ئەڤرۆ نیوز:
ب فەرمی دو یاریزانێن یانا بەرشەلۆنا پێکھاتیێ وێ یانێ بوو وەرزێ بھێت ب جە ھێلا و پەیوەندی ب دو یانێن نوو کر .
ھەر ئێک ژ یاریزانان پێ پورتوگالی ئەندرێ گومێز ی و گولچیێ ھولەندی یاسبر سیلیسین پێکھاتیێ وێ یانا کەتەلونی ب جە ھێلا پشتی گومێز ھەڤبەستا یانا ئیڤەرتون ئیمزاکری ئەوێ ل وەرزێ بوری پەیوەندی ب وێ یانێ کری ب شێوەیێ خواستن و ل وەرزێ ئەڤ سالە ئەوێ یانێ ب فەرمی ھەڤبەستا ئەوی یاریزانی ئیمزاکر و گولچیێ ھولەندی سیلیسن ژی ھەڤبەستا یانا ڤالنسیا ئیمزاکر .
گومێز
ئه‌ڤرۆ نيوز:
بڕياره ئه‌ڤرۆ پارتى ديموكراتى كوردستان و ئێكه‌تى نشتيمانى كوردستان، ده‌رباره‌ى دانانا پارێزگاره‌كى بۆ كه‌ركووكێ و پێكئينانا كابينا نوو يا حوكمه‌تا هه‌رێما كوردستانێ كۆم بن.
خالد شوانى، ئه‌ندامێ سه‌ركرداتيا ئێكه‌تيێ و ئه‌ندامێ كۆميتا ئاسايكرنا كاودانان ل كه‌ركووك، بۆ كوردستان 24 راگه‌هاند، دوهى مه‌كته‌بێن سياسى يێن ئێكه‌تى و پارتى په‌يامێن ئه‌رێنى لێك گوهاڕتن، بڕياره ژى ئه‌ڤرۆ هه‌ردولا كۆم ببن.
ئاماژه ب وێ چه‌ندێ ژى كريه كو گرنگه پارتى و ئێكه‌تى ل سه‌ر ناڤه‌كى رێك بكه‌ڤن بۆ پارێزگارێ كه‌ركووك، يێ نشتيمانپه‌روه‌ر بيت و ژ هه‌موو لايان پشته‌ڤانى لێ بهێته كرن دا كو يێ هاريكار بيت بۆ ڤه‌گه‌راندنا كاودانێن كه‌ركووك بۆ ره‌وشا وێ يا ئاسايى.
خالد شوانى، هيڤى خواست كو لايه‌نێن كوردستانى د ئێك رێز بن د پێناڤى وێ چه‌ندێ دا كو گه‌ف ل سه‌ر ده‌ستكه‌فتێن كوردان بهێنه دوورخستن.
هه‌ر ب گۆره‌ى پێزانينێن ل به‌ر ده‌ست ته‌وه‌ره‌كێ دى يێ كۆمبوونا ئه‌ڤرۆ يا پارتى و ئێكه‌تيێ، دێ پێكئينانا كابينا نه‌هێ يا حوكمه‌تا هه‌رێما كوردستانێ بيت.
ئەڤرۆ نیوز:
سەربەست تروانشی، ئەندامێ جڤاتا سەرکردایەتیا پارتی دیموکراتی کوردستان و بەرپرسێ لقێ ئێکێ وێ پارتێ، ئەو ھەردو قوتابیێن کچ یێن دھۆکێ خەلاتکرن؛ ئەوێن داھێنانەکا زانستی د بیاڤێ نۆشداری دا کرین و گۆت: مەژیێ قوتابیێن کورد گەلەک یێ مەزن و بەرفرەھە، ھەکە دەلیڤە بۆ ھەبیت دشێن داھێنانێن مەزن د ھەموو وارێن ژیانێ دا بکەن.
