زێدەتر ژ دەمێ مەهەكێ یە قانوونا بودجەیا گشتی یا ئیراقێ هاتیە پەسەندكرن، بەلێ هەتا نوكە ئەو قانوونە نەهاتیە بجهئینان، هەڤدەم ئەندامەكێ جڤاتا نوونەرێن ئیراقێ دبێژیت: ئەگەرێ بجهنەئینانا قانوونا بودجەی دزڤریت بۆ نەدەركرنا ڕێنمایێن تایبەت ب مەزاختنا بودجەی ڤە ژ ئالیێ وەزارەتا دارایی یا ئیراقێ ڤە.
ماجد شنگالی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان ل دۆر بودجەیا گشتی یا ئیراقێ و دەركرنا ڕێنمایێن بجهئینانا قانوونا بودجەی گوت» هەتا نوكە وەزارەتا دارایی یا ئیراقێ ڕێنمایێن تایبەت بجهئینانا قانوونا دەرنەكرینە و بزاڤ ب وی ئاراستەی نە كو ب زووترین دەم ڕێنما بهێنە دەركرن و پشكا بودجەیا هەرێما كوردستانێ بهێتە هنارتن».
ماجد شنگالی ئاماژەكر» پێدڤیە ب زووترین دەم مووچەیێن فەرمانبەرێن هەرێما كوردستانێ بهێنە هنارتن».
هەروەسا دوپاتكر ژی كو محەمەد شیاع سۆدانی، سەرۆك وەزیرێن ئیراقێ دخوازیت مووچەیێن فەرمانبەرێن هەرێما كوردستانێ بهێنە هنارتن.
وی پەرلەمانتاری ئەوژی گوت»پارتی وەكو پشكەك ژ هەڤپەیمانیا بڕێڤەبرنا دەولەتێ بەردەوام د كۆمبوونێن وێ هەڤپەیمانیێ دا داخوازا بجهئینانا قانوونا بودجەی و هنارتنا پشكا بودجە و مووچەیێن هەرێما كوردستانێ دكەت و محەمەد شیاع سۆدانی، سەرۆك وەزیرێن ئیراقێ پەیوەندیەكا باش و ئەرێنی ل گەل هەرێما كوردستانێ هەیە، بەلێ هەكە ڕێككەفتن نەهێنە بجهئینان، وی دەمی هیچ ڕامانەك بۆ وان پەیوەندیان نامینیت».
ماجد شنگالی باس ل وێ چەندێ ژی كر» د نوكە دا بەرهەڤی بۆ هەلبژارتنێن جڤاتێن پارێزگەهێن ئیراقێ دهێنە كرن و ئالیێن سیاسی بزاڤێ دكەن جارەكادی سەبارەت وی بابەتی دەست ب موزایەدێن خوە بكەن كو ئەڤە ژی ل سەر كیستێ كوردان و هەرێما كوردستانێ و مووچەیێن فەرمانبەرێن هەرێما كوردستانێ یە».
هەروەسا دوپاتكر» ئالیێن شیعی هەموو بزاڤان دكەن بۆ وێ چەندێ خوە ب سەر هەموو ئیراقێ ب سەپینن ب كورد و سوننە ژی ڤە، ب تایبەتی كو وان زێدەتر ژ ناڤ حوكمەتا هەرێما كوردستانێ پارتی دیموكراتی كوردستان ب ئارمانج گرتیە».
ناڤبری سەبارەت پڕۆژەیێ قانوونا پەترۆل و غازێ ب پێدڤی زانی ل دەستپێكێ ئو پڕۆژە قانوونە ل ناڤ هەڤپەیمانیا بڕێڤەبرنا دەولەتێ دا دەنگ ل سەر بهێتە دان و بهێتە پەسەندكرن، پاشی بهێتە هنارتن بۆ جڤاتا وەزیرێن ئیراقێ بۆ وێ چەندێ ل دووماهیێ ل جڤاتا نوونەرێن ئیراقێ بێی هیچ گرێیەكێ بهێتە پەسەندكرن و دەنگ پێ بهێتە دان».

