ئه‌ڤرۆنيوز:
وه‌زاره‌تا ئه‌وقافێ وكاروبارێن ئايينى ل هه‌رێما كوردستانێ راگه‌هاند، عومره‌كاره‌كێ كورد ل مه‌كه گيانێ خوه ژ ده‌ست دا وهه‌ر ل وێرێ هاته ڤه‌شارتن.
وه‌زاره‌تا ناڤبرى د رۆهنكرنه‌كێ دا به‌لاڤكر” وه‌لاتێ خالد ئه‌كره‌م ئه‌حمه‌د ژ دايكبوويێ 1973 كو خه‌لكێ خانه‌قينێ يه وبابێ دو زارۆيانه، ژ ئه‌گه‌رێ نه‌خوه‌شيه‌كێ ل باژێرێ مه‌كه گيانێ خوه ژ ده‌ست دا وهه‌ر ل وێرێ ژى ژلايێ كه‌سوكارێن وى ڤه كو دگه‌لدا بوون ل گورستانا (شه‌رائيع) هاته ڤه‌شارتن”.
ئه‌ڤرۆنيوز:
وه‌زيرێ به‌رێ يێ ناڤخوه ل عيراقێ وسه‌ركردێ جڤاتا ئيسلامى يا بلند ل عيراقێ باقر جه‌بر هوشدارى دا ژ زڤرينا رێكخراوا تيرۆرستى يا داعشێ بۆ عيراقێ وداخوازا دوباره رێكخستنا په‌يكه‌رێ ده‌ستهه‌لاتا له‌شكرى ل عيراقێ كر.
باقر جه‌بر دبه‌ياننامه‌كێ دا گۆت” پێدڤيه ب له‌ز گوهۆرێن دپه‌يكه‌ري ده‌ستهه‌لاتا له‌شكرى ل عيراقێ بهێته كرن وئاماژه ب وێ چه‌ندێ ژى دا كو پتريا به‌رپرسێن له‌شكرى ئه‌وێن پاريزگه‌ها نه‌ينه‌وا وچه‌ند ده‌ڤه‌رێن دى يێن عيراقێ بۆ داعشێ بجه هێلاى، ئه‌وبوون كو مژوولى گه‌نده‌ليێ وكۆمكرنا سامانى وكارێن لابه‌لا”.
گۆت ژى” ب گۆره‌ى چاڤدێريا مه بۆ پێشيلكاريێن ئه‌منى يێن ڤێ دووماهيێ يێن داعشێ ل باشوورێ مووسلێ وهه‌موو ده‌ڤه‌رێن پارێزگه‌هێن ئه‌نبار وسه‌لاحه‌دين، دووپات دكه‌ين كو داعشێ بنكێ نوو يێ دامه‌زراندى، ب تايبه‌ت ل ناڤ لايێ راستێ يێ مووسل به‌ر ب ده‌ڤه‌را شرگات وحه‌زه‌ر تاكو ناڤه‌راستا رووبارێ ديجله ل باشوورێ مووسل”.
دياركر ژى” داعشێ يا ژ سنوورێ سووريێ به‌ر ب عيراقێ ڤه‌دگه‌ريت وهه‌تا نوكه ئه‌و سنور ژداعشێ نه‌هاتيه پاقژكرن، هه‌روه‌سا ده‌ڤه‌رێن چيايێ مه‌كحول وحه‌مرين وداعش تێدا يا جێگيره”.
ناڤبرى ئاشكراكر ژى كو كێشێن مه‌زن يێن دناڤبه‌را فه‌رماندێن له‌شكرى وئه‌منى يێن عيراقێ هه‌ين وگۆت” چه‌ندين ساله ئه‌و يێن ب كارێ بازرگانيكرنا جگاران و ئاژه‌لى وپه‌ترۆلێ وفرۆتنا پۆستان وده‌ست درێژيێ ل سه‌ر وه‌به‌رئێنه‌ران ووه‌لاتيان وئاگه‌ه ژ پۆستێن خوه نه‌مايه وئه‌ركێن خوه بجهنائينن، له‌وما پێدڤيه دووباره په‌يكه‌ري ده‌ستهه‌لاتا له‌شكرى وئه‌منى ل عيراقێ بهێته دروستكرن”.
ئه‌ڤرۆنيوز:
شاره‌زايه‌كێ دبوارێ زانستێ بايولۆجيا ماسيان دا بۆ ئه‌ڤرۆنيوز دياركر كو ژه‌هراويبوونا ماسيان ل باشوورێ عيراقێ ومرنا ب مليۆنان ماسيان ژ ئه‌گه‌رێ وێ چه‌ندێ چو كارتێكرنێ ل ماسيێن هه‌رێما كوردستانێ ودهۆكێ ناكه‌ت.