سەربەست تروانشی، ئەندامێ جڤاتا سەرکردایەتیا پارتی دیموکراتی کوردستان و بەرپرسێ لقێ ئێکێ وێ پارتێ، ئەڤرۆ ٢٥/٦/٢٠١٩ ل بارەگایێ لقێ و ب ئامادەبوونا بەرپرسێ نڤێسینگەھا روشەنبیری و راگەھاندنێ پێشوازێ ل ھەردو قوتابیێن کچ (مەروا فەیسەل جەعفەر) و (عائیشا عەبدولسەلام محەمەد) و مامۆستا و خیزانێن وان کر.
بەرپرسێ لقێ بخێرھاتنا وان کر و دەستخوەشی ل ھەردو قوتابیێن پێنجێ ئامادەیی کر کو د ڤی ژیێ بچووکێ زانستی دا شیاین داھێنانەکا مەزن یا زانستی و مرۆڤایەتی ئەنجام بدەن و ببنە جھێ پووتەدانا ناڤەندێن زانستی یێن مەزنێن دونیایێ، نەخاسمە وەکو ڤەکۆلینێن زانکۆیێن ئەمریکی و گۆت: “ئەڤ پووتەپێدانە وێ چەندێ دگەھینیت کو مێشکێ قوتابیێن کورد گەلەک یێ مەزن و بەرفرەھە، ھەکە دەلیڤە بۆ ھەبیت دشێن داھێنانێن مەز د ھەموو وارێن ژیانێ دا بکەن”.
بەرپرسێ لقێ ئێکێ پارتی ئامادەبوون و پشتەڤانیا خوە یا ماددی و مەعنەوی وەکو لقێ ئێکێ پارتی بۆ وان ھەردو قوتابیان دیار کر، ھەروەسا دیاری ژی پێشکێشی وان کرن، ھەردو قوتابیان ژی سوپاسیا بەرپرسێ لقێ کر و گۆتن: “ئەڤ پشکنینا مە ئەنجام دای ل سەر نەخوشیا پەنجەشێرا سینگی بوو ب رێکا ڤەکۆلینەکا نوو بوویە، ئەڤ ڤەکۆلینا مە ژی بوویە جھێ گەنگەشێ و پووتەدانا جھێن زانستی یێن دونیایێ، ئەڤ ئێکە ژی نەبتنێ سەربلندیە بۆ مە و مامۆستایێن مە، بەلکو بۆ تەڤایا گەلێ کوردستانێ و دێ دبەردەوام بین ل سەر دووڤچوون و ڤەکۆلینێن خوە یێن زانستی، دا کو گرنژینەکا دی بۆ مرۆڤایەتیێ پەیدا بکەین”.
ئەڤرۆ نیوز:
فەرھاد ئەمین ئەترووشی، پارێزگەرێ دھۆکێ ل دوسلدورف پایتەختێ ویلایەتا نورت راین فایتسفیلد ل گەل خانم (پیترا ڤاستر) سەرۆکا وەبەرھێنانێ ل ویلایەتا ناڤھاتی کۆمبوو، د کۆمبوونێ دا بەحسێ دەلیڤێن وەبەرھێنانێ ل سنوورێ پارێزگەھا دھۆکێ و ھاندانا کۆمپانیێن ویلایەتا ناڤھاتی بۆ ئەنجامدانا کار و پرۆژێن وەبەرھێنانێ د وارێن جودا جودا دا ل سنوورێ پارێزگەھا دھۆکێ ھاتە کرن.
پارێزگەرێ دھۆکێ دیار کر کو ئەو د ئامادەنە ھەر ھاریکاری و پشتەڤانیەکێ ل کۆمپانیێن ویلایەتا نورت راین فایتسفیلد بکەن بۆ وێ یەکێ کار و پرۆژێن وەبەرھێنانێ ل پارێزگەھا دھۆکێ ئەنجام بدەن.