دوهی ئێكشەمبی 30/7/2023 هەردو مەكتەبێن سیاسی یێن پارتی دیموكراتی كوردستان و ئێكەتی نیشتمانی كوردستان ل سلێمانیێ كۆمبوون و ب گۆرەی بەیاننامەیەكا هەڤپشك پشتی كۆمبوونێ هەردو ئالی پشتەڤانیێ ل ئەنجامدانا هەلبژارتنێن پەرلەمانێ كوردستانێ دكەن ل وی ژڤانێ ژ ئالیێ سەرۆكێ هەرێما كوردستانێ ڤە دهێتە دیاركرن پشتی دانوستاندنێ ل گەل ئالیێن سیاسی ل هەرێما كوردستانێ.

دەقێ بەیاننامەیا هەڤپشك یا پارتی و ئێكەتیێ..

كۆمبوونا هەردو مەكتەبێن سیاسی یێن ئێكەتی نیشتمانی كوردستان و پارتی دیموكراتی كوردستان ل دەباشان هاتە ئەنجامدان. پشتی باسكرنا ڕەوشا دەڤەرێ ب گشتی و ئیراقێ و كوردستانێ ب تایبەتی، مە هەردو ئالیان دوپاتی ل پاراستنا قەوارەیێ هەرێما كوردستانێ و مافێن وێ یێن دستووری كر و هەموو شیانێن خوە دێ ئێخینە كار بۆ بەرهنگاریا ئاستەنگان ژ پێخەمەت ژیارا وەلاتیان و چارەسەركرنا كێشەیان.
ب ئاراستەیا زێدەتر چڕكرنا بزاڤێن خوە ئەم هەردو ئالی ل سەر ڤان خالێن ل خوارێ ڕێككەفتین:
1-هەردوئالی پشتەڤانیێ ل ئەنجامدانا هەلبژارتنێن پەرلەمانێ كوردستانێ دكەین ل وی ژڤانێ ژ ئالیێ سەرۆكێ هەرێمێ ڤە دهێتە دیاركرن پشتی دانوستاندنێ ل گەل ئالیێن سیاسی ل هەرێما كوردستانێ.
2-بۆ زێدەتر خزمەتكرنا خەلكێ كوردستانێ ژ هەموو ڕوویەكی ڤە كێشە و جوداهیێن بچووك بهێنە پشت گوهـ هاڤێتن و پێكڤە بەر ب چارەسەركرنا كێشەیان بچین.
3-مە بڕیار دا پڕۆسەیا ڕێكخستنا هێزێن پێشمەرگەی بەردەوام بیت.
4-مە هەردو ئالیان بڕیار دا پشتەڤانیێ ل ڕێككەفتنێن كابینەیا نەهێ یا حوكمەتا هەرێما كوردستانێ بكەین.
5-ژ پێخەمەت زێدەتر نێزیكبوونێ و بەرهنگاریا ئاستەنگان و سەركەفتن ل سەر كێشەیان مە بڕیاردا ب گیانەكێ كوردستانیانە و نیشتیمانپەروەرانە بەردەوامیێ ب كۆمبوونێن دوقۆلی و هەماهەنگیێ ل گەل هەموو ئالیان بدەین.

حوكمەت و جڤاتا نوونەرێن ئیراقێ ل دۆر پڕۆسەیا دەنگدانێ بۆ هەلبژارتنێن جڤاتێن پارێزگەهێن ئیراقێ كێشەیەكا دی بۆ ئاوارەیان دروستكریە كو پێدڤیە هەر ئاوارەیەك ل جهێ خوە دەنگێ خوە بدەت.
مەناف حەسەن، بەرپرسێ پشكا هەلبژارتنان یا پارتی دیموكراتی كوردستان ل مووسل گوت» حوكمەت و جڤاتا نوونەرێن ئیراقێ بێی كو بۆچوونا فراكسیۆنێن كوردستانی، بڕیارەك دەركریە كو پێدڤیە هەر ئاوارەیەك ل جهێ خوە دەنگێ خوە بدەت».
مەنافی گوت ژی» پڕۆسە یا گرانە بۆ ئاوارەیان، چونكە كۆمسیۆن نەشێت د وی دەمێ دیاركری دا هەموویان تۆمار بكەت، لەوما چاڤەڕێ دهێتە كرن پشكا مەزن یا ئاوارەیان ژ دەنگدانێ بێ بەهر ببن».
