌رێمێ درێدا و ب تایبه‌تی ئه‌وێن ب ترومبێلین خوه‌ یێن تایبه‌ت دچوون دهانه‌ به‌ربارانكرن ژ لایێ كوردێن مه‌ یێن باكۆر ڤه‌، گه‌لۆ هوون چاوا ڤان كارێن درنده‌ به‌رامبه‌ر برایێن خوه‌ دكه‌ن هوون چ كتكێن چاڤ نقن و بۆچی ل شوونا قه‌نجیا ل هه‌وه‌ دكه‌ین سوپاسیا مه‌ بكه‌ین نه‌ك مه‌ به‌ر باران بكه‌ن.

د رۆژا جیهانێ یا شه‌كرێ دا په‌یامه‌كه‌ تایبه‌ت د ناڤبه‌را من و نه‌خۆشێن به‌لایا نه‌خۆشیا شه‌كرێ دا هه‌یین، هه‌كه‌ دستووری بیت ژ نۆشداران كو مایێ خوه‌ د پیشه‌یا وان بكه‌م، چونكو ئه‌ز ژی نۆشدارم ب گرۆڤه‌یا گۆتنا نۆشدارێن جیهانێ ده‌مێ دبێژن هه‌ر مرۆڤه‌ك نۆشدارێ خوه‌ یه‌!! مخابن ل ڤان داویان ئه‌ڤ نه‌خۆشیا شه‌كرێ رابوویه‌ سه‌ر خوه‌ و شیرێ خوه‌ راكریه‌ و گه‌له‌ك ژ خۆشتڤێن مه‌ داگیركرینه‌ و بۆ خوه‌ كریه‌ بوهار، لێ بلا ژبیر نه‌كه‌ت كو هه‌ر دینسزه‌كی حه‌یاسزه‌ك هه‌یه‌. له‌ورا هه‌كه‌ ناڤزراندن بیت ل وژدانا من، ئه‌ز دبێژم د شه‌ری دا گۆشتێ هه‌سپی ژی حه‌لال دبیت یانژی (شه‌ڕ خاپاندنه‌)!!
خۆشڤیێن من نه‌خۆشێن ئێشا (شه‌كرا نه‌ شرین) ژه‌هرا سپی: دێ ژ پێش نۆشدارێن شه‌كرێڤه‌ چه‌ند ئامۆژگاریێن ده‌روونی بایۆلۆژی سه‌مپتاوی ل ته‌ كه‌م، دا كو ڤێ شۆره‌شا ده‌خه‌س سه‌ركوت بكه‌ی و نه‌هێلی مه‌زنتر لێ بهێت و ئه‌و ترسا ته‌ ئه‌و بۆ خوه‌ بكه‌ته‌ خه‌ون، له‌ورا دبێژمه‌ ته‌ (سوكه‌ری) ملله‌ته‌كێ بێره‌وشته‌ د ناڤ خوینا ته‌ دا هه‌كه‌ تو ده‌سهه‌لاتداریه‌كا دلۆڤان لێ نه‌كه‌ی، دێ رابیته‌ سه‌ر خوه‌ و زیانێ گه‌هینته‌ هه‌می داموده‌زگه‌هێن له‌شی ته‌ وه‌كو داعشا ره‌نگز!!، نه‌مازه‌ ره‌هێن خوینا ته‌ و چه‌نده‌كێ یێ بێ ده‌لیڤه‌یه‌، هه‌كه‌ تو هه‌می خواسته‌كێن وی بۆ دابین نه‌كه‌ی دێ خیانه‌تێ ل ته‌ كه‌ت نه‌مازه‌ تو ده‌سهه‌لاته‌كا وه‌كو هه‌می ده‌سهه‌لاتانی ل وه‌لاتێن ده‌وروبه‌ر!!، زارۆیه‌كێ گه‌له‌كێ نازاندی یه‌ هه‌كه‌ تو مێژمێژۆكێ د ده‌ڤی را نه‌كه‌ی نا هێلیت تو بسته‌ بنڤی، ئه‌و دخوازیت تو خوه‌ بوه‌ستینی و تێكۆشانێ بۆ بكه‌ی خوه‌ برسی بكه‌ی، شه‌كر نه‌ ئه‌جنه‌یه‌كه‌ د ناڤ خوینا ته‌ دا كو ب عه‌زماندن و روقه‌یاتان بكه‌یه‌ ده‌ر!! لێ بۆ ڤێ چه‌ندێ من بۆخوه‌ سۆزه‌ك دایه‌ به‌رپه‌رێن رۆژناما ئه‌ڤرۆ كو ئه‌ز هاری هه‌وه‌ بكه‌م و ل گه‌ل هه‌وه‌ راوه‌ستم ل دژی ڤی درندێ شه‌كرێ، نه‌هێلم تو برسی ببی و نه‌مازه‌ ل ڤی چه‌رخێ زێرینێ حه‌مه‌ریێ!! هه‌ست پێ نه‌كه‌ی زكێ ته‌ یێ برسی بیت، كو ئه‌م هه‌می ل گه‌ل ڤان نه‌خۆشان و هه‌می نه‌خۆشێن دیتر ژی براوه‌ستێین و برینیێن وان ده‌رمان بكه‌ین، چونكو (لا یۆلم الجرح الا من به الالم.. ) یانكو هه‌ر كه‌س ژ مه‌ ل جهێ خوه‌ هاری نه‌خۆش و نۆشداران ژی بكه‌ت، بۆ سه‌هلكرنا پیڤاژۆیا نه‌خۆشان، یێ ل ناپێژیێ نانی دپێژیت بلا نانێ خوه‌ ره‌ش بكه‌ت و نه‌هلێت ل سرایێ راوه‌ستێت، كه‌سوكارێن وان بلا سه‌ره‌ده‌ریه‌كا نه‌رم و حه‌لین ل گه‌ل بكه‌ن، نه‌كو ب ده‌نگه‌كێ بلند و ب عه‌سكه‌رتای به‌رسڤا پسیارێن وان بده‌ین چونكو نۆشدارێن مه‌ (ته‌خسیریێ ناكه‌ن) هنده‌ نه‌خۆشان دنازینن كو ل ئه‌ورۆپا ژی وه‌سا نینه‌، چونكو نه‌ساخ ل رۆژئاڤا یێ عه‌زیزه‌ و ژ كه‌یفێن وی قه‌در و قیمه‌تا خه‌سته‌ دده‌تێ دا، های ژ نه‌خۆشیا خوه‌ نینه‌، یێن مه‌ ژی د وه‌سانه‌، نۆشدار ته‌مه‌تی نه‌ڤیێ نه‌خۆشیه‌كی یه‌ وێ سه‌ده‌ریا نه‌رم ل گه‌ل نه‌خۆشه‌كی دكه‌ت كو دزانیت ئه‌ڤه‌ مامۆستایه‌كه‌ و به‌ره‌باب ل بن ده‌ستی بووینه‌ وه‌زیرێن ساخله‌میێ و قایمه‌قام ل بن ده‌ستی ده‌رچووینه‌ ژ پێش سه‌رێ وی یێ سپی رادبنه‌ ڤه‌. هه‌كه‌ نه‌ هینگی نۆشدرا دێ بنه‌ ساخ و نه‌ساخ دێ بنه‌ نۆشدار!! چونكو هنده‌ك نۆشدارێن مه‌ دبێژن ئه‌م ژی به‌شه‌رین و ئه‌م دوه‌ستیێن بلا جاران ئه‌م ژی خوه‌ ل سه‌ر سه‌رێ نه‌ساخان تۆره‌ بكه‌ین. نها مژار ل دۆر وێ ئێكێ یه‌ كو شه‌كر نه‌بیته‌ (قدم السكری) و بڕین ـ به‌ته‌رـ كو نه‌خۆشترین چاره‌نڤیسه‌ نه‌خۆش ژێ دترسن و خودێ نه‌كه‌ت مالئاڤیكرن، به‌س مرن ب ده‌ستێ خودێ یه‌ و كاره‌ساتێن ژ نشكان ڤه‌ ژی هه‌نه‌ و عه‌داله‌تا مرنێ نه‌ یا گه‌نده‌له‌ و ژ مه‌ هه‌میان دگریت كورێ سه‌رۆكی و كوڕێ قه‌ره‌چی نانیاسیت! له‌وا هه‌كه‌ پارێزیا خوه‌ بكه‌م دێ شێم وی زارۆیێ نازك و شیم ل گه‌ل خوه‌ راكه‌م بێی زیانێ بگه‌هینته‌ من هه‌تا هه‌تایێ كو سه‌خبێریا خوه‌ بكه‌م و نه‌ك یا وی، بلا خانمێن نه‌ساخ پاقژیا پێن خوه‌ بكه‌ن و نه‌هێلن شه‌ق بكه‌ڤنه‌ بنێن پیێن وان ل هاڤین و زڤستانان گوره‌ ل به‌ر بن دا كول نه‌بن، بلا خه‌مێن دونیایێ نه‌كه‌نه‌ پشتی.