ژ لایێ خوەڤە سەرۆکا وەبەرھێنانێ ل ویلایەتا نورت راین فایتسفیلد ل ئەلمانیا بەرھەڤیا خوە دیار کر کو ھاندانا کۆمپانیێن ویلایەتا خوە بکەن کو کاری ل پارێزگەھا دھۆکێ ئەنجام بدەن.
ھەژی گۆتنێ یە کۆمپانیێن وەبەرھێنانێ ل ویلایەتا نورت راین فایتسفیلد ل ئەلمانیا سالانە ب بھایێ پتری ٨٠ ملیار یورۆیان پرۆژێن وەبەرھێنانێ ئەنجام ددەن، ب تایبەتی ل پایتەختێ دوسلدورف و پتریا وان کوۆپانیێن بیانی نە.
ئەڤرۆ نیوز، عەلی حاجی:
سەرۆکێ باژێرڤانیا قەزا زاخۆ بۆ ئەڤرۆ نیوز ئاشکرا کر، ئەو د دەمەکێ نێزیک دا دێ دەست ب رێکخستنا بەرلێڤێن خابیری کەن و دبێژیت: د پلانا مە دایە دو پرێن پیادە یێن داری ل سەر خابیری دروست بکەین کو دو گەرەک و دو پارکان دێ پێکڤە گرێدەن.
بژار مونیب، سەرۆکێ باژێڕڤانیا قەزا زاخۆ د داخویانیەکێ دا دیار کر، د بەرنامێ وان دایە د دەمەکێ نێزیک دا دەست ب رێکخستنا بەرلێڤێن خابیرێ زاخۆ بکەن، ھەر ژ باژێرڤانیا زاخۆ ھەتا پرا خانی و گۆت: “بۆ ھەردو لایێن خابیری دێ ستاندجیداری دانین، ھەردیسا د پلانا مە دایە ھەر ژ پرا خانی ھەتا دگەھیتە پارکا لایێ دیێ ئاڤێ کو دبێژنێ تاخێ جوھیان، پرەکا داری یا پیادە بھێتە دروستکرن، د گەل دا ژی پرەکا دی یا پیادە ژ پارکا تاخێ جوھیان ھەتا دگەھیتە پارکا دانعەمران بھێتە دروستکرن، ب ڤی رەنگی پرا خانی و یا ناڤ بازاری و د گەل دا دو تاخ و دو پارک دێ پێکڤە ھێنە گرێدان و وەلاتی ژی دشێن ل سەر خابیری پەیاسێ بکەن، ئەڤ چەندە ژی دێ جوانیەکا دیتر دەتە وان تاخان، ژ بەکو جھێن شوونواری ژی ل وان تاخان ھەنە و ئاڤا خابیری ژی تێدا دەرباز دبیت”.
ناڤھاتی گۆتژی: “ئەم د نوکە دا چاڤەڕێی پێشینەیا ھەیڤانەینە یا باژێرڤانیا زاخۆ، ژ بەرکو ئەڤ کارە دێ ب پێشینەیا باژێرڤانیا زاخۆ ھێتە ئەنجامدان، راستەوخو ژی ئەڤ پرۆژە دێ ژ لایێ مەڤە ھێتە بجھئینان، ھەرچەندە ئەو پارێ دھێت یێ کێمە، بەلێ ب وی پارەی دێ شێین چەندین پرۆژە و کارێن باش بۆ باژێرێ زاخو َئەنجام دەین”.
ئه‌ڤرۆ نيوز:
جێگرێ سه‌رۆكێ په‌رله‌مانێ عيراقێ دياركر، ل گه‌ل پارێزگه‌هێن دى يێن عيراقێ، هه‌لبژارتنێن جڤاتا پارێزگه‌ها كه‌ركووكێ دێ هێنه ئه‌نجامدان.