هەروەسا دیاركر» نێزیكی 130 هزار دەنگدەرێن ئاوارە ل هەرێما كوردستانێ، ل پارێزگەهێن هەولێرێ و دهۆكێ هەنە و نێزیكی 29 هزار دەنگدەرێن ئاوارە ل دەرڤەی كەمپانە ل پارێزگەها دهۆكێ».
بەرپرسێ پشكا هەلبژارتنان یا پارتی ل مووسل ئاماژە ب وێ چەندێ ژی كر كو ئەو دەمێ هاتیە دیاركرن بۆ ڤەگوهاستنا دەنگێن دەنگدەران ل جهەكی بۆ جهەكێ دی دەمەكێ كێمە و هەتا نوكە 15 هزار دەنگدەران دەنگدانا خوە ڤەگوهاستیە».

پەیڤدارا كۆمسیۆنا بلند یا سەربخوە یا هەلبژارتنان ل ئیراقێ ڕاگەهاند: چاڤەڕێی مەرسۆما سەرۆكایەتیا هەرێما كوردستانێ دكەین بۆ وێ چەندێ دەست ب بەرهەڤیان بۆ هەلبژارتنێن پەرلەمانێ كوردستانێ بكەین.
جومانە غەلای، پەیڤدارا كۆمسیۆنا بلند یا سەربخوە یا هەلبژارتنان ل ئیراقێ سەبارەت هەلبژارتنێن خولا شەشەێ یا پەرلەمانێ كوردستانێ گوت» بۆ دەستپێكرنا پێرابوون و بەرهەڤیێن هەلبژارتنێن خولا شەشێ یا پەرلەمانێ كوردستانێ، چاڤەڕێی دەركرنا مەرسۆمەكا هەرێمی ژ سەرۆكایەتیا هەرێما كوردستانێ دكەین یا تایبەت ب دیاركرنا ڕۆژا ئەنجامدانا هەلبژارتنان».
جومانە غەلای گوت ژی» دڤێت ئەو مەرسوومە ل ڤان دو ڕۆژان دا بهێتە دەركرن بۆ وێ چەندێ ئەم ژی ل ڕۆژا 1 مەها بهێت دەست ب پێرابوونان بكەین، هەكە تاكو وێ ڕۆژێ مەرسۆما هەرێمی نەهێتە درەكرن، دێ ژڤانێ هەلبژارتنان ئەوێ مە پێشنیازكری كو 18/2/ 2024یان هەر ژڤانەكێ د دووڤ وێ ڕۆژێ دا ، هێتە پاشئێخستن».
ل حەفتیا بۆری، شاندەكێ سەرۆكایەتیا هەرێما كوردستانێ سەرەدانا هندەك حزب و ئالیێن سیاسی یێن هەرێما كوردستانێ كربوو و ژڤانەكێ نوو بۆ وان بەرچاڤكر بۆ ئەنجامدانا هەلبژارتنێن خولا شەشێ یا پەرلەمانێ كوردستانێ كو رشۆژا 25/2/2024 یە، ئانكو 7 ڕۆژ درەنگتر ژ وی ژڤانێ كۆمسیۆنێ پێشنیازكری كو 18/2/2024 یە.
ل ڕۆژا 10/7/2023، سەرۆكایەتیا هەرێما كوردستانێ نڤیسارەك ئاراستەی كۆمسیۆنا هەلبژارتنێن ئیراقێ كربوو و تێدا داخواز كربوو، هەكە نەشێت ل 18/11/2023 هەلبژارتنێن هەرێما كوردستانێ بڕێڤەببەت، ل ڕۆژا 18/12/2023 ل گەل هەلبژارتنێن جڤاتێن پارێزگەهێن ئیراقێ هەلبژارتنێن پەرلەمانێ كوردستانێ ژی بڕێڤەببەت. ژ ئالیێ خوەڤە كۆمسیۆنا هەلبژارتنێن ئیراقێ ل ڕۆژا 18/7/2023 ب نڤیسارا فەرمی بەرسڤا نڤیسارا سەرۆكایەتیا هەرێما كوردستانێ دابوو و تێدا دیاركربوو» كۆمسیۆنێ بڕیارا هەژمار 9 ل كۆنووسا ئاسایی 24 ل 18/7/2023 دەركریە كو تێدا پێشنیاز دكەت هەلبژارتنێن پەرلەمانێ كوردستانێ ل 18/2/2024، یان پشتی وێ ڕێككەفتی بهێنە ئەنجامدان».

