ئەڤرۆ نیوز:
سەرۆک کۆمارێ نوو یێ ئوکرانیا راگەهاند کو دڤێت ئەمریکا بەردەوام بیت ل سەر سزایێن کو بەری نها ل سەر روسیا سەپاندی، چونکو روسیا ب هەموو رەنگەکێ بزاڤا ئالۆزکرنا رەوشا ناڤخوەیی یا ئوکرانیا ددەت و ئاریشێن مە ل گەل وی وەلاتی د بەردەوامن.
ڤیلادەمیر زیلینسکی سەرۆکێ ئوکرانیا ئەو یەک ژی دیار کر کو ئەمریکا هەڤپەیمانێ مە یێ سەرەکی یە و بێگومان سزادانا روسیا ژ ئالیێ ئەمریکا بۆ مە وەکو ئوکرانیا نها گەلەک گرنگە.
ئەڤرۆ نیوز، قائید میرۆ:
پڕۆژێ بجە ئینانا رێیا دھۆک – ھەولێر ل سنوورێ پارێزگەھا ھەولێرێ ژی ھاتیە دەستپێکرن و بەرپرسەکێ وەزارەتا ئاڤاکرن و ئاکنجی کرنێ ژی دبێژیت، ئەڤ پرۆژە دێ د دەمێ خوە دا ب دووماھی ھێت و کەڤیتە کاری.
سدقی ئامێدی، بریکارێ وەزارەتا ئاڤاکرنێ بۆ رێک و پرا بۆ ئەڤرۆ نیوز دیار کر کو ئێک ژ ئەڤان پرسێن حوکمەتا ھەرێما کوردستانێ زۆر گرنگیێ پێ ددەت چێکرنا رێیا د ناڤبەرا ھەولێر و دھۆکێ دا یە و ل سنوورێ دھۆکێ رێژەکا باش یا ھاتیە بجە ئینان و گۆت: ” ئەم یێ خەمەکا زێدە دخۆین بۆ تەمام کرنا پڕۆژێ رێیا سەرەکیا ھەولێر – دھۆک نوکە کار یێ بەردەوامە تێدا، بەری نوکە ل سنوورێ دھۆکێ زووتر دەستپێکر و کارێ کۆنکریتی یێ بەر ب دوماھیێ دچیت”.
ناڤھاتی ئاماژە دا وێ چەندێ کو چەند رۆژەکە ل سنوورێ پارێزگەھا ھەولێرێ ژی دەست ب پڕۆژێ رێکێ ھاتیەکرن ھەر ل سەنتەرێ باژێڕی ھەتا دگەھیتە پرا گۆپالە و کۆمپانیا پڕۆژە بۆ کەفتی یا کارێ خوە دکەت رۆژانە، بێگومان ژڤانەک بۆ تەمام کرنا رێیا سەرەکیا ھەولێر – دھۆک ھاتیە دیارکرن، بەلێ کۆمپانیێ سۆزدایە زووتر تەمام بکەن و ئەڤ سالە دێ قووناغێن سەرەکی ھێنە بڕین.
ئەڤرۆ نیوز، لەزگین جوقی:
بەرپرسی راگەھاندنێ ل رێڤەبەریا چاڤدێریا بازرگانی ل پارێزگەھا دھۆکێ دیار کر کو ٣٧ جھێن فرۆتنا کەلوپەلان د ناڤ بازارێ دھۆکێ دا ھاتنە سزادان و حەفت جە ژی ھاتینە داخستن و ھەر فرۆشیارەکێ دەستکاریێ د مێژوویا کەلوپەلان دا بکەت دێ بۆ دادگەھێ ھێتە رەوانەکرن.
شوکری شەفیق، بەرپرسی راگەھاندنێ ل رێڤەبەریا چاڤدیریا بازرگانی ل پارێزگەھا دھۆکێ بۆ ئەڤرۆ نیوز دیار کر کو ل دەستپێکا ھەیڤا رەمەزانا پیرۆز ھەتا نوکە ٣٧ جە ل دھۆکێ ھاتینە سزادان و حەفت جە ژی ژ بەر سەرپێچیێن جۆرە و جۆر ھاتینە داخستن و دەست ب سەر سێ تەن و ١٧٠ کیلویێن کەلوپەلێن دەم ب سەرڤەچوویێ دا د ناڤ بازارێ دھۆکێ دا ھاتە گرتن و گۆت: “ھەر فرۆشکارەکێ بھایێ ژ دەف خوە گران بکەت دێ بۆ دادگەھی ھێتە رەوانەکرن یان ژی ھەر کەسەکێ مێژوویا کەرەستان ب گوھۆڕیت و دەستکاریێ د دەمێ بکارئینان و سەرڤەچوونا کەرەستان دا بکەت دێ دەینە دادگەھێ، چونکو ب ھیچ رەنگەکی نابیت دەستکاری د مێژوویا کەلوپەلێن ھەمە جۆر دا بھێتە کرن”.
