ئەڤرۆ نیوز، نەوزاد هلۆری:
نانێ تەنیرێ ئێکە ژ نانێن کوردەوای کو ل پتريا گوند و دەڤەرێن کوردستانێ دهێتە پاتن، نوکە کو رەمەزانە، خەلکێ گوندان هەموو ئیڤاران نانێ تەنیرێ دپێژن ژبەرکو تامەکا تایبەت هەیە و ساخلەمە. گوندێ (خاستو ژووری) ژی ئێکە ژ وان گوندێن سنوورێ ناحیا شێلادزێ کو نانێ تەنیرێ ژلایێ کابانین مالێ دهێتە دروستكرن.
ئەڤرۆ نیوز ، زنار تۆڤی:
وەسا بریارە ئەڤ شەڤە فلمێ دکیومێنتاری روو ب روو بوونا مرنێ ب کەتەری یێ دەرهێنەر (سەروەر عەبدوللا) ل هۆلا رێڤەبەریا رەوشەنبیری و هونەری ل سێمێلێ بهێتە نیشاندان.
دەرهێنەرێ فلمێ کیومێنتاری روو ب روو بوونا مرنێ ب کەتەری ب کەتەری سەروەر عەبدوللا بۆ ئەڤرۆ نیوز گۆت: ئەڤە ئێکەم جارە ئەڤ فلمە ل دەڤەرا بەهدینان د هێتە نیشاندان، کو ئەڤ فلمە یێ ئەندازەیا سەربازی یا پێشمەرگەیە، کو هەموو قارەمان و پشکدارێن ڤی فلمی ئەفسەر و پێشمەرگێن سەر ب کەتیبەیا ناڤبری ڤەنە، ماوێ فلمی (45) خولەکن، ل پرانیا میحوەرێن شەری د ماوەیێ دو سال و نیڤا دا هاتیە وێنەکرن، هەروەسا د دەمێ وێنەکرنێ دا بمخابنیڤە سێ ژ قارەمانێن فلمی شەهید دبن، و ئێك ژی بریندار دبیت دبیتە پەککەفتی، فلم ب گشتی کورتیەکە ل سەر قارەمانی و لێهاتی و گیان فیداییا پێشمەرگێن کوردستانێ، ل شەرێ دژی تیرورستێن داعش، کارێ ڤێ تیمێ راکرن و ژناڤبرنا بومب و مینێن داعشێ یە، ئەڤ فلمە وان ئاستەنگ و زەحمەت و مەترسیێن دکەڤنە درێیا ڤێ تیمێ دا ددەتە دیار کرن.
دەرهێنەرێ ڤی فلمی دبێژیت ژی: هەرچەندە کارەکێ گەلەک مەترسیدار بوو و گەلەک ئاستەنگ هەبوون بۆ چێکرنا فلمەکی دناڤا بومب و مینا دا و دناڤ تەکتیکێن داعشێ یێن سەردەم دا، بەلێ ئەز یێ رژد بووم ڤی فلمی بەرهەم بینم و تمام بکەم و هەمی وان روووب روو بوونێن ل گەل مرنێ ب چەند کەل و پەلێن سادە مینا کەتەر و شەفرە و چەقویا دڤی فلمی دا دکیومێنت بکەم و نیشا جیهانێ بدەم، هەتا نوکە ئەڤ فلمە ل چەندین ولاتێن جیهانی هاتیە نیشاندان، هەروەسا هەتا نوکە 16 خەلاتێن نێڤدەولەتی وەرگرتینە.
ئەڤرۆ نیوز:
ھەر ژ خوسارەتیا بەرامبەر لیڤەرپول ژ پێش دووماھیا قارەمانیا چامپیونیز لیگ مەترسی کەڤتیە سەر دورخستنا راھێنەرێ یانا بەرشەلۆنا ڤالڤێردی ھەر چەندە گەلەک جاران ئاماژە ب وێ چەندێ ھاتیەکرن کو ئەو راھێنەر دێ یێ بەردەوام بیت ل گەل یانێ لێ دبیت پشتی یاریا کاسا شاھێ ئیسپانیا چەند بریاریێن نە چاڤەرێکری بھێنەدانێ.
