ئه‌ڤرۆ نیز، گوهدار سلێمان زێباری :

سه‌باح زوهێر زێباری رێڤه‌به‌رێ‌ راگه‌هاندنا رێڤه‌به‌ریا ساخله‌میا ئاكرێ‌ ل كونگره‌یه‌كێ‌ رۆژنامه‌ڤانیدا ئامار و چالاكی و رویدانێن سالا 2019ێ یێن رێڤه‌به‌ریا ساخله‌میا ئاكرێ‌ به‌لاڤكرن و ب ڤی شێوه‌ی بوون:

 ل سالا بوری دا ( 356702) كه‌سان سه‌ره‌دانا نه‌خوشخانه‌ و بنگه‌ه و سه‌نته‌رێن ساخله‌میێ‌ یێن ئاكرێ‌ كرینه‌ و ئه‌ڤ سه‌ره‌دانا نه‌خوشان (10%) ئاواره‌ و په‌نابه‌ربووینه‌ , هه‌روه‌سا  (15289) نه‌خوشێن دومدرێژ ب شه‌كرێ‌ سه‌ره‌دانا به‌شێ‌ شه‌كرێ‌ كرینه‌ و (39260) نه‌خوش هاتینه‌ نڤاندن و (447919) پشكنینێن جورا و جور هاتینه‌ كرن , و (81) پشكنینێن وه‌ستانا دلی هاتینه‌ كرن و (5244) نشته‌رگه‌ریێن جورا و جور هاتینه‌ ئه‌نجامدان.

سه‌بارات زارۆكبونێ‌ ژی راگه‌هاند كۆ ( 6262) زارۆك ل قه‌زا ئاكرێ‌ ژ دایك بووینه‌ و (6218) زارۆك ب ساخله‌می ژ دایك بوونه‌ و (44) زارۆكێن ژ دایك بووی مرینه‌ و (2362) زارۆك ب رێكا نشته‌رگه‌ریێ‌ په‌یدابووینه‌ و (45) زارۆكێن جێمك ژ دایك بووینه‌ .

هه‌روه‌سا ل سالا بوری دا (292) حاله‌تێن رویدانێن هاتن و چوونێ‌ رویداینه‌ كو گه‌هاندینه‌ نه‌خوشخانا هه‌وارهاتنێ‌ ژ وان ژی ( 18) كه‌سان ب ڤان رویدانان گیانێ‌ خوه‌ ژ ده‌ست دایه‌ , هه‌روه‌سا  (8) حاله‌تێن خه‌ندقینێ‌ هه‌بووینه‌ و د سالا بوریدا (130) حاله‌تێن سوتنێ‌ هه‌بووینه‌ و كو (4 ) كه‌سان گیانێ‌ خوه‌ ژ ده‌ست دایه‌ , ( 558) حاله‌تێن دویپشك و مارا هه‌بووینه‌ و ( 1) حاله‌تێ‌ مرنێ‌ ب پێڤه‌دانا ماری هه‌بوویه‌ و ب گشتی ل سالا بوریدا (582)  كه‌سان گیانێ‌ خوه‌ ژ ده‌ست دایه‌ .

هه‌روه‌سا درێژیا كار و چالاكیێن مه‌دا د سالا بوریدا یه‌كا خوپاراستنا ساخله‌میێ‌ دوو هه‌وێن ڤاكسیندانێ‌ ئه‌نجامدانه‌ و تیمێن زێراڤانیا ساخله‌میا ئاكرێ‌ (7438) سه‌ره‌دان بۆ جهان كرینه‌ ژ وان جها ژی (141 ) جه هاتینه‌ گرتن و (63 ) جه ژی هاتینه‌ سزادان ب كوژمێ‌ پتر ( 14) ملیونان ,هه‌روه‌سا ل كار وچالاكێن مه‌ دا ل سالا بوریدا ل دویف بریارا حكومه‌تێ‌ یا گرێداری كلینیكێن نوژداری و ده‌رمانخان مه‌ وه‌كو ساخله‌میا ئاكرێ‌ چه‌ندین سه‌ره‌دان و دیفچون كرن ژ وان ژی مه‌ شیا 23 جهان سزابده‌ین كو (13) جه ده‌رمانخانه‌ بوون و (8 ) كلینیكێن نوژداری و ( 2 ) كوگه‌هێن هه‌لگرتنا ده‌رمانا بوون .

ئه‌ڤرۆ نیوز، عه‌لی حاجی :

نوونه‌رێ‌ قاممقامیا زاخۆ د لژنا بلندا كونترولكرنا ده‌رمانان دا د داخویانیه‌كێ‌ دا بۆ ئه‌ڤرۆ نیوز ئاشكهرا كر ل سالا بوری ژبه‌ر نه‌پێگریا دو جهان ب رێنمایان بۆ دادگه‌هێ‌ هاتینه‌ ره‌وانه‌ كرن و هه‌ر دیسان چه‌ندین جه هاتینه‌ گرتن و سزادان .

زێده‌تر خه‌لات ئوسمان گوت: (د سالا 2019 لژنا مه‌ كومبون دگه‌ل 28 كومه‌لگه‌هێن پزیكشی ئه‌نجام داینه‌ ل دور پێگیركرنا وان رێنمایان و سالا بوری مه‌ شیایه‌ 10 ده‌رمانخانان بۆ ماوه‌یێ‌ سێ‌ روژان دائێخین و 11 ده‌رمانخانێن دیتر ب كوژمه‌كێ‌ پاره‌یی سزا بده‌ین و هه‌ر دیسان 11 كلینكێن هاریكارێن نوشدار بۆ ماوه‌یێ‌ حه‌فت روژان هاتنه‌ دائێخستن و كه‌سه‌ك هاته‌ ره‌وانه‌ كرن بۆ دادگه‌ها زاخۆ ژبه‌ر سه‌رپێچیا وان د رێنمایێن ئه‌نجوومه‌نێ‌ وه‌زیران دا كو تایبه‌تن ل دور كلینیك و كونترولكرنا ده‌رمانان).

و گوت ژی هه‌ر دیسان مه‌ شیابوو چار كلینیكێن نوشداری ل زاخۆ بۆ ماوه‌یێ‌ سێ‌ روژان دائێخین و هه‌ر دیسان ئێك ژ وان كلینیكان ب ئێكجاری هاته‌ دائێخستن و كه‌سه‌ك ژ وان هاته‌ ره‌وانه‌ كرن بۆ دادگه‌هێ‌ و ئه‌و كه‌سێن هاتینه‌ ره‌وانه‌ كرن بۆ دادگه‌هێ‌ ئێك نوشدار بوو و ئێكێ‌ دیتر ژی هاریكارێ‌ نوشداری بوو و بۆ سالا نوو دێ‌ ب رژدی كار ل سه‌ر وان كلینیك و ده‌رمانخانه‌یان كه‌ین پێخه‌مه‌تی كونترولكرنا ده‌رمانان و نه‌هێلانا سه‌رپێچیان .