دھۆک، ئەکرەم ئیبراھیم:
دھێتە چاڤەرێکرن ئەڤرۆ سپێدێ 30\10\2014 ب ئامادەبوونا دەرباز عەبدوللا وەزیرێ ئاڤاکرن و ئاکنجیکرن و رێک و پرا و فەرھاد ئەترووشی پارێزگارێ دھۆکێ ھەردو لایێن تونێلا گەلیێ زاخۆ بگەھنە ئێک و کارێ کونکرنا تونێلێ ب دووماھی بھێت.
د داخویانیەکێ دا ئەندازیار ئەمین حسێن رێڤەبەرێ گشتیێ رێک و پرا و ئاڤاکرن و ئاکنجیکرنێ ل پارێزگەھا دھۆکێ دیار کر پشتی ب دووماھی ھاتنا کارێ کولانا ئاخێ ل تونێلا گەلیێ زاخۆ ئەڤرۆ ب ئامادەبوونا وەزیرێ ئاڤاکرن و ئاکنجیکرن و رێک و پرا و پارێزگارێ دھۆکێ ھەردو لایێن تونێلا گەلیێ زاخۆ دێ گەھنە ئێک و کارێ کولانا ئاخێ و کونکرنا تونێلێ دێ ب دووماھی ھێت و گۆت “کارێ کونکرنا تونێلێ بێ ئاریشە و ئاستەنگێن جیولۆجی و 100 % سەرکەفتیانە ب دووماھی ھات”.
ھەژی گۆتنێ یە پرۆژە ژ دو تونێلا پێک دھێت و درێژاھیا ھەر تونێلەکێ 3,600 کم و 160 ملیار دینار ژ لایێ حوکمەتا ھەرێمێ ڤە بۆ ھاتینە تەرخانکرن و ھەتا نوکە رێژا بحھئینانێ گەھشتیە 35% و ل 20\4\2013 دەست ب پرۆژەی ھاتیە کرن و ماوێ پرۆژەی 30 ھەیڤن و دھێتە چاڤەرێکرن دووماھیا ھەیڤا گولانا سالا بھێت بکەڤیتە د خزمەتا وەلاتیان دا.
ئەڤرۆ نیۆز:
ئەیۆب رەمەزان رێڤەبەرێ گشتیێ رەوشەنبیری و ھونەری ل دھۆکێ دیارکر وەک شاندەکێ وەزارەتا رەوشەنبیری دچارچووڤێ وەرگرتنا فلمەکێ کوردی دا ل فیستەڤالا ھەشتێ یا فلمان ل (ئەبو زەبی) ل ئیماراتێ کو ب فلمێ (بیرھاتنێن سەر بەری) یێ دەرھێنەر (شەوکەت ئەمین کورکی) یێ گرێدایی ب ھەوا ئەنفالان ڤە و تایبەت ل دەڤەرا بەھدینان.
رێڤەبەرێ گشتی ئاشکراکر کو فلمێ ناڤبری بەریکانە ل گەلەک فلمێن مەزنێن جیھانێ دکەت کو ھندەکا خەلاتێن ئوسکار برینە ئەڤە تشتەکێ مەزن بوو بۆ سینەما کوردی.
ناڤری دیارکر کو دفیستەڤالێ دا کورتیەک ل سەر فلمی ھاتەبەحسکرن، پشکەکا فلمی ل سەر کێشێن سینەما کارا ھاتبوو چێکرن، گەلەک بینەرێن فلمی ژ عەرەبان و ژ کەسێن ناڤدارێن جیھانی دبیاڤێ سینەمایێ دا حێبەتی بوون و رۆندک ژ چاڤان دھاتنە خوارێ.
