ئه‌ڤرۆ نیۆز:
ده‌نگۆباسێن ل سه‌ر مالپه‌رێ جڤاكى (تویته‌رى) هاتینه‌ به‌لاڤكرن كو د ناڤا رێكخستن و چه‌كدارێن ده‌وله‌تا ئیسلامى یا ب ناڤێ داعشێ دهێته‌ نیاسین دا سه‌باره‌ت شه‌رێ ل باژێرێ كوبانێ و شكه‌ستنێن وان یێن ئێك ل دوڤ ئێك و د ئه‌نجامدا زه‌ره‌رو زیانێن گیانى پتر ژ 1000 كوشتیان پێ گه‌هاندنینه‌ ئه‌گه‌رێن نهێنى هه‌بوون.
ل گۆڕ مالپه‌رێ تایبه‌ت ب ناڤێ (ویكلیكسا ده‌وله‌تا ئیسلامى) كو چه‌ند (ته‌غریده‌ ) تێدا هاتبوون، ئاشكراكرن كو ئێك ژ سه‌ركردێن پایه‌ بلندێن داعشێ ژ به‌رۆكێن شه‌رى ره‌ڤه‌یه‌ و ئه‌و زه‌ره‌را مه‌زن ب چه‌كدارێن داعشێ كه‌فتى ژ خه‌یانه‌تا وێ چێبوویه‌، و هه‌موو پێزانینێن نهێنى راده‌ستێ هێزێن هه‌ڤپه‌یمانان كرینه‌ بۆ هێرشێن ئه‌سمانى بهێنه‌ كرن.
تىغریده‌كا دى دبێژیت، به‌رزه‌بوونا وى كه‌سى كو ده‌ستێ راستێ یێ خه‌لیفێ داعشێ ئه‌بو به‌كر به‌غدادى بوویه‌ و ب ناڤێ ئه‌بو ئه‌حمه‌د عه‌لى عه‌بده‌ دهێته‌ ناسكرن، و هه‌موو پێزانینێن نهێنى یێن سه‌كرداتیا داعشێ دده‌ستێن وى دا هه‌نه‌.
هه‌روه‌سا ته‌غریده‌كا هاتیه‌، به‌غدادى نوكه‌ ب له‌ز مژوولى گوهۆڕین و ڤه‌گۆهاستا هه‌موو بنگه‌ه و عومبارێن چه‌كى یه‌ و هه‌موو بزاڤێن ل دۆر دیتنا وى سه‌ركردى ره‌ڤى و نه‌دیار دهێنه‌ كرن.
ته‌غریده‌كا دى ئاماژه‌دا یه‌، پێشبینى دهێنه‌ كرن به‌رى ره‌ڤینا ئه‌بو ئه‌حمه‌د هه‌موو نهێنیێن داعشێ هاتبنه‌ بۆ هێزێن هه‌ڤپه‌یمانان هاتبنه‌ فرۆشتن، چونكى نها هێرشێن ئه‌سمانى گه‌له‌ك د هوربینن ل سه‌ر بنگه‌هێن داعشێ.

ئه‌ڤرۆ نیۆز:
فرۆكێن ئه‌مریكى ژ جورێ ئه‌پاتچى ب هاریكاریا فرۆكێن جه‌نگى شیان ئاماده‌كاریه‌كا هێرشبرنێ ژئالیێ چه‌كدارێن داعشێ ڤه‌ نێزیكى سكرێ مووسل ژ ناڤ ببه‌ن، كو نێزیكى 100 ترۆمبێل و هه‌مه‌ران خوه‌ به‌رهه‌ڤى وێ هێرشێ كر بوون.
ل گۆڕ ژێده‌رێ هه‌والگیرى كو مالپه‌رێ شه‌فق نیۆز ئاشكرا كریه‌، پێزانینێن راست دورست راگه‌هاند چه‌كدارێن داعشێ ب 100 ترۆمبێلان د ناڤ و ده‌وروبه‌رێن قوتابخانه‌كا ناحیا وانكێ ل ژێریا سكرێ مووسل خڕڤه‌بوینه‌.
هه‌ڤده‌م فرۆكێن جه‌نكى و ئه‌پاتچى یێن ئه‌مریكى ده‌ست ب هێرشه‌كا دژوار ل سه‌ر جهێ هاتیه‌ ده‌ستنیشانكرى كرن و زه‌ره‌ر و زیان مه‌زن بوێ هێزا داعشى گه‌هاندن و ب ده‌هان كوشتى و بریندار و ترۆمبێلێن وان ل وێ قوتابخانا ناحیا وانكێ ژناڤبرن.