بەرنامەیێ شرینجیتو یێ وەرزشی ل ئیسپانیا دیارکریە بەرشەلۆنا ب مەرجەکی ڤالڤێردی دێ شێت بوو وەرزێ بھێت ل گەل بەرشەلۆنا یێ بەردەوام بیت ئەوژی ھەکە ناسناڤێ کاسا شاھێ ئیسپانیا ب دەستخوڤە ئینا و ھەکە نەشیا وی ناسناڤی ب دەستخوڤە بینت وی دەمی ب رێژەیا ھەرە مەزن کارگێریا یانا بەرشەلۆنا دیچ بریارا دورخستنا ئەوی دەت سەرەرای برنا ناسناڤێ خولێ ل وەرزێ ئەڤ سالە ب جوداھیەکا مەزن ل گەل یانا ریال مەدرید لێ کارگێریا یانێ مەرجەک دانایە بەر مانا وی ئەوژی برنا کاسا شاھێ ئیسپانیا.
ئەڤرۆ نیوز:
چاڤەرێ دھێتەکرن سوباھی ل دەمژمێر چار پشتی ئێڤاری یانا ھەولێر نوونەرا ھەرێما کوردستانێ د خولا پلا نایاب یا عیراقێ دا یاریا خوە یا حەفتیا ٢٨ ژ خولێ ل گەل یانا دیوانیە بکەت ل یاریگەھا عەفک یا تایبەت ب یانا دیوانیە ڤە .
یانا ھەولێر ئەوا نوکە د رەوشەکا لاواز دا بوریت تایبەت پشتی دەستپێکرنا یاریێن قوناغا دوێ ژ خولێ کو ل سەرجەمێ ٨ یاریێن بوری ئێک سەرکەفتن تومارکریە ل گەل دو و توشی پێنچ خوسارەتیا ژی بوویە کو پێنچ خال کومکرینە د قوناغا دوێ دا.
ژلایەکێ دیڤە یانا دیوانیە ب سەرکێشیا راھێنەرێ خوە و ستێرا بەری نوکە یا ھەلبژارتیێ عیراقێ و یانا جەویە رەزاق فەرحان شیا ئاستەکێ باش دڤێ قوناغێ دا پێشکێش بکەت کو سەرجەمێ ھەشت یاریێن خوە ١٤ خال کومکرینە کو چار سەرکەفتن ل گەل دو وەکھەڤی و دو خوسارەتی ھەنە دڤێ قوناغێ دا.
ھەژی گوتنێ یە نوکە یانا ھەولێر ل رێزا ١٢ دھێت د لیستەیا خولێ دا ب ٣٢ خالان و دیوانیە ل رێزا ١٤ دھێت ب ٣٠ خالان
ئەڤرۆ نیوز:
مالپەرێ ھوسکورد یێ وەکو ھەر سال باشترین پێکھاتیێ سالانە ل سەر ئاستێ خولێن ئورۆپی ئاشکراکر و ل وەرزێ ئەڤ سالە ژی باشترین پێکھاتیێ سالێ یێ خولا لالیگا ئیسپانیا بوو وەرزێ ٢٠١٨-٢٠١٩ دیارکر کو یاریزان ھاتینە ھەلبژارتن ل سەر ئامارێن تایبەت ب یاریزانی ڤە یێن کرنا وەرزەکی ل وێ خولێ کو ل پێکھاتیێ ئەڤ سالە چار یاریزانێن یانا بەرشەلۆنا ل گەل دا بوون و دو ژ ئەتلەتیکو مەدرید و دو ژ ئیبار ھەردیسان ئێک ژ یانێن ئالاڤێس و ڤالنسیا و سالتاڤیگو کو د پێکھاتیێ ئەڤ سالە دا چ یاریزانێن یانا ریال مەدرید خودانا رێزا سیێ د لیستا خولێ دا نە ھاتنە دیتن.
پێکھاتیێ ژلایێ ھوسکورد ھاتیە ھەلبژارتن ب ڤی رەنگێ خوارێ بوو.
گولچی ئوبلاک ژ یانا ئەتلەتیکو مەدرید
ھێلا بەرەڤانیێ پیکێ ژ بەرشەلۆنا و مارپیان ژ ئالاڤێس و پینا و کوتی ژ ئیبار .
ھێلا ناڤین میسی و دیمبیلی ژ بەرشەلۆنا و پارێخو ژ ڤالنسیا و رودرێگو ژ ئەتلەتیکو مەدرید.
ھێلا ھێرشبەریێ سوارێز ژ بەرشەلۆنا و ئەسپاس ژ سالتاڤیگو .
