ل ده‌مێ سنێله‌یێ و ب تایبه‌ت ل سالێن نوتان، ده‌ما ل رۆژێن ئه‌ینی به‌رێ زۆربه‌یا خه‌لكێ دهۆكێ ژ زارۆ و گه‌نج و پیران دكه‌ته‌ مزگه‌فتان بۆ ئه‌داكرنا نڤێژا خوتبێ، پڕانیا مه‌لایێن مه‌ ل سه‌ر بلندگۆیا (منبر) ده‌ستێن مه‌ به‌رێڤه‌ی ئه‌سمانان دكرن و ب ده‌نگه‌كێ بلند هاوار و پارانه‌وه‌ و دوعا ژ خودێ ته‌عالا دكرن و دگۆتن: (اللهم أنصر أخواننا المجاهدین فی الشیشان)، نڤێژكاران ژی وه‌ك (دار دۆرا) خواندنا سه‌ره‌تایێ دگۆتن: ( ئامیییین). پشتی دوعا و پارانا مه‌ خودێ ته‌عالا قه‌بوولكرین و برایێن مه‌ یێن شیشانی بسه‌ركه‌فتین، ئه‌وان برایان، به‌رێ خوه‌ دا عێراقێ و مووسلێ، پاشی بۆ شنگال و دهۆك و مه‌خمورێ! لێ ئه‌ڤجاره‌ ل ژێر سیبه‌را ناڤێ داعش. ئه‌ڤێ جارێ ژی خودێ ته‌عالا دوعایێن مه‌ قه‌بوولكرن و ته‌یرێن ئه‌بابیلێن ئه‌مریكی و فه‌ره‌نسی د هه‌وارا مه‌ كوردان هاتن و نامووس و شه‌ره‌ف و ئاخا مه‌ ب هاریكاریا پێشمه‌رگێ قاره‌مان هه‌تا راده‌كێ باش پاراست. یا سه‌یر ئه‌وه‌ هه‌ر ل ڤان مزگه‌فتان هنده‌ك جاران دوعا ژ خودێ دهاته‌ كرن كو هه‌ر ئه‌ڤ ئه‌مریكی و فه‌ره‌نسیه‌ ژ ناڤبچن، نڤێژكاران ژی وه‌ك هه‌ر جار و بێی دو دلی وبێی كو بزانن كو ناڤه‌ڕۆكا دوعایێن وان چه‌ندا گرنگه‌ بۆ خودێ ته‌عالا، دگۆتن: (ئامییییین).
هه‌كه‌ ل وی ده‌می نڤێژكاره‌ك راببا سه‌ر پێن خو و گۆتبا مه‌ڵای: (بێ ده‌نگ به‌ و به‌س دوعا بۆ شیشانیان بكه‌)، ئه‌ز پڕ باوه‌رم دا ئه‌و نڤێژكاره‌ باش ل ناڤ مالا خودێ هێنه‌ قوتان و هه‌رچیا خرابه‌ دا ل سه‌ر بێژن!. لێ خۆزی ئه‌ز ئه‌و نڤێژكاربام، چونكو دا ئه‌ڤرۆ ببمه‌ كه‌سه‌كێ ژیر و تێگه‌هه‌شتی و دا ده‌ست بۆ وی كارێ منێ هینگێ هێنه‌ قوتان.
نوكه‌ ژی دێ خۆزیه‌كا دی كه‌م (هندی بیرا من دهێت ئه‌م یێن خۆزیان ڕادهێلین) و دێ بێژم خۆزی ئه‌ز شیابم نه‌ هێلێم ئه‌ڤ ساله‌ كه‌س بچیته‌ حه‌جێ!! ره‌نگه‌ ئه‌ڤ گۆتنه‌ گه‌له‌ك كه‌سان تۆڕه‌ بكه‌ت و ڤێجا ناڤ چاڤێن وان تێكبچن و تبلێن وان ل سه‌ر كیبۆردێ لاپتوپێ بكه‌ڤنه‌ كاری و په‌یڤێن كرێت ل دژی ڤێ گۆتنا من بڤه‌هینن كا چاوا ژه‌نیارێ جیهانی (یانی) ب تبلێن خوه‌ ل سه‌ر پیانۆیێ ئاوازان دژه‌نیت. هه‌لبه‌ت ژه‌نینا (یانی) بۆ ژیانێ یه‌ و ڤه‌هاندنا وان كه‌سان ژی بۆ ره‌خنه‌كا بێ هزر و بنه‌مایه‌.
