سەرۆكێ حوكمەتا هەرێما كوردستانێ، مەسرۆر بارزانی بۆ دووڤچوونا ڕوودانا دلتەزین یا ئاگربەربوونێ ل ئاڤاهیەكێ ئاكنجیبوونێ ل سۆران، ب ڕێكا تەلەفۆنێ پەیوەندی ب هەلگورد شێخ نەجیب، سەرپەرشتێ ئیدارەیا سەربخوە یا سۆران كر.
مەسرۆر بارزانی، هەڤخەمیا خوە ل گەل كەسوكارێن قوربانیان دەربری و سەرپەرشتێ ئیدارەیا سۆران و دەزگەهێن پەیوەندیدارێن حوكمەتێ ڕاسپاردن هەر چ یا پێدڤیە بۆ هاریكاریا لێقەومیێن ڕوودانێ بكەن و ڤەكۆلینا هوور ل دۆر هۆكارێ ڕوودانێ بكەن، دووڤچوون ژی بۆ پێرابوونێن سلامەتیێ ل ئاڤاهی و جهێن گشتی و تایبەت بهێتە كرن.

ل دووماهی كۆمبوونا جڤاتا وەزیرێن هەرێما كوردستانێ ب سەرپەرشتیا مەسرۆر بارزانی، سەرۆكێ حوكمەتا هەرێمێ و ب بەرهەڤبوونا قوباد تالەبانی، جێگرێ سەرۆكێ حوكمەتا هەرێمێ، دبڕگەیەكا كۆمبوونێ دا دانوستاندن ل دۆر دوماهی پێشهاتێن پشكا بودجە و مووچەیێن هەرێما كوردستانێ هاتە كرن ل دۆر سەرەدانا شاندێ دانوستاندكارێ هەرێمێ بۆ بەغدا.
شاندێ دانوستاندكار ڕۆهنكرنێن پێدڤی بۆ جڤاتا وەزیران بەرچاڤكرن و تێدا ئاماژەكر كو سەرەرای دروستبوونا تێكگەهشتنەكا هەڤپشك ل بەغدا سەبارەت وێ چەندێ كو مووچەیێن فەرمانبەرێن هەرێمێ، شایستەیێن دارایی یێن فەرمانبەرانە و پێدڤیە ژ ناكۆكیێن سیاسی و پێگیریان بهێتە جوداكرن و پێدڤیە گۆژمەیێن پارەیێن د خشتەیێن بودجەی دا هاتین، وەكو خوە بهێنە مەزاختن و ب هیچ شێوەیەكی پیڤەرێ خەرجیێن ڕاستەقینە ل سەر نەهێنە بجهئینان و شایستەیێن دارایی یێن فەرمانبەران، تێكهەلی پرسێن سیاسی نەهێنە كرن.
شاندێ دانوستاندكار ئاماژە كر كو د دانوستاندنێن ڤێ دوماهیێ دا، ئەو چەندە بۆ شاندێ هەرێمێ هاتە بەرچاڤكرن، چارەسەریا بنەڕەتی یا ڤی بابەتی و كێشەیا مووچەیێن هەموو فەرمانبەرێن هەرێما كوردستانێ ناكەت كو مەهانە 944 ملیار دینارن و بۆ سالەكا دارایی زێدەتر ژ 11 ترلیۆن دینارانە، لەوما ئەوا بەغدا دكەت پێشێلكرنەكا ئاشكرا و بێ بهانەیە بۆ مافێن دەستووری یێن خەلكێ كوردستانی.
جڤاتا وەزیرێن هەرێمێ داخواز ژ حوكمەتا فیدرالی كر كو د نێزیكترین دەلیڤەدا، پڕۆژەیێ قانوونا ڕاستڤەكرنا قانوونا بودجەیا فیدرالی ل جڤاتا وەزیران پەسەند بكەت و ب هنێریتە جڤاتا نوونەران ب ئاراستەیا دابینكرنا مووچەیێن فەرمانبەرێن هەرێمێ وەكو د خشتەیێن قانوونا بودجەی دا هاتی دوور ژ پیڤەرێ خەرجیێن فعلی و ناكۆكیێن پەترۆلی و داهاتێن نە پەترۆلی. هەروەسا ل سەر ئاستێ سیاسی ژی پێدڤیە هەموو ئالیێن سیاسی یێن كابینەیا سودانی پێكئینای، پشتەڤانیا پڕۆژەیێ ڕاستڤەكرنا قانوونا بودجەی بكەن تاكو فەرمانبەرێن هەرێمێ هەڤشێوەیێ دەڤەرێن دی یێن ئیراقێ، مووچەیێن خوە ل دەمێ خوە وەربگرن و ئیدی نە دادپەروەری بەرامبەر فەرمانبەرێن هەرێمێ نەهێتە كرن و د چارچۆڤەیێ ڕێككەفتنان و قانوونا بودجەی دا، شایستەیێن دارایی یێن هەرێما كوردستانێ بهێنە هناترنن و ب ڕێكا وەزارەتا دارایی و ئابۆری ل هەرێما كوردستانێ مووچەیێن وان بهێنە دان.