سەباح زوهێر:

د.مردان خدر، بەرپرسێ‌ لقێ نەهـ یێ پارتی دیموكراتی كوردستان دیاركر كو كۆمبوونا هەردو مەكتەبێن سیاسی یێن پارتی دیموكراتی كوردستان و ئێكەتی نیشتیمانی كوردستان و ئالیێن دی د ڤێ‌ قۆناغێ‌ دا پێخەمەت دانوستاندنێ وتێكگەهشتنێ ل سەر پرسێن گرنک ل هەرێما كوردستانێ ، تایبەت پرسا هەلبژارتنێن پەرلەمانێ‌ كوردستانێ‌ و هەلبژارتنێن جڤاتێن پارێزگەهان پێخەمەت وێ‌ ئێكێ‌ كو كورد ب ئێكدەنگ و ئێكهەلویستی پشكداربن و تێكگەهشتنەكا سیاسی دروست ببیت و پێگەهێ‌ كوردان ل هەمبەر پرسێن گشتی ب هێز بیت و مافێن كوردان دپاراستی بن.
د. مەردان خدر گوت ژی» هیڤیدارین كۆمبوونێن نها دهێنەكرن د بەرژەوەندیا خەلكێ‌ كوردستانێ‌ دا بن ب ئاوایەكێ‌ كو زالبن ل سەر قەیرانێن سیاسی، هەلبەت پارتی و ئێكەتی شیاینە ل سەر كاودانێن دژوارتر زالببن و كێشەیان چارەسەر بكەن، تایبەت كێشەیێن گشتی یێن گرێدای هەرێما كوردستانێ، لەوما پێدڤیە كۆمبوون دناڤبەرا ئالیێن سیاسی دا د بەردەوام بن بۆ وێ چەندێ مە كیانەكێ‌ سیاسی یێ‌ ب هێز هەبیت و پتر خزمەتا خەلكێ‌ هەرێمێ‌ بهێتەكرن».
بەرپرسێ‌ لقێ نەهـ یێ پارتی دیاركر ژی» چو ڕێك و بەهانە ل هەمبەر ئالیێن سیاسی نینن و تنێ‌ ڕێككەفتن ل بەردەم وانە، تایبەت بۆ پرسا هەلبژارتنێن پەرلەمانێ‌ كوردستانێ‌ كو بابەتەكێ‌ گرنگە ودڤێت ل سەر ڕێك بكەڤن و هەلبژارتن بهێنە ئەنجامدان، چونكە نها ئەم د ڤالاهیەكا سیاسی و قانوونی دا دەرباز دبین».
خۆیاكر» جهێ‌ دلخوەشیێ‌ یە كو سەرۆكایەتیا هەرێما كوردستانێ‌ ب ئەركێ‌ خوە ڕابوویە و دانوستاندن دگەل ئالیێن سیاسی و كۆمسیۆنا هەلبژارتنێن ئیراقێ‌ پێخەمەت وێ‌ چەندێ‌ كو دەمەكێ‌ گونجای بهێتە دەستنیشانكرن ژبۆ هەلبژارتنێن پەرلەمانێ‌ كوردستانێ‌ و ئەو ڤالاهی نەمینیت، لەوما پێدڤیە ئالیێن سیاسی ب ئەرك و بەرپرسیارەتیا خوە ڕابن بۆ وێ چەندێ ڤێ قۆناغێ‌ دەرباز بكەن و پرسێن گرنگ بهێنە چارەسەركرن».
د.مردان خدر ئاماژە دا وێ‌ چەندێ‌ ژی كو پارتی دیموكراتی كوردستان دەست بەرداری گەلەك بەرژەوەندیێن خوە یێن حزبی بوویە بۆ وێ چەندێ هەلبژارتن ل دەمێ‌ خوە بهێنەكرن، نها ژی سیاسەتا پارتی ئەوە چ تشتەكێ‌ دبەرژەوەندیا خەلكێ‌ هەرێما كوردستانێ دا بیت پێنگاڤێ‌ بۆ بهاڤێژیت،چونكە ل دەف پارتی حزبایەتی خزمەتكرنا خەلكی یە، لەوما پارتی هەردەم دگەل وێ‌ چەندێ‌ یە كو پرسێن گرنگ وگرێدای خەلكی و كیانێ‌ هەرێما كوردستانێ ب هەلاویستی نەمینن و بهێنە چارەسەركرن».

