ئەڤرۆ نیوز، نەوزاد هلوری:
پشتی 24 سالان ژ نەچاندنا برنجی ژ ئەگەرێ نەبوونا ئاڤێ و هاریکاریان، جوتیارێن گوندێ بەرچی جارەکا دی دەست ب چاندنێ کرەڤە، هەر چەندە رەمەزانە، بەلێ وەکو جوتیارێن گوندى دیار دكه‌ن کو وان ب شێوازێ زوبارە دەست پێ کریە و بزاڤێ دکەن بەری جەژنێ هەموو برنجێ خوە بچینن.
ئەڤرۆ نیوز, رەزوان رۆژبەیانی:
جوان رۆژبەیانی سەرۆكا لژنا دەڤەرێن كوردستانى یێن دەرڤە یێن ئيدارا هەرێما كوردستانێ ل پەرلەمانێ كوردستانێ ژ فراكسيۆنا پارتى ديموكراتى كوردستان، بۆ ئەڤرۆ نیوز خویاكر لژنا مه ڕاپۆرت و پێزانينێن تەمام یێن وان گوندان ئەوێن ب سەر ناحیە سەرگەڕان ڤەنە ل سنوورێ پارێزگەها كەركوكێ ب دەست مە گەهشتینە ب تایبەت گوندێ پەلكانە كو ب رۆژا رۆناهی خانی ومال وحالێ وان دهێنە داگیركرن و تێكدان ژ ئالیێ عەرەبیێن هاوردە .
جوانى گوت ژی” نوكە ب رەنگەكێ دی رێگری ل خەلكێ گوندی دهێتە كرن و ئەو دڤه‌ر دهێنه تەعریبكرن و رێ ل بەر وان دهێتە گرتن كو گەنمێ خوە ب دورن”.
دیاركر ژى” مە وەك لژنا ده‌ڤه‌رێن كوردستانى يێن دەرڤەى ئێدارا هەرێمی راپۆرتا خوە یا ئامادە كریە و مه دانوستاندن هه‌نه ل گەل فراكسیۆنێین كوردستانی ل بەغدا كو ئەف ئاریشە بهێنه چارەكرن ,بەلێ ئاريشێ باگراوەندەكێ ديرۆكه يێ هەی و تنێ ب پەرلەمانى ناهێتە چارە كرن “.
گوت ژی” ئەف ئاریشە پێدڤی ب هندێ هەیە كو هەموو حزبێن كوردستانی ب ئێك رێزی و ئێك دەنگی بێنە سەر هێل بزاڤێن رژد بكەن كو رەوشا وان دەڤەران بهێته ئاسایی كرن و پێشمەرگە ڤەگەرنە جهێ خوە یێن بەرێ “.
ئاماژه كر” پشتی كو مال و حالێ خەلكێ گوندێ پەلكانە هاتيە داگیركرن و هندەك ژوان ژی ژلایێ هێزێن عیراقی ڤە هاتنە دەستە سەر كرن , ل وی دەمێ سەرۆك بارزانی ب خوە هاتە سەر خه‌ت وئه‌و كه‌سێن هاتينه ده‌سته‌سه‌ركرن هاتنە ئازاد كرن “.
خوياكر” هه‌كه رۆل و هیمەتا سەرۆك بارزانی نەبا، نوكە رەوش خراپ تر و ئالۆزتر ببا، بەلێ هەتا نوكە ژی رەوش نەيا ئارامە و پرۆسەیا تەعریبێ ل وان دەڤەران یا بەردەوامە”.
ئه‌ڤرۆ نیوز:
جێگرێ به‌رپرسێ میحوه‌رێ رۆژئاڤایێ دیجله، هاشم سیته‌یى، راگه‌هاند، پێشمه‌رگه وهێزێن عیراقى ل سه‌ر هه‌ماهه‌نگیێ ودابینكرنا ئاسایشا رۆژئاڤایێ دیجله رێككه‌فتن.