گۆت ژى” كێشێن كه‌ركووكێ وگه‌فێن تيرۆرێ وفره‌پێكهاته‌يى يا وێ پارێزگه‌هێ، ژ مه دخوازيت كو كارێ جدى بكه‌ين تاكو هه‌لبژارتن ل كه‌ركووكێ بهێنه ئه‌نجامدان”.
دياركر ژى” ل گه‌ل پارێوگه‌هێن دى، ل دووماهيا سالا 2020 دێ هه‌لبژارتن ل كه‌ركووكێ هێنه ئه‌نجامدان”.
ئه‌ڤرۆ نيوز:
وه‌زيرێ چاندنێ وژێده‌رێن ئاڤێ ب وه‌كاله‌ت ل هه‌رێما كوردستانێ، رێباز حه‌ملان سێ بريار ل دۆر رێكخستنا بازارى وبهايێ هێكا ده‌ركرن وراگه‌هاند، پێدڤيه گرنگيدان ب كه‌رتێ چاندنێ بهێته دان بۆ ڤه‌ژاندنا ژێرخانا ئابوورى ل هه‌رێما كوردستانێ.
ل دووڤ رۆهنكرنه‌كا وه‌زارتا چاندنێ، دێ وه‌زاره‌تا ناڤخوه ژى هێته راسپارد بۆ وێ چه‌ندێ كونترۆلكرنا هاورده‌كرنا هێكا بكه‌ت تاكو ب رێێن نه قانوونى نه‌هێنه د ناڤ هه‌رێما كوردستانێ دا.
سێ بريارێن هاتينه ده‌ركرن ژى بۆ رێكخستنا بازارى وبهايێن هێكا ب ڤى شێوه‌ى نه:
- ئه‌نجامدانا كۆمبوونه‌كێ د ناڤبه‌را رێڤه‌به‌ريا گشتى يا پلاندانانێ ودووڤچوونێ ورێڤه‌به‌ريا گشتى يا سامانێن ئاژه‌لى وڤيتێرنه‌رى ب به‌رهه‌ڤبوونا رێڤه‌به‌رێن سامانێن ئاژه‌لى ل پارێزگه‌هێن هه‌رێمێ وخودانێن پرۆژێن ب خودانكرنا مريشكان بۆ به‌حسكرنا بابه‌تێ به‌رهه‌مێ هێكێ ورێكخستنا بازارى ودابينكرنا پێدڤيێن خودانێن وان پرۆژان ودياركرنا بهايێ هێكا.
- پێكئينانا لژنه‌كا تايبه‌ت ل رێڤه‌به‌ريا گشتى يا سامانێن ئاژه‌لى وڤيتێرنه‌رى ب مه‌ره‌ما سه‌ره‌دانا وه‌زاره‌تا چاندنێ يا عيراقى بۆ يه‌كخستنا رێنمايێن هاورده‌كرنا هێكا وبه‌رچاڤ وه‌رگرتنا پاراستن وپێشڤه‌برنا به‌رهه‌مێ ناڤخوه.
- ئاگه‌هداركرنا وه‌زاره‌تا ناڤخوه ولايه‌نێن په‌يوه‌نديدار بۆ توندكرنا خالێن سنوورى ورێگرتنێ ل هاورده‌كرنا هێكا ب رێێن نه قانوونى ژبه‌ر هه‌بوونا مه‌ترسيێ ل سه‌ر ساخله‌ميا وه‌لاتيان.
ئەڤرۆ نیوز، لەزگین جوقی:
رێڤەبەرێ فەرمانگەھا ژینگەھا دھۆکێ دیار کر کو ٩٧ جھێن موەلیدێن کارەبێ ل سەرانسەری دھۆکێ ھەنە ژوان ژی ٩٤ جھێن موەلیدان د پیس بوون ئەو ژی پشتی پشکنینا گازوائیلا وان ژ لایێ رێڤەبەریا گازی و نەفتی ل دھۆکێ ھاتیە کرن د ڤان ھەر ٩٧ جھێن موەلیدان دا ٥٢٥ موەلێدین کارەبێ ھەنە و بتنێ ١٤ موەلیدە گازا پاقژ ل دووڤ ستاندەران بکاردئینن.