ئەڤرۆ نیوز:
چاڤەرێ دھێتەکرن ب فەرمی ل چەند رۆژێن بھێت ب فەرمی یاریزانەکێ یانا بەرشەلۆنا پێکھاتیێ وێ یانێ ب جهـ بھێلت و بەر ب یانەکا دی ڤە بچیت بوو وەرزێ بھێت سەرەرای .
رۆژناما موندو دیپورتیپو یا کەتەلونی ئاشکراکریە یاریزانێ بەرازیلی مالکوم بریارە پشتی یاریا دووماھیا کاسا شاھێ ئیسپانیا ئەوا چاڤەرێ دھێتەکرن ل ٢٥ ڤێ ھەیڤی بھێتەکرن پێکھاتیێ یانا بەرشەلۆنا ب جە بھێلت سەرەرای وێ چەندێ کو ب رێژەیەکا باش راھێنەرێ وێ یانێ ل وەرزێ ئەڤ سالە پشت بەستن ل سەر شیانێن ئەوی یاریزانی کربوو لێ ئەو یاریزان دخوازیت بەر ب یانەکا دیڤە بچیت پتر دەلیڤەیا کرنا یاریێ بوو ھەبیت و بەردەوام ب شێوەیەکێ سەرەکی یاریێ بکەت.
ئەوێ رۆژنامێ دیارکریە ژی ئەو یاریزان ل سەر چونا خوە یا رژدە و بەرشەلۆنا ژی نابیتە رێگر د رێیا فروتنا ئەوی دا لێ مەرجەک ھەیە ئەوژی ھەر یانەکا ب خوازیت ھەڤبەستێ ل گەل ئیمزا بکەت پێدڤی وی کوژمێ پارەی پێشکێشی یانێ بکەت ئەوێ ل وەرزێ بوری ئەو یاریزان ژ یانا بوردو یا فرەنسی ڤەگوھاستی کو ٤٠ ملیون یورۆنە .
ل دووماھیێ وێ رۆژنامێ ناڤێ دو یانان ئاشکراکریە کو ھەڤرکیێ ل سەر دەستڤە ئینانا ئەوی یاریزانێ گەنچ یێ بەرازیلی دکەت کو ئەوژی یانێن ئەرسینال و توتنهام یا ئنگلیزی و بروسیا دورتموند یا ئەلمانی .
ھەژی گوتنێ یە مالکوم یێ ٢٢ سالی ل ھاڤینا بوری ب کوژمێ ٤٠ ملیون یورۆیا ژ یانا بوردو یا فرەنسی ھاتبوو دناڤ رێزێن بەرشەلۆنا و ل وەرزێ ئەڤ سالە پشکداری د ٢٣ یاریان دا کریە ل گەل وێ یانێ کو ١٥ ژ ئەوان دخولا لالیگا دا بوون و ٣ قارەمانیا چامپیونیز لیگ و پێنچ د کاسا شاھێ ئیسپانیا .
ئەڤرۆ نيوز:
ناڤێ دو ھزار و ٥٢٦ کەسان کو ژ سێیێن ئێکێ یێن زانکۆ و پەیمانگەھێن ھەرێما کوردستانێ نە، نوکە ل جڤاتا وەزیرێن ھەرێمێ نە و چاڤەڕێی دەرخستنا فەرمانەکێ دھێتە کرن کو بھێنە دامەزراندن.
بڕیار ئەوە د کابینا نوو یا حوکمەتا ھەرێما کوردستانێ دا، ئەڤ بابەتە بھێتە چارەکرن و فەرمانا دامەزراندنێ ل دووڤ پێدڤیا وەزارەتان بۆ وان دەرچوویان بھێتە دەرخستن.
د سالا خواندنێ یا ٢٠١٥ – ٢٠١٦ دا سێ ژ دەرچوویێن ئێکێ یێن زانکۆ و پەیمانگەھێن حکومی ل ھەرێما کوردستانێ کو ھژمارا وان ھزار و ٣٦٩ کەس بوون و بۆ سالا ٢٠١٦ – ٢٠١٧ ژی ھزار و ١٥٧ کەس بوون و ھەتا نوکە نەھاتینە دامەزراندن.
وەکو دیار د چەند سالێن بۆری دا وان دەرچوویان چەندین جاران خوەنیشادان دکرن و داخوازا دامەزراندنێ دکر.