دوهی سێشەمبی 25/7/2023 سەرۆك مەسعود بارزانی دوەمین پێشانگەها ڕۆژهەلاتا ناڤین بۆ پەروەردێ و فێركرنێ ل جهێ پێشانگەها نێڤدەولەتی ل هەولێرێ ڤەكر.
د وێ پێشانگەهێ دا كو هەژمارەكا بەرچاڤ ژ زانكۆ و قوتابخانە و دەزگەهێن پەروەردەیی تێدا د پشكدارن، سەرۆك بارزانی سەرەدانا پشكێن پێشانگەهێ كر و هیڤیا سەركەفتنێ بۆ خواست.

سەرۆكێ فەرمانگەها هەماهەنگیێ و دووڤچوونێ ل حوكمەتا هەرێما كوردستانێ، ڕادگەهینیت: كێشە و مەترسی ل سەر پشكا بودجەیا هەرێما كوردستانێ نینە، هەروەسا پرسا داهاتێن نە پەترۆلی ڕێگر نینە ل هنارتنا پشكا بودجەیا هەرێمێ، هەڤدەم گوت ژی: ل ڤێ حەفتیێ دێ بەغدا پشكەكێ ژ مووچەیێن فەرمانبەرێن هەرێما كوردستانێ هنێریت.
عەبدولحەكیم خسرۆ، سەرۆكێ فەرمانگەها هەماهەنگیێ و دووڤچوونێ ل حوكمەتا هەرێما كوردستانێ گوت» دانوستاندنێن د ناڤبەرا بەغدا و هەولێرێ دا د بەردەوامن و نەهاتینە ڕاوەستاندن و ڕۆژانە دانوستاندن دهێنە كرن ل سەر ئالیێن تەكنیكی یێن قانوونا بودجەیا گشتی، هەروەسا كۆمەكا تێكگەهشتن و بابەتان هەیە پێدڤیە بهێنە ئێكلاكرن، ب تایبەتی بابەتێن تەكنیكی و ڕێنمایێن بجهئینانا قانوونا بودجەی.
هەروەسا گوت» مە داخواز كریە كو پێدڤیە فەرمانبەرێن هەرێما كوردستانێ هەڤشێوەیێ فەرمانبەرێن باژێرێن دی یێن ئیراقێ، د دەمێ خوە دا مووچەی وەربگرن».
ناڤبری ڕۆهنكر ژی» ل سەر كارێ تەكنیكی یێ بجهئینانا قانوونا بودجەی، مە ل گەل بەغدا ئاخڤتیە بۆ وێ چەندێ سیستەمەكێ جهگیر بهێتە دانان كو ڕۆژانە تووشی ڕەوشا سیاسی نەبیت، هەروەسا ئەو دەستكاریكرنا لژنەیا دارایی ل جڤاتا نوونەرێن ئیراقێ ل هندەك مادەیێن قانوونا بودجەی دا وەكریە كو ئەم پێدڤی ڕێككەفتنێ نە ل سەر بكەین و كاری ل سەر بكەین، هەڤدەم دانوستاندن د ناڤبەرا وەزارەتا دارایی و هەموو وەزارەتێن دی یێن ئیراقێ دهێتە كرن ل سەر ڕێنمایێن چاوانیا مەزاختنا بودجەی».
سەبارەت پرسا پەترۆلێ، سەرۆكێ فەرمانگەها هەماهەنگیێ و دووڤچوونێ ل حوكمەتا هەرێما كوردستانێ گوت» نێزیكی سێ ترلیۆن دینار بۆ مەزاختنا دەرئێنانا پەترۆلێ هاتیە تەرخانكرن و ڕۆژانە هەرێما كوردستانێ 60 هزار بەرمیلێن پەترۆلێ ددەتە پالاوگەهان، هەروەسا پێدانا پەترۆلا هەرێما كوردستانێ بۆ پالاوگەهان ب گۆرەی داخوازیا وەزارەتا پەترۆلا ئیراقێ یە».