مەحمەد تاھر بریفکانی، رێڤەبەرێ فەرمانگەھا ژینگەھا بۆ ئەڤرۆ نیوز دیار کر کو پشتی وان دووڤچوون ل سەر جۆری گازوائیلا موەلیدە بکاردئینن کری دەرکەفت گازا پیس بکاردئینن، چونکو بھایێ وێ یێ ئەرزانە و خۆدانێن موەلیدان بکاردئینن و ئەڤە دبیتە ئەگەرێ زیانێ ل سەر ژینگەھێ و ساخلەمیا وەلاتیان و گۆت: “ھەکە نوکە زیان دیارنەبن دێ د پاشەرۆژی دا دیاربن، پێدڤیە ئەم رێگریێ ل وان بکەین بۆ پاراستنا بەژەوەندیا خەلکێ خوە و نەھێلین ژینگەھا مە بھێتە پێس کرن”.
ناڤھاتی ئاماژە دا وێ چەندێ کو ئەڤ موەلیدێن کارەبێ یێن رۆژانە ل دھۆکێ کار دکەن بۆ دابینکرنا کارەبی دێ ئاریشێن ساخلەمیێ بۆ خەلکێ دھۆکێ دروست کەن، ھەکە نوکە نەبیت دێ پاشەرۆژێ دیاربیت، چونکو پتریا وان موەلیدێن کارەبی گازوائیلا پێس بکاردئینن، ھەکە گازوائیلا وان نەھێتە کونترۆلکرن دێ گەلەک ئاریشە ژێ دروست بن و گۆت: “پشتی پشکنین ھاتیە کرن ژ سەرجەمێ ٥٢٥ موەلیدان بتنێ ١٤ موەلیدە گازوائیلا پاقژ بکاردئینن یێن دی ژی ھەموو گازوائیلا پێس بکاردئینن و دووکێلەکا سوور ژ موەلیدان دەرکەڤیت و کارتێکرنێ ل ژینگەھێ دکەن”.
ئەڤرۆ نیوز، قائید میرۆ:
رێڤەبەرێ گشتیێ تۆمارکرنا کۆمپانیان ئاشکرا کر کو ئەڤ سالە رێژا تۆمارکرنا کۆمپانیان بشێوەکێ بەرچاڤ زێدەکریە، بشێوەیەکێ رێژا تۆمارکرنێ پێنج جارکی ژ سالا بۆری زێدەتر لێ ھاتیە و دبێژیت، ب فەرمانا سەرۆکاتیا جڤاتا وەزیران مۆلەت بۆ تۆمارکرنا کۆمپانیێن تایبەت بۆ کەرتێ دەرمانان ھاتیە راگرتن.
ئاراس رەئوف، رێڤەبەرێ گشتیێ تۆمارکرنا کۆمپانیا بۆ ئەڤرۆ نیوز دیار کر کو تۆمارکرنا کۆمپانیان د ئەڤ سالە دا پێنج جارکی ژ سالا بۆری زێدەتر لێ ھاتیە و ب رێژەکا بەرچاڤ زێدەکریە، نوکە ھژمارا کۆمپانیێن تۆمارکری گەھشتیە زێدەتری ٢٥ ھزار کۆمپانیێن ناڤخۆ و بیانی، ئەڤە ژی ھژمارەکا زۆرا کۆمپانیانە و رۆژ بۆ رۆژێ ژی ھژمارا تۆمارکرنا کۆمپانیا زێدە دبیت، دانا مۆلەتا کۆمپانیا ل گورەی قانوونا تۆمارکرنا کۆمپانیان و رێنمایێن حوکمەتێ، یێن ئەڤ سالە ناڤێن خوە تۆمارکرین ژ کەرتێن جودا پێک ھاتینە ھەر ژ گەشتوگۆزارێ بگرە ھەتا دگەھیتە کەرتێن پیشەسازی و بازرگانیا گشتی، چونکی ل سالێن بۆری تۆمارکرنا کۆمپانیا گەلەک کێم کربوو ژ ئەگەرێ شەڕێ تیرۆرستێن داعش و قەیرانا دارایی.