ژ ئالیەكی دی ڤە، هەرێما كوردستانێ هەموو ئەركێن خوە بەرامبەر حوكمەتا فیدرالی بجهئیناینە و دەستەیا هەڤپشك یا هەردو دیوانێن چاڤدێریا دارایی یا فیدرالی و هەرێمێ، هووربینی و پێداچوون بۆ هەموو داهات و خەرجیان و میلاكێ فەرمانبەریێ ل هەرێمێ كریە، ژبلی وێ چەندێ ژی، هەرێمێ پێگیریا خوە یا پەترۆلی بەرامبەر وەزارەتا پەترۆلا فیدرالی بجهئینایە ب ڕێكا ڕادەستكرنا پەترۆلی بۆ بكارئینانا ناڤخوەیی، بەلێ حوكمەتا فیدرال، هیچ گۆژمەیەكێ پارەی بۆ كۆمپانیێن پەترۆلی خەرج نەكریە، لەوما هیچ بەهانەیەك بۆ حوكمەتا فیدرال نەمایە كو شایستەیێن دارایی یێن فەرمانبەرێن هەرێمێ خەرج نەكەت و حوكمەتا فیدرال تاكە بەربرسە ژ گیرۆبوونا مووچەیان.

بەربژارێ هەژمار 35 ل سەر لیستەیا 197 یا پارتی دیموكراتی كوردستان بۆ هەلبژارتنێن جڤاتا پارێزگەها نەینەوا ڕاگەهاند، دێ‌ ل سەر پلانێن ستیراتیژی و گرنگ بۆ خزمەتكرنا هەموو دەڤەرێن سەر ب پارێزگەها نەینەوا ڤە كار كەین ب تایبەتی ژی دۆسێیا وەبەرئێنانێ‌ وپەروەردێ ساخلەمیێ‌ وباژێرڤانیێ و ڕزگاربوویێن ژ دەستێ داعشێ وقەرەبووكرنا زیاندارێن نەینەوا و پێشڤەبرنا نەینەوا د هەموو بوارەكی دا.
ڕەفعەت سمۆ ، بەربژارێ هەژمار 35 ل سەر لیستا 197 پارتی بۆ هەلبژارتنێن جڤاتا پارێزگەها نەینەوا گوت» دێ‌ ل جڤاتا پارێزگەها نەینەوا ب ڕژدی ل سەر دۆسێیا چاڤدێریا دامودەزگەهێن حوكمەتێ‌ كاركەین بۆ وی چەندێ‌ ب باشترین شێوە بكەڤنە دخزمەتا هەموو خەلكێ‌ نەینەوا دا وبێ‌ جوداهی خزمەتا هەموو دەڤەران بهێتە كرن وبۆ بدەستڤەئینانا مافێن خەلكێ‌ كوردستانێ‌ ل هەموو دەڤەرێن سەر ب نەینەوا ڤە دێ كاركەین كو نەهێلین ستەم ل خەلكێ‌ كوردستانێ‌ بهێتە كرن و ل جڤاتا پارێزگەها نەینەوا دێ‌ بینە بەرگریكارێن ڕاستەقینە ژ مافێن دەنگدەرێن خوە».
ڕەفعەت سمۆی گوت ژی»دێ‌ بۆ بڕێڤەبرنا ئێدارەكا دروست بۆ ئاڤەدانكرنا نەینەوا كاركەین ب تایبەتی ژی د وارێن ساخلەمیێ‌ وپەروەردێ‌ و وەبەرئێنانێ‌ دا و دۆسێیا ئاوارەیان وئاڤەدانكرنا هەموو دەڤەرێن كوردستانی دەست پێ‌ بكەت و دەلیڤەیێن كاركرنێ‌ بۆ گەنجان پەیداببن».
زێدەتر گۆت» هەروەسا دێ كار كەین بۆ نەهێلانا ئاریشەیا ئاكنجیبوونێ‌ ب ڕێكا پڕۆژەیێن وەبەرئێنانێ‌ ودێ‌ كار كەین پڕۆژەیێن ئاكنجیبوونێ‌ بهێنە دروستكرن وخەلكێ‌ مفاداربیت وئاڤەدانێ دەست پێ‌ بكەت وخەلكێ‌ زیاندار بهێنە قەرەبووكرن «.
ئاماژەكر» پارتی دیموكراتی كوردستان هەردەم خزمەتا وەلاتیان دكەت بێی جوداهیێ‌ ل هەموو دەڤەران لەورا ژی خەلكێ‌ نەینەوا دێ‌ دەنگ ب لیستەیا 197 دەن ژ بەر كو لیستەیا پارتی لیستەیا ئاڤەدانی وئاشتیێ‌ و پێكڤەژیانێ‌ یە».
خویاكر» دێ‌ ل جڤاتا پارێزگەها نەینەوا گەلەك گرنگیێ‌ ب ئاڤەدانكرنا شنگالێ و زڤرینا ئاوارەیێن شنگالێ‌ دەین ودێ‌ كار كەین بۆ ئاڤەدانكرنا گوندێن شنگالێ ب تایبەتی ژی ( گوندێ كۆچۆ) ئەوژی گوندەكێ‌ نوو ب ڕەخ گوندێ‌ كۆچۆ بهێتە ئاڤاكرن وهەموو پڕۆژەیێن خزمەتگوزارێ‌ ل دەڤەرا شنگالێ‌ بهێنە بجهئینان ومە پلانەكا مەزن بۆ خزمەتكرنا خەلكێ‌ خوە ل نەینەوا هەیە ودێ‌ كار ل سەر بجهئینانا پلان وبەرنامەیێن پارتا خوە كەین بۆ خزمەتكرنا وەلاتیان».