بۆچی ژ هه‌میان شه‌هید فاخر به‌رواری؟! راسته‌ هه‌موو شه‌هیدان جوداهی د ناڤبه‌رێ دا نینه‌، لێ ژ به‌ر كو شه‌هید عه‌قید. فاخر به‌رواری ئێك ژ كێم ئه‌ندامان بوو، ژ هه‌ر دو چووكان ڤه‌ و هه‌ریێ به‌رده‌وام بوو ل سه‌ر كارێ خوه‌، خزمه‌تا خوه‌ ل به‌ر سینگێ دوژمنان ئه‌نجامددا و ترس ل ده‌ف ڤی كه‌سی ب چو ره‌ نگه‌كی نه‌بوو، هه‌ژی هندێ یه‌ نه‌هێته‌ ژبیركرن، كو هێمایێن مینا وی كو ل جه‌م هه‌می ملله‌تان هه‌نه‌ و شانازیێ پێ دبه‌ن، ژ به‌ر وێ ئێكێ ئه‌م ل ڤێرێ بێژین و بینین په‌یكه‌ره‌كی ژ بۆی شه‌هیدێ قاره‌مان فاخر به‌رواری بهێته‌ دروستكرن و دانان ل نیڤا باژێرێ دهۆكێ، ژ لایێ حوكمه‌تا هه‌رێما كوردستانێ ڤه‌، كێمترین دلسۆزی یه‌ ل هه‌مبه‌ر دلسۆزیا وی بۆ ملله‌تێ وی، ئه‌ڤه‌ هزرا من و هه‌موو هه‌ڤالانه‌، هیڤیدارین هوون ل گه‌ل من بن ب هه‌ڤرا ئه‌م ده‌نگێ خوه‌ بلند بكه‌ین و په‌یكه‌ره‌كی بۆ شه‌هید فاخر به‌رواری پێشنیاز بكه‌ین.

