فوتو : حەسەن حاجی
ئەڤرۆ نیوز ، عەلی حاجی :

ژئەگەرێ توپباران کرنا بەردەواما سوپایێ تورکیا و ھەبونا ھێزێن پەکەکێ ل گوندێ شەرانشا مەسیحیان ، خوە جھێن وی گوندی نەچار دبن ب ئێکجاری وی گوندی ب جە بھێلن و ل ناڤا سەنتەرێ قەزا زاخۆ خوە جە بن.

زێرەڤان موسا رێڤەبەرێ ناحیا دەرکارێ بو ئەڤرۆ نیوز گوت : گوندیێن گوندێ شەرانشا مەسیحیان ژبەر بەردەوامیا توپبارا سوپایێ تورکیا ب ھێجەتا ھەبونا ھێزێن پەکەکێ نەچار دبن گوندێ خوە بجە بھێلن و قەستا باژێرێ زاخۆ ببن ، دوھی روژا دوو شەمبیچ مەختارێ کوندێ شەرانشا مەسیحیان پەیوەندی ب من کری یە و گوتیە ئەز دوماھی کەسم مایمە دگوندی دا و ئەز ژی نەچار گوندی بجە بھێلو ژبەر کو ئێدی ئەم نەشێن بمیننە گوندی .

ناڤھاتی زێدەتر گوت : ل حەفتیە بوری دا توپەکا سوپایێ تورمیا ب مالەکا مەسیحی دکەڤیت بەلێ خوەش یەختانە چو زیانێن گیانی نەبون بەلێ ھەتا راگەھاندنا ئەمریکا ژی گرنگی ب ڤی بابەتی دایە ژبەر کو ماموستا ژ ناحیا دەرکارێ دچونە گوندێ شەرانشێ بو وانە گوتنێ بەلێ ژبەریا سێ ھەیڤان ژئەگەرێ توپبارانێ ماموستایان بریا ردا بون ئێدی وانەیان ل وی گوندی نەدەن ، بەلێ مە قوتابیێن وی گوندی رەوانەکرن بو قوتابخانەێن ناحیا دەرکارێ و پشتی گوندیان ب ئێکجاری گوندێ خوە لحە ھبَلاتین نوکە گرفتەکا دی بو فوتابیان دروست بویە کو نەشێن لقوتابخانەێن دەرکارێ بەردەوامیێ بدەنە خاندنا خوە و نەچارین رێیەکا دی بگەرین بو چارەسەریا کێشەیا قوتابیان .

زاخۆ، عەلی حاجی :

د داخویانیەکێ دا بژار مونیب سەروکێ باژێرڤانیا زاخۆ بۆ ئەڤرۆ نیوز دیارکر ل سەر سەدو پێنچی دوونەمان ل تاخێ تلکەبەرێ دێ مەنترین پارک ل سەرانسەری پارێزگەھا دھوکێ ھێتە دروست کرن و ئەم چاڤەرێنە بودجەیەکا تایبەت بۆ بھێتە تەرخان کرن ب مەرەما وێ چەندێ کار ل سەر دروست کرنا وێ پارکیًَ بکەین.

بژار مونیبی زێدەتر گوت : ئەردێ پارکا تلکەبەرێ من ب خوە ھەلبژارتی یە ژبەر کو ئەردێ وێ یا باژێرڤانیا زاخۆیە و چو کەس ناھێتە قەرەبوکرن چونکی چو زێدەگاڤی ل سەر وی ئەردی نەھاتیە کرن و ئاڤاکرنا وێ ژی دێ سیمایەکێ جوان دەتە وی تاخی و ھەر دیسان ژی مە دخاست زێدەترین رێژا خزموتگوزاریێ ل وی تاخی ئەنجام بدەین بەلیچ ژبەر کو جاددەێن وی تاخی نە ل دووڤ وی دیزانیا باژێرڤانیێ یە و ئەگەر ئەو پارکە بھێتە ئاڤاکرن دێ سروشتەکێ جوان دەتە وێ دەڤەرێ و جھێ بھێن ڤەدانێ ژی تایبەت بھێتە دروست کرن .

ناڤھاتی زێدەتر گوت : پێش دو سالان پارێزگەرێ دھوکێ بەرێ بنیاتی بۆ وێ پارکێ دانا لێ ھەتا نوکە ئەم چاڤەرێنە بودجەیەک بۆ دروست کرنا وێ پارکێ بھێتە تەرخان کرن ، لێ ئەگەر بودجەیا دروست ژی نەبیت ھەر چو نەبیت ھەیڤانە پارەیەک بۆ دروست کرنا وێ بھێتە تەرخان کرن دا کو کار ل سەر بکەین ھەر چەندە سوز ژی ھاتیە دان لێ ھەتا نوکە چو نەھاتیە کرن.

ئەڤرۆ نیوز، نەوزاد ھلۆری:

ژ ئەگەرێ باران و دروستبوونا لەھیان ل سەنتەرێ ناحیا ش ێلادزێ و کومەگەھا سیریێ زیان ب چەند مال و رێیێن سەرەکی کەفتینە.

بێوار عەبدولعەزیز بەرپرسێ راگەھاندنا بەرەڤانیا باژێری ل دھۆکێ بۆ ئەڤرۆ نیوز گۆت: (ژ ئەگەرێ باران و دروستبوونا لەھیان ل سەنتەرێ ناحیا شێلادزێ مالا وەتی ئازاد عەبدولمەناف قەسرکی تووشی خراپبوونێ بوویە و زیانێن زۆر پێکەفتینە و ھەرفتیە).

زێدەتر گۆت: (ژبلی وی خانی ل کومەلگەھا سیریێ ژی ژ ئەگەرێ باران و دروستبوونا لەھیان زیان ب چەند جھان کەفتیە، دیسان رێیا سەرەکی یا کومەلگەھا سیریێ ئاڤ ب سەرکەفتیە، سوپاس بۆ خودێ تیمێن بەرەڤانیا باژێری بەرھەڤە و کار بۆ نەھێلانا زیانان دکەت و رێک ل بەر ئاڤێ ڤەکریە دا کو زیان ب وەلاتیان نەکەڤیت).