ئەڤرۆ نیوز:
پشتی کو ئەمریکا سوپایێ پاسداران وەکو هێزەکا تیرۆرستی دا نیاسین وەزارەتا دەرڤە یا سعوودیێ د داخۆیانیەکا فەرمی دا پشتەڤانیا خوە بۆ بریارا ترامپی دیار کر و داخواز ژ جڤاتێ نێڤدەولەتی ژی کر کو ل هەمبەر کریارێن ئیرانێ بێدەنگ نەمینن.
وەزارەتا دەرڤە یا سعوودیێ ئەو یەک ژی دیار کریە کو ب سالانە ئیران پشتەڤانیێ ل رێکخراوێن تیرۆرستی دکەت و رەوشا چەندین وەلاتان ژی ئالۆز کریە، بریارا ترامپی جهێ دلخوەشیێ یە و ئەم ب هەموو رەنگەکێ پشتەڤانیێ لێ دکەین.
ئەڤرۆ نیوز:
ئەڤرۆکە گرۆپەکێ نەنیاس ب ترۆمبێلەکا بۆمبرێژکری هێرشی باژێرێ رەققە کر و ل گۆر زانیاریان د ئەنجاما پەقینێ دا گەلەک ژن و زارۆ بووینە قوربانی و هەتا نها هژمارا دروست یا کوشتی و برینداران ناهێتە زانین.
بەرپرسەکێ هێزێن سووریا دیموکرات ژی بۆ ئاژانسا رویتەرز دیار کریە کو رەنگە پەقین کارێ چەکدارێن رێکخراوا تیرۆرستی یا داعشێ بیت.
ئەڤرۆ نیوز:
بەری دەمەکێ ل باژێرێ سلێمانیێ ل شەقامی سالم کەسەکێ تەقە ل وەلاتیەکێ کر و ب گرانی بریندار بوو و ژ ئالیێ وەلاتیان ڤە گەهاندنە نەخوەشخانێ لێ جانێ خوە ژ دەست دا.
سەرکەفت ئەحمەد پەیڤدار پۆلیسێن سلێمانیێ راگەهاند کو تەقەکەر رەڤیە و هەتا نها نەهاتیە گرتن و ڤەکۆلین ل دۆر روودانێن ژی د بەردەوامن و گۆت: (هەتا نها ناهێتە زانین کو بۆچی وی کەسی تەقە کریە و ناسناما کەسێ کو هاتیە کوشتن ژی دیار نینە و ڤەکۆلین ل دۆر روودانێ د بەردەوامن).
لێ پشتی دەمەکێ هاتە زانین کو تەقەکەر ژ ئالیێ هێزەکا پۆلیسان ڤە ل نێزیکی جهێ روودانێ هاتیە دەستەسەر کرن.
ئەڤرۆ نیوز:
ئەڤرۆ ل دەڤەرا سینا ل وەلاتێ مسرێ د ئەنجاما پەقینەکێ دا هەتا نها ب دەهان کەسان جانێ خوە ژ دەست داینە و گەلەک کەس ژی بریندار بووینە.
بەرپرسەکێ سەربازی یێ مسرێ راگەهاند کو پەقینەکا بهێز ل سینا بوویە ئەگەرێ کوشتنا گەلەک وەلاتیان و گەلەک کەس ژی بریندار بووینە و هەتا نها ئەگەرێ پەقینێ ب دروستاهی ناهێتە زانین و ڤەکۆلین ل دۆر روودانێ د بەردەوامن و پشتی ئاشکرابوونا ئەگەرێ پەقینێ دێ زانیاریێن تەمام بۆ رایا گشتی ئاشکرا کەین.
ئەڤرۆ نیوز، هۆشەنگ تاجر:
روستەم جیهانگیری ئەندامێ سەرکردایەتیا پارتی دیموکراتی کوردستان/ ئیران بۆ ئەڤرۆ نیوز دیار کر کو بریارا ترامپی یا ل دۆر تیرۆرست ناساندنا سوپایێ پاسداران بریارەکا گرنگ و دیرۆکی یە و دێ کارتێکرنا خوە یا ئەرێنی ل سەر خەباتا رۆژهەلاتێ کوردستانێ هەبیت و گۆت: (دەمەکە ئەم چاڤەرێ بریارەکا وەسا بووین، چونکو براستی ژی کریارێن سوپایێ پاسدارێن ئیرانێ ل هەمبەر گەلێ کورد و گەلێن دی یێن ئیرانێ ئاشکرانە و سالانە ب زۆرداری و کوشتنێ نەتەوێن دی ل ئیرانێ بێدەنگ کرینە).