ل ڤێرێ گرنگه‌ ره‌خنه‌گر به‌ری ده‌ست ب هێرشان بكه‌ن و ره‌خنه‌یێن دژوار ئاره‌سته‌ی ڤێ نڤسینێ بكه‌ن، ل گه‌ل من ب ئارامی بهێن هنده‌ك ژمێریاریان بكه‌ین و به‌راوردیا باردۆخێ ئه‌ڤرۆ یێ كوردستانێ بكه‌ین و تێڕوانینا شه‌رعێ خۆدێ ژی د گه‌لدا بیت، ئه‌ز پڕ باوه‌رم دێ ره‌خنا وی بیته‌ دووڤچوون و پاشی ده‌ست خۆشی. هه‌ر كه‌سه‌ك ژ هه‌رێمێ به‌ر ب مالا خودێ ته‌عالا ڕێ بكه‌ڤیت دڤێن ل ده‌ستپێكێ (4200000) دینار ئانكو (3400) دۆلارا بده‌ت، بۆ خوارنا رۆژانه‌ بۆ ماوێ هه‌یڤه‌كێ ب كێمی دڤێن (200) دۆلاران خه‌رج بكه‌ت، هه‌ر وه‌سا خه‌رجكرنا (100) دۆلار بۆ هه‌ر قوربانه‌كی كۆ دڤێن بده‌ت و نێزیكی (600) دۆلاران بۆ كرینا دیاریا دهێنه‌ خه‌رج كرن، سه‌رجه‌مێ گشتی یێ خه‌رجكرنا هه‌ر حه‌جیه‌كی دگه‌هیته‌ نێزیكی (4300)دۆلار. ژمارا حه‌جیێن ئه‌ڤ ساله‌ ژ كوردستانێ چووینه‌ مالا خۆدێ ته‌عالا دگه‌هیته‌ (3500- 4000) كه‌سان، هه‌كه‌ ئه‌م ژمارا كێمتر (3500) وه‌رگرین و لێكبده‌ین ل گه‌ل سه‌رجه‌مێ خه‌رجكرنێ كۆ (4300) دۆلارن دێ ده‌رئه‌نجام بیته‌ (15050000) دۆلار، ئانكۆ پانزده‌ ملیۆن و پێنجی هزار دۆلار، هه‌لبه‌ت ئه‌ڤه‌ ب كێمی.
پسیار: دێ ب ڤی گۆژمه‌ی چه‌ند كه‌مپ بۆ ئاوارا دروست بن؟ یان دێ چه‌ند قوتابخانه‌ هێنه‌ ئاڤاكرن؟ دێ چه‌ند قوتابی شێن خواندا بلند ل ده‌رڤه‌ی وه‌لاتی پێ ده‌رباز كه‌ن؟ چه‌ند كێشێن كۆمه‌ڵایه‌تی دێ پێ هێنه‌ چاره‌سه‌ركرن؟ چه‌ند پر و جاده‌ و كارێن خزمه‌تگوزاری هێنه‌ ئاڤاكرن؟ مووچێ چه‌ند پێشمه‌رگان دێ پێ هێنه‌ دابینكرن؟.. .. . هتد.
ژ لایێ شه‌رعیڤه‌، هه‌كه‌ ئه‌زێ شاش نه‌بم، باشتربوو هه‌كه‌ ئه‌ڤ پاره‌ بۆ ناڤخوه‌یا كوردستانێ هاتبا خه‌رجكرن دا هه‌مان خێر گه‌هیته‌ حه‌جیان هه‌كه‌ نه‌ زێده‌تر. ره‌نگه‌ هه‌ر نه‌ یا دروسته‌ كه‌سه‌ك سه‌ردانا مالا خۆدێ ته‌عالا بكه‌ت و ده‌وروبه‌رێن وی ژ كه‌سوكاران، گوند و هه‌ڤده‌را پێدڤی هاریكاریا مادی بن.
