ئەڤرۆ:
پشتی تیرۆرستێن داعش کەنیسێن دەشتا نەینەوا ب تمامی تالانکرین، ئاڤاھی ھەموو یێن بۆمبرێژکرین و بۆ پەقاندنێ یێن بەرھەڤ کرین، ژێدەرەکێ ھەوالگیری ژی راگەھاند کو چەند سەرکردەکێن داعش ل دەڤەرێ یێن رەڤین.
بەرپرسەکێ پلە بلندێ ئێمناھیا عیراقێ ئاشکرا کر کو پتریا وان سەرکردێن داعش ئەوێن رەڤین، ئەون یێن سەرپەرشتیا مەیدانی یا شەڕی ل وان دەڤەران دکەن یێن ل ژێر دەستھەلاتا داعش دانە و زۆربەیا وان ھەلگرێن رەگەزناما عیراقی نە.
ئەڤرۆ:
پشتی ھێرشەکا چەکداری یا ل دژی سەربازێن مسرێ ل بیابانا سینا کو د ئەنجام دا ٣٣ سەربازێن وی وەلاتی جانێ خوە ژ دەست دابوون وەزارەتا دەرڤە یا ئەمریکا د داخۆیانیەکا فەرمی دا دیار کر کو ھەکە ھێزێن ئێمناھیێ یێن مسرێ پێرابوونێن باش ل ھەمبەر وان ھێرشان وەرنەگرن رەنگە مسر ژی وەک لیبیا و عیراقێ بەر ب شەرەکی ناڤخوەیی یێ دژوار ڤە بچیت و ژ بەر وێ یەکێ ژی دڤێت مسر ئامادەکاریێن باش بۆ رێگری گرتن ل چالاکیان گرۆپێن توندرەوێن ئیسلامی بکەت.
چاڤدێرێن سیاسی دیار دکەن کو گرۆپێن چەکداری یێن سەر ب ئیخوان ل دەمێ دەستھەلاتا مورسی دا شیابوون ل بیابانا سینا و گەلەک دەڤەرێن دی چەکێن باش بدەستڤە بینن و خوە ب ھێز کرینە و ژ بەر وێ یەکێ ژی دھێتە چاڤەرێ کرن کو ھێرشا ل بیابانا سینا دەستپێا شەرەکی دژوار ل مسرێ بیت و ژ بەر وێ یەکێ ژی ب فەرمانا سەرۆک کۆمارێ وی وەلاتی سێ مەە وەک رەوشا نەئاسایی ل مسرێ ھاتیە راگەھاندن.
ھەفتیا بۆری بریتانیا و ئەلمانیا دیار کربوون کو زانیاریێن تەمام ل بەر دەستێ وان ھەنە کو ئیخوان بزاڤێ دکەن ل ئورۆپا جارەکا دی خوە ب رێکخستن بکەن و ھاریکاریا بۆ گرۆپێن چەکداری ل مسرێ رەوانە بکەن و ژ بەر وێ یەکێ ژی ئەو نھا ب توندی چاڤدێریا چالاکیێن وان دکەن و ناھێلن ئەو جارەکا دی خوە ب رێکخستن بکەن.
ئەڤرۆ، سەرجان مەحمود:
کۆنسەیا پەرلەمانێ ئورۆپا روونشتنەکا تایبەت ل سەر کۆبانێ سازکر و راگەھاند کو شەرڤان و خەلکێ کۆبانێ رومەتا مرۆڤاھیێ ل ھەمبەر تیرۆرستان دپارێزن و دڤێت ھەڤپەیمانیا نێڤدەولەتی ب ھەموو دەرفەتێن خوە ڤە پشتەڤانیا کۆبانێ بکەت و تورکیا ژی دەریێن خوە بۆ ھەڤکاریا کوردان ڤەکەت و ل ھەمبەر داعشێ ھەلویست وەربگریت نە ل دژی کوردان.
