ئەڤرۆ، مللەت جەمال:
بریارە ئەڤرۆ تیما تە پا پێی یا یانا دھۆک یاریەکا گرنگ بەرامبەر مێڤانا خوە تیما تەپا پێی یا یانا حدود یا بەغدادی بکەت ژ چارچوڤێ یاریێن گەرا پێنجێ ژ قوناغا ئێکێ یا خولا نایابا عیراقێ یا تەپا پێی و 10 یاریکەرێن یانا دھوک پشکداری ڤێ یاریێ نابن.
یانا دھۆک دڤێ یاریێ دا نێزیکی سەرکەفتنێ یە چونکو جیاوازیەکا مەزن دناڤبەرا مێژوویا ھەر دو تیمان دا ھەیە کو یانا دھۆک شیایە ناسناڤێ خولا عیراقێ ببەت بەرامبەر وێ یانا حدود تیمەکا خودان پشتەڤانیەکا سنوردارە، لێ دبیت یانا حدود دڤێ یاریێ دا مفایی ژ ئاریشێن یانا دھوک وەرگریت کو د دووماھی یەکا راھێنانێ دا کو روژا بەری یاریێ ھاتبو کرن 10 یاریکەران مانگرتن کربو ژ راھێنانێن تیمێ ژبەر نەدانا قستێ ئێکێ یێ ھەڤبەستێن وان، ئەوژی ھەر ئێک ژ عەلی لەتیف، عەلی عەلەللا، حەیدەر عەبدوللا، عەباس رحێمە، ئەیاد سەدیر، عەلی متەشەر، ئەیمەن حسێن، عەلی سەعەد، قاسم زێدان لێ دبیت ئەڤ چەندە ببیتە ھەڤرکیەک بو یاریکەرێن کورێن باژێرێ دھوکێ کو د یاریا ئەڤرۆ دا جھێ یاریکەرێن مانگرتی بگرن و باشتر خوە نیشان بدەن بو وێ چەندێ بو ھەموویان دیاربیت کو بتنێ کورێن باژێری نە د روژێن تەنگاڤ دا خوە ل یانێ دکەنە خودان .
ژلایەکێ دووڤە یانا دھۆک یا پێدڤی سەرکەفتنێ یە دڤێ یاریێ دا بو وێ چەندێ زێدەتر خوە نێزیکی رێزێن دەستپێکا کوما خوە بکەت و خالان د یاریگەھا خوە دا ژ دەست نەدەت بو وێ چەندێ ل قوناغێت بھێت زێدەتر ب گیانەکێ ئارام یاریێ بکەن.
ل دور ڤێ یاریێ راھێنەرێ یانا دھۆک باسم قاسم بۆ رۆژناما ئەڤرۆ گوت:مانگرتنا یاریکەران دێ کارتێکرنەکا خراب ل سەر تیمێ ھەبیت لێ نابیت ئەم خوە بێ ھیڤی کەین و راستە د دووماھی یەکا راھێنانێ دا بتنێ ١٤ یاریکەران پشکداری کریە لێ ب ئانەھیا خودێ بابەت دێ چارەسەربیت و مە ھیڤیێن باش ھەنە بو سەرکەفتنێ.
ژلایەکێ دووڤە راھێنەرێ یانا حدود عەلی وەھاب گوت: یاریەکا ب زەحمەت بەرامبەر یانا دھۆک و یانا دھۆک چ ئاریشە ھەبن دێ ھەر یا ب زەحمەت بیت، تایبەت یاری د یاریگەھا وێ دایە و بەرامبەر تیما مە ھەمی گەنجن و ھیڤیێن مە د وەرزێ ئەڤ سالە دا بتنێ خوە دخولێ دا راگرین و خالەک د یاریا ئەڤرۆ دا بو مە سەرکەفتنە.
نيشاندان