ئەیۆبی خواست ژی، پالپشتیا سینەماکارێن کورد بکەت و قانوونەک ل پەرلەمانی دەرکەڤیت بۆ سینەمایێ وبچیتە کەرتێ تایبەت و حوکمەت پشتەڤانیا کۆمپانیان بکەت، چونکی سەرکرداتیا ڤێ کریارێ دکەین و یا شاشە و دانپیدانێ پێ دکەم، ھێشتا گۆت: پەیاما سینەمایێ گەلەک مەزنترە ژ پەیاما سیاسەتێ و دەرھێنەر و سینەماکار گەلەک ژ بالیۆزەکی مەزنترە و رۆلێ سیناماکارەکێ باش ژیێ سەرکردەکی مەزنترە و کارتێکرن پێترە و ڤی فلمی رەنگڤەدانەکا مەزن ب خوەڤەگرت.
رێڤەبەرێ گشتی ھێتا گۆت: ھەتا نوکە ئە فلمە ژ(١٨) فیستەڤالان ھاتیەوەگرتن و پەیامەکا جوان ھەیە، رێڤەبەرێ گشتی پشتەڤانیا خوە ژی دیارکر کو گەنج ژ فلمێن کورت دەست پێ بکەن … ناڤبری گرنگی ل سەر چێبوونا پەیوەندیان کر دناڤبەر ھەرێمێ و سیناماکارێن جیھانی دا، دیسا خواست رۆژنامەڤانیا کوردی گرنگیێ ب سیناماکاران بدەت.
ئەڤرۆ:
بو پشکداریا ھەلبژارتیێ عیراقێ د قارەمانیا کاسا کەنداڤی یا 22 دا و دیسان کاسا نەتەوێن ئاسیا ئەوا بریارە ل وەلاتێ ئوسترالیا بھێتە کرن جڤاتا وەزیرێن عیراقێ بریار دا ب مەزاختنا کوژمێ ملیارەک و 500 ملیون دیناران و زێدەتر کێشەیێن دارای یێن ھەلبژارتیێ عیراقێ بھێنە جارەسەرکرن.
ل دور خەرجکرنا ڤی کوژمێ مەزن وەزیرێ وەرزش و لاوێن عیراقێ عەبدولحسێن عەبتانی راگەھاندیە ئەف کوژمێ پارەی ژبو وێ چەندێ یە ب باشترین شێوە بەھەڤیا ھەلبژارتیێ عیراقێ بو ڤان ھەردو قارەمانیان بھێتە کرن و ئەو کێشێن بەری نوکە ھەین بھێنە جارسەرکرن.
زێدەتر ناڤبری ئەو چەندە ژی راگەھاندیە کو بریار ھاتیە دان ژلایێ سەروک وەزیران کو لژنەک بھێتە پێکئینان د ناڤبەرا وەزارەتا وەرزش و لاوان و لژنا ئولوپی یا عیراقێ و چەند وەزارەتیێن دی پێخەمەت بەرھەڤکرنا راپورتان ل دور پروژێ وەرزشی یێ باژێرێ بەسرا و ب دووماھی ھاتنا پروژەی داکو بشێن قارەمانیا کاسا کەنداڤی یا 23 مێڤان بکەن و زێدەتر باوەریا ئێکەتیا ئاسیا ب دەستڤە بینن بو ھەر قارەمانیەکا نێڤدەولەتی و ھەرێمی.
ئەڤرۆ، بارزان مزوری:
سەرۆکێ بنگەھێ لاش تایێ سنوونێ بۆ رۆژناما ئەڤرۆ دیار کر کو ل دووڤ ئامارەکا بنگەھێ وان کو ل دۆر ئێزدیێن ل ناحیا سنونێ ھاتینە کوشتن و رەڤاندن ھاتیە بەرھەڤکرن دیار بوویە کو 83 کەس ب دەستێن داعش ھاتینە کوشتن و 845 کەس ژی ھاتینە رەڤاندن.
سلێمان فانۆ سەرۆکێ بنگەھێ لالش تایێ سنوونێ دیار کر کو نڤیسینگەھا لالش تایێ سنوونێ دگەل نڤیسیگەھێن تایێ لالش ئامارەکا تایبەت دروست کریە و ل گۆر دووماھی ئەنجامێن ئامارا وان 83 کەس ژ زارۆک و ژن و زەلامان ھاتینە کوشتن و 845 کەس ژ ژن و کچ و زارۆک زەلام ھاتینە رەڤاندن و گۆت “ژ وان کوشتی و رەڤاندیان 420 کەس یێن گوندێ حەمدانیێ نە کو کوردێن ئیزدینە، ب ئاوایەکی 150 ھزار کوردێن ئێزدی ل ناحیا سنونێ و کۆمەلگەە و گوندێن سەر ب ناحیێ ڤە ئاکنجینە و ھەشت ھزار عەرەب لێ ئاکنجینە”.