ناڤهاتی ئەو یەک ژی دیار کر کو پشتی ڤێ بریارێ دێ قۆناغەکا نوو ل رۆژهەلاتێ کوردستانێ دەستپێکەت کو ئەو یەک جهێ دلخوەشیا هەموو گەلێن بندەست یێن ئیرانێ ب تایبەتی ژی گەلێ کوردە و ئەم هێڤیدارین ئەمریکا و وەلاتێن دی بەردەوام پشتەڤانیا هێزێن ئۆپۆزسیۆنا ئیرانێ ب تایبەتی ژی پارتیێن رۆژهەلاتێ کوردستانێ بکەن.
ئەڤرۆ نیوز:
ئەڤرۆ هەموو ئەندامێن پەرلەمانێ ئیرانێ ب جلکێن سەربازی یێن سوپایێ پاسدارێن ئیرانێ چوونە پەرلەمانێ وی وەلاتی و دژبەریا خوە ل هەمبەر بریارا سەرۆکێ ئەمریکا یا ل دۆر ب تیرۆرست ناساندنا پاسدارێن ئیرانێ دیار کرن.
عەلی لاریجانی سەرۆکێ پەرلەمانێ ئیرانێ د گۆتارەکێ دا بەری دەمەکێ دیار کر کو پاسدارێن ئیرانێ ل سووریێ و عیراقێ شەرێ تیرۆرێ کرینە و ئەمریکا ژی پشتەڤانی ل تیرۆرستان دکر، بریارا ئەمریکا نیشانا شکەستنا سیاسەتا وی وەلاتی یە و بریارا ئەمریکا چو کارتێکرنێ ل پێگەهێ سوپایێ پاسداران ناکەت.
ئەڤرۆ نیوز ، عەلی حاجی :
کچەکا باژێرێ زاخۆ بناڤێ سومەیە تەحسین نێزیکی ٣٠٠ جل و بەرگێن ھاڤینی یێن زارویان ل سەر زارویێن کەمپا چەمشکو ڤە بەلاڤکرن و دپروژەیێ وێ کەسێ دایە ل وەلاتێ بریتانیا پشتەڤانیا کومکرنا ھاریکاریان بو ئاوارەیان بکەت .
سومەیە تەحسن بۆ ئەڤرۆ نیوز ئاشکەرا کر ھەر چەندە ئەز نوکە ل وەلاتێ بریتانیا خوەجە بویمە ، لێ پشتی من زانی رەوشا ئاوارەیان دناڤ کەمپان دا یا باش نینە وەکو کارەکێ مروڤایەتی رابوم ب کومکرنا کوژمەکێ پارەیی و ئەڤ کوژمێ پارەیی ژی ژلایێ خێزانا من و ھندەک ھەڤالان ھاتە تەرخان کرن ، پشتی من شیایی کوژمەیەکێ پارەیی کومڤە بکەم ئەز رابوم ب دابینکرنا ٣٠٠ جل و بەرگێن زاروکان و من ل سەر زارویێن کومپا چەمشکو بەلاڤکرن وەکو کارەکێ مروڤایەتی .
ناڤھاتی زێدەتر گوت : پشتی ڤەگەرمە وەلاتێ بریتانیا دپروژەیێ مندایە ئەز دگەل رێکخراوێن سڤیل و کوردێن ل وەلاتێ بریتانیا دژین کار بکەم بو کومڤەکرنا پارەیی دا کو بشێم ب رێکا وی پارەیی ھاریکاریان بگەھینینە دناڤ ئاوارەیێن دناڤ کەمپان داد ژین .
ئەڤرۆ نیوز:
فه‌رهاد ئه‌مین ئه‌ترووشى پارێزگه‌رێ دهۆكێ ئەڤرۆ پێشوازیا ھژماره‌كا مه‌ترانێن ئه‌رمه‌نیان ل وه‌لاتێن جیهانێ ب سه‌رۆكاتیا (ئاڤاك ئه‌سادوریان ) سه‌رۆكێ تائیفا ئه‌رمه‌نێن ئه‌رسه‌دوكس ل عیراق و كوردستانێ كر.
د هه‌ڤدیتنه‌كێ دا ب ئاماده‌بوونا چه‌ند كه‌سایه‌تیێن ئه‌رمه‌نیان ل باژێرێ دهوكێ به‌حسێ ره‌وشا سیاسى وئابورى وئه‌منى ل كوردستانێ ب گشتى وپارێزگه‌ها دهوكێ ب تایبه‌تى هاته كرن.
