دھۆک، لەزگین جۆقی:

سەرۆکێ گرۆپێ گەنجێن ھێزا شەرفەدین بۆ ئەڤرۆ دیارکر کو ب ھەڤکاریا وەلاتێ ئەلمانیا ل بەرە پێنچ ھزار پەککەفتیێن ئاوارێن شنگال بۆ چارەسەریێ بۆ ئەلمانیا بھێنە ھنارتن، داخواز ژی ژ سازیێن پەیوەندیدارێن حوکمەتا ھەرێمێ کر د ھەڤکار بن ل گەل وان بۆ سەرکەفتنا ڤێ پێنگاڤێ.

مەروان رەشو سەرۆکێ گرۆپێ گەنجێن ھێزا شەرفەدین کو ژ کۆمەکا گەنجێن خوە بەخش ئەڤ گرۆپە پێک دھیت گۆت نوکە ل ھەموو دەڤەرێن ئاوارێن شنگالێ لێ دئاکنجی ناڤ دھێنە تۆمار کرن و پرۆسە دی یا بەردەوام بیت ھەتا ھەموو ئاوارە دھێنە دیتن، یێ پیدڤی چارەسەریێ بیت دێ ناڤێ وێ ھێتە تۆمار کرن و بلند کرن بۆ وەلاتێ ئەلمانیا، ئەو ژی دیارکر کو بەرنامەک ھاتیە دانان ب ھەڤکاریا حوکمەتا ئەلمانیا ھەتا پێنچ ھزار پەککەفتیێن کارەساتا شنگال بھێنە رەوانە کرن بۆ وەلاتێ ئەلمانیا ب مەرەما چارەسەریێ.

ناڤبری ئەو ژی خۆیاکر کو کارەساتا شنگالێ ب سەدان وەلاتی پەککەفتی و نەخۆش کرینە ھەر چەندە حوکمەتا ھەرێما کوردستانێ ب ھەموو سازیێن خوە ڤە بەردەوام پشتەڤانیێ و ھاریکاریا وان دکەت.

ئەڤرۆ نیوز:

فرۆکێن ھێزێن ھەڤپەیمانان د بەردەوامن و ھەتا ئەڤرۆ سپێدێ ھێرشێن سەر چەکدارێن داعش د بەردەوامن و ب گۆرەی ئەو کەسێن ل سەر سنوری نوکە وەکو بەرێ دەنگێ فیشەک و تۆپان ناھێتە بھیستن.

ئەمریکا راگەھاند کو ئەوێ ب ھەڤپەیمانێن خوە ڤە د ماوێ دو رۆژێن بۆری دا ٢١ دربێن ئەسمانی وەشاندینە چەکدارێن داعش و ئەڤێ چەندێ ژی رێگری ل پێشڤەچوونێن داعش کریە.

ھێزێن یەکینەیێن پاراستنا گەل ژی راگەھاندیە کو ئەوان ژ دوھی وەرە تل شوعەیر ژ دەستێن چەکدارێن داعش دا دەرخستیە ئەوێ کو بەری ١٠ رۆژان ژ لایێ چەکدارێن داعش ڤە ھاتیە گرتن.

بڕیارە د ماوێ ٢٤ دەمژێرێن داھاتی ژی دا چەک ب رێیا فرۆکان بگەھیتە کۆبانێ کو ژ لایێ ھەرێما کوردستانێ ڤە ھاتیە بەرھەڤکرن.

پشتی کۆمبوونا سەرۆکێ ھەرێما کوردستانێ ل گەل لایەنێن سیاسی یێن کوردی ل کۆبانێ، سەرۆکێ ھەرێما کوردستانێ، مەسعود بارزانی، راگەھاند کو د ٢٤ دەمژمێران دا ب رێیا فرۆکان دێ چەک و تەقەمەنی گەھنە باژێرێ کۆبانێ دا کو شەرڤانێن ھێزا پاراستنا گەل بشێن روو ب روویێ داعش راوەستن.