مەسرۆر بارزانی، سەرۆكێ حوكمەتا هەرێما كوردستانێ د مێهڤانداریەكا تایبەتدا ب هەلكەفتا جەژنێن ژدایكبوونێ و سەرێ سالێ، پێشوازی ل بالیۆز و كۆنسلێن گشتی و هنارتی و دبلۆماتكارێن وەلاتان ل ئیراقێ و هەرێما كوردستانێ كر و تێدا پەیڤەك پێشكێشكر و ئەڤە دەقێ وێ یە:
جهێ خوەشحالیا منە ب خێر هاتنا هەوە هەموویان بكەم بۆ ڤێ ئاهەنگگێرانا پێشوەخت یا كریسمس و دائێخستنا دووماهی پشكا سالا 2023 كو پشتی كێمتر ژ مەهەكێ دێ چینە سالەكا نوو.
ئەڤسالە بۆ گەلەك ژ مە سالەكا گەلەك دژوار بوو. گەلەك ئاستەنگێن ئاسایش و ژینگەهی مە هەبوون. شەڕ و ململانیێن پشتی 7 ئۆكتۆبەرێ وێرانكەر بوون. مە دلتەنگیا خوە دەربریە، سەبارەت ب گیان ژ دەستدانا خەلكێ سڤیل و بێتاوان، هێشتا جهێ دلتەنگیا مەیە دبینین خەلكێ سڤیل هێشتا گیانێ خوە ژدەست ددەن و دلتەنگێن بەرفرەهبوونا ناكۆكیاینە ل دەڤەرێ، هیڤیدارین چارەسەریەكا ئاشتیانە بۆ ڤێ كێشەیێ بهێتە دیتن، وەكو چاوان باوەریا مە ئەوە هیچ دەمەكی شەڕچارەسەریەكا درێژخایەن نینە بۆ هیچ كێشەیەكێ. د هیچ شەڕەكی دا سەركەفتیێ ڕاستەقینە نینە، بەلكو تنێ ئاستێ جوداهیا زیانان د ناڤبەرا ئالیێن ناكۆك دا هەیە.
ب دیتنا من د ڤی شەڕی دا وانەیەك هەیە پێدڤیە ژێ فێربین. ئەوژی ئەوە دشیاندایە ناكۆكی بهێنە چارەسەركرن بەری وێ چەندێ بگەهنە ڕوو ب ڕووبوونا لەشكری. مە هەمان ڕەوش ل ڤێرێ هەیە. هیڤیدارم بشێین چارەسەریەكێ بۆ هەموو كێشەیێن هەلاویستی ببینین، بەری وێ چەندێ بگەهیتە بڕیارێن دژوار كو نەچار بی ئەوان بڕیاران بدەی. دێ هەموو بزاڤێن خوە كەین بۆ وێ چەندێ چارەسەریێن ئاشتیانە و درێژخایەن ببینین.
ئەڤسالە د تیروانینا ژینگەهی دا ژی سالەكا دژوار بوو، ڕوو ب ڕوویێ گوهۆڕینێن سەقای و ئەوان كێشەیان بووینە كو ل جیهانێ دبینین. بەری چەند ڕۆژان ل ئیمارات بووم و من پشكداری د گۆپیتكا 28 یا سەقای دا كر. گەلەك پەیڤ و ئاخڤتنێن جوان هاتنە پێشكێشكرن ل دۆر ئەوێ چەندێ چاوان ئەڤێ كێشەیێ چارەسەربكەین؟ بەری چەند ڕۆژان من ئاخڤتنێن كەسەكی خواندن، دبێژیت» جهێ حێبەتیێ نینە، ترلیۆنان دۆلاران خەرج دكەین و ب دووڤ ژیانێ دا ل دەرڤەی بۆشاییا ئەسمانی و ل هەسارەكێ دی دا دگەریێین، بەلێ ژیانێ ل سەر هەسارێ نوكە ل سەر دژین ژناڤ دبەین؟»دبیت زێدەگاڤی هەبیت د خەرجكرنا وی پارەیێ هاتیە باسكرن، بەلێ گەلەك یا ڕۆهنە كو ب ڕاستی ئەم یێ هەسارا خوە ژناڤ دبەین ! هیڤیدارین بشێین پێكڤە چارەسەریەكا ڕاستەقینە بۆ كێشەیان ببینین. بەردانا غازا دو ئۆكسید كاربۆن بۆ ناڤ هەوای، پیسكرنا ئاخ و ئاڤا مە، پێدڤیە دوماهیێ پێ بینین، ئالیێن دی هەنە و هەر ئێك ژی بەرپرسیارەتیا جودا هەیە. هیڤیدارین وەكو ئالیەك ب كێمی بشێین وێ پشكا هەسارا خوە رزگار بكەین.
ل دۆر ئاسایش و ئاستەنگێن دی ئەوێن ڕوو ب ڕوویێ مە دبن، ب دیتنا من نێگەرانیە دبینم مرۆڤ ئەوی دی بكۆژیت بۆ ئەوێ چەندێ هەست ب سلامەتیێ بكەت. ئەوێن دی برسی دكەن بۆ ئەوێ چەندێ حەزێن خوە تێر بكەن، هیڤیدارین ئەم هەموو پێكڤە بین و ب پێكڤە ژیانێ پیكڤە بژین، مە ل ڤێرێ ل كوردستانێ بزاڤكریە جهێ ژیانێ بۆ هەموو كەسەكی دابین بكەین، خەلكێ ژ باكگراوندێن جودا و نەتەوە و ئایینێن جودا، گەلەك ژی شانازیێ دكەین كوردستانێ بوویە مێرگا سەقامگیریێ و پێكڤەژیانێ.