دته‌وه‌ره‌كێ دن دا به‌حسێ ره‌وشا برایێن ئه‌رمه‌ن ل هه‌رێما كوردستانێ ب گشتى ول سنورێ پارێزگه‌ها دهوكێ ب تایبه‌تى وئه‌و گرنگیا حكومه‌تا هه‌رێما كوردستانێ دده‌ته برایێن ئه‌رمه‌نى كو ئه‌وژى پشكه‌كا گرنگا جڤاكێ كوردستانێ نه هاته كرن.
شاندێ مه‌ترانێن ئه‌رمه‌نى سوپاسیا حكومه‌تا كوردستانێ و پارێزگه‌ها دهوكێ كر هه‌مبه‌ر ئه‌و هاریكاریێن بو برایێن ئه‌رمه‌ن پێشكێشكرین نه‌خاسمه ئاڤاكرنا دێرا وب تایبه‌تى كو ل ڤێ دوماهیێ دێره‌ك ل هه‌ولێرا پایته‌خت ئاڤاكریه وبه‌رى نوكه چار دێر ل جهێن جودا ل پارێزگه‌ها دهوكێ ئاڤاكرینه وهاریكاریا ئه‌رمه‌نان كریه وخواست ئه‌ڤ هاریكاریه دبه‌رده‌وامبن .
پارێزگه‌رێ دهوكێ خوشحالیا خو ب سه‌ره‌دانێ دیاركر وپیروزباهیا وه‌لاتیێن ئه‌رمه‌ن كر كو ل روژێن بورى دێره‌كا مه‌زن بو وان ل هه‌ولێرێ هاتیه ڤه‌كرن ول سه‌ر بودجا حكومه‌تا كوردستانێ هاتیه ئاڤاكرن هه‌روه‌سا په‌سنا رولێ برایێن ئه‌رمه‌ن دئاڤاكرنا ده‌ڤه‌رێ دا كر وسه‌ركه‌فتن بو هه‌موویان خواست.
ئه‌ڤرۆ نيوز:
لژنا بلندا دووڤچوونا ده‌رمان و سه‌كته‌رێن ساخله‌ميێ هژماره‌كا ده‌رمانان ل دهۆكێ ده‌سته‌سه‌ركرن ژ ئه‌گه‌رێ وێ چه‌ندێ كو ژێده‌رێ هاتنا وان نه‌يێ ديار بوو.
جه‌هه‌وه‌ر عه‌لى، قايمقامێ قه‌زا دهۆكێ، راگه‌هاند كو پشتى ئاسايشا دهۆكێ ئه‌و ئاگه‌هدار كرين ب هه‌بوونا چه‌ندين ده‌رمانێن نه‌قانوونى، لژنا بلندا دووڤچوونا ده‌رمان و سه‌كته‌رێن ساخله‌ميێ دوهى 8ى نيسانا 2019ێ سه‌ره‌دانا عومباره‌كا ده‌رمانان ل دهۆكێ كر و ئاشكه‌را بوو كو ژێده‌رێن وان ده‌رمانان يێ ديار نينه و هاتنه ده‌سته‌سه‌ركرن و ژناڤبرن و جهێ وان ژى هاته داخستن.
قايمقامێ قه‌زا دهۆكێ گۆتژى: “دێ پێرابوونێن قانوونى ژی د دەرھەقێ خودانێ وێ عه‌مبارا ده‌رمانێن وان هاتينه ده‌سته‌سه‌ركرن دا ھێنە وه‌رگرتن”.
ئه‌ڤرۆ نيوز:
رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند کو سوبەھی رۆژا چارشه‌مبى رێکەفتی 10ى نيسانا 2019ێ ئەسمان دێ ئه‌ورێ ته‌مام بيت ل گه‌ل بارينا بارانێ و بريسى ژى دێ ل گه‌ل دا بن.
پشکا پێشبینیان ل رێڤەبەریا گشتیا کەشناسی و بیڤەلەرزێ ل ھەرێما کوردستانێ د نڤیسارەکێ دا کو دانەک بۆ ئەڤرۆ نیوز رەوانە کرینە راگەھاند کو دهێته پشبينيكرن ئه‌سمان ئه‌ورێ ته‌مام بيت ل گه‌ل بارينا بارانێ و بريسى ژى دێ ل گه‌ل دا بن.
پشکا پێشبینیان دایە زایە زانین کو دێ لەزاتیا بایی د ناڤبەرا 10 ھەتا 20کم دا و ماوێ دیتنێ ژی د ناڤبه‌را 7 بۆ8کم دا بیت، پلێن گەرمێ ژی دێ د ناڤبەرا 7 بۆ 18 پلان دا بن.
نيشاندان