فيراس عه‌بدولمالك، ماسته‌ر ب زانستێ بايولۆجيا ماسيان ومامۆستا ل زانكۆيا دهۆكێ بۆ ئه‌ڤرۆنيوز گۆت” ژه‌هراوى بوونا ماسيان ل ده‌ستپێكێ ل پاريزگه‌ها بابل وپاشى چه‌ندين پارێزگه‌هێن باشوورێ عيراقێ ژ ئه‌گه‌رێ ب كارئينانا مادێن كيمياوى بوو دپاقژكرنا ويستگه‌ها كاره‌بێ ل باژێرێ حله سه‌نته‌رێ پارێزگه‌ها بابل كو ئه‌و پاشمايێن پاقژكرنا ويستگه‌ها كاره‌بێ بێ كو بهێنه دوباره چاره‌سه‌ركرن هاڤێتينه د رووبارى دا، كو ئه‌و چه‌نده بوويه ئه‌گه‌ر بۆ مرنا ماسيان ل بابل وپاشى ل باشوورێ عيراقێ”.
دياركر ژى” پرۆژێن ماسيان ل بابل وپتريا پارێزگه‌هێن عيراقێ ب متران ژ هه‌ڤدو ددورن وپێدڤيه ب كێمى 500 متران ژ هه‌ڤدو ددوور بن، له‌وما ژه‌هراوى بوون وه‌سا زوو به‌لاڤبوو وڤه‌گرت”.
خوياكر ژى”چو ماسيێن ساخ نه‌مان دا ل تاقيگه‌هان ڤه‌كۆلين ل سه‌ر بهێنه كرن، هه‌كه راست بيت وه‌كو دهاته گۆتن ئه‌و مرنا ماسيان ژ ئه‌گه‌رێ به‌كتريايه، به‌لێ ب راستى ب ده‌هان جۆرێن به‌كتريا وڤايرۆسان يێن هه‌ين ووه‌كو ئێكن، به‌لێ هه‌ر ئيك ژوان كاره‌كى دكه‌ت ودياركرنا ئه‌گه‌رێ ئه‌و دبێژن بێ هه‌بوونا ماسيێن ساخ گه‌له‌ك يا ب زه‌حمه‌ته”.
فيراس دياركر ژى” هه‌موو ماسيێن ژ جۆرێ كارب يێن ل باشوورێ عيراقێ مرين ژبه‌ر وێ ژه‌هراوى بوونێ ژبه‌ر ئه‌و جۆرێ ماسيان ژ هه‌موو جۆرێن دى يێ هه‌ستيار تره وئه‌و ماسيێن دهێنه ب خوه‌دانكرنێ ژى هه‌موو ژجۆرێ كاربه”.
ناڤبرى ئاماژه كر كو ژه‌هراوى بوون ومرنا ماسيان ل باشوورێ عيراقێ چو كارتێكرنێ ل ماسيێن هه‌رێما كوردستانێ ودهۆكێ ناكه‌ت، به‌لكو هه‌تا كارتێكرن ل ماسيان ل به‌غدا ب خوه‌ژى نه‌كريه، ژبه‌ركو ئاڤ ژ هه‌رێما كوردستانێ وپاشى به‌غدا بۆ باشوورى دچيت.
ژلايێ خوه‌ڤه د. باسن خه‌فاجى سه‌رۆكێ لژنا شاره‌زايێن ژينگه‌هێ بۆ دووڤچوونێ ل سه‌ر مريا ماسيان ل باژێرێ ناسريه ل باشوورێ عيراقێ دياركر” مليۆنان ماسى ل باشوورێ عيراقێ مرن وچه‌ندين ئه‌گه‌ر بۆ وێ چه‌ندێ هه‌بوون ژوان نه‌بوونا ره‌وشه‌نبيريا ساخله‌ميێ يا تايبه‌ت ب خوه‌دانكرنا ماسيان هه‌روه‌سا پتريا پرۆژێن ب خوه‌دانكرنا ماسيان ل پارێزگه‌هێن باشوورێ عيراقێ ئێك ب ئێكێ ڤه بوو وپێدڤيه كيلۆمه‌تره‌ك دناڤبه‌را پرۆژه‌كێ ب خودانكرنا ماسيان وئێكێ دى هه‌بيت بۆ دانا ده‌ليڤێ بۆ گوهۆرينا ئاڤێ وپه‌يداكرنا هه‌وايه‌كا باش وگونجاى ژبه‌ركو ئوكسجين ژى يا كێمبوو دناڤ وان پرۆژان دا ب تايبه‌ت ژى كو پێدڤيه دهه‌ر متره‌كا سێ جاركى د پرۆژه‌كێ ب خوه‌دانكرنا ماسيان دا تنێ 20 مااسى تێدا بن، به‌لێ ل پتريا پرۆژان هه‌تا 100 ماسيان ژى يێن دئێك مترا سێ جاركى دا هه‌ين”.