پەرلەمانێ ئورۆپا ل سەر داخوازا پرانیا پارتێن د ناڤ پەرلەمانی دا کۆمبوونەک تایبەت ل سەر رەوشا کۆبانێ سازکر و ئەندامێن کۆنسەیا ئورۆپا ژی تێدا بەرھەڤ بوون و ب دەنگێ ھەموو بەرھەڤبوویان ژ ئێکەتیا ئورۆپا و جڤاتا نێڤدەولەتی ھاتە خواستن کو ب رەنگەکی لەز بچنە ھەوارا کۆبانێ و ھەموو پێدڤیێن وان بۆ دابین بکەن.
د ڤێ دەربارێ دا بینیدیتۆ دیلا ڤیدۆڤا ب ناڤێ کۆنسەیا ئورۆپا د ئاخڤتنا خوە یا پەرلەمانی دا راگەھاند کو ئەڤرۆ ھەڤکاریا بۆ کۆبانێ ئەرکەکی ئەخلاقی و مرۆڤی یێ ھەموو جیھانێیە و دڤێت ھەموو ھێزێن دیمۆکراسیخواز و پێشکەڤتی د شەرێ ل دژی تیرۆرێ دا دەستێ ھاریکاریێ درێژی کۆبانێ بکەن و گۆت: (خەلکێ کۆبانێ ب ھێزێن خوە یێن شەرڤان ڤە بۆ ھەموو جیھانێ نیشادان کو ئەو مافدارن و سەرێ بۆ تیرۆرستان شۆر ناکەن، ڤێجا دڤێت ئەم ژی ب دل و جان و ھەموو ئیمکانێن خوە ڤە ب ھەوارا کوردان ب گشتی و ب تایبەتی ل کۆلانێ بچین و پشتەڤانیێ ل وان بکەین، ژ بەر کو ئەڤرۆ پشتەڤانیا بۆ کوردان پشتەڤانیە بۆ نرخێن مرۆڤاتیێ).
ئەندامێ کۆنسەیا ئورۆپا ھەروەسا د ئاخڤتنا خوە دا رەخنەیێن دژوار ل حوکمەتا تورکیا کر و دیار کر دڤێت تورکیا ئێدی ھەلویستێ خوە یەک ئالی بکەت و بریارێ بدەت ل گەل ھەڤپەیمانا نێڤدەولەتی ل دژی داعشێ شەری بکەت و گۆت: (سیاسەتا تورکیا ل دژی کوردان ب چو رەنگەکێ ناھێتە قەبوول کرن و نابیت ئەندامەکی ھەڤپەیمانیا ئەتلانتیک (ناتۆ) و بەر ئەندامێ ئێکەتیا ئورۆپا ل دژی کارەساتا مرۆڤی یا ل کۆبانێ بێدەنگ بمینیت و ل سنۆرێن وێ تیرۆرست دەربازی رۆژئاڤا ببن و شەرێ کوردان بکەن، ژ بەر ڤێ یەکێ ژی ب ناڤێ کۆنسەیا ئورئپا داخواز ژ حوکمەتا تورکیا دکەم کو سیاسەتا خوە یا شاش ب گوھۆریت و ل گەل ھەڤپەیمانا نێڤدەولەتی ب رەنگەکی ئەکتیف شەرێ تیرۆرستێن داعشێ بکەت ئەو یەک ھەم بۆ تورکیا و ھەم ژی بۆ ئارامیا رۆژھەلاتا ناڤین گەلەک گرنگە).
ل ئالیێ دی کۆنسەیا ئورۆپا و پەرلەمانێ ئێکەتیا ئورۆپا پشتی ب دووماھی ھاتنا کۆمبوونا خوە د داخۆیانیەکی دا جارەکا دی ھێرشێن تیرۆرستان بۆ سەر دەڤەرێن باشور و رۆژئاڤایێ کوردستانێ شەرمزار کرن و داخواز ژ جڤاتا نێڤدەولەتی و ئەمریکا و سەرکردایەتیا ئێکەتیا ئورۆپا کرن کو د زووترین دەم دا ھەڤکاریا چەک و پێدڤیێن مرۆڤی بگەھیننە دەستێ شەرڤانێن کورد و ژ ھەڤپەیمانیا نێڤدەولەتی ژی خواستن کو ھێرشێن ل دژی داعشێ دژوارتر بکەت).