هاشم سیتەیی بۆ مالپه‌رێ فەرمیێ پارتی دیموكراتی كوردستانی گوت: ” ب رێیا باره‌گایێ له‌شكرى یێ سه‌رۆك بارزانى ل سحێلا، سه‌رۆك عه‌شیره‌ت وكه‌سایه‌تیێن عه‌ره‌ب وكورد، چه‌ندین داخوازى گه‌هاندنه سه‌رۆك بارزانى، سه‌رۆكى ژى سۆز دایێ هه‌موو وان داخوازیان بجهبینیت وكار ژى بۆ پاراستنا خه‌لكێ وێ ده‌ڤه‌رێ بهێته كرن، وه‌كو چاوان به‌رى نوكه ژى هاریكاریا خه‌لكێ وان سنووران كریه”.
سیته‌یى گۆت ژى”هه‌ر ب بزاڤێن سه‌رۆك بارزانى، رێیا سحێلا وزومار هاته ڤه‌كرن وئه‌ڤه ژى دێ بیته ئه‌گه‌ره‌ك بۆ وێ چه‌ندێ لڤین وهاتنوچوون ل وێ ده‌ڤه‌رێ زێده‌تر ببیت”.
دیاركر” ئه‌م وفرقا 15 یا له‌شكرێ عیراقێ ل دۆر چه‌ندین خالێن له‌شكرى وگرێداى خه‌لكێ ده‌ڤه‌رێ رێككه‌فتین، گاڤا ئێكێ ژى ڤه‌كرنا رێیا سحێلا وزومار بوو، پاشى دێ هه‌ماهه‌نگیێ كه‌ین بۆ روو ب رووبوونا لڤینێن داعشێ وپركرنا هه‌ر ڤالاتیه‌كا ئه‌منى ل ڤێ ده‌ڤه‌رێ هه‌بیت”.
ئه‌ڤرۆ نيوز:
مالپه‌ره‌كێ ئيسرائيلى ئه‌ڤرۆ چارشه‌مبى 22/5/2019 به‌لاڤكر كو برياره به‌رپرسێن ئه‌مريكى وئيرانى ب شێوه‌كێ نهێنى ل عيراقێ يان قه‌ته‌ر ژبۆ كێمكرنا گرژيێ د ناڤبه‌را ئيرانێ وئه‌مريكا دا كۆمببن.
مالپه‌رێ (دێبكا) كو يێ نێزيكه ژ هه‌والگيريا ئيسرائيلى، به‌لاڤكر” وه‌لاتێ قه‌ته‌ر يان عيراق دێ مێهڤانداريا وێ كۆمبوونا د ناڤبه‌را به‌رپرسێن ئه‌مريكى وئيرانى كه‌ت ب ئارمانجا ديتنا رێ چاره‌كێ بۆ كێمكرنا گرژيان، ب جۆره‌كى هه‌ردو وه‌لات بشێن گاڤێن كريارى بۆ ب دووماهى ئينانا ناكۆكيێن درێژخايه‌ن ببينن”.
وى وى مالپه‌رێ دياركر ژى كو په‌يوه‌نديا نێڤده‌وله‌تى يا نهێنى د ناڤبه‌را ته‌هرانێ وواشنتۆن دا ده‌ستپێكر، به‌لێ هێشتا نه‌گه‌هشتينه رادا كێمكرنا گرژيێن له‌شكرى د ناڤبه‌را واندا، سه‌ره‌راى وێ چه‌ندێ كو دونالد ترامپ سه‌رۆكێ ئه‌مريكا دووپاتكر كو ناخوازيت شه‌رى ل گه‌ل ئيرانێ هه‌لكه‌ت، ب هه‌مان شێوه عه‌لى خامه‌نه‌ئى رێبه‌رێ ئيسلامى يێ ئيرانێ ژى گۆتبوو كو شه‌ر ل گه‌ل ئه‌مريكا ناهێته ئه‌نجامدان.
ئه‌ڤرۆ نيوز:
رێڤه‌به‌ريا گشتى يا هاتنوچوونێ ل هه‌رێما كوردستانێ برياره‌كا نوو بۆ ره‌نگ وتابلۆيێ وان ته‌كسيان ده‌ردكه‌ت كو ژ نوكه و وێڤه كارێ ته‌كسيان پێ ناهێته كر ودێ هێنه گوهۆرين ب ترومبێلێن تايبه‌ت ودووپات دكه‌ت كو دێ ژ هه‌موو رسوماتێن تۆماركرنێ وژنگه‌هێ و رێ وپران هێنه لێبۆرين.
