ئه‌ڤرۆ نیۆز:
ل گۆر به‌یاننامه‌كێ ل ناڤه‌ندا باژێرێ مووسل كو دانه‌كا وێ گه‌هشتیه‌ ده‌ستێ ئه‌ڤرۆ نیۆز تێدا هاتیه‌، چه‌كدارێن داعشێ هژماره‌كا كولیژێن خواندنێ ل زانكویا مووسل لادان و هه‌لوه‌شاندن، ژوان كولێژا یاسا و رامیارى و كولیژا هونه‌رێن جوان و شینوار و په‌روه‌ردا وه‌رزشى و پشكا سیاحێ و ئوتێلان و پشكا فه‌لسه‌فى، زێده‌بارى وان بابه‌تێن دناڤ په‌یره‌وێ خواندا كولێژان دا هه‌ى وه‌كى بابه‌تێ مافێن مرۆڤى و ئازادیێ و دیموكراتى و رۆمان و شانوو بۆ پشكێن زامانێن ئینگلیزى و فه‌ره‌نسى یێن دهێنه‌ خواندن.

ئه‌ڤرۆ نيوز، ڤه‌گێر سه‌عدولا:

ئه‌ندامه‌كێ سه‌ركردايه‌تيا پارتى ديموكراتى كوردستان – سوريا، راگه‌هاند كو هه‌ردو جڤاتێن ئه‌نه‌كه‌س و ته‌ڤده‌م گه‌هشتنه‌ رێكه‌فتنێ ل سه‌ر هه‌رسێ خالێن دان و ستاندن ل سه‌ر دكر.

سه‌عيد عومه‌ر ئه‌ندامێ سه‌ركرداتيا پارتى ديموكراتى كوردستان – سوريا بۆ ئه‌ڤرۆ نيوز گۆت: “هه‌ردو جڤاتێن سياسى يێن ئه‌نه‌كه‌س و ته‌ڤده‌م ئه‌ڤرۆ گه‌هشتنه‌ رێكه‌فتنه‌كا سياسى بۆ چاوانيا ب رێڤه‌برن و سيسته‌مێ شه‌ركرن و دروستكرنا مه‌رجه‌عه‌كى ژ بوو ب رێڤه‌برنا رۆژئاڤايێ كوردستانێ”.

سه‌عيد عومه‌ر زێده‌تر گۆت: “هه‌ردو لايه‌ن ل سه‌ر هه‌ر سێ خالێن ئه‌ڤه‌ چه‌نده‌ گه‌نگه‌شه‌ ل سه‌ر دهاته‌ كرن، رێكه‌فتن و ل به‌ره‌ نوكه‌ بچنه‌ ده‌ف سه‌رۆك بارزانى كو دێ ل وێرێ رێكه‌فتن د ناڤبه‌را وان دا هێته‌ ئيمزا كرن”.

نێزيكى 10 رۆژايه‌ لايه‌نێن رۆژئاڤايێ كوردستانێ ل باژێرێ دهۆكێ و ل ژێر سه‌رپه‌رشتيا سه‌رۆكێ هه‌رێما كوردستانێ روونشتنان ئه‌نجام دده‌ن دا كو ل دۆر هه‌ر ئێك ژ سيسته‌مێ برێڤه‌برنێ و له‌شكرى و هه‌بوونا مه‌رجه‌عه‌كى بگه‌هنه‌ رێكه‌فتنه‌كێ.

سه‌ركرداتيا پارتى ديموكراتى كوردستان – سوريا زێده‌تر رۆهنكر و گۆت: “رێڤه‌برنا كانتۆنيا ل دووڤ ڤى سيسته‌مى دێ بۆ دو هه‌يڤان يێ به‌رده‌وام بيت و پاشان ژى دێ هه‌لبژارتن هێنه‌ كرن و دێ مه‌رجه‌عيه‌ته‌كا سياسى ژى بۆ پرسێن خوه‌ يێن چاره‌نڤيس ساز دانن”.

گۆتژى: “ل سه‌ر بابه‌تێ له‌شكرى ژى ئيمزا كر كو هه‌موو پێكڤه‌ رۆلێ خوه‌ تێدا ببينن و بۆ ڤێ مه‌ره‌مێ دێ شانده‌ك ژ هه‌ردو جڤاتا ل گه‌ل YPG روونيت بۆ رێكخستنا ڤى كارى كا چاوان هێزێن جڤاتا نشتيمانى دێ چينه‌ د ناڤا له‌شكرى دا ب مه‌ره‌ما به‌ره‌ڤانيكرنێ ژ رۆژئاڤا كوردستانێ”.