ژلايه‌كێ دى ڤه رێكخراوا ساخله‌ميا جيهانى پشتى ئه‌نجامدانا ڤه‌كۆلينان ل سه‌ر پرسا ژه‌هراويبوونا ماسيێن باشوورێ عيراقێ ب ريێا ئه‌نجامدانا پشكنينان ل سه‌ر ئاڤا وێ ده‌ڤه‌رێ ل تاقيگه‌هێن تايبه‌ت يێن خوه، ئه‌نجامێن ڤه‌كۆلينێن خوه راگه‌هاندن ودياركر كو پشتى پشكنينێ دياربوويه كو سێ مادێن پيس يێن دناڤ وێ ئاڤێ دا هه‌ين ورێژا وان مادان ژى گه‌له‌ك يا بلنده ئه‌وژى هه‌ر ئيك ژ كولۆنيات، ئه‌مۆنيا وكانزايێن گران وه‌كو ( زه‌رنيخ، كرۆم، رساس) وچه‌ندين مادێن دى.
بسپۆرێن رێكخراوا ساخله‌ميا جيهانى ووه‌زاره‌تا ساخله‌ميێ وژينگه‌هێ ل عيراقێ راگه‌هاند، هه‌بوونا وان ماده‌يان دناڤ ئاڤا رووبارێن باشوورێ عيراقێ دا، مه‌ترسيێ ل سه‌ر ماسيان دروست دكه‌ن، به‌لێ چو كاريگه‌رى ل سه‌ر ژيانا مرۆڤێ نابيت”.
بسپۆرێن وێ رێكخراوا جيهانى ترسا وێ چه‌ندێ هه‌يه كو ئه‌و ماسى هه‌لگرێن ڤايرۆسه‌كێ مه‌ترسيدار بن وڤه‌كۆلينێن وان دێ دبه‌رده‌وام بن.
ئه‌ڤرۆنيوز:
ل دووڤ نڤيساره‌كێ ب فه‌رمانا نێچيرڤان بارزانى سه‌رۆك وه‌زيرێن هه‌رێما كوردستانێ، ل دۆر پانزينخانان وڤه‌كرن ومۆله‌ت دانا وان، چه‌ند برياره‌ك هاتنه ده‌ركرن.
ل دووڤ وى نڤيسارێ، ژ نوكه وپێڤه بريارا ڤه‌كرنا پانزينخانان دێ بيته ده‌ستهه‌لاتا جڤاتا وه‌زيران، بريارا دووماهيێ ژى ل دۆر پێدانا مۆله‌تا پانزينخانان ل سه‌رانسه‌رى هه‌رێما كوردستانێ ب هه‌ر جۆر وقه‌باره‌كى بيت، دێ ده‌ستهه‌لاتا سه‌رۆكاتيا جڤاتا وه‌زيران بيت.
هه‌روه‌سا ل دووڤ وێ نڤيسارێ، لژنه‌ك ب سه‌رۆكاتيا نوونه‌رێ سه‌رۆكاتيا جڤاتا وه‌زيران وئه‌ندامه‌تيا هه‌ر ئێك ژ (وه‌زاره‌تا سامانێن سروشتى، ناڤخوه، باژێرڤانيان، ده‌سته‌يا ژينگه‌هێ) دێ مه‌رج وميكانيزمه‌كا ئێكگرتوو وتايبه‌ت ب ڤى بابه‌تى بۆ مفا وبه‌رژه‌وه‌نديا گشتى به‌رهه‌ڤ كه‌ن ودێ ئه‌و لژنه پێشنياز وراسپاردان بۆ هه‌موو وان سه‌رپێچيێن هاتينه كرن ئێخيته به‌رده‌م جڤاتا وه‌زيران وجڤات ژى دێ بريارێن گونجاى بۆ ده‌ركه‌ت.
دياركريه ژى، بۆ رێگرتنێ ل سه‌رپێچيێن تايبه‌ت ب مۆله‌تدانێ وڤه‌كرنا پانزينخانان ل باژێر وباژێركان وكونترۆلكرنا بازارێ ڤى كه‌رتى وبۆ ده‌ليڤه‌دانا يه‌كسان ب وان بازرگانێن دڤى بوارى دا كاردكه‌ن وب دووماهى ئينانا پاوانكرنێ، ئه‌و برياره هاتينه ده‌ركرن.
ئه‌ڤرۆنيوز:
مالپه‌ره‌كێ عيراقى به‌لاڤكر سوباهى چارشه‌مبى 21/11/2018 سه‌رۆك بارزانى دێ سه‌ره‌دانا به‌غدا كه‌ت.