د بزاڤێ داینە بۆ ئەوێ چەندێ كێشەیێن خوە ل گەل بەغدا چارەسەر بكەین. مە چەندین كۆمبوون هەبوون و من چەندین جاران ل گەل سەرۆك وەزیران ل بەغدا ئاخڤتیە، د بزاڤێ داینە بۆ دیتنا ڕێكەكێ بۆ چارەسەریا هندەك ژ ئەوان كێشەیان، ب تایبەتی بۆ كێشەیا بودجەی، كو چەند مەهەكە ژ ئەگەرێ وێ چەندێ خەلك تووشی كێشەیان بووینە. هیڤیدارم ئەڤ كێشەیە ل سالا داهاتی چارەسەر ببیت. د بزاڤێ داینە بۆ ڕوو ب ڕووبوونا هەموو ئەو كێشەیێن ئەمنی ئەوێن ل دەڤەرێ هەین. سوپاسیا هەوە هەموویان دكەین، كو هاریكار و پشتەڤانێن مە د شەڕێ دژی توندڕەویێ و داعشێ دا. بۆ وێ چەندێ ڕێگریێ ل پەیدابوونا تەندڕەویێ و زڤرینا گرۆپێن وەكو داعشێ بكەین، مە پێدڤی ب پێشئێخستنا دیموكراسێ، دادپەروەریێ و یەكسانیێ یە. ل ڤێرێ داخواز ژ هەوە هەموویان دكەم، هاریكارێن مە بن بۆ وێ چەندێ سالا 2024 کۆ مە سالەكا باشتر هەبیت.

ب، سه‌رجان مەحمود:

پارتا هەدەپێ ل تورکیا خوە بۆ قۆناغەکا نوو بەرهەڤ دکەت و دڤێت خوە ژ چەپێن تورک دوور بکەت و بەرێ خوە بدەتە کوردان، چاڤدێرێن سیاسی ژی وەسا دبینن گوهۆڕینەکا وەسا داخوازیا سەرەکی یا کوردانە، ژ بەر ڤێ یەکێ ژی هەدەپە نها یا بەرهەڤ نینە ژ بۆ هەلبژارتنان ل گەل ئاکپارتیێ و پارتا کۆماری چو هەڤپەیمانیەکێ بکەت و وێ هندەک داخوازیێن جودا هەنە.

پشتی کۆنگرێ پارتا که‌سک و گوهۆ‌ڕینا ناڤێ پارتیێ و ئاڤاکرنا پارتا وه‌کهه‌ڤی و دیموکراتیا گه‌لان (هه‌ده‌پ)، رێڤەبه‌ریا هه‌ده‌پێ وه‌ک کارێ خوه‌ یێ سه‌ره‌کی بدەستڤەئینانا مافێن نه‌ته‌وا کورد و بلندکرنا ناسناما نه‌ته‌وەیی ده‌ستنیشان کر و هێدی هێدی ژ سیاسه‌تا تورکیابوونێ دوور دکه‌ڤیت. به‌ری هه‌ده‌پ، سیاسه‌تا کوردان ل باکورێ کوردستانێ ب سه‌رپه‌ره‌شتیا هەدەپێ سیاسه‌تا تورکیابوونێ بوو، لێ سه‌رکردایه‌تیا هه‌ده‌پێ و ئا‌قلمه‌ندێن وێ یێن سیاسی سیاسه‌تا کوردبوونێ و بلندکرنا ناسناما کوردایه‌تیێ ده‌ردخیته‌ پێش و هەدەپ و هه‌ده‌پە ل ڤێرێ ‌ژ هه‌ڤدو جودا دبن.
د ڤێ مژارێ دا چاڤدێرێن سیاسی یێن تورکیا و هژماره‌ک رۆژنامه‌ڤان وه‌سا دبینن کو هه‌ده‌پ د هه‌لبژارتنێن باژێرڤانیان دا ل گه‌ل پارتێن تورکیا ئانکۆ ئاکپارتیێ و پارتا کۆماری هه‌ڤپه‌یمانیێ دروست ناکه‌ت و ل هه‌مبه‌ر هه‌ر داخوازیه‌کا جەهەپێ، هه‌ده‌پێ داخوازیێن خوه‌ ده‌ردئێخیته‌ پێش و ب هه‌مان ره‌نگی مه‌رجێن وێ یێن دژوار ژی بۆ دروستکرنا هه‌ڤپه‌یمانیه‌کێ ل گه‌ل ئاکپارتیێ هه‌نه‌. داخوازیێن هه‌ده‌پێ ژ ئاکپارتیێ، ئازادکرنا زیندانیێن سیاسی، نەهێلانا سیاسەتا قەیومان، نەهێلانا زۆرداریا ل سەر کوردان و خواندنا ب زمانێ کوردی نە. ئاکپارتی ژی ژ به‌ر هه‌ڤپه‌یمانیا خوه‌ یا ل گەل پارتا بزاڤا نه‌ته‌وه‌په‌رست نه‌شێت به‌رسڤا داخوازیێن هه‌ده‌پێ بده‌ت.