ل دووڤ پێزانینان، ل رۆژا ١٥/٤/٢٠١٩ ل جڤاتا وەزیرێن ھەرێمێ نوونەرێ دەرچوویێن ئێکێ ھاتیە ئاگەھدارکرن کو پشتی دەست بکاربوونا کابینا نوو یا حوکمەتێ، فەرمانا دامەزراندنا وان دێ ھێتە دەرخستن.
نەزھەت سالح، شیرەتکارێ قوتابی و خواندنا بلند ل سەرۆکاتیا جڤاتا وەزیران بۆ (باس) گۆت: “ناڤێ سێ دەرچوویێن ئێکێ یێن زانکۆ و پەیمانگەھێن حکومی یێن ھەرێما کوردستانێ ل دیوانا جڤاتا وەزیرانە، ب پشتڕاستی ڤە د کابینا نوو یا حوکمەتا ھەرێما کوردستانێ دا، ئەڤ بابەتە دێ ھێتە ئێکلاکرن و ل گۆرەی پێدڤیێ دێ ھێنە دامەزراندن”.
نەزھەت گۆتژی: “گەلەک ژ زانکۆ و پەیمانگەھان پێدڤی ب دامەزراندنا دەرچوویێن ئێکێ یا ھەی، بەلێ مەرج نینە ھەر سێ دەرچوویێن ئێکێ بھێنە دامەزراندن، چونکو دێ بیتە بارگرانی بۆ حوکمەتێ”.
ئەڤرۆ نیوز، بارزان مزووری:
بەرپرسێ لقێ ٢٠ شێخان یێ پارتی دیموکراتی کوردستان بۆ ئەڤرۆ نیوز دیار کر، پشتی ئەنجامێن ھەلبژارتنێن پەرلەمانێ عیراقێ ھاتینە راگەھاندن وەسا دیاربوو کو بەربژارا لقێ ٢٠ شێخان (دکتۆرا خالیدا خەلیل) یا سەرکەفتی بوو، بەلێ پشتی بۆرینا چەند رۆژان ل سەر راگەھاندنا ئەنجامان بەربژارا مە ھاتە ئاگەھدارکرن کو ئەو دەرنەکەفتیە و بەربژارەکێ دی جھێ وێ گرت.
مەحمود ئێزدی، بەرپرسێ لقێ ٢٠ شێخان یێ پارتی دیموکراتی کوردستان ئاشکرا کر، دکتۆرا خالیدا بێ ھیڤی نەبوو و سەرکردایەتیا پارتی دیموکراتی کوردستان و بارەگایێ بارزانی پێ ئاگەھدارکرن و گۆت: “بەردەوام سەرکردایەتیا پارتی دیموکراتی کوردستان و بارەگایێ بارزانی ل سەر خەتی بوون ژ بۆ ئەگەرێن دەرنەکەفتنا وێ دانە دادگەھا فیدرالی یا عیراقێ، پشتی دادگەھێ پێداچوون د بادەکا وێ دا کری گەھشتە ئەنجامەکێ دروست کو ئەو بەربژار جھێ خو بکەت د ناڤ پەرلەمانێ عیراقێ دا، ل رۆژا ٢٠/٥/٢٠١٩ دادگەھا فیدرال بڕیار دا بابەتێ دکتۆرا خالیدا خەلیل ئێکلا کر وەکو کچەکا پەرلەمنتارا ئێزدی ھاتە دانان”.
ناڤھاتی خویا کر ل ڤان دو رۆژێن بھێن دێ سووندا قانوونی ل پەرلەمانێ عیراقێ خوینیت و ل سەر ب لیستا پارتی دیموکراتی کوردستان بیتە پەرلەمانتار و دەست بکاری کەت و گۆت: “ئەم یێن ھاتینە ئاگەھدارکرن ژ لایێ دەزگەھێ ھەلبژارتنێن پارتی ڤە کو دکتۆرە خالیدا بھێتە ئاگەھدارکرن، ھیڤیدارین وەکو کچەکا کوردا ئێزدی رۆلێ خوە ببینیت، ژ بەرکو ئەڤە ئێکانە پەرلەمنتارا کچا ئێزدی یە ل سەر لیستا پارتی دیموکراتی کوردستان”.
ئەڤرۆ نیوز، مەحمود نھێلی:
ژ بۆ گەھاندنا داخوازیێن خوە ھژمارەکا گەنجێن ئامێدیێ دەست ب کۆمکرنا ئیمزایان کرینە و وەک یاداشتەک رادەستی جھێن شولە ژێ کرینە.