دبیت گه‌له‌ك وه‌سا هزر یان شرۆڤه‌ بكه‌ن و بێژین هێشا زوویه‌ و ده‌مێ گونجای نینه‌ كو حوكمی ل سه‌ر ره‌فتار و هه‌لویست و هزرێن سه‌رۆك وه‌زیرێن نوویێ عیراقێ عه‌بادی بكه‌ین و پێدڤییه‌ هێشتا ده‌لیڤێ بده‌ینێ تاكو نیازێن وی زلالتر و دیارتر لێبهێن، لێ مه‌زنان چ بۆ بچووكا نه‌هێلایه‌ ده‌مێ دگۆت هندی خیاره‌ ژ تیتكی یێ دیاره‌، راسته‌ نه‌ ژمێژه‌یه‌ عه‌بادی ده‌ست بكاربووی راسته‌ گڤاشتنێن ناڤحوه‌یی و هه‌رێماتی و ده‌وله‌تی و ب تایبه‌تی یێن ویلایه‌تێن ئێكگرتیێن ئه‌مریكا ل سه‌ر ڤی زه‌لامی یێن هه‌ین كو نابیت هه‌مان شاشیێن مالكی بكه‌ت و پێدڤییه‌ نه‌خشه‌یه‌كێ رێكێ یێ ئاشكه‌را هه‌بیت بۆ چاره‌سه‌ركرنا سه‌رجه‌م كێشێن عیراقێ و ب تایبه‌تی ل گه‌ل هه‌رێما كوردستانێ و پێكهاته‌یا سوننی ل وه‌ڵاتی و ژبلی ڤێ چه‌ندێ گڤاشتنێن ره‌وشا خرابا ئێمناهیێ ب تایبه‌تی پشتی هاتنا گرۆپێ تیرۆرستیێ داعش و ده‌ست ب سه‌ر داگرتنا قه‌باره‌یه‌كێ مه‌زن ژ ئاخا عیراقێ كو گه‌له‌ك جاران گه‌فێن داعش گه‌هشتینه‌ وی ئاستی كو مه‌ترسیه‌كا ژدل ل سه‌ر عه‌بادی و حوكمه‌تا وی هه‌بیت ل ده‌ڤه‌را گرین زوون به‌لێ یا ئاشكه‌رایه‌ كو هزر و ئایدیولۆجیا ڤی براده‌ری هه‌مان هزرا هه‌ڤالێ وی یێ به‌ری مالكییه‌ و ئه‌ڤه‌ نه‌ تشته‌كێ نامۆیه‌ یان حێبه‌تییه‌ چونكی هه‌ردو ده‌رچووێن هه‌مان هزر و قوتابخانه‌ نه‌ ، ته‌كتیكا شێوازێ رێڤه‌برن و حوكمداریا وه‌لاتێ عیراقێ ل ده‌ڤ عه‌بادی ئه‌وه‌ كو یێ یاریه‌كا ب مه‌ترسی ل سه‌ر دو وه‌ریسان دكه‌ت كو ژ لایه‌كیڤه‌ په‌سنا رۆلێ پێشمه‌رگه‌ی و گرنگیا هه‌رێما كوردستانێ دكه‌ت ب ئاوایه‌كێ كو ئاشكه‌را نیفاقه‌كا سیاسیی یا سۆر ب سوره‌ و د به‌رامبه‌ر دا یێ گڤاشتنێن ده‌روونی ل گه‌ل حوكمه‌ت و گه‌لێ كوردستانێ دكه‌ت ده‌مێ كارتا بودجه‌ی و مووچێن خه‌لكی دكه‌ته‌ گه‌فه‌ك بۆ سه‌پاندنا سیاسه‌تا (ئه‌مر واقع) ل هه‌رێما كوردستانێ كو قه‌ناعه‌ته‌كێ بۆ خه‌لكی په‌یدا بكه‌ت هوون كیڤه‌ بچن چاره‌سه‌ریا وه‌ یا ل به‌غدا و ئێدی هه‌رێم نه‌شێت وه‌ بخودان بكه‌ت و خونیشاندانا دژی ده‌ستهلاتا خوه‌ بكه‌ن، هه‌لبه‌ت ئه‌ڤه‌ خه‌ونه‌كا مه‌زنه‌دبینیت چونكی ئه‌ڤ سیاسه‌تا كو نوكه‌ عه‌بادی په‌یره‌و دكه‌ت ب هه‌ڤكاریا هنده‌ك هه‌ڤالێن خوه‌ ل هه‌رێمێ چ گومان تێدا نین ندێ شه‌رمزار