هیڤیدارم كه‌س خه‌له‌ت ل من نه‌گه‌هیت، چونكو مه‌به‌ست ژ ڤێ نڤیسینێ ئه‌و نینه‌ به‌رێ خه‌لكی ژ چوونا حه‌جێ سار بیت، به‌لكۆ هیڤیدارم ل پاشه‌رۆژێ خودێ ب رزقێ مه‌ژی بكه‌ت، لێ ژ به‌ر كاودانێن رۆژه‌ڤا كوردستانێ، ب دیتنا من دا باشتر بیت هه‌كه‌ ئه‌ڤ ساله‌ حه‌ج هاتبا پاشخستن بۆ سالێن بهێن. گومان تێدا نینه‌ حه‌جیێن مه‌ ئه‌ڤ ساله‌ ل به‌ر به‌رێ ره‌ش گه‌له‌ك دوعا بۆ گه‌لێ كوردستانێ و پێشمه‌رگه‌ی یێن كرین و دلسۆزیا خوه‌ بۆ خودێ و كوردستانێ یا دوپاتكری، هیڤیه‌ خودێ ته‌عالا دوعایێن هه‌میان ئه‌رێ بكه‌ت.

یا به‌رچاڤه‌ و ناهێته‌ ڤه‌شارتن كو د نێڤبه‌را پارت و لایه‌نێن سیاسی یێن كوردستانی دا، ده‌رزه‌كا ئێكجار مه‌زن درۆست بوویه‌، به‌لكو دێ كارین بێژین ده‌رزا هه‌نێ یا بوویه‌ دۆله‌كا مه‌زن هه‌می لایه‌نێن نه‌یار چ ل سه‌ر ئاستێ نێڤخوه‌یێ یان ده‌ره‌كی بن، دێ كارن ب ئاسانی كارێ خوه‌ تێدا بكه‌ن و پیلان و پرۆژه‌كتێن خوه‌ بجهبینن و رێڤه‌ببه‌ن، ئه‌ڤێ چه‌نده‌ كارتێكرن كریه‌ سه‌ر هه‌ستا پابه‌ندبوونا نه‌ته‌وی و ژ جیاتی ل با تاكه‌كه‌سێ كورد ده‌مارگیریا نه‌ته‌وی هه‌بیت، ده‌مارگیریه‌كا حزبی هه‌یه‌ و له‌وما هێزێن كوردی هه‌ر ب هه‌ڤركیێن نێڤخوه‌یی ڤه‌ د مژوولن و كێمتر پووته‌ی ب لایه‌نێ ده‌ره‌كی بده‌ن.
ئه‌ڤ چه‌نده‌ دیارده‌كا نوو نینه‌، به‌لكو ب درێژه‌هیا دیرۆكێ ئه‌ڤ نه‌ساخی یه‌ د له‌شێ كوردان دا هه‌بوویه‌ و ئه‌نجام ژی كاره‌سات و تراژیدیێن مه‌زن بووینه‌، دیسا دێ كارین بێژین كوردان نه‌ دیرۆك نه‌خویندیه‌، نه‌ یا خوه‌ و نه‌ یا گه‌ل و نه‌ته‌وێن دی و مفا ژ سه‌رهاتی و بۆیه‌رێن به‌رێ وه‌رنه‌گرتیه‌، هه‌كه‌ وه‌ها نه‌بیت چما كورد نه‌شیاینه‌ بگه‌هنه‌ وێ راستیێ كو ب تنێ هێز و سه‌نگیا كوردان د ئێكرێزی مالا وان و هه‌ڤگرتنا وان دا یه‌؟
ئێكگرتنا مالا كوردی یا بوویه‌ درۆشمه‌كێ هه‌تا هه‌تا یێ، ب ڕامانا ئه‌ڤ درووشمه‌ هه‌ر دێ مینیت و چ جاران ناهێته‌ جێبه‌ جێكرن، دێ هه‌ر مینیت گۆتنه‌ك و د هه‌لكه‌فتان دا وه‌كو ته‌یسۆكه‌ك هێته‌ بڵندكرن.