ئاماژەكر» ژ ڕوویێ تەكنیكی ڤە، مەزاختن و بەرهەمئینانا پەترۆلێ، مە كێشە ل گەل بەغدا نینە، د ڤێ قۆناغێ دا پەترۆل كێشە نینە ل بەردەم دانوستاندنێن د ناڤبەرا بەغدا و هەولێرێ دا، هەروەسا هەماهەنگی د ناڤبەرا وەزارەتا سامانێن سروشتی ل هەرێما كوردستانێ و وەزارەتا پەترۆلا ئیراقێ د ئاستەكێ گەلەك باش دایە».
عەبدولحەكیم خسرۆ دوپاتكر» پرسا داهاتێن پەترۆلی ڕێگر نینە ل هنارتنا پشكا بودجەیا هەرێما كوردستانێ، هەروەسا كێشە و مەترسی ل سەر پشكا بودجەیا هەرێما كوردستانێ نینە».
سەبارەت هنارتنا پشكا بودجەیا هەرێما كوردستانێ ژ ئالیێ بەغدا ڤە، دبێژیت» ل ڤێ حەفتیێ بەغدا دێ پشكەكێ ژ مووچەیێن فەرمانبەرێن هەرێما كوردستانێ هنێریت، ل گەل گەهشتنا وێ پشكا بودجەی، حوكمەتا هەرێما كوردستانێ دێ ڕاستەوخوە دەست ب بەلاڤكرنا مووچەیێن فەرمانبەرێن هەرێما كوردستانێ كەت».

پەیڤدارێ حوكمەتا هەرێما كوردستانێ ل دۆر مووچەیێ فەرمانبەرێن هەرێما كوردستانێ بەیاننامەیەك بەلاڤكر و تێدا دبێژیت: تاكو وێ ڕۆژا مە پشتبەستن ب داهاتێ ناڤخوەیی و پەترۆلێ دكر بۆ دابینكرنا مووچەیێن فەرمانبەران، حوكمەتا هەرێما كوردستانێ یا خەمسار بوو و هەموو مەهان مووچەیێ تمام یێ فەرمانبەران دابین كریە.
پێشەوا هەورامانی، پەیڤدارێ حوكمەتا هەرێما كوردستانێ دبێژیت» نوكە كو داهاتێ پەترۆلێ ب ڕێككەفتنەكێ ل گەل حوكمەتا ئیراقێ د دەستێ هەرێما كوردستانێ دا نەمایە، حوكمەتا ئیراقێ ب بەرپرس دزانین ژ دابینكرنا مووچە و شایستەیێن دارایی یێن وەلاتیێن هەرێما كوردستانێ ب گۆرەی قانوونا بودجەی».
پەیڤدارێ حوكمەتا هەرێما كوردستانێ گوت ژی» پەیاما مە بۆ پشكەك ژ ئالیێن سیاسی و خەلكەكی هەیە كو د دەمێ ڤان چەند سالان ب هیچ جۆرەكی گرنگی ب پێگەهێ قانوونی ودستووری یێ هەرێما كوردستانێ نەدایە و وەكو وەلاتیێن خەمخۆرێن خەلكێ كوردستانێ ڕەفتار نەكریە، ژ ڤێ چەندێ زێدەتر ل پێگەهێ هەرێما كوردستانێ نەدەن و بۆ جارەكێ ژی بیت ب بەرپرسیارانە بەرانبەر خەلكێ كوردستانێ و مافێ وی یێ دستووری ڕەفتارێ بكەن».
دەقێ بەیاننامەیا پەیڤدارێ حوكمەتا هەرێما كوردستانێ:
پرسا مووچەیێن وەلاتیێن هەرێما كوردستانێ گرنگترین بابەت و ئەولەویەت بوو بۆ حوكمەتا هەرێما كوردستانێ و هەتا وێ ڕۆژا مە پشتبەستن ب داهاتێ ناڤخوە و پەترۆل دكر بۆ دابینكرنا مووچەی، حوكمەتا هەرێما كوردستانێ یا خەمسار نەوو و هەموو مەهەكێ مووچەیێ تمام یێ وەلاتیان دابینكریە.
