ئەڤرۆ نیوز، زنار تۆڤی:

چەندین پرۆێن کارەبێ ل دەڤەرا بەرواری بالا دێ ھێنە ب جھئینان و ھێلا گشتی یا کارەبێ دێ بۆ گوندێ ھێسێ ھێتە راکێشان و ئەڤ پرۆژە دێ خزمەتەکا باش بۆ خەلکێ ڤێ دەڤەرێ کەن.

سەربەست سەبری ئاکرەیی، رێڤەبەرێ ناحیا کانی ماسێ بۆ ئەڤرۆ نیوز دیار کر، ب کۆژمێ ٤٦ ملیۆن و ٦٢٥ ھزار دیناران، ل سەر بودجا وەزارەتا کارەبا ھەرێمێ چەندین پرۆژێن کارەبێ ل ناحیا کانی ماسێ دێ کەڤنە د قووناغا ب جھئینانێ دا.

سەربەستی خویا ژی کر، ئەو پرۆژێن بڕیارە بھێنە ب جھئینان پێکھاتینە ژ: گەھاندنا کارەبا گشتی یە بۆ گوندێ ھێسێ و چێکرنا تۆرێن ناڤخوەیی و دانانا بگۆرەکێ ٢٥٠ کەیڤی یە بۆ گوندێ ھروورێ، دیسا سەخبێرکرنا تۆرا ناڤخوە یا کارەبێ ل گوندێ چەلکا نەسارا و گەھاندنا فیدەرێ تروانش بۆ ئاستەنگێ کو ئەڤ پرۆژە دێ خزمەتەکا باش گەھیننە خەلکێ ڤێ دەڤەرێ.

ئەڤرۆ نیوز، عەلی حاجی:

دگەل نێزیکبوونا وەرزێ وەرگرتنا گەنمی ل سایلۆیا زاخۆ، ب سەرپەرشتیا قایممقامێ زاخۆ کۆمبوونەک دگەل لایەنێن پەیوەندیدار ل زاخۆ ھاتە ئەنجام دان ل دۆر دانانا پلانەکا رێکخستی دەربارەی وەرگرتنا گەنمێ جۆتیاران ل سایلویا زاخۆ.

ئەحمەد سامی، رێڤەبەرێ چاندنێ ل زاخۆ بۆ ئەڤرۆ نیوز ئاشکرا کر، ل دووڤ وێ پلانا ھاتیە دانان و سەرەرای زیانێن مەزن بەر ب جۆتیارێن دەڤەرێ کەفتین ژ بەر بارینا بارانەکا زۆر، بەلێ د ئەڤ سالە دا دێ وەرگرتنا گەنمی ٣٠% ژ سالا بۆری زێدەتربیت، ژ بەرکو سالا دەرباز بووی گەلەک جۆتیاران بەرھەمێ خوەیێ گەنمی رادەستی سایلۆیا زاخۆ نەکر و ئیٍَکسەر د ناڤ بازاری دا فرۆت، ئەو ژی ژ بەر وێ یەکێ بوو کو وان جۆتیاران ھزر دکر پارێ بەرھەمێ خوە یێ گەنمی زوو وەرناگرن و گۆت: “ئەم پێشبینی دکەین د ئەڤ سالە دا بەرھەمێ گەنمێ جۆتیاران ژ سالا بۆری باشتر بیت و ھەموو بەرھەڤی ژی ھاتینە کرن، داکو ب باشترین شێوە دەست ب وەرگرتنا گەنمی بھێتە کرن”.

ئەندازیار سەربەست عەبدولستار، رێڤەبەرێ سایلۆیا زاخۆ بۆ ئەڤرۆ نیوز گۆت: “د وێ کۆمبوونا مە دگەل قایممقامێ زاخۆ ئەنجام دای، ھەموو بەرھەڤی ھاتینە کرن، داکو ب شێوەکێ باش ل دووڤ وێ پلانا ھاتیە دارێشتن پێشوازیێ ل وەرگرتنا گەنمێ جۆتیاران د ئەڤ سالە دا بکەین، ھەموو کێماسیێن د ناڤ سایلۆیێ دا ژی ھاتینە چارەکرن و گۆت: “د نوکە دا سایلۆیا زاخۆ یا بەرھەڤە دەست ب وەرگرتنا گەنمی بکەت، سایلۆیا زاخو َدشیان دایە ھەتا ٢١ ھزار و ٨٠٠ تەنێن گەنمی ئەڤ سالە وەربگریت”.

رێڤەبەرێ سایلۆیا زاخۆ ئاماژە ب وێ چەندێ ژی کر کو چەندین تیمێن ئاگرڤەمراندنێ ل سنوورێ قەزا زاخۆ ھاتینە بەرھەڤکرن، داکو ژ نێزیکڤە سەرەدانا زەڤیێن گەنمی بکەن، ھەکە ھەر روودانەکا نەچاڤەڕێکری یا ئاگربەربوونێ ل وان جھان روو بدەت، داکو ب زووترین دەم ئەو ئاگرە بھێتە کونترۆلکرن و چو زیانێن مەزن نەگەھنە جۆتیارێن دەڤەرێ، ژ لایێ خوە ژی پۆلیسێن ھاتنوچوونێ و پۆلیس دی بەردەوام دێ چاڤدێریا ترۆمبێلێن بارھەلگرێن گەنمی کەن ھەتا پروسا وەرگرتنێ ب دووماھی دھێت.