سه‌دات بۆزکورت رۆژنامه‌ڤان و چاڤدێرێ سیاسی، د ته‌له‌فزیۆنه‌کا تورکیا دا راگه‌هاند کو د ناڤبه‌را هەدەپ و هه‌ده‌پێ دا جوداهیه‌کا مه‌زن هه‌یه‌ و هه‌ده‌پ ب ته‌مامی ژ سیاسه‌تا تورکیابوونێ دوور کەفتیە و گۆت: (د به‌رنامێ هه‌ده‌پێ دا، ئازادکرنا زیندانیێن سیاسی، ناسکرنا ناسناما کوردی و خوا‌ندنا ب زمانێ کوردی هه‌یه‌ و هه‌ول دده‌ت ڤان داخوازیێن خوه‌ بده‌ته‌ قه‌بوول کرن.)
فه‌هیم تاشته‌کین ڤەکۆلەرێ ناڤدار یێ تورکیا ژی راگه‌هاند کو هه‌ده‌پێ پشتی کۆمبوونێن ل گەل تەخێن جودا یێن کوردان، به‌رێ سیاسه‌تا خوه‌ دایه‌ سه‌ر پرسا کوردی و ناسناما کوردی، مافێن کوردان، ئازادکرنا گرتیێن سیاسی و نه‌ دووره‌ هه‌ده‌پ سیاسه‌ته‌کا رادیکال بمه‌شینیت. ب گشتی شاره‌زایێن سیاسی پێشبینیا گوهۆ‌ڕینێن رادیکال د سیاسه‌تا هه‌ده‌پێ دا دکه‌ن.
بەری نها ژی هژمارەک ژ چاڤدێرێن سیاسی ل باکورێ کوردستانێ دیار کربوون هەتا هەدەپ خوە ژ چەپێن تورک دوور نەکەت و بەرێ خوە نەدەتە کوردان نەشێت د هەلبژارتنان دا یا سەرکەفتی بیت، چونکی کوردێن باکور قەبوول ناکەن هندەک کەسێن چەپێن تورکیا ب دەنگێن وان بچنە پەرلەمانی یان ژی ببنە ئەندامێن سەرکردایەتیا هەدەپێ.

نوونەرێن حوكمەتا هەرێما كوردستانێ ل لژنەیا مادەیا 140 باس ل گرنگیا هەلبژارتنێن جڤاتێن پارێزگەهێن ئیراقێ دكەت ل سنۆرێ دەڤەرێن كوردستانی یێن دەرڤەی ئیدارەیا هەرێما كوردستانێ و دبێژیت: چاڤەڕێنە پارتی پارتی دەنگ و كورسیێن زۆر بدەستڤەبینیت.
دژوار فایق، نوونەرێ حوكمەتا هەرێما كوردستانێ ل لژنەیا مادەیا 140 گوت» خەلكێ كەركووكێ ل ئێكەمین ڕۆژا هاتنا پارتی پێشوازی ل پارتی كر، ئەو خوەنیشادانا ل ڕەحیماوا هاتیە كرن سەلماند هەر مالەكا كەركووكێ بارەگەهێ پارتی یە و سەرۆكێ بارزانی پەیام هنارتیە و باوەریا خەلكێ كەركووكێ ئەوە پارتی خودانا پرسێ یە و دێ دەنگ ب لیستەیا 197 یا پارتی دەن، پشتڕاست بن ئەڤێجارێ ل كەركووكێ دێ دەنگێن زۆر و كورسیێن باش بدەستڤەئینین».
گوت ژی» پارتی دێ هەڤكێشەیا وان دەڤەران گوهۆڕیت و هەردو پۆستێن پارێزگەرێ كەركووكی و پارێزگەرێ نەینەوا دڤێت ب ڕازیبوونا سەرۆك بارزانی ئێكلا ببن و پارتی دێ ئاخڤتنا خوە هەبیت ل سنوورێ مادەیا 140 و پارتی ڤێجارێ ب هێز زڤریە و چاڤەڕێی دەنگێن زۆر و ئاستەكێ باش دهێتە كرن، دخوازین هەموو خەلك كارتێن خوە یێن دەنگدانێ وەربگرن و دەنگ ب لیستەیا پارتی دیموكراتی كوردستان بدەن».
ئاماژەكر» ل ئەگەرێ هەبوونا زۆرینەیا لیستەیا پارتی ل هەردو جڤاتێن پارێزگەهێن كەركووكێ و نەینەوا دێ دەست ب دانوستاندنان ل گەل لیستەیێن دی كەین بۆ دانانا پارێزگەرێن هەردو پارێزگەهان و نوكە پارتی مژوولی وێ نەخشەڕێكێ یە كو چاوان پشتی هەلبژارتنان ئەوان هەردو پۆستان ئێكلا بكەین و د گەشبینین ب وێ چەندێ پارتی ببیتە هێزا ئێكێ ل سەر ئاستێ هەردو پارێزگەهێن كەركووكێ و نەینەوا».