هه‌ر ملڵته‌ك دیرۆكێ نه‌خوینیت و مفای ژێ وه‌رنه‌گریت دێ مینیت ملڵته‌ك ساڤا و نه‌ یێ هه‌ڤگرتی، هه‌لبه‌ت نه‌ هه‌ڤگرتنا كوردان و نه‌ كۆمبوونا وان ئه‌گه‌ر و سه‌ده‌مێن خوه‌ هه‌نه‌، لێ هه‌تا نها تۆێژه‌ره‌ك و ڤه‌كۆله‌ره‌كێ جڤاكی یان چاڤدێره‌كێ سیاسی نه‌شیایه‌ ب دروستی ئه‌ڤان سه‌ده‌م و ئه‌گه‌ران و ب ئاوایه‌كێ زانستی و ب وێرانه‌ تێز بكه‌ت، هه‌ر هه‌موو ئه‌ڤێ داخوازێ دووباره‌ دكه‌ن و ته‌كه‌زێ ل سه‌ر گرنگی و هه‌ستیاریا وێ هه‌ڤگرتنێ دكه‌ن، لێ چما درووشم و داخوازا هه‌نێ ناهێته‌ بجهئانین؟!
نها كورد د قووناغه‌كا مه‌ترسیدار دا ده‌رباز دبن، نه‌ ب تنێ هێرشا چه‌تێن گرۆپێ تیرۆرستێ ل سه‌ر مه‌ كوردانه‌ و هه‌ر كه‌سێ هزر بكه‌ت داعش وه‌كو گرۆپه‌كێ تیرۆرست ب تنێ په‌له‌مارا كوردستانێ دكه‌ت یێ شاشه‌، ل پشت داعش كۆمه‌كا ده‌وله‌تان هه‌نه‌ و به‌رییا هه‌میان ئه‌و ده‌وله‌تێن كوردستان داگیركری و هه‌ست دكه‌ن ئه‌ڤ ئه‌زموونا ل كوردستانا باشۆر هه‌ی میناكه‌كه‌ نه‌ ب تنێ نابیت ل پارچه‌یێن دی یێن كوردستانێ دوباره‌ ببیت به‌لكو ئه‌ڤ ئه‌زموونه‌ پێدڤی یه‌ ب هێته‌ هه‌رفاندن و ل رۆژئاڤا نابیت ببیته‌ دیفاكتۆ.
كورد هه‌تا نها د قووناغا به‌ر ب نه‌ته‌وه‌بوونێ دا نه‌، هه‌تا نها گشت فاكته‌رێن ب نه‌ته‌وه‌بوونێ جهگیر نه‌بووینه‌، ژبۆی ئه‌ڤی ئارمانجی پێدڤی یه‌ ئه‌مێن كورد ببینه‌ خودان به‌رنامه‌كێ درێژخایه‌ن و به‌ریا هه‌ر ئه‌ركه‌كی پێدڤیه‌ لایه‌نێن سیاسی یێن كوردستانی كار بكه‌ن ژبۆی بنبركرنا ئه‌وان ده‌رزێن دنێڤبه‌را وان دا هه‌ین و باوه‌ری و متمانه‌ د ناڤبه‌را وان دروست ببیت، نه‌ بوونا باوه‌ریێ د ناڤبه‌را پارت و لایه‌نێن سیاسیێن كوردی دا بوویه‌ سه‌ده‌ما نه‌جهگیربوونا هزرا نه‌ته‌وی د هشێ تاكه‌كه‌سێ كوردستانی، دیسا ڤالاتیه‌كا هزری به‌رچاڤ دروست دكه‌ت، چونكو هه‌ر ئالیه‌ك ته‌كه‌زێ ل سه‌ر گۆتارا خوه‌ دكه‌ت و خوه‌ ب تنێ ب خودانێ راسته‌قینه‌یێ دۆزێ دزانیت و ب چاڤێ گۆمانێ ته‌ماشه‌ی یێن دی دكه‌ت، له‌وما فه‌ره‌ نها ته‌كه‌زی ل سه‌ر گۆتارا نه‌ته‌ه‌ویا هه‌ڤگرتی بهێته‌كرن و ل ژێر چه‌ترا ئه‌ڤێ گۆتارا گشت جوداهیێن سیاسی بهێنه‌ پاشگوكرن.

