ئه‌ڤرۆ نیوز:
جڤاتا پارێزگه‌ها نه‌ینه‌وا سه‌باره‌ت روودانا نقومبوونا به‌له‌مه‌كا گه‌شتیارى ل رووبارێ دیجله ل باژێرێ مووسل، كۆمبوونه‌كا نه‌ئاسایى ئه‌نجامدا وتێدا بریار دا ب دوورخستنا رێڤه‌به‌رێ گشتیێ ساخله‌میا پاریزگه‌ها نه‌ینه‌وا.
جڤاتا پارێزگه‌ها نه‌ینه‌وا تۆمه‌تا خه‌مساریێ ونه پیته پێدانێ بریار دا ب دوورخستنا (فه‌لاح تائى) رێڤه‌به‌رێ گشتیێ ساخله‌میا پارێزگه‌ها نه‌ینه‌وا ژ كارێ وى.
ئه‌ڤرۆ نيوز:
ئه‌ڤرۆ ئه‌ينيێ 22/3/2019 حوكمه‌تا هه‌رێما كوردستانێ ژبه‌ر روودانا كاره‌ساتا دوهى يا باژێرێ مووسل ئه‌وژى نقوومبوونا به‌له‌مه‌كا گه‌شتيارى كو بوويه ئه‌گه‌رێ گيان ژده‌ستدانا نێزيكى 100 كه‌سان، راگه‌هاند، پشكدار وهه‌ڤپشكێن به‌هيداريا گشتى نه ل عيراقێ وب ڤێ هه‌لكه‌فتى چالاكى وئاهه‌نگێن فه‌رمى يێن جه‌ژنا نه‌ورۆزێ دێ هێنه راگرتن”.
ئه‌ڤرۆ نیوز:
كارگێریا پارێزگه‌ها دهۆكێ ل دۆر روودانا مووسلێ راگه‌هاندنه‌ك به‌لاڤكر.
كارگێریا پارێزگه‌ها دهۆكێ د راگه‌هاندنه‌كێ دا ئاگه‌هداریا هه‌موو فه‌رمانگه‌هێن میری ل سه‌نته‌رێ پارێزگه‌هێ و ل سنوورێ هه‌موو قه‌زا و ناحیێن پارێزگه‌هێ دكه‌ت كو ئالایێ كوردستانێ و عیراقا فیدرال ل سه‌ر هه‌موو دام و ده‌زگه‌هێن میری سێ رۆژان بیننه خوار وه‌ك ڕێزگرتن و به‌هیداری بۆ گیانێ قوربانیێن روودانا خه‌ندقینا چه‌ندین وه‌لاتیێن پارێزگه‌ها نه‌ینه‌وا د رووبارێ دیجله دا و ئه‌ڤ رێنمایه هه‌ر ئه‌ڤرۆ ٢٢/٣/٢٠١٩ بهێته بجهـ ئینان.
ئه‌ڤرۆ نیوز:
ئاژانسه‌كا ده‌نگوباسێن توركى به‌لاڤكر كو گه‌شتێن ئه‌سمانى د ناڤبه‌را هه‌ردو فرۆكخانێن نێڤده‌وله‌تى هه‌ولێر وغازى عه‌نتاب دێ ده‌ستپێكه‌ن.
ئاژانسا (ئه‌نادۆل) یا ده‌نگوباسان یا توركى به‌لاڤكر” گه‌شت دێ ب رێیا هێلا ئه‌سمانى یا (ئه‌نادۆلۆ جیت) هه‌فتیانه سێ رۆژان ئه‌وژى رۆژێن شه‌مبیێ ودوشه‌مبى وچارشه‌مبى د ناڤبه‌را هه‌ولێرێ وباژێرێ غاى عه‌نتاب ل باشوورێ توركیا هێنه ئه‌نجامدان.
هه‌ر ئه‌ڤرۆ پێنجشه‌مبى 21/3/2019 گه‌شتێن ئه‌سمانى د ناڤبه‌را هه‌ولێرێ ودیاربه‌كر ده‌ستپێكرن.
ئه‌ڤرۆ نیوز:
ژێده‌ره‌كێ رۆژنامه‌ڤانى ژ باژێرێ مووسل نوكه بۆ ئه‌ڤرۆ نیوز راگه‌هاند، هژمارا كه‌سێن گیانێ خوه د روودانا مووسل دا ژ ده‌ست داى زێده بوون.