دھۆک، لەزگین جۆقی:
رێڤەبەرێ ناحیا زومار بۆ ئەڤرۆ دیارکر کو ھێشتا دەواما ئاسایی ل دام و دەزگەھێن ناحیا زومار دەست پێ نەکریە، چونکو وان وەکو رێڤەبەرێ ناحیێ و جڤاتا ناحیێ خوە ئاماکرن داکو ل زومار دەست بکاری خوە بکەن، بەلێ ژ بەر کو داعش گەلەک تی ئێن تی داناینە، ئەو ژ لایێ پێشمەرگەی ڤە ھاتنە ھایدار کرن کو نوکە سەرەدانا زومار نەکەن ھەتا تیمێن ئەندازیاریا لەشکەری کاری خوە دکەن.
موزاحم سەعدون رێڤەبەرێ ناحیا زومار گۆت ژی داعش ھەموو خزمەت گوزاریێن دەڤەرا زومار تێکداینە وەکو جادە و کارەب و ئاڤ و پشتی زومار ژ دەستێن داعش ھاتیە رزگار کرن ھزر د ئاڤاکرنا وێ دا ھاتە کرن و نوکە چەندین دەزگەھێن خزمەتگوزاری ل پارێزگەھا دھۆکێ سەرەدانا وێ دکەن بۆ چیکرنا پرۆژێن خزمەتگوزاری.
رێڤەبەرێ ناحیا زومار ئاشکرا ژی کر کو داعش گەلەک زیان گەھاندینە زومار لێ ھیشتا ئامارێن دروست دیار نەبووینە کا ب کۆژمی چەندێ زیان گەھاندینە زومار، بەلێ پشتی دەست بکاری خوە دکەن و خەلکێ زومار ڤەدگەرنە سەر مالێن خوە دێ ئامارێن ھوور ئاشکرا بن کا چ زیان گەھشتیە وێ دەڤەری.
ئەڤرۆ:
رۆژناما واشنتۆن پۆست یا ئەمریکی د راپۆرتەکا خوە دا ئاماژە ب ڤێ یەکێ دکەت تنێ ھێزا کو شیا دربێن کوژەک ل تیرۆرستێن داعشێ بدەت پێشمەرگە بوون و ژ بەر وێ یەکێ ژی باراک ئۆباما سەرۆکێ ئەمریکا د کۆمبوونەکێ ل گەل شیرەتکارێن خوە دیار کریە کو دڤێت ئەم چەکێن گران بدەینە کوردان دا ئەو بشێن باشتر شەرێ داعشێ بکەن و تشتا کو لەشکرێ دو وەلاتان نەشیا بکەت پێشمەرگەی کوردستانێ ب چەکێن سڤک ئەو کارە ئەنجام دایە.
ل ئالیێ دی ئاژانسا رویترز یا نووچەیان ژی د راپۆرتەکێ دا ئاماژە ب ڤێ یەکێ دکەت کو ئەمریکا باش ئەو یەک دیتیە کو ھەڤپەیمانێن وێ یێن بەرێ ئێدی ب ئەرکێ خوە رانابن و ژ بەر وێ یەکێ ژی دێ بنگەھێن خوە یێن سەربازی ل ھەرێما کوردستانێ دروست کەت و شیرەتکارێ ئۆباما د چەندین کۆمبوونان دا بۆ وی دیار کرینە کو ئێدی چو کاریگەریا بنگەھێ سەربازی یێن ئینجیرلیک ل تورکیا نەمایە و دڤێت ئەو بنگەە بۆ ھەرێما کوردستانێ بھێتە ڤەگوھاستن و ژ بەر وێ یەکێ ژی ئێدی ئەمریکا وەک بەرێ سەرەدەریێ ل گەل کوردان ناکەت و کوردان وەک ھەڤپەیمانێ خوە یێ ستراتیژی دبینیت.