د کۆمبوونێ دا ھەروەسا ھاتە راگەھاندن ژی کو پارتا ئێکەتیا دیمۆکراتیک و شەرڤانێن کورد تیرۆرست نینن چونکو ئەو ئاخ و وەلاتێ خوە دپارێزن و دڤێت ھەماھەنگی و پەیوەندیێن ل گەل وان بھێنە بەرفرەە کرن و ژ سەرکردەیێن ئورۆپا خواستن کو پارتا کارکەرێن کوردستانێ ژی ژ لیستا تیرۆرێ بھێتە دەرخستن ژ بەر کو ئەو ژی نھا مل ب ملێ پێشمەرگێن ھەرێما کوردستانا عیراقێ و شەرڤانێن یەکینەیێن پاراستنا گەل شەرێ تیرۆرستێن داعشێ دکەن و خەلکێ سڤیل دپارێزن).
د پشکەکا دی یا روونشتنا خوە دا ژی ھەڤکاریێن ھەرێما کوردستانێ بۆ کۆبانێ ب بلندی ھاتە نرخاندن و ھاتە راگەھاندن کو کۆمبوونێن ب سەرپەرەشتیا مەسعود بارزانی سەرۆکێ ھەرێما کوردستانێ بۆ دروستکرنا ئێکەتیا د ناڤبەرا پارت و ئالیێن رۆژئاڤایێ کوردستانێ دا ھاتە سازکرن پێنگاڤەکا گەلەک گرنگە و جھێ رێزێیە و ژ ئالیێن رۆژئاڤا ھاتە خواستن ب یەکرێزی ل دژی تیرۆرستان راوەستن و پرسێن خوە ب رەنگەکی دیمۆکراتیک و ب رێیا دانوستاندنێ چارە بکەن.
ئەڤرۆ، رەوان نھێلی
د.عزەت سابر سەرۆکێ لژنا دارایی ل پەرلەمانێ کوردستانێ بۆ ئەڤرۆ دیارکر ل سالا 2014 حکومەتا عیراقێ چو بودجە بۆ ھەرێما کوردستانێ نەھنارتیە و ئەڤ پرسە درێژ بوو، ژبەرکو خەلکێ کوردستانێ ژی نێزیکی 5 ملیون کەسانن و پێدڤی ب ژیانێ نە و فەرمانبەرێن وێ ژی پێدڤی ب موچانن، لەوما دڤێت پرۆژێن ئاڤەدانکرنێ بھێنە ئەنجامدان و نەخوشخانە و قوتابخانە بھێنە ئاڤاکرن و حکومەتا ھەرێمێ نەشیت پارێ نوو دەربکەت و نەشێن قەرێن ناڤخویی ژی بکەت، لەما باشترین رێک قەرێن نێڤدەولەتی یە و ئەگەر حکومەت نەشێت راستەوخو قەران بکەت، دشێت ب رێیا کۆمپانیێن مەزن قەران بکەت یێن ل کوردستانێ کار دکەن کو ئەڤ کۆمپانیە دشێن ناڤبەریێ د ناڤبەرا حکومەتا ھەرێمێ و کۆمپانیێن نێڤدەولەتی بکەن و گۆت: حکومەتا ھەرێما کوردستانێ رەشنڤیسەک ل دۆر پرۆژە قانوونا قەرزکرنێ بەرھەڤکریە و ھیڤیدارین ب زووترین دەم بھنێریتە پەرلەمانی داکو خواندنا ئێکێ بۆ بھێتە کرن و بھێتە پەسەندکرن و ئەو باوەرین بەری سالا نوو ئەڤ پرۆژە بگەھیت و بھێتە پەسەندکرن”. د.عزەت سابر دیسا دیارکر پشتی پەسەندکرنا پرۆژەی دێ دیار بیت کانێ چ وەلاتەک یان بانکەک یان کۆمپانیەک دێ بەرھەڤیا خوە دیارکەت کو ھە ڤکاریا ھەرێما کوردستانێ بکەت و گۆت” ئەڤ قەرە ژی دێ ئەرکێن دارایی ئێختە سەر ملێن حکومەتێ و دێ فایدە چیتە سەر، بەلێ ھەر چاوابیت ھیڤیدارین ب قەرکرنا ھندەک پارەی، حکومەت بشێت موچێ فەرمانبەران و پرۆژان و وەبەرھێنانێ پێ ئەنجام بدەت داکو ئەڤ قەیرانا دارایی کێم ببیت”.