ی و شكه‌ستن به‌هرا وێ بیت پێدڤی بوو عه‌بادی مفایه‌كێ ئه‌رێنی ژ ره‌وشه‌نبیریا ئه‌وا ل وه‌لاتێ بریتانیا وه‌رگرتی كو نوكه‌ خودانێ ناسناما وه‌لاته‌كێ رۆژئاڤایه‌ و پیشه‌نگه‌ د دیمۆكراسیێ وه‌رگرتبا و قه‌ناعه‌ته‌كا ته‌مام بۆ په‌یدا ببا كو ئێدێ نه‌ما ئه‌و رو ژكو كورد بهێنه‌ خاپاندن یان په‌راوێزكرن چونكی هه‌كه‌ ته‌ماشه‌ی سیاسه‌تا نێده‌وله‌تی بكه‌ین و سه‌مت و ئاراستا نه‌خشه‌یێ سیاسی و ئێمناهیێ ل سه‌رانسه‌ری جیهانێ بێ كوردان و رۆلێ سه‌ركردایه‌تیا سیاسیا كوردستانێ و ب تایبه‌تی سه‌رۆك بارزانی برێڤه‌ناچیت و نوكه‌ چاڤدێرێن سیاسه‌تا هه‌رێمایه‌تی و ده‌وله‌تی گه‌هشتینه‌ باوه‌ریه‌كا تمام كو رۆلێ هه‌رێمێ ئه‌كتیڤتر و میحوه‌ری تره‌ ب تایبه‌تی د قووناغا نوكه‌ دا چونكی هه‌رێما كوردستانێ ب رێیا هێزێن پێشمه‌رگێ قه‌هره‌مان پێش هه‌می جیهانێ ل هێلا پێشیێ شه‌رێ تیرۆرێ دكه‌ت و هه‌ڤده‌م پێشمه‌رگه‌ی ب كریار سه‌لماندیه‌ كو تاكه‌ هێزه‌ شیایه‌ سه‌ركه‌فتنێن مه‌زن و به‌رچاڤ ل سه‌ر تیرۆرستێن داعش تومار بكه‌ن، ئه‌ڤجا پێدڤیه‌ عه‌بادی پێداچوون و چاڤخشاندنه‌كێ د هه‌لویستێ خوه‌ دا بكه‌ت ب تایبه‌تی ل به‌رامبه‌ر كوردان چونكی عه‌بادی پێنگاڤێن مه‌زن هاڤێتینه‌ بۆ ڤه‌گه‌راندنا مافێن سونێن عه‌ره‌بێن عیراقێ چونكی ئه‌و وه‌سا هزر دكه‌ ت كو چاكسازی ل به‌رامبه‌ر باده‌كێ سونان دێ ژ ڤه‌رێژا شاشیێن مالكی قورتال كه‌ت و دێ وێنێ حوكمه‌تا خوه‌ ل به‌رامبه‌ری جیهانێ پاقژكه‌ت و ئه‌ڤه‌ مه‌زنترین شاشیه‌ عه‌بادی بكه‌ڤیته‌ تێدا چونكی هه‌كه‌ عه‌بادی یێ رژد بیت و حه‌زا ب دوماهیك هاتنا كێشا ل سه‌رانسه‌ری عیراقێ هه‌بیت و باوه‌ریێ بخو په‌یدا بكه‌ت و جهێ خوه‌ خۆشكه‌ت پێدڤیه‌ بێ گیرۆبوون سه‌رجه‌م كێشێن هه‌لاویستی ل گه‌ل كوردان چاره‌سه‌ر بكه‌ت و ب تایبه‌تی كێشا بۆدجێ و موچێن فه‌رمانبه‌رێن هه‌رێمێ، هه‌كه‌ مالكی نیاز اوێ چه‌ندێ هه‌بیت بمینیته‌ د ده‌ستهله‌لاتێدا بۆ وی باشتره‌ شاشیێن مالكی دوباره‌ نه‌كه‌ت و گلۆپا كه‌سك ژ سه‌رۆك بارزانی و كوردان وه‌ربگریت چونكی ئه‌سته‌مه‌ ئێك حوكمی ب ئاوایه‌كێ سه‌ركه‌فتیانه‌ ل عیراقێ بكه‌ت بێ كو كورد و سه‌رۆك بارزانی ل سه‌ر رازی نه‌بن و پێدڤیه‌ ده‌ستهه‌لاتدار و سیاسه‌تمه‌دارێن به‌غدا په‌ند و سه‌ربۆران ژ دیرۆكێ وه‌ربگرن.