د پشکەکا دی یا راپۆرتێ دا ھاتیە کو چوونا مەسعود بارزانی سەرۆکێ ھەرێما کوردستانێ بۆ بەرەیێن شەری ئەو یەک نیشا ھەموو جیھانێ دایە کو سەرۆکێ کوردستانێ وەک سەرۆکێ عیراق و سووریێ نینە و ئەو ھێشتا وەک پێشمەرگەکێ بەرھەڤە جانێ خوە گوری ئاخا وەلاتێ خوە بکەت و وێ یەکێ ژی کاریگەریەکا مەزن ل ھەلویستێ سەرۆکێ ئەمریکا و وەلاتێن دی یێن ئورۆپا کریە و ژ بەر وێ یەکێ ژی نھا ئەو گەنگەشە ل سەر وێ یەکێ دکەن کو چەکێن گران بدەنە کوردستانێ.
ئەڤرۆ، سالار دۆسکی:
بریادەرا لژنا دارایی و ئابووری ل پەرلەمانێ کوردستانێ دیارکر کو نوکە مژوولی راستەڤەکرنا قانوونا خانەنشینێ نە ل ھەرێمێ، چونکو ھەکە ل بەغدا چوو د بیاڤێ بجھئینانێ دا، دا ل ھەرێمێ ژی بھێتە بجە ئینان.
ھیڤا حاجی میرخان بریاردەرا لژنا دارایی و ئابووری ل پەرلەمانێ کوردستانێ بۆ رۆژناما ئەڤرۆ ھەروەسا گۆت ل سالا ٢٠٠٣ راستڤەکرنا قانوونا خانەنشینێ و مووچان ل بەغدا ھاتبوو کرن، راستەڤەکرنا نوکە د قانوونا خانەنشینێ دا بەرھەڤینە چونکو ھەکە ل بەغدا ھاتە پەسەند کرن دا ل ھەرێما کوردستانێ ژی بھێتە پەسەند کرن و خانەنشینێن کوردستانێ ژێ بێ بار نەبن.
ھیڤا حاجی گۆت ژی پێشمەرگە وەکو خانەنشین د قانوونا بەغدا دا نەھاتیە نیاسین، نوکە لژنا دارایی پەرلەمانێ ھەرێمێ کار دکەت کو د ناڤ قانوونێ دا خالەک بۆ پێشمەرگێ خانەشین بھێتە زێدەکرن، چونکو ھەکە ئەڤ قانوونە بھێتە پەسەند کرن خانەنشینێن ١٩٩١ ھەتا ٢٠٠٣ کو نوکە زەڕەرەکا مەزن ڤێ کەفتیە دێ مفاداربن ژ بریارێ.
ئەڤرۆ، رەمەزان رێکانی:
زانکۆیا دھۆک بۆ سالا نوو یا خواندنێ چەند پشکێن نوو یێن زانستی ڤەکرن ژ وان دو پشک گرێدایی گەشتوگوزارێ نە، ئێک ل فاکۆلتیا کارگێری و ئابووری و ئێک ژی ل فاکۆلتیا چاندنێ.
رێڤەبەرێ تۆمارا گشتی یا زانکۆیا دھۆک د. سەعید خودێدا بۆ رۆژناما ئەڤرۆ دیارکر کو ل فاکۆلتیا کارگێری و ئابووری پشکا کارگێریا گوزار و ئوتێل گێری ھاتە ڤەکرن و دێ یا گرێدایی جھێن گوزاری بیت، ھەروەسا پشکا گەشتیاری و تۆریزما ژینگەھێ ژی دێ ل فەکۆلتیا چاندنێ ھێتە ڤەکرن کو دێ گرێدایی گەشتوگوزارا ژینگەھێ بیت.
