ئه‌ڤرۆ، قائيد ميرۆ:‏

بەرپرسەکێ پارتی دیموکراتی کوردستان ل پارێزگەھا نەینەوا ئاشکر اکر، ‏نوکە گرۆپا تیرۆرستیا داعش مژوولی خوە رێکخستنێ یە ل سنورێ مووسل و ‏شانەیێن نڤستی کەفتینە کاری، دناڤا دەڤەرێن جودایێن مووسل ھەروەسا ‏دیارکر، ھەکە داعش بەرفەرە بکەتە سەر ھێزێن عیراقی ئەڤە لەشکرێ و ‏حەشدا شەعبی شیانێن بەڕەڤانی کرنێ نینە.‏

عەلی خەلیل، بەرپرسێ لقێ 14 یێ پارتی ل مووسل بۆ رۆژناما ئەڤرۆ گۆت: ‏گرۆپا تیرۆرستیا داعش ل سنورێ پارێزگەھا نەینەوا بەرھەڤیان بۆ بجە ‏ئینانا پیلانەکێ دکەن، بەلێ ئارمانج ژڤێ پیلانێ دیار نینە داعشێ چو ‏نیەتەک ھەیە، بەلێ مە زانیاری ل سەر زێدەبوونا لڤینێن داعشێ ھەنە، ‏بتایبەتی دناڤا سەنتەرێ باژێڕێ مووسل شانەیێن نڤستی یێن داعشێ یێن ‏خوە رێک د ئێخن و بھێزتر بووینە ، ھەتا حەفتیا بۆری تەقینێن گەیارا ‏مەترسیێن زێدەتر یێن داعش زۆر زێدەتربوون ل سەر خەلکی، ھەتا ل ‏دەڤەرێن تەلەعفەر و سەلامیە و بەعاج رەوش زێدەتر بن کۆنتڕۆلا ‏چەکدارێن داعشێ یە نەک حوکمەتا عیراقێ، لەوڕا ژی دەستھەلاتا داعش ل ‏ئەڤان دەڤەران زێدەترە ل ھێزێن عیراقی و ئەو دەڤەر بووینە ھێلینا داعش ‏ددەمێ نوکەدا، چونکە ھەکە بەری نوکە ھژمارەکا کێم چەکدار داعش ھەبن، ‏بەلێ ددەمێ نوکەدا ھژمارا وان زۆر زێدەکریە و قەبارێ گرۆپا تیرۆرستیا ‏داعش یا بەلاڤ دبیت. ‏

عەلی خەلیل گۆتژی” ھەردەمێ داعش بھێزەکا مەزن یان ھێرشێن بەرفرەە ‏بکەتە سەر ھێزێن عیراقی دناڤا خاکا عیراقێ دا، ئەڤە چو گومان تێدا نینە ‏ھێزێن عێراقی ژ حەشد و سوپای شیانێن بەرەڤانی کرنێ نینە، بتایبەتی ‏دەمێ ھێرش ب خوەکوژان بھێتە ئەنجامدان ئەڤە ھێزێن عیراقی دێ مەیدانێ ‏بۆ داعش چۆلکەن مینا سالا 2014ێ دەمێ داعش دەست بسەر ئاخا عیراقێ ‏دا گرتی، تنێ ھێزێن پێشمەرگەی دشێن بەرھنگاری چەکدارێن ئەڤێ گروپێ ‏ببن.‏

ژ لایێ خۆڤە ژی لیوا ھەکار ئامێدی فەرماندێ پێشمەرگەی بۆ رۆژناما ئەڤرۆ ‏دیارکر، راستە لڤینێن چەکدارێن داعش زۆر زێدەکریە، بتایبەتی ل دەڤەرێن ‏سنوری مینا ناحیا رەبیعە و قەزا بەعاج کو ئەو دەڤەر بن دەستھەلاتا ‏لەشکرێ عیراقێ و حەشدا شەعبی دایە، بێگومان زێدەبوونا لڤینێن داعش ‏مەترسیە بۆسەر ئەڤان دەڤەرێن لڤین تێدا پەیدابوی، خویایەژی ھێزێن ‏عیراقێ ئەڤ ھێز نینە بشێن داعشێ بتەمامی ژناف ببەن و بەڕەڤانێ ل خوە ‏بکەن، لەوڕاژی ئەم وەک ھێزێن پێشمەرگەی ل سەنگەرێن پێشیێ ب ھویری ‏چاڤدێریا داعش دکەین و پێشمەرگە یێ بەرھەڤە بۆ بەرسیڤدانا ھەر ھێرش ‏و پیلانەکا تیرۆرستان.‏

ئه‌ڤرۆنيوز:

سه‌رۆك وه‌زيرێن عيراقێ، عادل عه‌بدولمه‌هدى، ئه‌ڤرۆ سێشه‌مبى 6/11/2018 راگه‌هاند، پێدڤيه‌ چاره‌سه‌ريێن گونجاى بۆ مادێ 140 يێ دستووري عيراقێ وبودجا هه‌رێما كوردستانێ بهێنه‌ ديتن.