جێگرێ بەرێ یێ سەرۆكێ جڤاتا نوونەرێن ئیراقێ ڕادگەهینیت، هەموو ئەو ئالیێن د ناڤ هەڤپەیمانیا بڕێڤەبرنا دەولەتێ دا بۆ پێكئینانا حوكمەتا محەمەد شیاع سۆدانی ئیمزاكری، نوكە خوە ژ بەرپرسیارەتیێ ڤەددزن و دڕەڤن، پێدڤیە ئەو ئالی ڕوو ل حوكمەتا ئیراقێ بكەن و بپرسن بۆچی مووچەیێن فەرمانبەرێن هەرێما كوردستانێ ب ڤی شێوەی گیرۆ دبن؟ بۆچی ڕێككەفتن ناهێتە بجهئینان؟ چونكە ئارامگرتنا هەرێما كوردستانێ ژی بەرامبەر ئیراقێ سنۆر هەیە؟
د. بەشیر حەدا، جێگرێ بەرێ یێ سەرۆكێ جڤاتا نوونەرێن ئیراقێ گوت» بابەتێ شایستەیێن دارایی یێن هەرێما كوردستانێ، ژوان ژی شایستەیێن دارایی یێن فەرمانبەر و مامۆستایان، بابەتەكێ هەنوكەیی یە و كابینەیا نوو یا حوكمەتێ گرنگیەكا زێدەتر ب وی بابەتی دایە، دشێم بێژم د دەمێ ئەڤسالەدا زۆرترین شاندێن حوكمەتا هەرێما كوردستانێ، ژ بەر بابەتێ چارەسەركرنا شایستەیێن دارایی یێن هەرێما كوردستانێ، ب تایبەتی پرسا مووچەیێن فەرمانبەرێن هەرێمێ چووینە بەغدا، حوكمەتا هەرێما كوردستانێ دبێژیت كو بەلێ مافێ ئاساییێ فەرمانبەر و مامۆستایانە داخوازا مووچەیێن خوە بكەن، ئەم ژی دبێژین ئەڤە مافێ فەرمانبەرایە، بەلێ وی مافی پێدڤی ب وێ چەندێ هەیە ل جهێ خوە بهێتە داخوازكرن، ل وی جهێ بوویە ئەگەرێ بڕین و گیرۆبوونێ، كو هەموو ل دەف بەغدایە».
د. بەشیری گوت ژی» هەكە پێشتر بەهانەیا بەغدا بەرامبەر هەرێما كوردستانێ پەترۆل ڕادەستكرن، داتا و پێزانین و داهاتێ نە پەترۆلی بیت، پشتی مەها ئادارا ئەڤسالە ئەڤ بابەتە ژی هاتە چارەسەركرن و هەموو تشت هاتە ڕادەستكرن و چوونە بەردەستێ ئەوان، ب گۆڕەی ڕاپۆرتا چاڤدێریا دارایی یا حوكمەتا ئیراقێ، هەموو پێزانین هاتنە ڕادەستكرن بۆ بەغدا و چو بەهانە نەماینە».
ڕۆهنكر ژی» هەموو ئالیێن سیاسی یێن هەڤپەیمانیا بڕێڤەبرنا دەولەتێ پێكئینای كو حوكمەتا محەمەد شیاع سۆدانی ل ئیراقێ ل سەر هاتیە دروستكرن، ب گۆڕەی وێ ڕێككەفتنا ئەنجامدای و ئیمزا ل سەر كری، پێدڤیە ئەو ئالیێن سیاسی مل ب ملێ حوكمەتا هەرێما كوردستانێ، داكۆكیێ ل بجهئینانا وێ ڕێككەفتنێ بكەن هەتا دهێتە بجهئینان، قانوونا بودجەی كو ژ ئالیێ جڤاتا نوونەرێن ئیراقێ ڤە دەرچووی، پێدڤیە بێی گیرۆبوون و وەكو خوە بهێتە بجهئینان».
بەرچاڤكر ژی» بەهانە و ئاخڤتنێن هندەك ئالیێن سیاسی یێن ئیراقی زێدەتر خوە ڤەدزینە ژ بەرپرسیارەتیێ، ئەوا ئەو دكەن زێدەتر هاندانە بۆ بچووكرنا قەوارەیێ هەرێما كوردستانێ و زێدەتر فشارئێخستنە سەر حوكمەتا هەرێما كوردستانێ، بۆ وێ چەندێ بۆ هەموو بڕیاران ڤەگەرنە بەغدا، ئەو دەستهەلاتێن ل دەستووری ب هەرێما كوردستانێ هاتینە دان، ب دیتنا ئەوان پێدڤیە بهێنە زڤراندن بۆ ئیراقێ، ل دەستپێكێ ژی قەناعەت ب فیدرالیێ نەبوو و نینە».
ب دیتنا د. بەشیر حەداد» ئارامگرتنا هەرێما كوردستانێ سنوورێ خوە هەیە و گرفت ب دانوستاندنێ بهێنە چارەسەركرن باشترە ژ ئەوێ چەندێ ناكۆكی و ئالۆزی بكەڤنە دناڤ پەیوەندیان دا».
گوت ژی» هەكە ئەڤێجارێ ئالۆزی د ناڤبەرا هەولێرێ و بەغدا دروست ببیت، بەغدا دێ هێتە تۆمەتباركرن، چونكە پێگیری ڕێككەفتنان نەبوویە، نوكە ژی جڤاكێ نێڤدەولەتی و هەموو دۆستێن هەرێما كوردستانێ و ئیراقێ گازندێ ژ حوكمەتا ناڤەندی دكەن، چونكە هیچ بەهانەیك بەرامبەر هەرێما كوردستانێ نەمایە، كو تشتەك هەبیت و بجه نەئینابیت».