سەبارەت وێ یەکێ کانێ حکومەتا ھەرێما مافێ وێ یەکێ ھەیە قەران بکەت و کانێ دێ چ وەلاتەک قەران دەتە ھەرێمێ، د.عزەت سابر گۆت” مادەم حکومەتا ھەرێمێ نەفتا خوە دھنێریت و بەغدا بودجە ناھنێریت، ئانکو حکومەتا ھەرێما کوردستانێ مافێ ھەی، قەرێن نێڤدەولەتی بکەت و عیراق نابیتە رێگر ل ھەمبەر ھەرێما کوردستانێ ب تنێ دشێت بێژیت ئەو پارێ حکومەتا ھەرێما کوردستانێ وەردگریت، زڤراندنا وی پارەی نە ل سەر ملێ حکومەتا عیراقێ یە”.
د.عزەت سابر سەرۆکێ لژنا دارایی ل پەرلەمانێ کوردستانێ دیارکر ژی کو ب ئەو ل گەل ڤی پرۆژە قانوونا قەرکرنا پارانە بەلێ ھندەک تێبینی ھەنە و گۆت” دڤێت د پرۆژە قانوونێ دا، کوژمێ پارەی و دەولەت و کۆمپانیێن دێ پارە ژێ ھێنە قەر کرن، بھێنە دیارکرن و کانێ قەرز بۆ ماوێ چەندێ یە و ب چەند ماوە ئەڤ قەرە بھێتە زڤراندن”.
د.عزەت سابر سەرۆکێ لژنا دارایی ل پەرلەمانێ کوردستانێ ئاماژە ب وێ یەکێ کر ژی کو پرانیا وەلاتێن جیھانێ د قەردان وەکو فەرەنسا، ئیتالیا، ئسپانیا، یونان، ئەمریکا، تورکیا بەلێ پرۆسا ئاڤەدانکرنێ نەراوەستیایە، ئەمریکا زێدەتر ژ 10 ھزار ملیار دولاران یا قەردارە و بانکێن وێ ژی یێن پرن ژ پارەی، تورکیا 300 ملیار دولاران یا قەردارە، بەلێ ئاڤەدانکرن و بەرەڤ پێشبرنا کەرتێ ئابووری یا لێ بەردەوامە، ژبەر ھندێ گەلەک یا ئاسایی یە حکومەت داخوازا قەران بکەت، ژبەر کو پارە ئامرازەکە ھەر رۆژەکێ یێ د دەستێ ئێکێ دا و کار پێ دھێتە کرن و گۆت: حکومەتا ھەرێما کوردستانێ ب ژڤانە رۆژانە 500 ھزار بەرمیلێن گازێ بھنێریتە ژ دەرڤە و وی دەمێ دێ شێت قەرێن خوە پێ بدەت و پاشان بودجێ ھەرێمێ دانیت و ژیانا وەلاتیان پێ خوەش بکەت. ل دووماھیێ سەرۆکێ لژنا دارایی ل پەرلەمانێ کوردستانێ دیارکر کو دیاردا قەران یا ساخلەمە، بەلێ حکومەتا ھەرێما کوردستانێ پێدڤیە ھزرەکا ھوور بۆ ڤان قەران بکەت ب تایبەت د چاوانیا زڤراندنا وێ دا ، ژبەر کو ئەڤ پارێ دھێتە وەرگرتن، نە بۆ کارێ وەبەرھێنانێ یە کو مفا ل سەر ھەبیت بەلکو بۆ موچێن فەرمانبەرانە و بۆ مەزاختیێن وەزارەتانە و ئەو پارێ دھێتە مەزاختن، بەرامبەر دەستناکەڤیت.