چالاکڤان مراد محەمەد ئامێدی وەک رێکخەرێ کۆمکرنا ناڤ و ئیمزایان بۆ ئەڤرۆ نیوز دیارکر کو ژ بۆ داخوازکرنێ ل سەرڤەکرنا زانکۆیا پولیتەکنیک ل قەزا ئامێدیێ و گۆت: (مە داخوازا خوە گەھاندیە راگرێ پەیمانگەھا تەکنیکی یا ئامێدیێ کو دو پشکێن زانستی بۆ ھاولاتیێن دەڤەرێ بکەنە کولیژا پولیتەکنیک، چونکو دخوازیەکا زێدە ل سەر ھەیە و ھاولاتی دخوازن باوەرنامێن خوە بلندتر لێ بکەن).
ناڤھاتی دیار ژی کر دەڤەرا ئامێدیێ گەلەک یا پێدڤی ب ڤان پشکانە ئەو ژی پشکا کارگێری کار و IT مە داخوازا خوە گەھاندیە قایمقامیا قەزا ئامێدیێ و لقا ١٨ و جێگرا سەرۆکا فراکسیۆنا پارتی ل پەرلەمانێ کوردستانێ و گۆت: ( بو ڤێ مەرەمێ ئەم شیاینە پتر ژ ١٢٠ ئێمزایان کۆم بکەین پتریا وان ژی فەرمانبەرن حەزا خواندنێ ھەیە ل دەمێ ئێفاریان).
ئەڤرۆ نیوز:
ئه‌ڤرو سپێدێ 21-5-2019ل كوچكا مێهڤانداریا فه‌رهاد ئه‌مین ئه‌تروشى پارێزگه‌رێ دهوكێ پێشوازیا به‌رێز (ماركوس ریته‌ر ) سه‌روكێ شاندێ ئێكه‌تیا ئه‌ورپا یێ شیره‌تكارى وچاكسازیكرنێ دكه‌رتێ ئه‌منیا ئیراقێ دا كر.
دهه‌ڤدیتنه‌كێدا ب ئاماده‌بونا چه‌ند به‌رپرسێن ئێمناهیێ ل پارێزگه‌ها دهوكێ به‌حسێ ره‌وشا دام وده‌زگه‌هێن ئێمناهیێ ل پارێزگه‌هێ وئه‌و خزمه‌تا دبوارێ ئێمناهیێدا پێشكێش دكه‌ن ب گشتى هاته كرن.
دته‌وه‌ره‌كێ دن دا به‌حسێ به‌رنامێن شاندێ ئێكه‌تیا ئورۆپا یێ شیره‌تكارى وچاكسازیكرنێ دكه‌رتێ ئێمناهیدا وچاوانیا هاریكاریكرنا سازیێن ئێمناهیێ ل پارێزگه‌هێ دبیاڤێ پێشئێخستنا شیانێن پیشه‌یى یێن كارمه‌ندێن ئێمناهیێ دا هاته كرن.
سه‌روكێ شاندێ ئێكه‌تیا ئورۆپا یێ شیره‌تكارى وچاكسازیكرنێ دكه‌رتێ ئه‌منیا ئیراقێ دا ته‌كه‌زكر كو هاتینه ژنێزیك ره‌وشا سازیێن ئێمناهیێ ل پارێزگه‌هێ بزانن پاش ب رێكا به‌رنامێن تایبه‌ت هاریكاریا كه‌رتێ ئێمناهیێ بكه‌ن كو باشتر خزمه‌تێ پێشكێش بكه‌ن.
پارێزگه‌رێ دهوكێ خوشحالیا خو ب سه‌ره‌دانا شاندێ ناڤبرى دیاركر وچه‌ند رونكرن دانه سه‌ر هه‌یكه‌لیتا سازیێن ئێمناهیێ و به‌رهه‌ڤیا پارێزگه‌هێ نیشان دا بو هه‌ر هه‌ڤكاریه‌كێ دگه‌ل تیمێ ئێكه‌تیا ئه‌ورپا یێ شیره‌تكارى وچاكسازیكرنێ دكه‌رتێ ئه‌منیا ئیراقێ دا بو وێ یه‌كێ كار وئه‌ركێن سازیێن ئێمناهیێ ل پارێزگه‌هێ باشتر بهێنه ئه‌نجامدان.
نيشاندان