ئەڤرۆ نیوز، رێوار مزیری:

ب ھەلکەفتا ١٢١ سالیا رۆژنامەگەریا کوردی، ئێکەتیا ئافرەتێن کوردستانێ دێ کۆنفرانسێ (پرسا ئافرەتان د میدیا یا کوردی دا) ل رۆژا ٢٣/٤/٢٠١٩ێ ل دەمژمێر ٩:٣٠ سپێدێ ل سەنتەرێ رەوشەنبیری و جڤاکی یێ زانکۆیا سەلاحەدین گێڕیت.

شەیما مستەفا، ئەنداما مەکتەبا سکرتاریەتا ئێکەتیا ئافرەتێن کوردستانێ بۆ ئەڤرۆ نیوز دیار کر کو چەندین پانێل د ڤی کۆنفرانسی دا دێ ھێنە ئەنجامدان کو تێدا دێ بەحسێ میدیا یا کوردی و ھێز و شیانێن ئافرەتێ د بوارێ میدیایێ دا ھێنەکرن ب تایبەتی ئافرەتا کورد، چونکو ئافرەتا کورد ھەر ژ دەمێن بۆری و ھەتا نوکە شیایە خوە پێبگەھینیت و کێمتر نەبوویە ژ ئافرەتێن جیھانێ ب تایبەتی د بوارێ میدیایێ دا رۆلەکێ بەرچاڤ ھەبوویە.

ناڤھاتیێ ئاماژە دا وێ چەندێ کو ب ھەلکەفتا ١٢١ سالیا رۆژنامەگەریا کوردی ھەمی ئەنجومەنێن ئێکەتیا ئافرەتان دێ چالاکیێن جودا ئەنجامدەن.

ئەڤرۆ نیوز، رێوار مزیری:

د رێورەسمەکی دا ناڤەندا خانکێ یا ئێکەتیا ئافرەتێن کوردستانێ ب ئامادەبوونا (بەھجەت ئاڤدەل) بەرپرسێ رێکخراوێن جەماوەری یێن سەر ب لقێ ئێکێ پارتی دیموکراتی کوردستان ڤە و (زەری نەوزاد رەسول) بەرپرسا ئەنجومەنێ پارێزگەھا دھۆکێ یێ ئێکەتیا ئافرەتێن کوردستانێ ھاتە ڤەکر.

رێژین نھێلی، بەرپرسا پشکا رەوشەنبیری و راگەھاندنێ ل ئێکەتیا ئافرەتێن کوردستانێ ئەنجومەنێ پارێزگەھا دھۆکێ بۆ ئەڤرۆ نیوز دیار کر کو د ڤی رێورەسمی دا باوەرنامە ل سەر ٥٠ ئافرەتێن خانکێ یێن کو پشکداری د خولا نەخویندەواریێ دا کری ھاتنە بەلاڤکرن و گۆت: “د ھەمان دەم دا پێشانگەھەکا جلکان ھاتە ڤەکرن”.