سەرۆکێ لژنا دارایی ل پەرلەمانێ کوردستانێ بۆ ئەڤرۆ دیارکر ل گەل ھاتنا پارێن حکومەتا ھەرێما کوردستانێ قەر دکەت، دێ دەست ب پرۆژێن ئاڤەدانکرنێ ھێنە ئەنجامدان و نەخوشخانە و قوتابخانە دێ ھێنە ئاڤاکرن ڤە و گۆت” مادەم حکومەتا ھەرێمێ نەفتا خوە دھنێریت و بەغدا بودجە ناھنێریت، ئانکو حکومەتا ھەرێما کوردستانێ مافێ ھەی، قەرێن نێڤدەولەتی بکەت و عیراق نابیتە رێگر ل ھەمبەر ھەرێما کوردستانێ ب تنێ دشێت بێژیت ئەو پارێ حکومەتا ھەرێما کوردستانێ وەردگریت، زڤراندنا وی پارەی نە ل سەر ملێ حکومەتا عیراقێ یە”.
ئه‌ڤرۆ نیۆز:
ئه‌ندامێ ده‌سته‌یا دووچڤونێ یا ته‌ڤگه‌را گه‌نجێن كوردێن رۆژئاڤایا كوردستانێ عه‌بدولمه‌جید ته‌مه‌ر راگه‌هاند، بڕیارا پڕ چه‌ككرنا شه‌رڤانێن كوبانێ و په‌سه‌ندكرنا په‌رله‌مانێ هه‌رێما كوردستانێ ل سه‌ر هنارتنا هێزێن پێشمه‌رگه‌ێ كوردستانێ كو پشكداریا د شه‌رێ دژى داعشێ دا بكه‌ن، سه‌ركه‌فتنه‌كا هه‌ره مه‌زنا كوردایه و مه‌زنترین ده‌ستكه‌فتا دبلوماتیا كوردایه د دیرۆكا نوو دا.
عه‌بدولمه‌جید ته‌مه‌ر هه‌روه‌سا گۆت: گرنگیا هنارتنا پشته‌ڤانیێ بۆ كوردان ب رێیا فرۆكێن ئه‌مریكى بوویه و یا گرنگتر ژوێ ئه‌و چه‌ك بۆ باسكێ پارتا كاركه‌ێن كوردستانێ بوویه، كو ل گۆڕ دیتنا ئه‌مریكا پارته‌كا تیرۆرى یه، پاشى ڤه‌كرنا رێیا ل هه‌مبه‌رى پێشمه‌رگه‌ى ل سه‌ر ئاخا توركیا بۆ پشته‌ڤانیكرنا شه‌رڤانێن كوبانێ، هه‌موو ئه‌ڤ كاره ب پڕانیا ده‌نگان و ب رازیبوونا وه‌لاتێن عیراقێ و توركیا و ئه‌مریكا، باشترین گرۆڤه ل سه‌ر هێزا كوردان و بلندیا رێزگرتنا وان ل جیهانێ.
هه‌روه‌سا خوه‌یاكر، هاتنا پێشمه‌رگه بۆ كوبانێ بۆ جارائێكێ یه هێزه‌كا بیانێ دهێته ناڤ ئاخا وه‌لاتێ سوریا دا پشتى بۆرینا 40 سالان ل سه‌ر شه‌رێ جیهانێ، ئه‌ڤه ژى نامه‌كه بۆ هه‌موو تیرۆرستان و هه‌موو پارچه‌كریێن ئاخا كوردستانێ ئێدى كورد ده‌ستان ل هه‌مبه‌رى وان داناناهێلن و نامینن راوه‌ستیایى.
