ئەڤرۆ نيوز:

سەربەست تروانشی، ئەندامێ ئەنجومەنێ سەرکردایەتیا پارتی و بەرپرسێ لقا ئێک ل بارەگایێ لقێ پێشوازیا ل (مەتران رەبان ئەلقەس) مەترانێ کەنیسێن (دھوک، زاخو، ئامێدی)یێ کر.

د روونشتنەکێ دا مەتران رەبان پیرۆزباھیا خەلکێ دھۆکێ و کوردستانێ کر ب ھەلکەفتا ھاتنا ھەیڤا رەمەزانا پیرۆز و ھیڤی خواست ئەڤ ھەیڤە ھەیڤا خێر و بەرەکەتێ بیت بۆ ھەمی خەلکێ کوردستانێ و گۆت: “ب ڤێ پێکڤەژیانا ل کوردستانێ ھەی ئەم شیاینە ب ئازادانە ھەلکەفت و بیرەوەریێن خوە بگێرین و ب ڤێ تەبایی و ئێک رێزیا د ناڤبەرا مە دا ھەیی رۆژ بۆ رۆژێ کوردستانێ جوانتر بکەین”.

ژ ئالیێ خوە ڤە سەربەست تروانشی، ئەندامێ ئەنجومەنێ سەرکردایەتیا پارتی و بەرپرسێ لقا ئێک سۆپاسی و بخێرھاتنا مەتران رەبانی کر بۆ ڤێ سەرەدانێ و گوت ” ژمێژەیە کوردستانی د کەد و خەباتێ دانە بۆ ئازادی و سەربەستیا گەلێن کوردستانی کرستیان ژی ئێک ژ پێکھاتێن سەرەکی نە د ناڤ کوردستانێ دا وان ژی د دەمێ شۆرەشێ دا مالێن وان حەشارگەھا بارەگایێن پێشمەرگا بوون و شیان خزمەتەکا گەلەک مەزن ژ بلی روحا خوە ب نان و ئاڤێن خوە ژی پارزینکێن پێشمەرگەیان تژی بکەن”.

ئەڤرۆ نیوز:
رێکخراوەکا نێڤدەولەتی دوو پرۆژە بۆ گرتیێن سنێلە ل چاکسازیا ژن و سنێلەیان داناینە کو ئێک ژ وان مەلەڤانگەھەکا ھەڤچەرخە و یاریگەھەکا تەپاپێ یە.
زەکی سالح، رێڤەبەرێ چاکسازیا ژن و سنێلەیان ل پارێزگەھا دھۆکێ، بۆ (باسنیوز) دیار کر، مەلەڤانگەھا سنێلەیان ب شێوەیەکێ فەرمی کەفتە د خزمەتا سنێلەیان دا و رۆژانە ھژمارەکا سنێلەیان ل گۆرەی خشتەیەکێ تۆمارکری سەرەدانا مەلەڤانگەھێ دکەن و دەمێن خوە لێ دبورینن.
ئاشکرا ژی کر کو مەلەڤانگەھا چاکسازیێ ب رەنگەکێ جوان و پێشکەفتی ھتیە درۆستکرن و ب سەرپەرشتیا کەسانێن مەلەڤان خۆلێن فێرکرنا مەلەڤانیان بۆ گرتیێن سنێلە دھێنە ڤەکرن.