رێڤه‌به‌ريا ناڤبرى د رۆهنكرنه‌كێ دا ئاماژه كر كو سه‌باره‌ت وان تاكسيێن ژ نوكه و وێڤه حه‌زا كارێ ته‌كسيان نينه، هاتيه به‌رچاڤكرن كو دشێن تابلۆيێن خوه بكه‌نه تابلۆيێن تايبه‌ت وژ هه‌موو رسوماتێن تۆماركرن وژينگه‌هێ ورێ و پران بهێنه لێبۆرين، ب ڤى شێوه‌ى:
1- ل ده‌مێ گوهۆرينا ترومبێلا تاكسى بۆ ترومبێلا تايبه‌ت، پێدڤى ب گرمركێ ناكه‌ت ژ به‌ركو ئه‌و ترومبێل به‌رى نوكه هاتينه تۆماركرن، تنێ د ده‌مه‌كى دا هه‌مه ترومبێلێ كێشه د هژمارا لاشى يان پلێتا كابينێ دا هه‌بوو، دێ هێته هنارتن بۆ گۆمركێ.
2- سه‌باره‌ت رسوماتێن تابلۆى، تنێ رسوماتێن چاپا تابلۆى دێ هێنه وه‌رگرتن كو 50 هزار دينارن.
3- سه‌باره‌ت ره‌نگێ ترومبێلان ژى، خودانێن وان د ئازادن ب ره‌نگكرنا هه‌موو ترومبێلێ بۆ ره‌نگه‌كێ دى يان تنێ سه‌قفێ ترومبێلێ بره‌نگه‌كى دى ره‌نگ بكه‌ت.
4- كار ب مادێ 8 ژ قانوونا هاتنوچوونێ يا هژمار 86 يا سالا 2004 بهێته كرن.
ئه‌ڤرۆ نيوز:
وه‌زاره‌تا پێشمه‌رگه ل دۆر دوسێيا پێشمه‌رگێن كێمئه‌ندام، ئه‌ڤرۆ چارشه‌مبى 22/5/2019 رۆهنكرنه‌ك بۆ رايا گشتى به‌لاڤكر.
فه‌ريق( جه‌بار ياوه‌ر) ئه‌ميدنارێ گشتيێ وه‌زاره‌تا پێشمه‌رگه راگه‌هاند” ده‌نگوباسه‌ك ل هنده‌ك كه‌نالێن راگه‌هاندنێ ب شاشى هاته به‌لاڤكرن كو لژنه‌كا نوشدارى هاتيه دامه‌زراندن وجاره‌كا دى دێ پێداچوونێ ب دوسێيا كێمئه‌ندامان دا كه‌ت”.
گۆت ژى بۆ راستكرنا ڤى ده‌نگوباسێ شاش، ديار دكه‌ين كو ئه‌ڤ لژنا نوشدارى بۆ ده‌مێ دو سالانه هاتيه دامه‌زراندن وكارێن وێ يێن د قۆناغێن دووماهيێ دا وچاڤپێكه‌فتن ل گه‌ل زێده‌تر ژ 9 هزار كێمئه‌ندامێن پێشمه‌رگه كريه ول 1/7/2019 دێ دووماهيێ ب كارێن خوه ئينيت وب چو شێوه‌كى چاڤپێكه‌فتنا كێمئه‌ندامان دوباره نابيت، به‌لكو بريارێن ڤێ لژنێ ب فه‌رمانێ فه‌رمى يا سه‌رۆكاتيا جڤاتا وه‌زيران ووه‌زاره‌تا پێشمه‌رگه دێ هێنه بجهئينان.
ئەڤرۆ نیوز، مەحمود نهێلی:
کومپانیا فه‌یسبوکی گەنجەکی ناحیا دێرەلۆک ب ناڤێ (نیهاد میکائیل) داخواز دکەتە ئاهەنگا لاس فیگاس ل ئه‌مریكا ژ بەر چارەسەرکرنا چەندین ئاریشێن د دسیستەمێ فه‌یسـبوکی دا هەین.
نیهاد میکائیل، بۆ ئەڤرۆ نیوز دیار کر، کو تانوکە ئەو شیایە پێنج ئاریشێن د سیستەمێ فه‌یسبۆکی دا ئاشکرا بکەت و گۆت : ژبەر ڤێ یەکی ژی كۆمپانیا فه‌یسبوكى ئەز داخواز کریمە ئاهەنگەکی ل لاس فیگاس کو دێ ل حەفتێ تەباخا ئەڤ سالە هێتە گێران.