ناڤھاتی ئاماژە دا وێ چەندێ کو ئەو کەرەستێن بھایێ وان گران ژی بووی ژ ئەگەرێ پێناسا گۆمرکی بوویە و چو خۆدانێن فرۆشگەھان وەکو ئستغلالی بھایێ کەرەستان گران نەکریە و ھندەک گوھۆڕین د کەلو پەلان دا دروست بوون ئەو ژی ژ بەر پێناسا گۆمرکێ یان ژی ل بنەجە گران بووینە.
ئەڤرۆ نیوز:
ب فەرمانا دادگەها بلند یا تورکیا ٩ ئەندامێن جڤاتا باژێرڤانیا تاتوانێ یا باکورێ کوردستانێ کو سەر ب هەدەپێ نە ب ئەگەرێ هندێ کو بەری نها سکالا ل سەر وان هاتینە تۆمار کرن و ئاریشێن خوە یێن قانوونی هەنە ژ کاری هاتینە دوورخستن.
جڤاتا باژێرڤانیا تاتوانێ ژ ١٤ ئەندامان پێک دهێت لێ پرانیا جڤاتێ د دەستێ هەدەپێ دایە و ژ بەر هندێ ب دوورخستنا ئەندامێن هەدەپێ ئەو باژێرڤانی ب تەمامی دکەڤیتە دەستێ ئاکپارتیێ.
ئەڤرۆ نیوز:
بەری دەمەکێ محەمەد جەواد زەریف وەزیرێ دەرڤە یێ ئیرانێ راگەهاند کو ئەمریکا بەری نها رێز ل رێککەفتنا ئەتۆمی نەگرت و ژ بەر هندێ ژی ئەم ب چو رەنگەکێ ل گەل ئەمریکا دانوستاندنان ناکەین، چونکو دانوستاندنێن ل گەل ئەمریکا چو ئەنجامێن خوە نابن.
ل ئالیێ دی هەر ئەڤرۆ حەسەن رۆحانی سەرۆک کۆمارێ ئیرانێ ژی راگەهاند کو د رەوشا نها دا ئەم نەشێین ل گەل ئەمریکا دانوستاندنان بکەین.
ئەڤرۆ نیوز:
دەزگەهێن راگەهاندنا عیراقێ دیار کرن کو سپێدێ رۆژا چارشەمبیێ سەرۆک وەزیرێن عیراقێ عادل عەبدولمەهدی دێ سەرەدانا کوێتێ کەت و دێ ل گەل میرێ کوێتێ کۆمبیت.
چاڤدێرێن سیاسی ژی دیار دکەن کو ئێک ژ مەرەمێن سەرەکی یێن سەرەدانا عادل عەبدولمەهدی دێ ل دۆر ئالۆزیێن نوو یێن ل رۆژهەلاتا ناڤین ب تایبەتی ژی ئەگەرێ شەرەکێ د ناڤبەرا ئیران و ئەمریکا دا بیت.
ئەڤرۆ نیوز، مەحمود نھێلی:
دکتور کامل رەشید بەرپرسێ پشکا زێرەڤانیێ و خوە پاراستنێ ل رێڤەبەریا ساخلەمیا قەزا ئامێدیێ خویاکر، ئەوان دەست ب لێگەریان و پشکنینا تەڤایا کافتیریایێن سنورێ قەزا ئامێدیێ کرینە و گۆت: ( ل سیریێ تا کو دگەھیتە سەنتەرێ قەزایێ دورێن ٢٠ کافتیریایێن نارگیلێ ھەنە ژ وان ب تنێ پێنجان مولەتا کارکرنێ ھەیە، یێن دی بێ مولەت کار دکەن).
ناڤھاتی ئەو یەک ژی دیار کر کو ئەوان بەری نوکە ژی ژ بەر نەبوونا مولەتێ شەش کافتیریا داخستنبوون و ئاشکرا کر کو ھندەک ژ وان نوکە یێن مژوولی چێکرنا مولەتێ نە و یێن مایی ژی یێن ھاتینە ئاگەھدار کرن، ھەکە مولەتا کارکرنێ نەبن دێ هێنە سزادان و ھەروەسا دێ ھێنە داخستن.
