ئەڤرۆ نیوز:
ئەندامەکا لژنا کاروبارێن قانوونی ل پەرلەمانێ کوردستانێ ئاشکرا کر، ئەڤرۆ ٢/٧/٢٠١٩ جڤاتێن پارێزگەھێن ھەرێما کوردستانێ، پڕۆژەقانوونەک بۆ راستڤەکرنا قانوونا ھەلبژارتنێن پارێزگەھێن ھەرێما کوردستانێ پێشکێشی پەرلەمانێ کوردستانێ کر.
خەدیجا عومەر مزووری، ئەنداما لژنا کاروبارێن قانوونی ل پەرلەمانێ کوردستانێ دیار ژی کر، لژنا کاروبارێن قانوونی و لژنا ناڤخوە ل پەرلەمانێ کوردستانێ، ئەڤرۆ ٢/٧/٢٠١٩ ل گەل ھەرسێ جڤاتێن پارێزگەھێن دھۆک، ھەولێر و سلێمانیێ کۆمبوون.
وێ ئەنداما لژنا کاروبارێن قانوونی بۆ مالپەڕێ فەرمی یێ پارتی دیموکراتی کوردستان گۆت: “جڤاتێن پارێزگەھێن ھەرێما کوردستانێ پڕۆژەقانوونەک بەرھەڤکریە ل دۆر راستڤەکرنا قانوونا ھەلبژارتنێن جڤاتێن پارێزگەھێن ھەرێما کوردستانێ یا ھژمارە سێ یا سالا ٢٠٠٩ کو بڕیارە پێشکێشی پەرلەمانێ کوردستانێ بکەن و ئەم ژی وەکو پەرلەمانتار دانوستاندنێ ل سەر بکەین، چونکو جڤاتێن پارێزگەھێن ھەرێما کوردستانێ دڤێت ئەم ڤێ قانوونێ بۆ راستڤەکەین”.
خەدیجا عومەر مزووری ئاماژە ب وێ چەندێ ژی کر کو ئەو وێ پرۆژەقانوونێ دێ وەرگرن ل گەل لژنا ناڤخوە پێداچوونێ دێ بۆ کەن و گۆت: “دانوستاندنێ دێ ل سەر کەین و ئەو رێکارێن کو پێدڤی نە دێ ئەنجام دەین، چونکو پرۆژەک بۆ قانوونا جڤاتێن پارێزگەھێن ھەرێما کوردستانێ گرنگە و دڤێت ل پەرلەمانێ کوردستانێ کاری ل سەر بکەین”.
نيشاندان