عه‌بدولمه‌هدى دكۆنگرێ رۆژنامه‌ڤانى يا حه‌فتيانه‌ گۆت” دێ به‌حسێ بابه‌تێ مادێ 140 وبودجا هه‌رێما كوردستانێ كه‌ين، به‌لێ نه‌شێم نوكه‌ برياره‌كا دووماهيێ بده‌م”.

گۆت ژى” جڤاتا نوونه‌ران وجڤاتا وه‌زيران ولايه‌نێن په‌يوه‌نديدار دێ پتر به‌حس ل ڤى بابه‌تى كه‌ن وئه‌و لژنا هاتيه‌ پێكئينان بۆ دانوستاندنێ ل دۆر بودجێ دێ به‌حسێ ڤى بابه‌تى ل گه‌ل جڤاتا نوونه‌ران كه‌ت”.

دياركر ژى” ئه‌ركێ هه‌موويانه‌ بگه‌هنه‌ رێككه‌فتنه‌كێ وپرسێن دارايى وقانوونى ب شێوه‌كێ عاديلانه‌ بهێنه‌ ئێكلاكرن بۆ خزمه‌تنكرنا هه‌موو پارێزگه‌هان وهه‌موو گه‌لێ عيراقێ”.

ئه‌ڤرۆنيوز:

باليۆزخانا ئه‌مريكا ل به‌غدا، هوشداريه‌كا ئه‌منى دده‌ت ل دۆر پێلانه‌كا هژماره‌كا سه‌ركردێن ميليشيان بۆ ره‌ڤاندنا وه‌لاتيێن ئه‌مريكى .

باليۆزخانا ئه‌مريكى ل به‌غدا، ل دووڤ باسنيوز،  درۆهنكرنه‌كێ دا هوشدارى ژ وێ چه‌ندێ دا كو پيلانه‌ك يا هه‌ى بۆ ره‌ڤاندنا وه‌لاتيێن ئه‌مريكى ل ناڤه‌راستا ڤێ هه‌يڤێ.

ئاماژه‌كر كو هژماره‌كا سه‌ركردێن ميليشيان ( بێ كو ناڤێ وان بينيت) به‌حسێ پيلانه‌كێ كريه‌ بۆ ره‌ڤاندنا وان وه‌لاتيێن ئه‌مريكى ئه‌وێن دێ پشكداريێ دپێنجه‌مين پيشانگه‌ها نێڤده‌وله‌تى يا به‌غدا كو برياره‌ ل 10 هه‌تا 19 ڤێ هه‌يڤێ بهێته‌ ڤه‌كرن.

ل دووڤ وێ رۆهنكرنێ، سه‌ركردێن وان ميليشيان به‌حسێ چاوانيا ره‌ڤاندن وڤه‌شارتنا وه‌لاتيێن ئه‌مريكى وخستنا ره‌ڤاندنا وان ل سه‌ر لايه‌نێن سياسى يێن نه‌يارێن وان كريه‌.

ئه‌ڤرۆنيوز:

هنده‌ك ژێده‌رێن عيراقى ئاشكرا دكه‌ن كو حزبوللا يا لوبنانى وئيران وروسيا وسووريا فشارێ ل سه‌ر سه‌رۆك وه‌زيرێن عيراقێ عادل عه‌بدولمه‌هدى دكه‌ن بۆ وێ چه‌ندێ وه‌زاره‌تا ناڤخوه‌ بده‌ته‌ فالح فه‌ياز ئێك ژ سه‌ركردێن حه‌شدا شه‌عبى.

وان ژيده‌رێن سياسى يێن عيراقى، ل دووڤ شه‌فه‌ق نيوز، دياركر كو پێداگريا لايه‌نێن نێزيك ژ حه‌شدا شه‌عبى بۆ به‌ربژاركرنا فالح فه‌ياز بۆ وه‌زاره‌تا ناڤخوه‌ ژبه‌ر وێ چه‌ندێ يه‌ كو چه‌ند وه‌لاتێن ده‌ره‌كى پشته‌ڤانيا فه‌يازى دكه‌ن.

ئاماژه‌ بۆ وێ چه‌ندێ ژى هاته‌ كرن كو محه‌مه‌د كه‌وسه‌رانى به‌رپرسێ دۆسيا عيراقێ ل حزبوللا يا لوبنانى فشار ل سه‌ر لايه‌نين شيعى كريه‌ تاكو فالح فه‌ياز ى بكه‌ن وه‌زيرێ ناڤخوه‌.

وان ژێده‌ران دياركر كو ژبلى حزبولا يا لوبنانى، هه‌ر ئێك ژ روسيا وئيران فشارێ دكه‌ن تاكو وه‌زاره‌تا ناڤخوه‌ ب وى سه‌ركردێ حه‌شدا شه‌عبى بهێته‌ دان، دبه‌رامبه‌ر دا ليستا سائيرون ب سه‌رۆكاتيا موقته‌دا سه‌در فالح فه‌يازى ره‌ت دكه‌ت.