ئه‌ڤرۆ نیۆز:
نوونه‌رێ جڤاتا نیشتیمانیا كوردێن سورى ل هه‌رێما كوردستانێ دكتور كاوه عه‌زیزى راگه‌هاند، بڕیارا هنارتنا هێزێن پێشمه‌رگه‌ى ژ ئالیێ په‌رله‌مانێ هه‌رێما كوردستانێ ، خوه‌یاكر، هه‌رێما كوردستانێ بتنێ هه‌رێمه‌ك نینه، به‌لكى ده‌وله‌ته‌كا موسسه‌ساتیى یه نوونه‌ریا هه‌موو پێكهاتێن ئاینى و ملله‌تێن كوردستانێ دكه‌ت، بتنێ كێماسیا وى راگه‌هاندنا ده‌وله‌تبوونا وێ هه‌یه، ئاماژه‌دا هندێ ژى بڕیارا په‌رله‌مانێ كوردستانێ ئێك رێزیا كوردان چێكرن ل هه‌ر چار پارچێن كوردستانێ و سنۆره‌ك بۆ داخوازیێن حزبیێن به‌رته‌سك دانان، و دوپاتكرن پێشمه‌رگه و چه‌ك مولك و میراتێ هه‌موو پارت و ملله‌تێ كوردستانێ یه ل هه‌رێمێ.
ئه‌ڤرۆ نیۆز:
سه‌رۆكێ حزبا ئوممه یا عیراقى میسال ئالوسى دوپاتكر، بڕیارا سه‌رۆك بارزانى د پشكدارى و هنارتنا پێشمه‌رگه‌ى د شه‌رێ دژى داعشێ دا ل كوبانێ بڕیاره‌كا دورست و دجهێ خوه‌دا بوویه، دیاركر ژى، له‌ورا پێدڤیه ل سه‌ر هه‌موویان وان بڕیاران بشێوه‌كێ رژد وه‌ربگرن نه بتنێ سۆز بن، ئه‌ڤه ژى به‌لگه‌یه سه‌رۆك بارزانى نه بتنێ سه‌رۆكێ هه‌رێما كوردستانێ یه، به‌لكى سه‌رۆك و سه‌ركرده‌كێ نه‌ته‌وه‌یا كوردستانى یه ب ره‌وشتێن مرۆڤایه‌تى و شارستانى و باژێرڤانى یێن پایه بلند و به‌ره‌ڤانێ مافێن مروڤَى و رێزێ ل به‌رپرسیا خوه دگریت.
میسال ئالوسى گۆت: بڕیارا سه‌رۆك بارزانى د پشكدارى و هنارتنا پێشمه‌رگه‌ى د شه‌رێ دژى داعشێ دا ل كوبانێ ڤێ راتسیێ دوپات دكه‌ت، هه‌روه‌سا خوه‌یا دكه‌ت كو هه‌رێما كوردستانێ ب ملله‌ت و سه‌ركرده و حوكمه‌تا خوه ڤه هه‌موو درژدن ل سه‌ر ژناڤبرنا داعشێ و درژدن ل سه‌ر پاراستنا ره‌وشت و پرانسیبان و به‌ره‌ڤانیا ژ كوردێن رۆژئاڤا یێن كوردستانێ ب گشتى و كوبانێ بتایبه‌تى.
ئالوسى هه‌روه‌سا گۆت: دبیت هنده‌ك كه‌س وه‌ك ره‌خنه‌گرێن سیاسه‌تمه‌دار هه‌بن، به‌لێ دیاركر و گوت من دڤێت پرسیاره‌كێ ژ وان كه‌سان بكه‌م، ئه‌رێ هه‌وه دڤێت داعشى ل مرۆڤیه‌تیێ سه‌ركه‌ڤن و زال ببن، ئه‌رێ هه‌وه دڤێت داعش كڕین و فرۆشتنا ب ئافره‌ت و زارۆ كێن هه‌وه بكه‌ت وه‌كى ل هنده‌ك كه‌سان كرى و جهێن پیرۆز و شینوارا وێران بكه‌ت؟.