دیار ژی کر کو وی دشەرێ داعشێ 3 سایت و400 ڤیدیۆیێن وێ رێكخراوا تیرۆرستى ژناڤبر بوون.
ئەڤرۆ نیوز، ئەمیر ئەترووشی:
سەرۆکێ باژێرڤانیا زاخۆ راگەھاند، ب جوانترین شێواز پارکەکا مۆدێرن بۆ دانعەمرێن زاخۆ دھێتە دروستکرن و د قووناغێن دووماھیێ دایە و ل دەمەکێ نێزیک دێ کەڤیتە د خزمەتا دانعەمرێن زاخۆ دا.
ئەندازیار بژار مونیب، سەرۆکێ باژێرڤانیا زاخۆ بۆ ئەڤرۆ نیوز دیار کر، ئەو مژوولی دروستکرنا پارکەکا مەزنن ل قەزا زاخۆ بناڤێ پارکا (ئازادی) کو دێ یا تایبەت بیت ب دانعەمران ڤە و ئەڤە ژ پرۆژێن ھەرە گرنگ ل زاخۆ دھێتە قەلەمدان، پارکا دانعەمران دکەڤیتە سەنتەرێ قەزا زاخۆ ل بەر لێڤا خابیرێ زاخۆ ب درێژاھیا ١٥٠ مەتران و ٢٠ مەتران یا فرەھە و نافورێن ئاڤێ تێدا ھەنە و کەسکاتی تێدایە و کۆژمێ ٥٢٠ ملیۆن دیناران بۆ ھاتینە تەرخانکرن و خوارنگەھـ و کافیتریا ل ناڤا پرۆژەی دا ھەنە.
ل دۆر پلانێن باژێرڤانیا زاخۆ بۆ داھاتی ناڤبری گۆت: “مە پلانا ھەی بۆ سالا داھاتی مەزنترین پارک ل زاخۆ دروست بکەین، رووبەرێ وێ ١٥٠ دوونەمە و ھەتا نوکە قەزا زاخۆ پێنج پارکێن باش ھەنە بۆ خەلکی و جھێ ئارامیا وەلاتیان”.
ئەڤرۆ نيوز، ئەمیر ئەترووشی:
رێڤەبەرێ سەخبێری و پاراستنا رێک و پران ل پارێزگەھا دھۆکێ راگەھاند، رازیبوون ل سەر چێکرن و سەخبێریکرنا چەپێن زرێزە ھاتیە کرن و ل دەمەکێ نێزیک دێ دەست ب چێکرنا وان ھێتە کرن و ئەو ئاریشە دێ ھێتە چارەکرن.
ئەندازیار دێوالی حەمێ بریندار، رێڤەبەرێ سەخبێری و پاراستنا رێک و پران ل پارێزگەھا دھۆکێ بۆ ئەڤرۆ نیوز دیار کر کو چەپێن زرێزە ئەڤە بۆ جارا گەلەکێ یە د ھڕیێن و ژناڤ دچن و ئەڤە بۆ ماوێ سێ ھەیڤانە ترۆمبێلێن رێڤەبەریا مە ل وێرێ ماینە بۆ ھندێ ھەر چو نەبیت رێکێ بۆ ترۆمبێلان خۆشبکەن کو ھاتنوچوونێ بۆ جھێن پێدڤی و فەر بکەن و گۆت: “رازیبوون ل سەر سەخبێریکرنا چەپێن زرێزە ھاتیە کرن و نھا ئەم چاڤەڕێی بودجەیا پێدڤی دکەین بۆ سەخبێریکرنا وان”.
رێڤەبەرێ سەخبێری و پاراستنا رێک و پران ل پارێزگەھا دھۆکێ ئاشکرا ژی کر کو ئەو نەشێن نھا چو رێیێن دی یێن پێگوھۆر ل شوونا وێ چێکەن، چونکو بودجەکا مەزن بۆ دڤێت و جە ژی نینە چو رێیێن دی بھێنە چێکرن و گۆت: “مە داخوازا ٧٠ ملیار دیناران ژ حوکمەتا ھەرێما کوردستانێ کریە بۆ سەخبێریکرنا گشت رێ و پرێن پارێزگەھا دھۆکێ”.
نيشاندان