نێزیكه‌ سێ هه‌یڤێن حوكمه‌تا هه‌رێمێ و حوكمه‌تا ئاغایێ عه‌بادی به‌ر ب خلاسبوونێ ڤه‌ دچن، ئه‌ڤه‌ نه‌ ئێكه‌مین حوكمه‌ته‌ و نه‌ دووماهیك حوكمه‌ته‌ ژی كو نه‌ڤییایه‌ و نه‌ڤێت ژی، سیسته‌م و ره‌وشتێ پراگماتیكی د سیاسه‌تا ده‌وله‌تمه‌داریا رێڤه‌برنا عیراقێدا بنبڕ بكه‌ن. ڤه‌هێلان و پاشخستنا كریز و قه‌یرانان و چاڤنقاندن ل نه‌خشه‌رێكا چاره‌سه‌ریان و په‌نجكرنا نه‌ساخیێن دومدرێژ، بێگومان به‌رژه‌نگێن مینا هۆڤانیه‌تا داعشان و ده‌ستتێوه‌ردانێن ده‌ره‌كی و هه‌لوه‌شین و كه‌ركه‌ربوونا ناڤخۆیی بخوه‌ڤه‌ دگریت. عیراق وه‌كی حوكمه‌ت نه‌ ده‌وله‌ته‌ك هند كه‌ڤنار و خودان ئه‌زموونه‌ د بیاڤێ سه‌ربخوه‌یا رێڤه‌برنێدا، به‌لكی د هه‌ر سه‌رده‌مه‌كێ دا ژ ئالێ ڕاسپارده‌ و وه‌ڵاته‌كێ بیانیڤه‌ هاتیه‌ سه‌رپه‌رشت كرن، له‌وڕا هه‌تا نها ژی نكاریت ل بن سیبه‌را وێ ژێرده‌ستكرنێ ده‌ركه‌ڤیت. عیراق ده‌وله‌تا شیره‌تكار و شێوه‌دارانه‌ و ل چ ده‌م و سه‌رده‌مان د چارچووڤێ ئه‌ڤێ نیمچه‌ ده‌وله‌تێدا چ ئاریشه‌ و كریز و قه‌یران و دۆز نه‌ هاتینه‌ چاره‌سه‌ركرن و ناهێنه‌ چاره‌سه‌ركرن. به‌لكی خاپاندن و سه‌ردابرن و توڵڤه‌كرن باشترین و جوانترین سیما و ڕوومه‌تێن پڕۆسه‌یا سیاسی بوونه‌ د درێژاییا دیرۆكا وێ دا، ب راستی ئه‌ڤه‌یه‌ كریزا كریزان، ئه‌ڤه‌یه‌ مه‌زنترین ئاڵوزیێن گه‌لێن عیراقێ، نه‌خاسمه‌ گه‌لێ كورد كو زێده‌تر ژ 35% ێ ژ پێكهاته‌ێ گه‌لێن عیراقێ پێكدئینیت و هه‌تا نها ژی د ناڤبه‌را ناڵ و بزمارێن هه‌رێمبوون و جودابوونێ دا مژوولی شه‌رێ دبلوماسیه‌تیا ده‌وله‌تبوون و پاراستنا ئاخ و هه‌لوه‌شاندنا سنۆرێن ئیمپراتۆرییه‌تێن پراگماتیكیه‌. ده‌مێ دیوارێ شكۆمه‌ندێ به‌رلینێ ل نۆڤه‌مبه‌را 1989ێ هاتیه‌ هه‌ڕفاندن كو درێژاهیا وێ 150ی كم بوون و بهایێ چێكرنا وێ 150ی ملیۆن دۆلار بوون، هه‌ردوو