بەربژارا هەژمار 48 ل سەر لیستەیا 197 یا پارتی دیموكراتی كوردستان بۆ هەلبژارتنێن جڤاتا پارێزگەها نەینەوا دیاركر، ئارمانجا مە ئەوە ل جڤاتا پارێزگەها نەینەوا ب باشترین شێوە خزمەتا ئافرەت و جۆتیاران ل هەموو دەڤەرێن سەر ب پارێزگەها نەینەوا ڤە بهێتە كرن و ئەم د وێ‌ باوەریێ دانە خەلكێ‌ نەینەوا ژبۆ ئاڤەدانیێ‌ وئاشتیێ‌ و پێكڤە ژیانێ‌ دێ‌ دەنگ ب لیستەیا 197 یا پارتی دیموكراتی كوردستان دەن.
نەباء عزەدین مەحمەد زنون ، بەربژارا هەژمار 48 ل سەر لیستەیا 197 یا پارتی دیموكراتی كوردستان بۆ هەلبژارتنێن جڤاتا پارێزگەها نەینەوا ڕاگەهاند، پارتی دیموكراتی كوردستان بۆ پارێزگەها نەینەوا بەرنامەیەكێ‌ مەزن دانایە ودێ‌ ب ڕێكا جڤاتا پارێزگەها نەینەوا دەست بجهئینانا بەرنامەیێ‌ پارتی كەین بۆ پتر خزمەتكرنا هەموو خەلكێ‌ نەینەوا بێ‌ جوداهیێ‌ وئەم د وێ‌ باوەریێ دانە خەلكێ‌ دەشتا نەینەوا دێ‌ لیستەیا 197 یا پارتی دیموكراتی كوردستان هەلبژێرن ژبۆ نەهێلانا پڕۆسەیا ب ئەرەبكرنێ و زڤرینا ئاوارەیان و قەرەبووكرنا هەموو خەلكێ‌ زیانڤیكەفتیێن پارێزگەها نەینەوا وئاڤەدانكرنا هەموو دەڤەرێن سەر ب پارێزگەها نەینەوا ڤە و گەهاندنا پڕۆژەیێن خزمەتگوزارێ‌ بۆ هەموو گوند وكومەلگەه و قەزا وناحیێن نەینەوا «.
بەربژارا هەژمار 48 ل سەر لیستەیا 197 یا پارتی بۆ هەلبژارتنێن جڤاتا پارێزگەها نەینەوا، ئاشكەرا كر، د بوارێن ئافرەتان دا مە پلانەكا مەزن دانایە دەمی دچینە جڤاتا پارێزگەها نەینەوا دێ‌ دەست ب خزمەتكرنا ئافرەتان كەین ل نەینەوا ودێ‌ كاركەین ئافرەت نەهێنە بێ‌ بەهركرن ژ پۆستێن ئێداری ل نەینەوا و یەكسانی هەبیت وئافرەت پتر ڕۆلی خوە د هەموو وارەكی دا بگێرن ل پارێزگەها نەینەوا و دێ‌ ب هەموو شیانێن خوە پشتەڤانیا ئافرەتان كەین».
زێدەتر گوت» ژین وژیارا گەلەك ژ خەلكێ‌ نەینەوا ل سەر كارێ‌ چاندنێ‌ یە لەورا دێ‌ ل جڤاتا پارێزگەها نەینەوا كاركەین بۆ پشتەڤانی و هەڤكاریا جۆتیاران وزێدەكرنا بەرهەمێ‌ وان یێ چاندنێ و دابینكرنا بازاری بۆ بەرهەمێن وان و ب ڕێكا پڕۆژەیێن چاندنێ‌ دێ‌ بزاڤان كەین دەلیڤەیێن كاری بۆ گەنجان بهێنە پەیداكرن وكارگەهـ ل نەینەوا بهێنە دروستكرن بۆ وەرگرتنا بەرهەمێ‌ جۆتیاران».
ئەوژی دیاركر» ژبۆ ئاڤەدانیێ‌ وئاشتیێ‌ و پێكڤە ژیانێ‌ دێ‌ خەلكێ‌ نەینەوا دەنگ ب لیستەیا 197 یا پارتی دەن وئەم دێ‌ كاركەین ئاڤەدانی ل هەموو دەڤەرێن سەر نەینەوا ڤە بهێتە كرن و ئاشتی وپێكڤە ژیان هەبیت وهەموو خەلكێ‌ نەینەوا هەست ب تەناهیێ‌ بكەن وبشێن ڤەگەرنە سەر مالێن خوە ب تایبەتی ژی خەلكێ‌ شنگالێ ودێ‌ هەموو بزاڤان كەین هەموو خەلكێ‌ زیانڤێكەفتی بهێنە قەرەبووكرن».

هەوا هەلبژارتنان ل كەركووكێ یا بەردەوامە، بەرپرسەكێ پارتی ژی ل كەركووكێ دبێژیت كادر و بەرپرسێن ئێكەتیێ بەردەوام دهێنە د ناڤ ڕێزێن پارتی دا، هەروەسا دیاركر ژی كو پشتی ئەنجامدانا هەلبژارتنێن جڤاتێ پارێزگەهان دێ پارێزگەرەكێ كورد ل پۆستێ پارێزگەرێ كەركووكێ بیت، خەلكێ كورد ژی ب ئومێد ڤە دنێرنە پارتی و زڤرینا وێ بۆ کەرکووکێ.