ناڤھاتی خویا کر کو د ناڤ کۆمپانیێن ھاتینە تۆمارکرن دا ھژمارەکا مەزن کۆمپانیێن بیانی ھەنە و چەندین کۆمپانیێن نێڤدەولەتی تایێن خوە ل ھەرێما کوردستانێ ڤەکرینە و مۆلەت ژ لایێ رێڤەبەریا گشتی یا تۆمارکرنا کۆمپانیان پێھاتیەدان، بەلێ ئەڤ سالە ب فەرمانا سەرۆکاتیا جڤاتا وەزیران دانا مۆلەتێ بۆ کۆمپانیێن تایبەت ب کەرتێ دەرمانان ڤە ھاتیە راگرتن، لەوڕا نوکە ب چو شێوەیەکی مۆلەت ب کۆمپانیێن دەرمانان ناھێتە دان.
ئەڤرۆ نيوز:
ئەڤ سالە ل ژ پێش سالێن بۆری ڤە رێژا پێڤەدانا دوپشک و ماران زێدەبوویە، کو ژ وان کەسێن دوپشک و ماران پێڤەدای ب تنێ ئافرەتەکێ گیانێ خوە ژ دەست دایە، دووماھیک جار ژی مێشڤانەکێ دەڤەرێ مارەکێ گەلەک مەزن کوشتیە.
حەبیب ئەحمەد مێشڤانەکێ دەڤەرا ئاکرێ یە د ئەکاونتێ خوە یێ تایبەتێ تۆرا جڤاکی یا فەیسبووکی دا بەلاڤکریە کو ل دەمێ سەخبێرکرن و چاڤدێریکرنا مێشانا ل دەڤەرا ئاکرێ مارەکێ مەزن دیتیە پشتی چەند بزاڤا ئەو مار کوشتیە.
عەلی سالح، دانعەمرەکێ دەڤەرا ئاکرێ یە بۆ باسنیوز دیار کر کو ئەڤ سالە ژ بەر کو بارانێن باش بارینە و گژو گیایێ زۆرە ل دەڤەرێ مار گەلەک زۆر بووینە، پرانیا مارێن ئەڤ سالە ھاتینە دیتن و کوشتن ژەھر دار بووینە و مەترسی ل سەر ژیانا مرۆڤان و ئاژەلداریێ پەیداکریە.
ژ ئالیێ خوە ڤە سەباح زوھێر بەرپرسێ راگەھاندنا ساخلەمیا ئاکرێ بۆ باسنیوز راگەھاند کو ئەڤ سالە ھەتا ھەیڤا شەش رێژا پێڤەدانا ماری زوور بوویە ژ پێش ساڵێن بۆری ڤە، بەلێ ب تنێ ئافرەتەکێ گیانێ خوە ژ دەست دایە بەری بگەھیننە نەخوشخانێ و ئەوێن دی ھەموو یان چارەسەری بۆ ھاتیە کرن و گۆت: “٨٠ حالەتێن پێڤەدانا دوپشک و ماران ل نەخوشخانا ئاکرێ ھاتینە تۆمارکرن، ٦٨ کەسا دوپشکی پێڤەدایە و ١٢ کەسا ژی ماری پێڤەدایە ب تنێ ئافرەتەکا ٤٠ ساڵی ل دەڤەرا نەھیلێ ل ناحیا دینارتە گیانێ خوە ژ دەستدایە بەری بگەھیننە نەخوشخانێ و یێن دی ھەموویا چارە سەری بۆ ھاتیە کرن”.
نيشاندان