د. سەعید خودێدا ئەو ژی دیارکر کو زانکۆیا دھۆک سالانە دووڤچوونان دکەت کا دەڤەر و جڤاک و بازار پێدڤی ب چ بسپۆریان ھەنە وان پشکان دکەتە د پلانا خوە دا و ڤەدکەت، ب ڤەکرنا ڤان ھەردوو پشکان ژی زانکۆیا دھۆک ڤیایە پتر گرنگیێ ب دەتە کەرتێ گەشتوگوزارێ ل دەڤەرێ، چونکو دەمێ دەرچوویێن بسپۆر د بیاڤێ گەشتوگوزارێ دا ل ڤی کەرتی کار دکەت پێ نەڤێت دێ پتر خزمەتا ڤی کەرتێ گرنگ ل دەڤەرێ ھێتە کرن.
رێڤەبەرێ تۆمارا گشتی ئەو ژی دیارکر کو پێشکێش کرن بۆ ڤان ھەردو پشکان دێ ب رێیا زانکۆلاین بیت و دەرچوویێن ئەڤ سالە یێن ئامادەی دێ شێن پێشکێش کەن و بۆ سالا نوو دێ قوتابی لێ ھێنە وەرگرتن و دەوام لێ ھێتە کرن.
د. سەعید خودێدا ئەو ژی بۆ ئەڤرۆ ئاشکرا کر کو ل زانکۆیا دھۆک ھندەک بسپۆری یێن ھاتینە ڤەکرن کو ل سەر ئاستێ ھەرێما کوردستانێ بۆ جارا ئێکێ یە ئەو پشک دھێنە ڤەکرن، وەکو ڤەکرنا پشکا پەروەردا تایبەت ل فەکۆلتیا زانستێن پەروەردەی، بۆ سالا نوو ب ھەڤکاریا زانکۆیا ئولدنبۆرگ یا ئەلمانی و دەرچوویێن ڤێ پشکێ دێ گرنگیێ دەنە کەسێن خودان پێدڤیێن تایبەت، گۆت ژی بزاڤ د بەردەوامن ژ بۆ زێدەکرنا خواندنا ژ ڤی رەنگی ل زانکۆیا دھۆک.
ئەڤرۆ، حەمۆ محەمەد:
وەزارەتا پەروەردێ یا حوکمەتا ھەرێما کوردستانێ دیار دکەت کو بڕیارەک بۆ وان قوتابیێن پێشمەرگە و ھێزێن ناڤخۆ ل بەرۆکێن شەری دەرخستیە، کو دێ شێن ئەزموونێن دەرەکی ئەنجام ب دەن ژ بۆ ھندێ خواندنا وان ژ کیس نەچیت.
فاتیح مەولەوی زادە، پەیڤدارێ وەزارەتا پەروەردێ یێ حوکمەتا ھەرێما کوردستانێ بۆ ئەڤرۆ دیار کر کو ژ پێخەمەت بەرژەوەندیا گشتی و کارھێسانیکرن بۆ ئەو قوتابیێن پێشمەرگە یان د ناڤ ھێزێن ناڤخۆ و نوکە د بەرۆکێن شەری دا و نەشێن دەواما خوە یا ئاسایی بکەن و گۆت “پشتی ئەرکێ وان ب فەرمی و ب بەلگە ژ لایێ وان وەزارەتانڤە دھێتە سەلماندن، دشێن ئەزموونێن دەرەکی ئەنجام بدەن، بۆ ڤێ مەرەمێ ژی دشێن سەرەدانا رێڤەبەریێن قوتابخانێن خوە بکەن”.
ئەو رەوشا نوکە ژ ئەگەرێ ھاتنا داعش بۆ دەڤەرێ پەیدابووی و شەرێ ھێزێن پێشمەرگەی د گەل پێخەمەت پاراستنا ھەرێما کوردستانێ، ھژمارەکا زۆر یا وان پێشمەرگێن بۆ تمامکرنا خواندنا خوە قەستا ناڤەندێن خواندنێ کری نوکە د بەرۆکێن شەری دانە و ژ خواندنێ ڤەقەتیاینە.
نيشاندان