لوقمان كاكەیی، كارگێرێ لقێ سێ یێ پارتی دیموكراتی كوردستان بۆ ڕۆژنامەیا (ئەڤرۆ) گوت» پارتی پشتی ڕوودانێن 16 ئۆكتۆبەرێ كارێ خوە یێ حزبی ل كەركووكێ هەلاویست و دانپێدان ب حوكمڕانیا سەپاندی و داگیركاریا باژێری نەدكر، پشتی ڕێككەفتنێ ل گەل هەڤپەیمانیا بڕێڤەبرنا دەولەتێ بۆ پێكئینانا حوكمەتا ئیراقی وی دەمی بڕیار هاتە دان پارتی ل كەركووكێ دەست ب كارێ خوە یێ سیاسی بكەت و بارەگەهێن خوە یێن داگیركری وەرگرتن، كار ژی دكەت بۆ ب دوماهی ئینان ب وێ حوكمڕانیا ل وی باژێرێ هەی».
كاكەیی دیاركر» مە وەكو پارتی دیموكراتی كوردستان بەری دەمەكێ كێم بارەگەهێن خوە وەرگرتینە و هەوا هەلبژارتنان بۆ هەلبژارتنێن جڤاتا پارێزگەها كەركووكێ دەستپێكریە، ل ئەوان هەردو كۆمبوونێن بەرفرەهێن جەماوەری یێن مە ئەنجامداین تێدا مە بەربژارێن پارتی دانە نیاسین، خەلكەكێ مەزن پشكداری د كۆمبوونا جەماوەری دا كر و دلێ خەلكی ژی یێ خوەشە ب زڤرینا پارتی بۆ كەركووكێ».
هەوەرسا گوت» مە تیم یێن پێكئیناین كو سەرەدانا وەلاتیان ل مالان و ل بازاران دكەن و بانگەشێ بۆ لیستەیا 197 و بەربژارێن پارتی دكەن و وەلاتی گەلەك ب باشی پێشوازیێ لێ دكەن، خەلكێ كەركووكێ ب كۆم ژی ڕوو ل بارەگەهێن پارتی دكەن، وەلاتیێن كەركووكێ باش دزانن ئەو مافێ ئەوان ل باژێری هەی و ژێ هاتیە وەرگرتن ژ زەڤیێن ئەردی و ئیدارەیێ و پشتگوه هاڤێتنا كوردان، خەلكێ بیانی ئینایە پێش پشتی 16 ئۆكتۆبەرا 2017، دێ دووماهی پێ هێت». وی كارگێرێ لقێ سێ یێ پارتی ل كەركووكێ خویاكر ژی» هەموو بزاڤێن مە ئەون كوردستانی ل ڕۆژا 18 ڤێ مەهێ بچنە سەر سندۆقێن دەنگدانێ و دەنگێن كوردان زێدە ببن و پۆستێ پارێزگەرێ كەركووكێ وەربگرین و كوردەكێ كوردپەروەر د وی پۆستی دا بهێتە دانان، ئەوژی ئومێدەكە ل دەف وەلاتیێن كەركووكێ ب گشتی».
پتر گوت» ب دیتنا مە نابیت د هەوا هەلبژارتنان دا دەمێ كادرەكێ حزبی سەنگەری بۆ ناڤ حزبەكا دی ڤەدگوهێزیت، د ڕاگەهاندنێ دا بهێتە مەزنكرن، بەلێ ئێكەتی دەستپێشخەر بوو لەوما مە ژی دەستپێكر و ڕۆژانە خەلكێ بەرپرس و كادر و ئەندامێن ئێكەتیێ پەیوەندی ب پارتی دكر و مە ل ڕاگەهاندنێ باس نەدكر، ل ڕۆژێن بهێن ژی دا خەلكێ ئێكەتی سەنگەرێ خەباتا خوە دێ بۆ ناڤ پارتی ڤەگوهێزن».
ل دوماهیێ گوت» پشتی 16 ئۆكتۆبەرێ پارێزگەرێ سەپاندی ل سەر كەركووكێ ب پشتەڤانیا بەغدا، تنێ بۆ ئەرەبا كار دكەت و دناڤ ئەرەبا ژی دا بۆ عەشیرەتا خوە كاردكر، وەكو پارێزگەرێ كەركووكێ ڕەفتار نەكریە، كەركووكێ ئیراقەكا بچووكریە هەر كەسێ ل سەر كورسیێ پارێزگەری بیت، پێدڤیە ب دادپەروەرانە ڕەفتارێ ل گەل كورد و ئەرەب و توركمانان بكەت، دخوازین دڤان هەلبژارتنان دا كورسیێن پێدڤی بدەستڤەبینین و ل گەل ئالیێن دی یێن كوردستانی، كوردەكێ باش ل سەر كورسیا پارێزگەری دابنین».

نێچیرڤان بارزانی، سەرۆكێ هەرێما كوردستانێ ل دوبەی، پشكداری د ڕێوڕەسمێ هەلكەفتا ڕۆژا نیشتمانی یا ئیماراتێ دا كر.
ڕێوڕەسم یێ هەڤدەم بوو ل گەل بەردەوامیا كار و چالاكیێن گۆپیتكا نەتەوەیێن ئێكگرتی بۆ گوهۆڕینا سەقای ب پشكداریا مێهڤان و بەرهەڤبوویێن گۆپیتكێ، بڕێڤەچوو.
د وی ڕێوڕەسمی دا سەرۆكێ هەرێما كوردستانێ ب ناڤێ هەرێما كوردستانێ پیرۆزباهی ل شێخ محەمەد بن زاید ئال نەهیان، سەرۆكێ ئیمارات و گەلێ ئیماراتێ كر و هیڤیا سەركەفتن و پێشكەفتنا بەردەوام بۆ خواستن.