نوكە داهاتێ پەترۆلێ ب ڕێككەفتنەكێ ل گەل حوكمەتا ئیراقێ د دەستێ هەرێما كوردستانێ دا نەمایە، حوكمەتا ئیراقێ ب بەرپرس دزانین ژ دابینكرنا مووچە و شایستەیێن دارایی یێن وەلاتیێن هەرێما كوردستانێ ب گۆرەی قانوونا بودجەی، د ڤێ پرسێ دا مە هەموو ئەركێن سەرملێن خوە بجهئیناینە و پێگیریەكا تمام یا قانوونی مە ئەنجامدایە و هەتا ئەڤرۆ ژی بەرێز سەرۆك وەزیرێن هەرێما كوردستانێ د پەیوەندیێ دابوو بۆ وێ چەندێ حوكمەتا ئیراقێ هەر چ زوویە مووچەیێن فەرمانبەر و شایستەیێن دارایی یێن هەرێما كوردستانێ بهنێریت و ئێدی ئەڤ پرسە زێدەتر گیرو نەبیت.
پەیاما مە بۆ پشكەك ژ ئالیێن سیاسی و خەلكەكی هەیە كو د دەمێ ڤان چەند سالان دا ب هیچ جۆرەكی گرنگی ب پێگەهێ قانوونی و دستووری یێ هەرێما كوردستانێ نەدایە و وەكو وەلاتیەكێ خەمخۆرێ خەلكێ كوردستانێ ڕەفتار نەكریە، ژ ڤێ زێدەتر ل پێگەهێ هەرێما كوردستانێ نەدەن و بۆ جارەكێ ژی بیت بەرپرسیارانە بەرانبەر خەلكێ كوردستانێ و مافێن وی یێن دستووری بلڤن و ڕەفتارێ بكەن، ڤێ پرسێ پەیوەندیا ڕاستەوخوە ب ژیان و ڕەوشا خەلكی ڤە هەی و بابەتێ موزایەدێ و هەوا هەلبژارتنان نینە و پێدڤیە نەهێتە بكارئینان وەكو ئامرازەكی بۆ لێدان ل پێگەهێ قانوونی و دستووری یێ هەرێما كوردستانێ.

سەرۆكێ هەرێما كوردستانێ، نێچیرڤان بارزانی دوهی سێشەمبی 25/7/2023 پێشوازی ل كاردینال لویس ساكۆ، پاتریارك و سەرۆكێ كەنیسەیا كلدانی ل ئیراقێ و جیهانی و شاندەكێ دگەلدا كر.

ل دەستپێكا ڤێ مەهێ سەرۆكایەتیا كۆمارا ئیراقێ بڕیارا ڤەكێشانا مەرسووما هەژمار 147 یا سالا 2013 ڕاگەهاندبوو و تێدا پلەیا پاتریاركێ كەنیسەیا كلدانی ل ئیراقێ و جیهانیچ ژ كاردینال لویس ساكۆ هاتە ستاندن.
د دیدارەكێ دا ل دۆر ڤەكێشانا فەرمانا سەرۆكایەتیا كۆمارا ئیراقێ یا تایبەت ب كەنیسەیا كلدانی، نێچیرڤان بارزانی دوپاتكر كو گرنگە ئیراق ب هەرێما كوردستانێ ڤە كۆمكەرا هەموو پێكهاتەیێن ئایینی و نەتەوەیی بمینیت و هیڤی خواست سەرۆك كۆمارێ ئیراقا فیدرال ب زووترین دەم وێ كێشەیێ چارەسەر بكەت.
سەرۆكێ هەرێما كوردستانێ دوپاتكر كو پێكڤەژیان و هەڤدوقەبوولكرن باوەری و پرنسیپە و جوانیا ئیراقێ د وێ چەندێ دایە وەلاتێ هەموو پێكهاتەیان بیت و تێدا مافێ هەموویان یێ پاراستی بیت.
ژ ئالیێ خوەڤە كاردینال لویس ساكو سوپاسی و پێزانین بۆ پشتەڤانیا نێچیرڤان بارزانی دیاركر و دوپاتكر كو هەرێما كوردستانێ ئەردێ پێكڤەژیان و هەڤدوقەبوولكرنێ یە و شانازیێ پێ دكەن و ئاماژەكر كو ئەو كێشەیە چو جاران ڕێكێ ل كار و ئەركێن وی ناگریت و دێ بەردەوام ل سەر بەرگریێ ژ ئیراقێ و پێكڤەژیانێ. هەر د وێ دیدارێ دا ڕەوشا دەشتا نەینەوا و چەندین پرسێن دی یێ گرێدای مەسیحیان ب گشتی، ئالیەكێ دی یێ دیدارێ بوو.