وى ژێده‌رى زێده‌تر بۆ ئه‌ڤرۆ نیوز گۆت” پشتى دیتنا ته‌رمى هژماره‌كا دى یا وه‌لاتیێن ئه‌ڤرۆ ژئه‌نجامێ نقوومبوونا به‌له‌مه‌كێ د رووبارێ دیجله دا ل مووسلێ هاتیه دیتن، هژمارا كه‌سێن گیانێ خوه ژ ده‌ست داى بلند تربوو وگه‌هشته 93 كه‌سان”.
ئه‌ڤرۆ نیوز، نه‌وزاد هلۆرى:
ب مه‌ره‌ما پیروزكرنا جه‌ژنا نه‌ورۆزێ و بوراندنا ده‌مه‌كێ خوه‌ش، ئه‌ڤرۆ پێنجشه‌مبى 21/3/2019 رۆژا ئێكێ یا نه‌ورۆزا سالا كوردى 2719ێ هژماره‌كا مه‌زن یا خه‌لكێ ده‌ڤه‌را بارزان و شێلادزێ و دێره‌لوك و ده‌روبه‌ران قه‌ستا هه‌ردو سه‌یرانگه‌هێن (كانیا بێدلێ و شیڤچناركێ) ل سنوورێ هه‌ردو ناحیێن دێره‌لوك و شێلادزێ كر.
ئه‌ڤرۆ نیوز:
سه‌رۆك مه‌سعود بارزانى ئه‌ڤ شه‌ڤه په‌یامه‌كا سه‌ره‌خوه‌شیێ ئاراسته‌ى كه‌سوكارێن روودانا ئه‌ڤرۆ یا باژێرێ مووسل هنارت.
سه‌رۆك بارزانى دپه‌یاما خوه دا گۆت” ب مخابنیه‌كا مه‌زن ڤه ژ ئه‌گه‌رێ نقوومبوونا به‌له‌مه‌كێ ل رووبارێ دیجله ل باژێرێ مووسل، هژماره‌كا مه‌زن یا وه‌لاتیان بوونه قوربانى”.
سه‌رۆك بارزانى گۆت ژى” ب ڤێ هه‌لكه‌فتا خه‌مگین، سه‌ره‌خوه‌شی وهه‌ڤخه‌میا خوه ئاراسته‌ى كه‌سوكارێن قوربانیێن وێ روودانا دلته‌زین وئاكنجیێن باژێرێ مووسلێ دكه‌م ژ لاڤان بۆ خودێ مه‌زن دكه‌م سه‌بر وئارامیێ ب كه‌سوكارێن گیان ژده‌ستدایان ببه‌خشیت وهیڤیا باشتربوونێ بۆ برینداران ودیتنا به‌رزه‌بوویان دخوازم”.
ئه‌ڤرۆ نیوز:
مالپه‌ره‌كێ عیراقى به‌لاڤكر، ئه‌ڤرۆ پێنجشه‌مبى 21/3/2019 پشتى روودانا نقومبوونا به‌له‌مه‌كێ ل رووبارێ مووسل وگیان ژده‌ستدانا ب ده‌هان وه‌لاتیان، عادل عه‌بدولمه‌هدى سه‌رۆك وه‌زیرێن عیراقێ گه‌هشته مووسل.
مالپه‌رێ (بغداد الیوم) ژ زارده‌ڤێ ژێده‌ره‌كى به‌لاڤكر” هاتنا عادل عه‌بدولمه‌هدى بۆ مووسل ژبۆ دووڤچوونا پرسا نقوومبوونا به‌له‌مێ درووبارێ دیجله دایه”.
پێشتر عادل عه‌بدولمه‌هدى سه‌رۆك وه‌زیرێن عیراقێ فه‌رمان دابوو بۆ دابینكرنا هه‌موو شیانێن ده‌وله‌تێ بۆ هاریكاریكرنێ دقورتالكرنا قوربانیێن به‌له‌مێ د رووبارێ دیجله دا وئه‌نجامدانا ڤه‌كۆلینێ د وێ روودانێ دا”.
نيشاندان