ل دووماهیێ گۆت: ئه‌م ل گه‌ل بڕیارا سه‌رۆك بارزانى و بڕیارا وى یا راسته و پێدڤیه هه‌موو چاڤلێكه‌رێن وى بن د وه‌رگرتنا ڤان بڕیارێن رژد دا.
ئه‌ڤرۆ نیۆز:
وه‌زاره‌تا به‌ره‌ڤانیا عیراقێ راگه‌هاند، د هێرشه‌كا ل سه‌ر بنگه‌هێن داعشێ ل پارێزگه‌ها سه‌لاحه‌دین 300 چه‌كدارێن داعشى هاتن كوشتن و 112 بومبێن (تى ئێن تى) هاتن ژناڤبرن و 18 ترۆمبێلێن ژى هاتن سۆتن، هه‌روه‌سا دیاركر، له‌شكرێ عیراقێ نها به‌ر ب باژێرێ بێجى ڤه پێشڤه دچیت.
وه‌زاره‌تا به‌ره‌ڤانیا عیراقێ د به‌یننامه‌كێ دا گۆت: هێزێن له‌شكرێ عیراقێ ب سه‌ركرداتیا فه‌ریقێ ئێكێ عه‌بدولوه‌هاب ئه‌لساعدى فه‌رماندێ فه‌رمانده‌یا سه‌لاحه‌ددین شیان گوندێ ئه‌لبو توعمه و ئه‌لبو حه‌جاج ئازاد بكه‌ن و 300 چه‌كدارێن داعشێ كوشتن.
هه‌روه‌سا د به‌یاننامێ دا هاتیه د ناڤبه‌را كوشتیان دا هژماره‌كا زۆر یا سه‌ركردێن تیرۆرى تێدا هه‌نه و پرۆسا رامالینا چه‌كدارێن داعشێ به‌ر ب باژێركێ بێجى دچیت.
ئه‌ڤرۆ نیۆز:
وه‌زیرێ ناڤخویا عیراقێ و سه‌ركردێ فه‌یله‌قا بدر محه‌مه‌د ئه‌لغه‌بان د كنگره‌كێ رۆژنامه‌ڤانى دا ل پارێزگه‌ها كه‌ربلا گۆت: شه‌رێ دژى رێكخستنا تیرۆرى داعشێ شه‌ره‌كێ رۆژنامه‌ڤانى و راگه‌هاندنیه و دڤێت ئه‌م پشته‌ڤانیا راگه‌هاندنا خوه بكه‌ن، و دڤێت راگه‌هاندنه‌كا مه‌یدانى د ناڤ شه‌رى دا مه هه‌بیت.
وه‌كى ده‌ستپێشكا راگه‌هندنا وى شه‌رى 35 كه‌نالێن تلفزیونى و مالپه‌رێن ئه‌نترنێتێ یێن پشته‌ڤانى و هاریكارى و ریكلاما بێ به‌رانبه‌رى بۆ چه‌كدارێن داعشێ دكه‌ن هاتنه راگرتن و دائێخستن.
ئه‌ڤرۆنیوز، سالار دۆسكى:
ب مه‌ره‌ما پشته‌ڤانیكرن و هه‌ڤخه‌میا خوه بۆ باژێرێ كۆبانێ، سترانبێژ(ماهر) د نووترین به‌رهه‌مێ خوه دا ، سترانه‌ك ب ناڤێ كۆبانێ به‌لاڤ دكه‌ت.
سترانا كۆبانێ په‌یڤ و ئاوازێن (د.ره‌وشت ره‌شید) ب هه‌ر دو زاراڤێن سورانى و كرمانجى دهێته گۆتن و دیسا به‌حسێ به‌رخودانا كۆبانێ دهێته‌كرن وئه‌ڤه دبیته پالپشتى بۆ خه‌لكێ ڤى باژێرى.
دیسا سترانا كۆبانێ ژ وێنه‌گرتنا (زاهێر ئیبراهیم) ه و ژ ده‌رهێنانا ( رێكان ئه‌حمه‌د)ه ژڤانه رۆژێن بهێت بهێته به‌لاڤه‌كرن.
نيشاندان