دھۆک، لەزگین جوقی:

رێڤەبەرێ کارۆبارێن ئێزدیان ل دھۆکێ دیار کر کو وان پرۆژەک ھەیە بۆ بەھەڤکرن و ڤەگەڕیانا زارۆیێن ئێزدی یێن ژ باغۆز ژ بن دەستێ تیرۆرستێن داعش ھاتینە رزگارکرن کو ب ریێا وی پرۆژەی بھێنە بەرھەڤکرن و ھزرێن توندرەوێن تیرۆرستان ژ مێشکێ وان بھێنە دوورکرن.

جەعفەر سمۆ، رێڤەبەرێ کاروبارێن ئێزدیان یا سەر ب رێڤەبەریا گشتی یا کاروبارێن ئێزدیان ڤە وەزارەتا ئەوقافا ھەرێما کوردستانێ بۆ ئەڤرۆ نیوز دیار کر کو ب ھەماھەنگی دگەل نڤیسینگەھا رزگارکرنا رەڤاندیێن ئێزدی وان پرۆژەک بۆ ٧٠ زارۆیێن ئێزدی یێن ل ڤێ دووماھیێ ژ باغۆز ژ بن دەستێ تیرۆرستێن داعش رزگاربووین بەرھەڤکریە و گۆت: “ئەم ب ریێا وی پرۆژەی دێ کار کەین بۆ بەرھەڤکرنا وان زارۆیان، چونکو تیرۆرستێن داعش ل سەر مەترسیدارترین ھزرێن توندرەو ئەو زارۆ مەشقداینە، ئەم یێ کار دکەین ب ریێا پرۆژەکێ تایبەت بشێین جارەکا دی ھزرێن توندرەوێن داعش ژ مێشکێ وان زارۆیان دەربێخین و ئەو زارۆ بۆ ژیانا خوە یا ئاسایی بھێنە ڤەگەڕاندن”.

ناڤھاتی ئەو ژی دیار کر کو ژ لایێ دەروونی ڤە تیرۆرستێن داعش زۆر کارتێکرن ل زارۆیان کریە، پشتی ژ بن دەستێ داعش رزگار ژی دبن ئەو زارۆ پێدڤی ھەموو جۆرێن چاڤدانێ و ھاریکاریکرنێ نە، داکو ھزرێن توندرەوێن تیرۆرستێن داعش ژ مێشکی وان بھێنە دەر.

ئەڤرۆ نیوز، ئەمیر ئەترووشی:

بەرپرسێ راگەھاندن و پەیوەندیان ل سەرۆکاتیا باژێرڤانیا دھۆکێ ئاشکرا کر کو ب کۆژمێ ٦٥٠ ملیۆن دیناران پرۆژێ ڤەکرن و قێرکرنا جادێن قەسارا دەستپێکریە و نھا ب رێژا ٤٤% پرۆژە ھاتیە ئەنجامدان.

ئیسماعیل مستەفا، بەرپرسێ راگەھاندن و پەیوەندیان ل سەرۆکاتیا باژێرڤانیا دھۆکێ بۆ ئەڤرۆ نیوز دیار کر کو ئەڤ پرۆژە ب پشتەڤانیا پارێزگەھا دھۆکێ دھێتە ئەنجامدان و ئەڤە دەمێ ھەشت ھەیڤانە دەست ب پرۆژەی ھاتیە کرن، بەلێ چەند ئاستەنگێن کارەبێ و ھێلێن ئاڤێ و قەرەبووکرنا وەلاتیان پەیدابووینە و سەرەرای ھندێ ژی نھا پرۆژە ب رێژا ٤٤% ھاتیە ئەنجامدان و نوکە ژی کا د چێکرنا ڤی پرۆژەی دا یێ بەردەوامە.

ناڤھاتی ئاماژە دا وێ چەندێ کو نھا ڤەکرنا جادان ب دووماھی ھاتیە و ل گەل ڤەکرن و قێرکرنا جادێن قەسارا دێ رێیا سەرەکی ژ زالگەھا ئالوکا و ھەتا دچیتە دناڤ گۆندی ژی دا ھێتە چێکرن و گۆت: “نھا نێزیکی ھزار و ٥٠٠ مالان ل گۆندێ قەسارا دژین و ١٣ کۆلانێن وێ دێ سەر ژ نوو ھێنە ڤەکرن و ھندەک جادە ژی دێ ھێنە قێرکرن”.

ئەڤرۆ نیوز، عەلی حاجی:

ناڤەندا بالا یا ئێکەتیا لاوێن دیموکراتا کوردستانێ ل زاخۆ ب ھەڤکاری دگەل سێ خێرخوازان جلکان ل سەر سێ ھزار زارۆیێن کێم دەرامەت دێ بەلاڤ کەت.

حکمەت محەمەد، بەرپرسێ ناڤەندا زاخۆ بۆ ئەڤرۆ نیوز دیار کر، د پرۆژەکێ خێرخوازی دا وەکو ناڤەندا بالا ل زاخۆ ب ھەڤکاری دگەل سێ خێرخوازێن زاخۆ و ھەولێرێ ئەو دێ جلکان بۆ سێ ھزار زاروویێن کێم دەرامەت ل سنوورێ دەڤەرا زاخۆ دابین کەن و گۆت: “ھەر خێزانەکا د شیانێن وی دا نەبیت جلکان بۆ زارۆیێن خوە د جەژنێ دا دابین بکەت، ب رێیا وی پرۆژەی ئەم دێ بۆ دابین کەین بۆ ھەر خێزانەکێ ھەتا پێنج زارۆیان ئەم دشێین جلکان بۆ دابین بکەین”.

گۆتژی: “ئەو جلکە ژ یێن کچ و کوڕان پێک دھێن، ل گورەی وان خێرخوازان بۆ مە دیار کری کو ئەڤ پرۆژە دێ ل ھەموو جەژنا ھەبیت و ئامادەیا خوە ژی دەربڕیە بۆ جەژنا قوربانێ ژی ھەمان کار ئەنجام بدەن وەکو کارەکێ خێرخوازی بو خێزانێن ھەژار و دەستکورت”.