مالپه‌رێ (بغداد اليوم) ژزارده‌ڤێ سه‌ركرده‌كێ پارتى ديموكراتى كوردستان به‌لاڤكر” سه‌رۆك بارزانى سوباهى چارشه‌مبى دێ سه‌ره‌دانا به‌غدا كه‌ت ودێ نامه‌كا پشته‌ڤانيێ گه‌هينيته حوكمه‌تا عيراقى يا نوو ب سه‌رۆكاتيا عادل عه‌بدولمه‌هدى، هه‌روه‌سا دێ دووپاتيێ ل سه‌ر پێدڤيا ب دووماهى ئينانا هه‌موو كێشێن هه‌لاويستى دناڤبه‌را به‌غدا وهه‌ولێرێ دا كه‌ت”.
ئەڤرۆ نیوز:
سەروک وەزیرێن عیراقێ ئەڤرۆ داخوازنامەکا فەرمی پێشکێشی سەروکێ روسیا فلادیمێر پوتین کر سەرەدانا عیراقێ بکەت.
د سەرەدانەکێ دا ھنارتیێ سەروکێ روسیا یێ تایبەت ل رۆژھەلاتا ناڤین میکائیل بوگانوڤ بۆ بەغدا ئەڤرۆکە رۆژا سێشەمبی دا و پشتی کومبونەکا تایبەت دگەل سەروک وەزیرێن عیراقێ عادل عەبدولمەھدی ب ھەلکەفتا ھەلبژارتنا وی وەک سەروکێ نوو یێ حکومەتا عیراقێ و پشتەڤانیا وەلاتێ خوە بۆ حکومەتا روسیا بۆ عیراقێ دیارکر د ھەمی بواران دا.
ژلایێ خوە ڤە نڤیسینگەھا سەروک وەزیرێن عیراقێ د بەیاننامەکێ دا ئاشکرا کر کو سەروک وەزیرێن عیراقێ ب فەرمی داخواز ژ ھنارتیێ سەروکێ روسیا کر فلادیمێر پوتین سەرەدانا عیراقێ بکەت ل دەمەکێ نزیک
ئەڤرۆ نيۆز، سالار دۆسكى:
ئەندامەكێ لیژنا دارايى و ئابوورى ل پەرلەمانێ عيراقێ ئاشكرا كر كو ل بۆدجا 2019 يا عيراقێ دا بۆدجەیەك بۆ مادێ 140 یێ دستوورى هاتيە تەرخانكرن.
د. ئەحمەد سەفار ئەندامێ لیژنا دارايى و ئابوورى ژ فراكسيۆنا پارتی ل پەرلەمانێ عيراقێ بۆ ئەڤرۆ نيۆز ئاشكرا كر كو ئەڤرۆ 20/11 ئەندامێن كوردێن لیژنا دارايى و ئابوورى ل گەل وەزيرێ دارايى یێ عيراقێ كو كوردە كۆمبوون و گەنگەشە هاتنەكرن كا دێ چاوا شێین هەڤكارێن ئێك بین و گۆت: (د كۆمبوونێن بۆرى دا ئەو پێشنياز و خالێن كوردان تێبينى ل سەر هەی د بۆدجێ دا بۆ ئاليێ حوكمەتا بەغدا هاتيە بلندكرن و چاڤەرێى بەرسڤێ نە).
سەفارى ئەو یەک ژى ئاشكرا كر كو هەتا نوكە دو شاندێن هەرێما كوردستانێ سەرەدانا بەغدا كرينە.
شێخان، بارزان مزووری:
عەبدال خەلیل سەروکێ لژنا چاڤدێری و گەشەپێدانا جڤاکی شێخان یا سەر ب مووسل ڤە بۆ ئەڤرۆ نیوز دیارکر کو ناڤێن ٣ ھزارو ١٠ کەسانێن بێکار ھاتیە بۆ وەرگرتنا مووچەکێ ھەیڤانە سەر ب حکومەتا فیدرال ڤە ھاتە مەزاختن.
ناڤھاتی زێدەتر گۆت: ئەڤ مووچەیە ٣٠٠ ھزار دینارن بۆ کەسێن بێ کار ھاتیە تەرخان کرن، و ئەو کەسێن ناڤێن خوە تەمارکربیت ل شێخان دیسان مالا خو بو مووسل یان جھەکێ دی ڤەگوھاست بیت دشێت سەرەدانا رێڤەبەریا مە بکەت ل بەرتللە بکەت دێ فورمەک دوبارە بو ھێت پرکرن جھێ ئاکنجی بونێ بو ھێتە دیارکرن دا بشێت بەنکەکا نێزیک وی جھێ لێ ئاکنجی موچێ خوە وەرگریت ، ئەو کەسێن ناڤێن وان نەھاتین قوناغەک دی یا ناڤان مایە ئەگەر حکومەتێ بودجەیەکا مەزاخت دێ ناڤێن وان ژی ھێنە راگەھاندن.
نيشاندان