ئەڤرۆ نیوز:
باشترین پێکھاتیێ وەرزێ ٢٠١٨-٢٠١٩ ل سەر ئاستێ ھەر پێنچ خولێن مەزن یێن ئورۆپی کو پێکھاتی بوون ژ خولێن ئیسپانیا، ئیتالیا، ئنگلتەرا، ئەلمانیا و فرەنسا ژلایێ مالپەرێ بەرنیاس یێ جیھانی ھوسکورد ھاتە ئاشکراکرن کو ئەوی مالپەری ھەموو حەفتیا باشترینێن حەفتیێ دیارکرن .
دناڤا ئەوی پێکھاتیی دا چ یاریزانێن قارەمانا خولا ئنگلتەرا یانا مانچێستەر سیتی دناڤدا نەبوون .
پێکھاتیێ باشترینێن ھەر پێنچ خولێن مەزن ل سەر ئاستێ ئورۆپا ب ڤی رەنگێ خوارێ بوو
گولچیی، کرانگو ژ یانا کالیاری
ھێلا بەرەڤانیێ
کیمیچ ژ بایرن میونیخ ،ڤان دایک ژ لیڤەرپول و ئوربان و ھالستنبێرگ ژ یانا لایبزیگ
ھێلا ناڤین
میسی ژ بەرشەلۆنا و ساڤیانێر ژ نیمس و گومێز ژ ئەتلانتا و ھازارد ژ چێلسی
ھێرشبەر
مباپێ ژ پاریس سانجێرمان و کریستیانو رونالدو ژ یوڤانتوس.
ئەڤرۆ نیوز:
بایرن میونیخ دخوازیت بوو وەرزێ بھێت ھەڤبەستێ ل گەل یاریزانەکێ خودان شیان و دناڤا یاریگەھێ دا بلەز بیت کو بیتە پێگوھورەکێ سەرکەفتی ل جھێ ھەردو ستێرێن وێ روبن و رێبیری ئەوێ ب فەرمی پشتی یاریێن خولێ پێکھاتیێ وێ یانیچ ب جە ھێلای پشتی ھەڤبەستێن ئەوان ب دووماھیی ھاتین کو ل دیڤ گوتنا رۆژنامەیەکا ئەلمانی وێ یانێ ستێرەکا یانا مانچێستەر سیتی کریە ئارمانجا خوە .
رۆژناما کیکر یا ئەلمانی دیارکریە یانا بایرن میونیخ دخوازیت لیروی سانی یێ ئەلمانی و یاریزانێ یانا مانچێستەر سیتی بینتە دناڤ رێزێن یانا خوە بوو وەرزێ بھێت کو دبینت ئەو باشترین پێگوھورە ل جھێ ھەردو یاریزانێن وێ رێبیری و روبن ئەوێ پشتی یاریێن خولا ئەلمانیا پێکھاتیێ وێ یانێ ب جە ھێلای.
ھەژی گوتنێ یە سانی یێ ٢٣ سالی نوکە دھێتە ھژمارتن ئێک ژ یاریزانێن ھەرە باش ل یانا مانچێستەر سیتی ل وەرزێ ئەڤ سالە پشکداری ٤٧ یاریێن یانا مان سیتی کریە د ھەموو ئەو قارەمانیێن ئەو یانە تێدا پشکدار کو ٣١ ژ ئەوان دخولا ئنگلتەرا دا بوون و شیابوو دخولا ئنگلتەرا دا ١٠ گولان توماربکەت و ١١ بوو ھەڤالێن خوە بەرھەڤبکەت ھەردیسان ٤ گول ژی تومارکربوون د قارەمانیا چامپیونیز لیگ دا کربوون .
بەرھەڤکرن،ھەژار مەعروف
بەری ب دووماھیی ھاتنا ھەڤرکیێن خۆلا سوپەر لیگا تورکیا یا تەپا پێ ب حەفتیەکێ قارەمانا وەرزێ ئەڤ سالە بوو وەرزێ ٢٠١٨-٢٠١٩ ئاشکرا بوو پشتی یانا گەلاتەسەرای شیای د یاریا خوە یا حەفتیا ٣٣ ژ خولێ سەرکەفتنێ ل سەر یانا باشاک شەھیر توماربکەت ب دو گولان بەرامبەر گولەکێ و خالێن وێ بوونە ٦٩ خالان و ناسناڤێ خولێ مسوگەر کر بەری ب دووماھیی ھاتنا خولێ ب حەفتیەکێ و یانا باشاک شەھیر ل رێزا دوێ مسوگەر کر ب ٦٦ خالان و بریارە ھەردو یانە بوو وەرزێ بھێت پشکداری د قارەمانیا چامپیونیز لیگ دا بکەن کو گەلاتەسەرای ئێکسەر پشکداری د قوناغا کومان دا کەت و یانا باشاک شەھیر پشکداری د ڤاڤارتنێن دەربازبوونێ دا کەت.