ئه‌ڵمانیا، رۆژهه‌ڵات و رۆژئاڤا، بوون ئه‌ڵمانیا ئێكگرتی، چ هاووڵاتیه‌ك نه‌ ل رۆژهه‌ڵات و نه‌ ل رۆژئاڤا، نه‌ ماركسیسته‌ك، نه‌ سه‌رمایه‌داره‌ك، نه‌ هاتن سزادان و چ قانون و پرۆسێن ڤه‌كوڵین و دادوه‌ری و ده‌رخستنا وه‌ڵاتیان نه‌ هاتنه‌ پیاده‌كرن، به‌لكی ته‌ڤایا سیاسه‌تمه‌دار و وه‌زیر و سه‌ركرده‌ و فه‌رمانده‌ێن له‌شكری و رێڤه‌به‌رێن رۆژهه‌ڵات و رۆژئاڤا بۆ ده‌وله‌تا ئێكگرتی سه‌رێ خوه‌ چه‌ماند و ل هه‌مبه‌ر زڤرینا ئه‌ڵمانیا بو ئێكگرتن و ئێكبوونێ دلسۆززیا خوه‌ راگه‌هاند و چ سیاسیه‌كێ سه‌رمایه‌دار ب ده‌ستێ كومۆنیسته‌كێ نه‌هاته‌ سزادان و به‌روڤاژی ژی. ئه‌ڤ نمونه‌یا ته‌كنیكی و په‌یوه‌ندییا ویژدانی دناڤبه‌را دیوارێ به‌رلینێ و هه‌رفاندنا سنوری دناڤبه‌را باشور و رۆژهه‌ڵاتێ كوردستانێ، ئه‌زمونه‌كا گیانێ نه‌ته‌وه‌یێ هه‌ڤپشك نیشا مه‌ دده‌ت و په‌یاما لێبۆرین و پێكڤه‌ژیان و نووبوونێ رادگه‌هینیت. باوه‌ڕبكه‌ن حوكمه‌تا شیعه‌ مه‌زهه‌با (عه‌بادی) و زۆربه‌ی عه‌ره‌بێن عیراقێ ئیرۆ، دبێژن: هه‌تا كه‌نگی سه‌رۆك كۆمار دێ كورد بیت، وه‌زیرێن سه‌روه‌ری كوردبن. . سه‌فیرێن ووه‌ڵاتێن گرنگ كورد بن. گرنگترین كۆچه‌ و ده‌ڤه‌رێن به‌غدایێ كورد داگیربكه‌ن و ل په‌رله‌مانێ به‌غدا كورد هاشوهوشێ ل سه‌ر عه‌ره‌بان بكه‌ن. كه‌نگی ئه‌ڤ په‌یوه‌ندیه‌ ل گه‌ل كوردان دێ ب دووماهی هێت؟!! چونكی هه‌می وێرانی و موسیبه‌ت و ئاریشه‌ هه‌ر ل كه‌ڤنار دا ژ پێخه‌مه‌ت كوردان ب سه‌رێ مه‌دا هاتیه‌. . عیراق وێرانكرن. . ئان پێدڤیه‌ هه‌ر وه‌كی سه‌رده‌مێ سه‌دام ل گه‌ل مه‌ بژین، ئانكو پێدڤیه‌ ل مه‌ جوداببن. كه‌ واته‌ چاوا ئه‌م كورد وه‌كی ملله‌ته‌ك پێكۆڵا ده‌وله‌تبوونێ دكه‌ین، وه‌سا ژی عه‌ره‌ب و ده‌وروبه‌ر ب هه‌ڤڕا كۆنگره‌یا ئارامبه‌خشیا كوردان گرێدده‌ن و پاراستیمۆلا بێده‌نگیێ دابه‌ش دكه‌ن.