ئه‌ڤرۆ نيوز، نيوار محه‌مه‌د سه‌ليم:

ئه‌ندامه‌كێ سه‌ركرداتيا پارتى ديموكراتى كوردستان راگه‌هانديه‌ كو سه‌رۆك بارزانى ئه‌مر ده‌رخستيه‌ كو پێدڤيه‌ د 48 ده‌مژمێرێن بهێت دا، پێشمه‌رگه‌ى ل كۆبانێ بن و هێشتا PYD ژى چو هه‌لويست نه‌داينه‌، توركيا ژى يا ئاماده‌يه‌ رێ ل به‌ر پێشمه‌رگه‌ى ڤه‌كه‌ت.

ب گۆره‌ى نووچه‌يه‌كێ ئاڤێستا كورد، ئه‌ندامه‌كێ سه‌ركرداتيا پارتى ديموكراتى كوردستان ب كه‌نالێ جه‌زيره‌ يێ عه‌ره‌بى راگه‌هانديه‌ كو سه‌رۆك بارزانى ئه‌مر ده‌رخستيه‌ كو پێدڤيه‌ د 48 ده‌مژمێرێن بهێت دا، پێشمه‌رگه‌ى ل كۆبانێ بن.

پێشتر وه‌زيرێ به‌ره‌ڤانيا توركيا، مه‌وليد جاويش ئۆغلۆ ژى راگه‌هاند بوو كو توركيا يا ئاماده‌يه‌ ده‌رگه‌هێن خوه‌ يێن سنورى ل هه‌مبه‌ر پێشمه‌رگه‌ى ڤه‌كه‌ت بۆ چوونا ناڤ كۆبانێ، به‌لێ دايه‌ زانين ژى كو هێزێن پێشمه‌رگه‌ى چو چه‌كى ل گه‌ل خوه‌ نابه‌نه‌ توركيا و كۆبانێ ب تۆمه‌تا وێ چه‌ندێ نه‌كه‌ مه‌ترسيێ ل سه‌ر ئه‌منا توركيا دروست بكه‌ن.

ئه‌مريكا ژى ژ لايێ خوه‌ ڤه‌ پێشوازى ل وێ پێنگاڤا حوكمه‌تا توركيا كر و ب پێنگاڤه‌كا باش به‌ر ب روو ب رووى بوونا تيرۆرێ ب ناڤ كر.

هه‌ر د ڤێ ده‌ربارێ دا، پێشتر ژێده‌ره‌كى ژ جڤاتا نشتيمانى يا كوردى ب ئه‌ڤرۆ نيوز راگه‌هاند بوو كو سه‌ره‌راى رازيبوونا توركيا ل سه‌ر چوونا له‌شكرى ب رێيا سنۆرێن وێ بۆ كۆبانێ، به‌لێ هێشتا PYD چو هه‌لويست د وێ ده‌ربارێ دا نه‌داينه‌ و ب ڤێ چه‌ندێ ژى پێشمه‌رگه‌ نه‌شێت بچيته‌ ناڤا كۆبانێ.

نوكه‌ كۆمبوونا هێزێن سياسى يێن ناڤا جڤاتا نشتيمانى و ته‌ڤده‌مێ يا به‌رده‌وامه‌ و ل سه‌ر چه‌ندين خالێن هه‌ستيار وه‌كو چێكرنا ئێك كانتۆرن ل جهێ سێ كانتۆنان هاتيه‌ دان و رێڤه‌به‌ريا وێ ژ لايێ هه‌ر ئێك ژ جڤاتا سياسى و ته‌ڤده‌مێ بيت، به‌لێ ژ لايێ له‌شكرى ڤه‌ هه‌تا نوكه‌ نه‌گه‌هشتيه‌ چو ئه‌نجامێن باش.

محه‌مه‌د ئيسماعيل ئه‌ندامێ مه‌كته‌ب سياسيا پارتى ديموكراتى كوردستان- سوريا د داخۆيانيه‌كێ دا بۆ ئه‌ڤرۆ نيوز گۆت: “جارێ ل ڤان دانوستاندنا مه‌ وه‌كو پارتى و جڤاتا نشتيمانى ب تنێ دڤێت رازيبوونا وان وه‌رگرين بشێن شه‌رى ل كۆبانێ بكه‌ين”.