دەربازبوون بۆ قارەمانیا یورۆپا لیگ
ژلایەکێ دیڤە ھەتا نوکە ھەڤرکی ل سەر پلێتێن دەربازبوونێ بۆ قارەمانیا یورۆپا لیگ بەردەوامە دناڤبەرا چار یانان دا کو ھەردو یانێن ترابزون سپور و بشکتاش پلێتێن دەربازبوونێ مسوگەر کرینە بتنێ ھەڤرکی مایە بوو دەست نیشانکرنا تیمەکێ بوو پشکداری ئێکسەر د قوناغا کومان دا و یانەکا دی ژ ئەوان بوو پشکداری د ڤاڤارتنێن وێ قارەمانیێ دا کو بشکتاش نوکە ل رێزا سیێ دھێت ب ٦٢ خالان و ترابزون سپور نوکە ل رێزا چارێ دھێت کو تیما رێزا سیێ ئێکسەر دەربازی قوناغا کومان بیت ژ قارەمانیا یورۆپا لیگ و ھەردو یانێن رێزا چارێ و پێنچێ دخولا تورکیا دا پشکداریێ د ڤاڤارتنان دا دکەت .
ھەردیسان ھەڤرکی ل سەر پلێتا سیێ دناڤبەرا دو یانان دا مایە ئەوژی یانێن یانی مالاتیا و ئەنتالیا سپور کو ئەرکێ ھەردو یانان ل حەفتیا دووماھیێ گەلەک ب زەحمەتە یانا مالاتیا خودانا رێزا پێنچێ ب ٤٧ خالان دێ یاریا خوە بەرامبەر بورسا سپور کەت ئەوا د مەترسیا پاشڤەزفرینێ دا و ئەنتالیا سپور ژی دێ یاریێ ل گەل یانا فەنەربخچە ل باژێرێ ئیستەنبول کەت.
یانێن پاشڤەزفرینێ
یانا ئاکیسھیر سپور ب فەرمی پاشڤەزفری خولا پلا ئێک و ھەر سێ یانێن ئەزروم سپور و بورسا سپور و گوزتەپە ھەتا نوکە ھەڤرکێ ل سەر مانا خوە دخولێ دا کەن کو ژ ئەوان ھەر سێ یانان دو ژ ئەوان دێ پاشڤەزفرنە خولا پلا ئێک کو ئەزروم ل رێزا ١٧ دھێت ب ٣٢ خالان و یاریا بھێت ل گەل قەیسری سپور کەت ھەتا رادەیەکێ ئەرکێ وێ ب زەحمەتە ژبەرکو پێدڤی ب سەرکەفتنێ یە و ب جوداھیا زێدەتر ژ ٥ گولان و ھەردو یانێن رێزا ١٦ و ١٥ ژی خوسارەت بن و یانا بورسا سپور کو ئێک ژ بەرنیاسترین یانێن تورکی یە ئەرکێ ئەوێ ژی ب زەحمەتە و نوکە ل رێزا ١٦ دھێت ب ٣٤ خالان و حەفتیا بھێـت دێ یاریا خوە ل گەل یانا مالاتیا سپور کەت کو ئەو یانە ژی ھەڤرکیا دەربازبوونێ بۆ یورۆپا لیگ دکەت و یانا گوزتەپە ل رێزا ١٥ دھێت ب ٣٥ خالان و یاریا خوە دێ ل یاریگەھا خوە ل گەل یانا ئەنقرە گوجو کەت.
مێژویا برنا ناسناڤێن خولا تورکیا
ھەژی گوتنێ یە بوو وەرزێ دوێ ل دیڤ ئێک گەلاتەسەرای شیا ناسناڤی ب دەستخوڤە بینت و بوو جارا ٢٢ د مێژویا خوە دا کو خودانا مەزنترین رێژەیا برنا ناسناڤان د مێژویا تورکیا دا پاش یانا فەنەربخچە ل رێزا دوێ دھێت ١٩ ناسناڤ و بشکتاش ل رێزا سیێ ١٤ ناسناڤ و ترابزون سپور ب شەش ناسناڤ و بورسا سپور خودانا ناسناڤەکێ یە
نيشاندان